¿Ima ninantaq bibliapi chayna nisqanqa?

Taytanchik Jehova Diosqa munanmi tukuy ima llakinchikkunata payman willaykunanchikta (Salmos 55:22). Ima sasachakuyninchikkunatapas Jehova Diosmanmi willakunanchik. Imaynam sasachakuykuna ñuqanchikta llakichiwanchik chaynam Jehova Diostapas llakichin. Chaymi puntata Diosta mañakunanchik hinaspaqa yuyayninchikpim hawka kasunchik (Filipenses 4:​6, 7).

¿Imaynatataq Diosta mañakuyqa yanapawanchik?

Yuyayninchikpi mana allin tarikuspanchikqa sapallanchik hinam tarikuchwan. Hukkunaqa manapaschá entiendewasunchu imayna tarikusqanchiktaqa (Proverbios 14:10). Jehova Diosmi ichaqa yachan imayna tarikusqanchikta, yachanmi imakuna llakichiwasqanchikta chaynataq imanasqa hukmanyasqanchiktapas. Chaymi munan imamantañapas payman willakunanchikta (2 Cronicas 6:​29, 30).

Jehova Diosta mañakuspanchikqa astawanmi paypi hapipakusun manam iskayrayasunchu yanapawananchikmantaqa. Bibliata qillqaq hinam mana iskayrayaspa Diosta nichwan: “Qanmi ñakariptiy qawariykullawanki. Hukmanyasqa tarikuptiymi qamqa chaylla yanapaykullawanki”, nispa (Salmos 31:7). Ima pasawasqanchikkunata Dios qawasqanta yachasqanchikmi kallpanchawanchik mana hukmanyananchikpaq. Payqa manam imawan ñakarisqallanchiktachu yachan, aswanqa pimantapas aswan allinta entiendewaspanchikmi palabranwan sunqunchikta tiyaykachin hinaspam kallpanchawanchik.