1 Corintios 15:1-58

  • Cristo kawsarichisqa kasqanmanta (1-11)

  • Iñiyniyuqqa manam iskayrayanchu wañuqkuna kawsarimunanmantaqa (12-19)

  • Wañuqkuna kawsarimunanmanta Cristopa kawsarimusqanwan mana iskayrayasqanchikmanta (20-34)

  • Aycha cuerpomanta hinaspa mana rikuna cuerpomanta (35-49)

  • Mana wañuq hinaspa mana tukuq cuerpomanta (50-57)

  • Señorpa ruwayninpi aswan llamkay kasqanmanta (58)

15  Wawqi-panillaykuna, sumaq willakuymanta qamkunaman willasqaytam yuyarichikichik, chaytam chaskirqankichik hinaspam chaypi hinalla iñichkankichik.  Willasqay sumaq willakuypi qamkuna allinta hapipakuspaykichikqa salvasqam kankichik, mana chayqa yanqapaqchiki iñirqankichik.  Qamkunaman punta willasqaykunaqa karqa ñuqapapas chaskisqay willakuymi, chayqa kaymi: Diospa qillqanpa nisqanman hinam huchanchikrayku Cristoqa wañukurqa.  Chaymantam payqa pampasqa karqa, hinaspam kimsa punchawmanta Diospa qillqanpa nisqanman hina kawsarichisqa karqa,  hinaspam Pedroman* rikuriykurqa chaymantañataq chunka iskayniyuq apostolkunaman.  Chaymantam huk kutipi pichqa pachak masnin huñunasqa wawqi-panikunaman rikuriykurqa. Paykunamanta yaqa llapankum ñuqanchikwanraq kachkanku, wakinmi ichaqa wañukunkuña.  Chaymantapas Santiagomanmi rikuriykurqa, chaymantañataq llapallan apostolkunaman.  Llapanmanta qipallatañam ñuqamanpas rikuriykuwarqa, ñuqaqa kani manaraqpas tiemponpi naceq wawa hinam.  Ñuqaqa lliw apostolkunamantapas menosmi kani, chaymantapas ñuqaqa manam “apostol” nispa sutichasqa kanaypaq hinachu kani Diospi iñiqkunata* qatikachasqayrayku. 10  Ichaqa ancha kuyakuyninta Dios qawachiwasqanraykum kay ruwasqaytaqa ruwani, kuyakuynin qawachiwasqanqa manam yanqapaqchu, aswanqa lliw apostolkunamantapas mastam llamkarqani, ichaqa manam kikillaymantachu, aswanqa ancha kuyakuyninta Dios qawachiwaptinmi. 11  Chaynatam ñuqapas utaq wakin apostolkunapas willakuchkaniku chaymi qamkunapas creerqankichik. 12  Sichu wañusqakunapa kasqanmanta Cristo kawsarichisqa kasqanta willakuchkanchik hinaptinqa, ¿imaynamá wakinnikichikqa ninkichik wañuqkuna mana kawsarimunantaqa? 13  Wañusqakuna manapuni kawsarimunan kaptinqa, manachiki Cristopas kawsarimurqachu. 14  Chaynaqa Cristo mana kawsarichisqa kaptinqa willakusqanchikqa yanqachiki, yanqataqchiki qamkunapa iñiynikichikpas. 15  Chaymantapas, wañuqkuna mana kawsarimunanku kaptinqa manachiki Diospas Cristotaqa kawsarichirqachu. Chayna kaptinqa, “Cristotam Dios kawsarirachirqa” nispanchikqa Diosmantachiki llullata willakuchkachwan. 16  Wañusqakuna mana kawsarimunanku kaptinqa, manachiki Cristopas kawsarichisqachu karqa. 17  Chaymantapas Cristo mana kawsarichisqa kaptinqa iñiynikichikqa yanqachiki, chaynaqa hinallaraqchiki huchapi kachkankichik. 18  Chayna kaptinqa Cristopa wañukuq qatiqninkunaqa wiñaypaqchiki chinkarunku. 19  Sichu Cristopi iñisqanchik kay vidallapaq kaptinqa, pimantapas aswan llakipayanam kachkanchik. 20  Cristom ichaqa wañusqakunapa kasqanmanta kawsarichisqa karqa, payqa wañuqkunamanta punta kawsarimuqmi. 21  Imaynam wañuy rikurirurqa huk runallawan, chaynam wañuqkunapas kawsarimunqa huk runallawan. 22  Imaynam Adanrayku lliw runakuna wañuchkanku, chaynallataqmi Cristoraykupas lliw runakuna kawsarimunqaku, 23  ichaqa sapakamam ordenninpi: Cristom puntata kawsarimurqa, chaymantañataqmi Cristopa chayaramuspan kaypi kasqan* tiempopi paypaq kaqkuna kawsarimunqaku. 24  Tukuyninpiñataqmi taytan Diosman munaychakuyninta* quykunqa, quykunqaqa llapallan kamachiqkunata, munayniyuqkunata hinaspa atiyniyuqkunata pasaypaq chinkarachispanñam. 25  Cristoqariki kamachinqa llapallan enemigonkunata Dios saruchinankamam. 26  Hinaspanmi pasaypaqta chinkachinqa qipallaña kaq enemigonchik wañuyta. 27  Diosqa “Cristopa sarupakunanpim llapa imata churarun”. “Sarupakunanpim llapa imata churarun” nispanqa manam nichkanchu Diospas Cristopa makinman churasqa kasqantachu, aswanqa Diosmi tukuy imata churarun Cristopa makinpi. 28  Ichaqa, churinpa makinpi Dios tukuy imata churaruptinmi, churipas tukuy imata makinpi churaq Diosman churakuykunqa, chaynapim Diosña lliwta kamachinqa. 29  Mana chayna kaptinqa, ¿imatataq ruwanqaku wañunankupaq bautizasqa kaqkunaqa? Wañuqkuna manapuni kawsarimunanku kaptinqa, ¿imanasqataq paykunaqa wañunankupaq bautizakunku? 30  Chaynaqa, yanqapaqchiki ñuqanchikpas tukuy tiempo peligropi kachkanchik ¿aw? 31  Wawqi-paniykuna, imaynam señorninchik Cristo Jesuspi qamkunamanta chiqaptapuni kusikuni chaynam sapa punchaw wañuypa patanpi kani. 32  Wañuqkuna mana kawsarimunan kaptinqa, yanqapaqchiki wakin runakuna hina Efeso llaqtapi purun animalkunawan pelearqani, chaynaqa wakin runakuna hinayá nisunchik: “Mikukusun, tomakusun paqarinmi wañukusun”, nispa. 33  Amayá pantaychikchu, mana allin amistadkunaqa allin kawsakuytam chinkachin. 34  Allin kaqta ruwaspayá yuyaynikichikman kutiriychik, amayá huchallikuychikchu, wakinqariki manam Diosmanta yachankuchu. Kaytaqa nichkaykichik pinqakunaykichikpaqmi. 35  Yaqapaschá pipas ninqa: “¿Imaynataq wañuqkunaqa kawsarimunqa? ¿Imayna cuerpoyuqtaq kawsarimunqa?”, nispa. 36  ¡Yaw mana yuyayniyuq runa! Muhu tarpusqaykiqa manam wiñanchu puntata mana chinkaspanqa*. 37  Tarpunkiqa manam wiñasqa plantatachu aswanqa muhullatam, trigo kaptinpas utaq sapaq muhu kaptinpas. 38  Diosmi muhuta munasqanman hina wiñachin hinaptinmi sapa muhu wiñan, ichaqa manam chaynallachu kanku. 39  Manam lliw aychachu huk rikchaqlla, runakunapa aychanqa huk rikchaqmi, huk rikchaqtaqmi uywa animalkunapa aychanpas, alton pawaq animalkunapa aychanpas chaynataq challwakunapa aychanpas. 40  Hanaq pachapi kaqkunapa cuerponqa manam chaynallachu kay pachapi kaqkunapa cuerponwanqa. Chaynallataqmi hanaq pachapi kaqkunapa sumaq kasqanpas mana chaynallachu kay pachapi kaqkunapa sumaq kasqanwanqa. 41  Intipa sumaq kasqanqa huk rikchaqmi, killapa sumaq kasqanpas huk rikchaqtaqmi, huk rikchaqtaqmi lucerokunapa sumaq kasqanpas, arí sapa luceropa sumaq kasqanpas manam chaynallachu. 42  Chaynataqmi wañuqkunapa kawsarimuyninpas. Ismuruqlla cuerpom pampasqa, hatarinñataqmi mana ismuq cuerpoña. 43  Pinqaypaq qawarisqam pampakun hatarinñataqmi kancharichkaqña, mana kallpayuqmi pampakun hatarinñataqmi kallpayuqña. 44  Aycha cuerpom pampasqa, hatarinñataqmi mana rikuna cuerpoña. Aycha cuerpo kaptinqa mana rikuna cuerpopas kanmi. 45  Qillqasqam kachkan: “Punta kaq Adanmi kawsaq runaña* rikurirurqa”, niq. Qipa kaq Adanñataq kawsay qukuq mana rikuna cuerpoña rikurirurqa. 46  Puntataqa kan manam mana rikuna cuerpochu, aswanqa aycha cuerporaqmi chaymantañam mana rikuna cuerpoqa. 47  Punta kaq runaqa kay pachamantam karqa, ñutu allpamanta ruwasqa. Qipa kaq runañataqmi hanaq pachamanta. 48  Ñutu allpamanta ruwasqa chay runa hinam kanku kay pachapi runakunapas, hanaq pachamanta hamuq runa hinataqmi kanku hanaq pachapi kaqkunapas. 49  Imaynam ñutu allpamanta Diospa ruwasqan runaman rikchakunchik, chaynam hanaq pachamanta kaq runamanpas rikchakusun. 50  Wawqi-paniykuna kaytam nikichik: Aychayuq hinaspa yawarniyuqqa manam Diospa munaychakuyninmanqa yaykunqachu, manataqmi tukuruqlla kaqpas chaskinmanchu mana tukuq kaqtaqa. 51  Diospa kaq pakasqa kaqmanta willasqaykichik: Manam lliwchu wañusunchikqa, ichaqa lliwmi hukniraqman cambiasqa kasun 52  huk ratollapi, arí ultimo kaq cornetilla waqaptinmi huk ñawi qimchiyllapi cambiasqa kasunchik. Cornetilla waqaptinmi wañuqkuna kawsarimunqaku mana ismuq cuerpoyuqña, hinaptinmi ñuqanchikqa cambiasqa kasunchik. 53  Kay tukuruqlla cuerpoqa mana tukuq cuerpomanmi cambiasqa kanan, kay wañuruqlla cuerpopas mana wañuq cuerpomanmi cambiasqa kanan. 54  Tukuruqlla kaq mana tukuq kaqman cambiaruptinmi, chaynataq wañuruqlla kaqpas mana wañuqman cambiaruptinmi, kayna qillqasqa kaq cumplikunqa: “Wañuyqa wiñaypaqmi chinkachisqa kanqa”, nisqan. 55  “Yaw wañuy, ¿maytaq atiyniki? ¿Maytaq wañuchinaykipaq tuksinayki*?” 56  Wañuypa tuksinanqa* hucham, Moisespa leyninñataqmi huchaman atiyta qun. 57  Ichaqa, ¡Diosman gracias kachun señorninchik Jesucristowan vencechiwasqanchikmanta! 58  Chaynaqa kuyasqay wawqi-panillaykuna qamkunaqa mana imapa kuyurichinanyá kaychik, hinaspapas allintayá sayaychik, hinaspayá señorninchikpa ruwayninpi tukuy tiempo aswan llamkaychik, yachasqaykichikman hinaqa señorpaq llamkasqaykichikqa manam yanqapaqchu.

Willakuykuna

Kaypiqa nichkan: “Cefas”, nispam. Chaynam Pedropa huknin sutin. Qawaytaq Juan 1:42.
Utaq: “Diospa congregacionninta”. Qawaytaq: Palabrakuna entiendenapaq listata.
Griego rimaypiqa: “Parousia”, ninmi. Chay ninanqa: “Ladonpi tarikuy”, ninanmi. Qawaytaq: Palabrakuna entiendenapaq listata.
Utaq: “Gobiernonta”. Qawaytaq: Palabrakuna entiendenapaq listata.
Kaypiqa nichkan: “Mana wañuspanqa”, nispam.
Utaq: “Alma”. Qawaytaq: Palabrakuna entiendenapaq listata.
Utaq: “Puyayki”.
Utaq: “Puyanqa”.