Manaraq runakunata unanchachkaspanmi Diosqa millonnintin angelkunata unancharqa (Job 38:4, 7). Kay atiyniyoq angelkunam Diosta servinku. Paykunatam Diosqa kamachin kasukuq runakunata yanapananpaq hinaspa waqaychananpaq (Salmo 91:10, 11). Kunanpas, angelkunaqa runakunatam yanapan Diosmanta yachanankupaq. (Leey Apocalipsis 14:6, 7.)

Chaynaqa, ¿angelkunatachu mañakunanchik yanapawananchikpaq? Manam, Diosllatam mañakunanchikqa hinaspa yupaychananchikqa (Apocalipsis 19:10). Angelkunaqa Diospa kamachisqantam ruwanku, manam runakunapa mañakusqantachu. Chaymi Jesuspa sutinpi Diosta mañakunanchik. (Leey Salmo 103:20, 21; Mateo 26:53.)

Runakuna hinam angelkunapas unanchasqa karqaku, allin kaqta hinaspa mana allin kaqta akllakunankupaq. Achkam Diosta mana kasukunankupaq tantearurqaku (2 Pedro 2:4). Puntataqa Satanasmi Diosta mana kasukurqachu, wakinkupas mana kasukuspankum demoniokunapi rikurirurqaku. Pasaq watakunapim paykunaqa hanaq pachamanta kay allpa Pachaman wischumusqa karqaku. (Leey Apocalipsis 12:7-9.)

1914 watamantam astawan yapakurqa mana allin ruwaykunawan wañuchinakuy. Kaymi qawachin Satanastawan demoniokunata Dios ña chinkachinanmanta. Hinaptinmi kay allpa Pachaqa sumaq huertaman tikrakunqa. (Leey Apocalipsis 12:12; 21:3, 4.)