Wakinpiqa eunuco niq rimayqa capasqa qarikunamantam rimachkan. Ñawpaq tiempokunapim wakin qarikunata capaqku imapas mana allin ruwasqankurayku utaq sirviente kanankupaq hapisqa kasqankurayku. Eunuco runa kuyachikuptinqa reypa warminkunata yanapananpaqmi churaqku. Hegaiwan Saasgazmi rey Asueropa warminkunapa hinaspa sirvientankunapa yanapaqninkuna karqaku (Ester 2:3, 14).

Wakinpiñataqmi Bibliapi eunuco niq rimayqa mana capasqa qarikunamanta rimachkan. Chaymi yachaysapa runakuna ninku reywan llamkaqkunapas eunuco niqwan sutichasqa kasqankuta. Yaqachusmi Jeremiaspa amistadnin Ebed-melecpas hinaspa Felipepa yachachisqan Etiopia lawmanta runapas, eunuco niqwan sutichasqa karqaku. Ebed-melecqa atiyniyuq riqsisqa runachá karqa rey Sedequiaswan llamkaq kasqanrayku (Jeremias 38:7, 8). Etiopia lawmanta runañataq reynapa qullqi waqaychaqnin kasqanrayku (Hechos 8:27).

Tukupay punchawkunamanta rimaspanmi Jesus nirqa: ‘Runapa churinmi kanchariyninpi hamuspan kancharichkaq trononpi tiyaykunqa, hinaspanmi michiq rakichkaq hina rakinqa cabrakunamanta ovejakunata’, nispa (Mateo 25:31, 32 CQ12). Kay rikchanachiyqa ñawpaq tiempopi runakunapa sapa punchaw ruwayninkum karqa. Paykunaqa cabrakunamantam ovejakunata rakiqku. ¿Imanasqa?

Yaqa llapanpim, punchawpiqa ovejakunawan cabrakunaqa kuska kaqku. Tutanpiñataqmi kanchanman qaykuqku chirimanta, suwakunamanta utaq imamantapas harkanankupaq (Genesis 30:32, 33; 31:38-40). Michiqkuna kanchanman qaykuspankuqa ovejankutam cabrakunamanta sapaq kanchaman rakiqku, chinankunata hinaspa chitankunata cabrakuna mana maqarunanpaq. Huk librom nin: “Ovejakunataqa rakiqku chichukunankupaq, chawanankupaq hinaspa millwanta rutunankupaqmi”, nispa. Chaymi judiokuna allinta entiendenankupaq chaymanta Jesusqa rikchanachirqa paykuna chakrapi yachasqankurayku.