Kaytam yachanayki

  • Runamasinchikkunawanqa imapipas sasachakunchikmi. Pantaq runakuna kasqanchikraykum, kuyasqanchik runamasinchikpas hukmanyarachiwachwan rimasqanwan utaq ruwasqanwan. Yuyarinaykim qampas pantaq runa kasqaykita. ¿Manachu qampas pitapas hukmanyarachirqanki? (Santiago 3:2).

  • Internetpi imapas qawasqaykiqa hukmanyachisunkimanmi. David sutiyuq musum nin: “Internetman yaykuruspayki amistadnikikunapa fotonta qawaspaykiqa, tapukunkim kusirikuyman rinaykipaq qamtapas imanasqa mana willasusqaykimanta. Wakinpiqa mana kuyasusqaykita piensaspam llakisqa tarikuwaq”, nispa.

  • Sasachakuykuna atipaytaqa atiwaqmi.

 Kaytam ruwawaq

Yuyaymanay. Bibliam nin: “Amayá chayllaqa piñakuruychu, chaylla piñakuruyqa mana yachayniyuqkunapa ruwayninmi”, nispa (Eclesiastes 7:9).

“Wakinpiqa punchawkuna pasasqanman hinam musyakunki yanqamanta hukmanyasqa tarikusqaykita” (Alyssa).

Kaypi yuyaymanay: ¿Chaylla piñakuruqchu kanki? ¿Atiwaqchu wakinku pantaptinkupas mana chaylla piñakuruyta? (Eclesiastes 7:21, 22).

Pampachakuq kayqa allinpunim. Bibliaqa ninmi runamasinchikpa pantasqanta mana kaqpaqpas hapinanchikpaq (Proverbios 19:11).

“Piñakunaykipaq hina imataña ruwaptinkupas, aswan allinqa pampachaykuymi. Kaywanqa nichkanchikmi pampachaykuspa manaña yuyarinamanta utaq qunqanamanta. Pampachaykuspaqa manañam yuyarichinanchikchu” (Mallory).

Kaypi yuyaymanay: ¿Chiqaptachu llumpay mana allinta ruwarusunki? ¿Pampachaykuwaqchu hukmanyachisuqniki runata hawka kanaykichikpaq? (Colosenses 3:13).

Sasachakuymanta amistadnikiwan sapa kuti rimayqa quni wasita chirillaña wayra yaykumunanpaq sapa kuti kichay hinam

Huknikipi yuyaymanay. Bibliam nin: “Amayá kikillaykichikpa allinnikichiktachu maskaychikqa, aswanqa wakinnikichikpa allinnintayá”, nispa (Filipenses 2:4).

“Amistadnikita kuyaspaykiqa hinaspa respetaspaykiqa chayllam imapas sasachakuynikichikta allichankichik, paypaq anchata tiempochakusqaykirayku. Unayña amistad kasqaykichikraykum, mana chayllaqa yanqacharuyta munankichu” (Nicole).

Kaypi yuyaymanay: ¿Atiwaqchu huk runapa allinkuna ruwasqan qawayta? (Filipenses 2:3).

Tukunapaq: Hukkunata mana hukmanyachinaykipaq kallpanchakusqaykiqa yanapasunkim yuyayniyuqña kaptikipas. ¿Atiwaqchu kunanmantapacha chayta ruwanaykipaq kallpanchakuyta?