Yachachikuypa kasqanman rinapaq

Yachachikuyman rinapaq

Jehova Diospa testigonkuna

Rimaynikita akllay Quechua (Ayacucho)

1 Corintios 10:1-33

  • Israel runakunapa ruwasqanta mana qatipakunamanta (1-13)

  • Taytacha-mamacha mana yupaychanamanta (14-22)

    • Jehova Diospa mesanmanta hinaspa demoniokunapa mesanmanta (21)

  • Ima ruwanapaq libre kaspapas hukkunapa allinninta maskanamanta (23-33)

    • Dios hatunchasqa kananpaq tukuy ima ruwanamanta (31)

10  Ñuqaqa wawqi-panillaykuna kayta yachanaykichiktam munani: Ñawpa abuelonchikkunaqa llapallankum puyupa tapaykusqan karqaku, llapallankutaqmi lamar quchatapas chimparqaku.  Llapallankum Moisesta qatichkaspanku puyuwan hinaspa lamar quchawan bautizasqa karqaku.  Chaynataq Diospa qusqan mikuytapas llapallanku mikurqaku,  llapallankutaqmi Diospa qusqan yakutapas tomarqaku. Paykunaqa tomarqaku Diospa qusqan hatun rumimantam, chay hatun rumiqa qipankutam rirqa hinaspapas chay hatun rumiqa Cristom karqa.  Ichaqa yaqa llapallankutam Diosqa mana chaskirqachu, paykunaqariki chunniqpim wañurqaku.  Tukuy kaykunaqa yachananchikpaqmi karqa, chaynapi paykuna hina mana allin kaqkunata mana munapayananchikpaq.  Amayá wakinkuna hinaqa taytacha-mamacha yupaychaqqa kasunchu, qillqasqam kachkan: “Runakunam mikurqaku hinaspa tomarqaku chaymantañataqmi aychankuta kusichirqaku”, nispa.  Amataqyá wakinkunapa huchapakusqankuman* hinaqa huchapakusunchu, huchapakusqankuraykum paykunamanta huk punchawlla wañururqaku iskay chunka kimsayuq waranqa runakuna.  Amataqyá wakinnin hinaqa Jehova* Diostapas pruebaman churasunchu, chaymi culebrapa kachusqan wañurqaku. 10  Amataqyá wakinkuna hinaqa hukkunamanta rimapakuqchu kasunchik, wakinkunam chayna karqaku chayraykum paykunataqa angel wañurachirqa. 11  Tukuy kaykunam paykunata pasarqa yachachiwananchikpaq, hinaspam qillqasqa karqa kay tiempopa* tukupayninpi kawsaqkuna willasqa kananchikpaq. 12  Chaynaqa, pipas allin sayasqanta piensaqqa cuidakuchunyá wichiykunanmanta. 13  Tentacionpi tarikusqaykichikqa manam wakin runakunapa tarikusqan tentacionmanta hukchu. Diosqa cumpliqpunim, payqa manam saqisunkichikchu mana aguantay atinaykichikkama tentasqa kanaykichiktaqa, aswanmi tentacionkuna kaptinqa yanapakuyta qusunkichik aguantanaykichikpaq. 14  Chayrayku kuyasqallaykuna, karunchakuychikyá taytacha-mamacha yupaychaymantaqa. 15  Entiendeq runakunata hinam rimapayachkaykichik, kikikichikyá musyakuychik rimasqay chiqap utaq mana chiqap kasqanmanta. 16  Vinoyuq vasopaq Diosta mañakusqanchikqa, ¿manachu Cristopa yawarninwan tupan? Partisqanchik tantapas, ¿manachu Cristopa cuerponwan tupan? 17  Tantaqa chullallam, ñuqanchikqa achkallaña kaspapas huk cuerpollam kanchik, chaynaqa kanchik huk tantallamanta llapallanchik mikusqanchikraykum. 18  Yuyariychik Israel runakunata: Altarpi qusqa ofrendata mikuqkunaqa, ¿manachu yaqa Dioswanpas mikuchkanmanku hina karqaku? 19  Hinaptinqa, ¿ima nichkanitaq? ¿Taytacha-mamachapas hinaspa chaykunaman qusqa kaqkunapas valorniyuq kasqantachu nichkani? 20  Manam chaytachu nichkaniqa, aswanqa kaytam: Huk law nacionniyuqkuna animalkunata wañuchispa ofrendata quspankuqa demoniokunamanmi quchkanku, manam Diosmanchu. Ñuqaqa manam munanichu demoniokunawan hukllawakunaykichiktaqa. 21  Qamkunaqa manam Jehova Diospa vasonmanta tomachkaspaqa demoniokunapa vasonmantaqa tomawaqchikchu, nitaqmi “Jehova Diospa mesanmanta” mikuchkaspapas demoniokunapa mesanmantaqa mikuwaqchikchu. 22  Icha, ¿“Jehova Diostachu piñachiyta munachkanchik”? Ñuqanchikqa manam Diosmanta aswan kallpayuqchu kanchik, ¿aw? 23  Tukuy imatam ruwachwan, ichaqa manam tukuy imachu yanapawanchik. Tukuy imatam ruwachwan, ichaqa manam tukuy imachu kallpanchawanchik. 24  Sapakamayá maskachun wakinkunapa allinninta, amayá kikillankupa allinnintachu. 25  Mercadopi ima aycha rantikusqankutapas* mikuychik concienciaykichikrayku ama imatapas tapukuspa, 26  “Jehova Diospamiki kay pachapas hinaspa kay pachapi tukuy ima kaqkunapas”. 27  Sichu Diospi mana iñiq runa mikunaykichikpaq invitasunkichik, hinaptin qamkunañataq “arí” nispa rinkichik, hinaspaqa mikuychik lliw qususqaykichikta concienciaykichik imatapas nisunaykichikmanta ama imatapas tapukuspa. 28  Ichaqa, sichu pipas nisunkichik: “Kay aychaqa taytacha-mamachakunaman qusqa aycham”, nispa. Hinaptinqa ama mikuychikchu willasuqnikichik runarayku hinaspa runapa conciencianrayku. 29  Kaywanqa manam qamkunapa concienciaykichikmantachu rimachkani, nichkaniqa chay runapa conciencianmantam. Imapas ruwanaypaq libre kaspaypas, manam allinchu kanman hukpa conciencian juzgawaptinqa. 30  Diosman graciasta quspay mikuchkaptiypas, ¿allinchu kanman ñuqapa contraypi mana allinta rimaptinku mikuyniyqa? 31  Chayrayku, mikuspaykichikpas, tomaspaykichikpas utaq imataña ruwaspaykichikpas, llapallanta ruwaychik Dios hatunchasqa kananpaq. 32  Amayá huchallichiychikchu judiokunatapas, griegokunatapas nitaq Diospi iñiqkunatapas*. 33  Ñuqapas tukuy imapim llapa runakunata kusichiyta munachkani, ñuqaqa manam kikiypa allinnillaytachu maskani aswanqa hukkunapa allinnintam, chaynapi paykuna salvakunankupaq.

Willakuykuna

Kayqa, qari kayninwan utaq warmi kayninwan millakuypaq kaqkunata ruwaymi. Qawaytaq: Palabrakuna entiendenapaq listata.
Qaway: Palabrakuna entiendenapaq listata.
Qaway: Palabrakuna entiendenapaq listata.
Utaq: “Vendesqankutapas”.
Utaq: “Diospa congregacionnintapas”. Qawaytaq: Palabrakuna entiendenapaq listata.