Ima tiyashcata ricui

Ima tiyashcata ricui

 YACHAI 47

Levítico libromanta yachashunchij

Levítico libromanta yachashunchij

‘Diospaj shimica, paillataj Quillcachishcami can’ (2 TIMOTEO 3:16).

CANTO 98 Bibliataca Diosmi quillcachirca

CAITAMI YACHASHUN *

1, 2. ¿Jesusta catijcunaca imamantataj Levítico librota yachana canchij?

APÓSTOL Pabloca Timoteomanca: ‘Diospaj shimica, paillataj Quillcachishcami can’ nircami (2 Timoteo 3:16). Levítico libropish Dios quillcachishcami can. Shinapish huaquin gentecunaca: “Levítico libropi tiyaj mandashcacunaca ñucanchij punllacunapica mana sirvinchu” nishpami yuyancuna. Pero Jesusta catijcunaca mana chashna yuyanchijchu.

2 Jehová Diosca tres mil quinientos huatacuna huashamanmi Levítico librotaca quillcachirca. Pero cunan punllacunapajpish cai libroca valishcami can (Romanos 15:4). Chaipica Dios imata yuyashcatami yachachin. Chaimantami ñucanchijca Levítico libromanta yachana canchij. Cunanca chuscu yuyaicunata yachashun.

DIOSPAJ ÑAUPAJPI ALLI RICURISHUNCHIJ

3. ¿Israelitacunaca imamantataj animalcunata rupachishpa Diosman cujcuna carca?

3 Puntaca, Diospaj ñaupajpimi alli ricurina canchij. Israelitacunaca cada huatami paicunapaj juchacunamanta Diosman ofrendata cungapaj tandanacujcuna carca. Chaita rurashpaca israelitacunaca juchata mana rurana cashcatami yuyarircacuna. Chai punllapica sacerdotecunata mandajca animalcunata rupachishpami Diosman ofrendata cuj carca. Sacerdoteca animalcunapaj yahuarhuanmi Diospajlla chˈicanyachishca ucuman yaicuna carca. Chai yahuartaca tucui israelitacunapaj juchacunata Dios  perdonachunmi cuj carca. Pero manaraj ofrendata cushpaca ¿imatataj rurana carca?

(Párrafo 4-ta ricui). *

4. ¿Sacerdotecunata mandajca Diospajlla chˈicanyachishca ucumanca imapajtaj punta cutin yaicurca? Página 1-pi tiyaj dibujota ricui.

4 (Levítico 16:12, 13-ta liyipai). Chai punllapica sacerdotecunata mandaj imata rurashcata ricushun. Paica shuj maquipica mishquijllaman ashnacuj inciensotami apan. Cutin caishuj maquipica ninatami apan. Caicunahuanmi Diospajlla chˈicanyachishca ucuman punta cutin yaicun. Chaiman chayashpaca Diospaj arca ñaupajpimi shayarishpa saquirin. Arca ñaupajpi shayarishpaca Jehovapaj ñaupajpi shayacushcatami ricuchin. Qˈuipaca inciensotaca ninapimi churan. Chaita rurajpimi chai ucuca mishquiman ashnacuj cushnihuan jundan. * Chai huashaca sacerdotecunata mandajca animalcunapaj yahuarhuanmi Diospajlla chˈicanyachishca ucuman cutin yaicun. Caipi ricushca shinaca juchacunamanta yahuarta manaraj cushpami Diospaj ñaupajpiraj inciensota rupachirca.

5. ¿Sacerdotecunata mandaj inciensota respetohuan rupachishcamantaca imatataj yachanchij?

5 ¿Sacerdotecunata mandaj inciensota rupachishcamantaca imatataj yachanchij? Bibliapica Diosta alli sirvijcunapaj mañaicunataca inciensohuanmi chˈimbapuran (Salmo 141:2; Apocalipsis 5:8). Sacerdotecunata mandajca inciensotaca Diospaj ñaupajmanca respetohuanmi apaj carca. Ñucanchijpish Jehová Diosta mañacushpaca respetohuanmi mañana canchij. Shuj yayaca paipaj churi cˈuchuyachunmi saquin. Chashnallatajmi Jehová Diospish paita mañajpica paipajman cˈuchuyachun saquin (Santiago 4:8). Shinallataj paica shuj amigo shinami ñucanchijtaca chasquin (Salmo 25:14). Chaimantami paita tucuipi cazushpaca cushilla sintirinchij.

6. ¿Sacerdotecunata mandaj rurashca shinaca Jesusca imatataj rurarca?

6 Ña ricushca shinaca sacerdotecunata mandajca Diospaj ñaupajpi alli ricuringapajmi, manaraj ofrendata cushpa inciensota rupachij carca. ¿Caimantaca imatataj yachanchij? Jesusca ñucanchijmanta manaraj paipaj causaita cushpami tucui causaipi Diosta cazurca. Chaita rurajpimi Jehová Diosca paipaj causaita chasquirca. Jesusca Dios munashca shina causashpami Jehová Dioslla alli mandaj cashcata ricuchirca.

7. ¿Jesusca llaquicunahuan cashpapish imallatataj rurarca?

7 Jesusca cai Allpapi cashpaca tentacioncunata, pruebacunatami charirca. Shinallataj llaquinaita huañuna cashcatami yacharca. Pero paica llaquicunahuan cashpaca paipaj Yaya ayudachunmi huacashpa mañarca (Hebreos 5:7). Shungumanta mañashpami tucuipi Diosta cazushpa causarca (Filipenses 2:8, NM ). Jesús mañashcacunaca Diospaj ñaupajpica mishquijlla ashnacuj inciensota rupachishca shinami carca. Jesusca Dioslla mandana derechota charishcatami ricuchirca. Chaita ricushpaca Jehová Diosca cushillami sintirirca.

8. ¿Jesuspaj ejemplota catingapajca imatataj rurana canchij?

8 ¿Jesuspaj ejemplota catingapajca imatataj rurana canchij? Jehová Diospaj  mandashcacunatami tucuipi cazuna canchij. Llaquicunahuan cashpaca Dios ayudachunmi mañana canchij. Caicunata rurashpaca Jehová Dios ñucanchijta mandachunmi saquishun. Mana allita rurashpa mañajpica Yaya Diosca ñucanchij mañashcacunataca mana chasquingachu. Pero pai munashca shina causajpica ñucanchij mañashcacunaca Diospajca mishquijlla ashnacuj inciensota rupachishca shinami canga. Jehová Diosta tucuipi cazujpica paica contentomi sintiringa (Proverbios 27:11).

SHUNGUMANTA DIOSTA SIRVISHUNCHIJ

(Párrafo 9-ta ricui). *

9. ¿Israelitacunaca imamantataj ofrendacunata Diosman cujcuna carca?

9 Ishquipica, Diosta agradicishcamantami shungumanta sirvina canchij. Levítico libropi nishca shinaca israelitacunaca Diosta agradicingapajmi ofrendacunata cujcuna carca. * Chaita rurashpami paicunaca Diospaj ñaupajpi alli ricurijcuna carca (Levítico 7:11-13, 16-18). Israelitacunaca ofrendacunata cuna cashcallamantaca mana curcacunachu. Ashtahuanpish Diosta cˈuyashcamantami ofrendacunata cujcuna carca. Shinallataj maijanpish cˈuyaimanta shuj animalta Diosman ofrendata cujpica ofrendata cujpish, paipaj familiapish, sacerdotecunapishmi aichataca micujcuna carca. Pero animalcunapaj huaquin partecunaca Jehová Diospajllami carca. ¿Imacunallataj Diospajlla cashcanga?

(Párrafo 10-ta ricui). *

10. a) ¿Imamantataj israelitacunaca animalcunapaj huiracunata Diosman cujcuna carca? b) ¿Imamantataj Jesusca Diosta tucui shunguhuan sirvirca?

 10 Quimsapica, Jehová Diosta cˈuyashcamantami tucui shunguhuan sirvina canchij. Jehová Diosca animalcunapaj chunllullicunapi tiyaj huirata, huijsapi tiyaj huirata, ishqui riñoncunata, lomopi tiyaj huirata, yana shungupi tiyaj huiratapish cuchunmi munaj carca (Levítico 3:6, 12, 14-16-ta liyipai). Israelitacunaca animalcunapaj huiracunata, huaquin partecunataca cˈuyaimantami cujcuna carca. Paicuna cashna ofrendacunata cujpica Diosca cushillami sintirij carca. Chashnallatajmi Jesusca Diosta cˈuyashcamanta paita tucui shunguhuan sirvirca (Juan 14:31). Ashtahuancarin Jesusca Diospaj mandashcacunata cazushpami cushilla sintirirca (Salmo 40:8). Jehová Diospish paipaj Churi tucuipi paita sirvishcata ricushpaca cushicushcangami.

Jehová Diosta cˈuyashpaca shungumantami sirvishun. (Párrafos 11 al 12-ta ricui). *

11. a) ¿Israelitacuna rurashca shina imamantataj Jehová Diosta sirvinchij? b) ¿Diosca mana tanto sirvi tucujpipish imatataj ricun?

11 Israelitacunaca Diosta tucui shunguhuan cˈuyashcamantami huaquin ofrendacunata cujcuna carca. Ñucanchijpish Diosta tucui shunguhuan cˈuyashcamantami paita sirvinata agllashcanchij. Jehová Diosca muyundij Allpapi paita tucui shunguhuan sirvijpi, cazujpica cushillami sintirin. Paica ñucanchij sirvishcallataca mana ricunchu. Por ejemplo, mayorlla cashcamantachari Diostaca ña mana tanto sirvi tucunichu nishpa yuyanchij. Pero Jehová Diosca paita cˈuyashcamanta tucuita rurashcata ricushpami cushicun. Caita yachashpaca cushillami sintirinchij.

12. a) ¿Israelitacuna shungumanta ofrendacunata cujpica Jehová Diosca ima shinataj sintirirca? b) ¿Ñucanchij shungumanta sirvijpica Diosca ima shinataj sintirin?

12 ¿Shungumanta cushca ofrendacunamantaca imatataj ashtahuan yachai tucunchij? Israelitacunaca Jehová Dios munashca huirata rupachishpami ofrendata cujcuna carca. Paicuna shungumanta cujpica Jehová Diosca cushillami sintirirca. Ñucanchijpish Jehová Diosta shungumanta sirvijpica paica cushillami sintirin (Colosenses 3:23, NM ). Cˈuyaimanta achcata rurashcapish ashallata rurashcapish Diospaj valishcami can. Paica tucui rurashcataca manataj cungaringachu (Mateo 6:20; Hebreos 6:10).

JEHOVÁ DIOSCA PAIPAJ PUEBLOTAMI BENDICIACUN

13. Levítico 9:23, 24-pi nishca shinaca ¿Jehová Diosca ima shinataj sacerdotecunata agllashcata ricuchirca?

13 Chuscupica, Jehová Diosca paipaj pueblotami bendiciacun. Jesús manaraj huacharijpi 1512 huatapi ima tucushcata ricushun. Israelitacunaca Sinaí urcupimi Diospaj carpa huasita shayachircacuna (Éxodo 40:17). Chai qˈuipaca Moisesca Aaronta, paipaj churicunatapish sacerdotecuna cachunmi agllarca. Chai huashaca israelitacuna tandanacushca cajpimi sacerdotecunaca punta cutin animalcunata Diosman ofrendacunata curca. Cai ofrendacunataca tucui israelitacunamantami curcacuna (Levítico 9:1-5). ¿Jehová Diosca sacerdotecunataca ima shinataj pai agllashcata ricuchirca? Aaronpish Moisespish tucui israelitacunata bendiciashca huashami, Jehová Diosca jahua pachamanta ninata cachashpa altar jahuapi tiyacuj tucui ofrendacunata rupachirca.  Chashnami Jehová Diosca Aaronta, paipaj churicunatapish agllashcata ricuchirca (Levítico 9:23, 24-ta liyipai).

14. ¿Aaronta, paipaj churicunatapish Jehová Dios ayudacushcataca imamantataj alli intindina canchij?

14 Israelitacunaca caita ricushpaca sacerdotecunata Dios ayudacushcatami cuenta japircacuna. Chaimantami paicunaca sacerdotecuna Diosta sirvishpa catichun ayudarcacuna. ¿Aaronta, paipaj churicunatapish Jehová Dios ayudacushcataca imamantataj alli intindina canchij? Jehová Diosca sacerdotecunata Jesús mandaj cachunmi agllashca. Shinallataj jahua pachapi mandachun, sacerdotecuna cachunpishmi 144 mil gentecunata agllashca (Hebreos 4:14; 8:3-5; 10:1).

Jehová Diosca paipaj pueblotami bendiciacun. Chaimanta pushaj huauquicunata ayudashunchij. (Párrafos 15 al 17-ta ricui). *

15, 16. ¿Alli cazuj alli yuyaiyuj sirvij huauquicunata Jehová Dios ayudacushcataca imamantataj crinchij?

15 1919 huatapimi Jesusca “alli cazuj alli yuyaiyuj” sirvij huauquicunata agllarca. Paicunaca jahua pachaman rigrijcunamanta ashallacunami can. Cai huauquicunami huillashpa catichun, Bibliamanta yachachun minishtirishca horaspi ayudancuna (Mateo 24:45, QC, 1989). ¿Cai huauquicunata Dios ayudacushcataca imamantataj crinchij?

16 Diabloca, paita catijcunandijmi alli cazuj alli yuyaiyuj sirvij huauquicunata jarcasha nishcacuna. Por ejemplo, ishqui jatun macanacuicunami tiyashca. Muyundij Allpapipish minishtirishca cosascunata charinaca maipica sinchimi cashca. Shinallataj gobiernocunaca Diosta sirvijcunatapishmi llaquichishcacuna. Chashna jarcajpipish alli cazuj alli yuyaiyuj sirvij huauquicunaca Diospaj ayudahuanmi tucuicunaman yachachishpa catishca. Cunan punllacunapica  novecientos yalli shimicunapimi achca publicacioncuna gratis llujshishca. Shinallataj muyundij Allpapimi Diospaj alli huillaicunataca predicacunchij (Mateo 24:14). Caita ricushpami Jehová paipaj pueblota ñaupajman pushacushcata intindinchij.

17. ¿Alli cazuj alli yuyaiyuj huauquicunata ayudangapajca imatataj rurana canchij?

17 Moisespaj punllacunapica Jehová Diosca jahua pachamanta ninata cachashpami Aaronpaj, paipaj churicunapaj cushca ofrendata rupachirca. Chashnami paicunata agllashcata ricuchirca. Chashnallatajmi cunan punllacunapipish Jehová Diosca alli cazuj alli yuyaiyuj sirvij huauquicunata agllashcata ricuchin. Chaimantami Diospaj pueblo ucupi cashcamanta cushilla sintirinchij (1 Tesalonicenses 5:18). ¿Alli cazuj alli yuyaiyuj huauquicunata ayudangapajca imatataj rurana canchij? Publicacioncunata estudiashpa, tandanacuicunaman rishpami Bibliamanta yachachishcacunata pajtachina canchij. Shinallataj huillanataca manataj saquinachu canchij. Gentecunapish Jesuspaj discipulocuna tucuchunmi yachachina canchij (1 Corintios 15:58).

18. ¿Imatataj pajtachina canchij?

18 Levítico libropi yachachishcacunatami pajtachina canchij. Jehová Diospaj ñaupajpipish alli ricuringapajmi tucuipi cazuna canchij. Shinallataj paita cˈuyashcamanta, agradicishcamantami sirvina canchij. Dios agllashca huauquicunatapishmi ayudana canchij. Tucui caicunata rurashpaca Jehová Diosta shungumanta sirvicushcatami ricuchishun.

CANTO 96 Bibliaca Dios cushca valishca regalomi

^ par. 5 Ñaupa punllacunapica Levítico libropi tiyaj mandashcacunataca Jehová Diosca israelitacunamanmi curca. Ñucanchijca cai mandashcacunataca mana pajtachinchijchu. Pero cai mandashcacunaca cunan punllacunapimi ayudai tucun. Cai yachaipimi Levítico libromanta valishca yuyaicunata yachashun.

^ par. 4 Israelitacunapaj punllacunapica Diospaj carpa huasipimi inciensotaca rupachijcuna carca. Caitaca Diosta adorangapajllami rurajcuna carca (Éxodo 30:34-38). Apostolcunapaj punllacunapica Diosta adorangapajca inciensota mana rupachijcunachu carca.

^ par. 9 Cai ofrendacunamanta ashtahuan yachangapajca Perspicacia para comprender las Escrituras, volumen 2, página 523-ta españolpi ricui.

^ par. 54 FOTOCUNAMANTA: Sacerdotecunata mandajca Diospajlla chˈicanyachishca ucumanmi inciensota, ninatapish apaj carca. Chashnami chai ucuca mishquiman ashnacuj cushnihuan jundaj carca. Qˈuipaca israelitacunapaj juchacunamanta Dios perdonachunmi animalcunapaj yahuarta Diospajlla chˈicanyachishca ucuman cutin apaj carca

^ par. 56 FOTOCUNAMANTA: Shuj israelitaca paipaj familiandijmi agradicingapaj shuj ofrendata Diosman cusha nin. Chaimantami shuj ovejata sacerdoteman cun.

^ par. 58 FOTOCUNAMANTA: Jesusca cai Allpapi cashpaca Diospaj mandashcacunatami cazurca. Discipulocunamanpish Diosta cazuchunmi yachachirca. Chashnami Jesusca Diosta shungumanta cˈuyashcata ricuchirca.

^ par. 60 FOTOCUNAMANTA: Shuj mayorlla panica cartacunata rurashpami huillacun. Chashnami shungumanta Diosta sirvicushcata ricuchin.

^ par. 62 FOTOCUNAMANTA: Cuerpo Gobernantemanta Gerrit Lösch shuti huauquica alemán shimipi Traducción del Nuevo Mundo Biblia llujshishcatami cushilla huillarca. Alemania llajtamanta huauqui panicunaca cai Bibliahuanmi cushilla huillacuncuna.