Ima tiyashcata ricui

Ima tiyashcata ricui

Ari nishcata pajtachinaca shuj barco yacupi ama pambarichun jatun fierrohuan charichicuj layami can.

 CAZADOCUNA

1: Ari nishcata pajtachichij

1: Ari nishcata pajtachichij

¿IMA SHINATAJ CAITA RURAI TUCUNGUICHIJ?

Huaquin cazadocunaca paicuna ari nishcatami shungumanta pajtachincuna. Chashnami cusa huarmica ima problemacuna ricurijpipish tucuita ahuantashpa alli causancuna.

Cutin shujtajcunaca familiacuna obligashcallamantami mana separarincuna. Pero mana chaillamantachu ishquindij causana can. Ashtahuanpish ishquindij cˈuyaita, respetota ricuchishpaca cushillami causangacuna.

BIBLIAPICA: ‘Cusaca paipaj huarmitaca ama shitachun’ ninmi (1 Corintios 7:11).

Shuj runaca: “Cazadocunaca ari nishcata yuyarishpami problemacuna ricurijpica mana pˈiñarishpa allichina canchij. Problemacuna ricurijpipish separarinatajmi canchij nishpaca mana yuyanachu canchij” ninmi.

¿IMAMANTATAJ ARI NISHCATA PAJTACHINA CANCHIJ?

Ari nishcata valichishpaca problemacuna ricurijpipish separarinataca mana yuyashunchu. Shinallataj ‘cai huarmi o cusaca ñucapaj mana canchu’ nishpaca mana yuyanachu canchij.

Shuj huarmica: “Huaquin gentecunaca manaraj cazarashpami, ‘ima problema ricurijpica separarishunllami’ nishpa yuyancuna. Pero chashna yuyashpaca cusa o huarmita mana valorashcatami ricuchinchij” ninmi.

¿IMATATAJ RURANA CANGUI?

CAIPI YUYAI

Cambaj cusahuan o huarmihuan litunacucushpaca:

  • ¿“Cantaca shitashami, shujtajtami mashcasha” ninguichu?

  • ¿“Shujtajhuan cazarashca cashpaca allimi causaiman carcani” nishpachu yuyangui?

  • ¿“Paihuan cazarashcamantami arrepintirini” nishpachu yuyangui?

Chashna yuyacushpaca cambaj cusahuan o huarmihuan alli causangapajmi esforzarina cangui.

CUSANDIJ HUARMINDIJ ALLI PARLANACUICHIJ

  • Puntapica imamanta problemacunata charishcatami ricuna canguichij.

  • Qˈuipaca problemacunata ima shina allichinatami ricuna canguichij.

CAITA RURAI

  • Cambaj huarmita o cusata cˈuyashcata ricuchingapajca shuj hojapi sumaj yuyaicunata quillcai.

  • Trabajopica cambaj cusapaj o huarmipaj fototami charina cangui.

  • Trabajacushpa o carupi cashpaca cambaj cusata o huarmitami punllanta cayana cangui.

BIBLIAPICA: “Dios tandachishcataca, ni pi amataj chˈicanyachichun” ninmi (Mateo 19:6).