Piwanpas astawan rimaspaqa allin amistadtam armanchik. Diospas munanmi paywan rimaspanchik amistadnin kananchikta. Chaymi nin: “Qayakuspa mañakuwaptikichikqa uyarisqaykichikmi”, nispa (Jeremias 29:12). Diosta mañakuspa payman ‘asuykuptinchikqa paypas asuykamuwasunmi’ (Santiago 4:8). Jehova Diosmantam biblia nin: “Qayakuqninkunapa hichpallanpim kachkan”, nispa (Salmo 145:18). Dios amistadninchik kananta munaspaqa sapa kutillam mañakunanchik.

Chayna kasqanmantam Jesus nirqa: ‘Churikichikmanqa, ¿yaqachum rumita quykuwaqchik tantata mañakusuptikichik utaq culebrata challwata mañakusuptikichik? Qamkunaqa [...] churikichikmanqa allin kaqkunatam qunkichik, ¿chaychu mañakuqkunamanqa hanaq pachapi kaq taytaykichik mana qusunkichikman allin kaqkunata?’, nispa (Mateo 7:9-11). Chayna nisqanmi yachachiwanchik Diosta mañakunapaq, payqa yanapawasunmi (1 Pedro 5:7). Niwanchiktaqmi sasachakuypi tarikuspaqa payman asuykunapaq. Bibliapim nin: ‘Amayá imamantapas afanakuychikchu, aswanqa Diosta mañakuspayá payman lliwta willakuychik hinaspa graciasta quychik’, nispa (Filipenses 4:6, CQ12).

Yachaysapa runakunam ninku wara-waranqantin runakuna Diosta mañakusqankumanta, chaynataq Diospi mana iñiqkunapas hinaspa Dios kasqanmanta iskayrayaqkunapas mañakusqankumanta. * Chaywanmi cuentata qukunchik runakunaqa Dios necesitasqanchikta. Chayna kasqanchikmantam Jesus nirqa: ‘Mayna kusisqam “Diostam necesitani” niqkunaqa’, nispa (Mateo 5:3). Chaymi Diosta sapa kutilla mañakunanchik.

¿Imapitaq yanapawasun Dioswan amistad kasqanchikqa?