Jehova Diospa testigonkunaqa achka bibliakunatam kikinku estudianankupaq servichikurqaku. Ichaqa allinpaqmi qawanku Musuq allpa pachapi kawsaqkunapaq biblia niq bibliata, kay bibliaqa tukuy rikchaq rimaymanmi traducisqa kachkan. Chaypiqa Diospa sutinmi rikurin, chaymantapas chiqap kaqtam yachachin, hinaspapas chaylla entiendenapaqmi.

•   Diospa sutinmi rikurin. Wakin bibliakunapiqa manam qillqankuchu Diospa sutintaqa. Kaypi yuyaymanay, tikrasqanku hukkaqnin bibliapim rikurin chay biblia lluqsinanpaq yanapakuq qanchis chunka masnin runakunapa sutin, ichaqa manam huk kutillatapas rikurinchu Diospa sutin Jehova Diosqa.

   Musuq allpa pachapi kawsaqkunapaq bibliapim ichaqa bibliata chayllaraq qillqasqanku tiempopi hina Diospa sutinqa maymi kananpi qanchis waranqa masnin kutita rikurin, manam kay bibliata traduciqkunapa sutinkuchu.

•   Imam kaqtam yachachin. Wakin bibliakunaqa manam allintachu imamantapas yachachin, chayna kasqanmanta cuentata qukunapaq qawarisun Mateo 7: 13 nisqanta, chaypim nin: “Kichki punkuntayá yaykuychikqa, hatun punkunta hinaspa hatun ñannintaqa richkanku infiernomanmi”, nispa. Qallariypi qillqasqankupiqa manam “infiernoman” nispachu qillqarqaku, aswanqa “wañuyman” nispam. Bibliata traduciqkunaqa yaqachusmi piensarqaku mana allin runakunaqa infiernopi wiñaypaq ñakarichisqa kasqankuta. Bibliam ichaqa mana chaynatachu yachachin. Chaymi Musuq allpa pachapi kawsaqkunapaq bibliata traduciqkunaqa ñawpaqpi kasqanman hina “wañuyman” nispa traducinku.

•   Manam sasa entiendeychu. Imam kaq traducisqa kasqan allin kaptinpas allintataqmi entiendekunanpas. Chayna kasqanmanta qawasunchik. Achka bibliakunapim Romanos 12:11 nisqanta imam kaqllata traducinku, chaypim griego rimaypi nichkan: “Espirituwanyá timpuychik” nispa. Chayna nisqantaqa manañam kay tiempopi runakunaqa allintañachu entiendenku. Chayraykum mana hukta entiendekunanpaq Musuq allpa pachapi kawsaqkunapaq bibliata traduciqkunaqa kayna niqtaña traducinku: “Diospa atiyninwanyá ancha kallpanchasqallaña kaychik” nispaña.

 Musuq allpa pachapi kawsaqkunapaq biblia Diospa sutinta rimaspan hinaspa imam kaqta yachachispanpas manam chayna ruwasqa kasqallanwanchu riqsichikun, aswanqa mana qullqillapaq aypukusqanwantaqmi. Chaywanmi wara-waranqantin runakuna kikinkupa rimayninkupi bibliata leeyta atinku rantinankupaq qullqinku mana kaptinpas.