República Dominicana llactai

Japón llactai

Haití llactai

Llaquiuna, turmindusguna shamujpiga, Jehovahuaj testigogunaga llaquirishca huauquiunara uctalla yanapanchi. Shina rasha cierto pacha llaquinushcara ricuchinchi (Juan 13:​34, 35; 1 Juan 3:​17, 18). ¿Imasnara yanapanchi?

Cullquihua yanapanchi. Judea partimanda quirijcunaga, yarcai timpui pasaujpi Antioquía partimanda quirijcunaga, paigunama cullquira cachanuca (Rashcauna [Hechos] 11:27-30). Cunan timpuibis ñucanchi huauquiuna maibis llaqui apanujpi ñucanchi yanapaira cachanchi (2 Corintios 8:13-15).

Ministishcaunara cusha yanapanchi. Tandarijcunara Cuirajcunaga, tucui huauquiunara yanapangahua mascanun. Huaquimbi micunara, yacura, churanaras paiguna cungahua tandarinun, shinallara susurishcaunara cuirangahua, maibi puñunaras alichingahua tandarinun. Ashca Jehovahuaj testigoguna llaqui apaushca pambama, paiguna quiquin cullquihua yanapangahua rinun, shinallara huasiunaras, Reinomanda Yachana Huasiunaras alichingahua, shayachingahuas rinun. Ñucanchipura gunlla llaquinushcamanda, imasna ali tarbanara yachashcamandas llaqui turmindus shamujpis uctalla purunturinchi tucui huauquiunara yanapangahua. Shina rasha ñucanchi huauquiunara ñaupa punda yanapanchi. Astaumbas ushashaga, shujta runaunaras maican religión charijpis yanapanchi (Gálatas 6:10).

Diospa Shimihua yanapanchi. Llaquirishcaunaga mas ministinun paigunara shinzhiyachinuchu. Jehová Diosmi, ‘tucui turmindarishcaunara cushiyachinara’ ushanmi (2 Corintios 1:3, 4). Chiraigumanda llaqui apajcunara Bibliara leasha yachachinchi, Diospa Mandanallami tucui llaquiunaras, turmindusgunaras tucuchinga nisha (Ricuchina [Apocalipsis] 21:4).

  • Jehovahuaj testigogunaga llaqui apajcunara yanapangahuaga ¿imarasha purunturishca anun?

  • Llaqui, turmindus apajcunara shinzhiyachingahua ¿imara ruranchi?