HILTON sutiyuq runam takanakuy pukllayllaman qukururqa. Payqa qanchis watachanmantapacham maypipas maqanakuyllapi karqa. Mozoyaruspanpas puriqmasinkunawanmi pitapas maqarunanpaq maskaq. Paymi willakun: “Suwakuqmi, qullqillapaq pukllaqmi, millakuypaq qalalla kaqkuna qawaqmi, warmikunatapas qatikachaqmi karqani hinaspa tayta-mamaytapas mana respetaqmi karqani. Mana allin runa kasqayta qawaspankum tayta-mamayqa mana valeqpaqña qawawarqa. Chaymi manaraq 20 wataypi kachkaspay wasiymanta pasakurqani”, nispa.

Ichaqa, 12 watamantañam Hiltonqa wasinman kutirqa. Tayta-mamanñataqmi admirasqallaña qiparurqaku llampu sunqu hinaspa respetakuq kasqanta qawaspanku. ¡Yaqallaraqmi churin kasqantapas pantarurqaku! ¿Imataq Hiltontaqa yanaparurqa chayna kananpaq? Payqa huk lawpi kachkaspanmi mana allinkuna ruwasqanmanta musyakuspan Bibliapi yanapakuyta maskayta qallaykurqa. Paymi nin: “Biblia leesqaytam kasukuyta qallaykurqani. Chaymantapas mana allin kayniyta saqispaymi Efesios 6:2, 3 nisqanman hina tayta-mamaytapas respetayta qallaykurqani. Manam haykapipas kayna kusisqaqa tarikurqanichu. Tayta-mamaypas kunanqa kusisqañam tarikunku”, nispa.

¿Imatam kay willakuyqa yachachiwanchik? Yachachiwanchikmi Diospa palabranqa kunan tiempopipas hinalla runakunata yanapasqanta chaynataq atiyniyuq kasqantapas (Hebreos 4:12). Qatiqninpiyá qawasun mana llullakuq, controlakuq, mana huchapakuq hinaspa kuyakuq kanapaq Biblia imayna yanapawasqanchikmanta.