Ima tiyashcata ricui

Ima tiyashcata ricui

 YACHAI 48

Imata ruranata agllashpaca pajtachishuntaj

Imata ruranata agllashpaca pajtachishuntaj

‘Imata callarichishcata rurashpaca pajtachichijlla’ (2 CORINTIOS 8:11).

CANTO 35 Ima importante cashcata agllashunchij

CAITAMI YACHASHUN *

1. ¿Jehová Diosca imata rurachuntaj saquishca?

JEHOVÁ DIOSCA ñucanchij causaipi imata rurangapaj agllachunmi saquishca. Shinallataj imatapish alli agllachunmi yachachin. Ñucanchij agllashcacuna alli cajpica chaita pajtachichunmi ayudan (Salmo 119:173). Diospaj Shimi yachachishcacunata pajtachishpaca imatapish allimi decidishun (Hebreos 5:14).

2. ¿Imata alli decidishpapish maipica imamantataj sinchi can?

2 Imata alli decidishpapish maipica imata decidishcata pajtachinaca sinchimi can. Caipi yuyashun, shuj jovenca Bibliata tucui liyingapajmi decidin. Shinapish asha semanacuna qˈuipaca shujtaj ruraicunamantami Bibliata liyinata saquin. Shinallataj shuj panica precursora canatami decidin. Pero pai decidishcataca mana utca pajtachinchu. Cutin pushaj huauquicunaca huauqui panicunata animashpa visitangapajmi decidincuna. Quillacuna pasajpipish pita mana visitashcacunachu. Cai ejemplocunapi ricushca shinaca, paicunaca alli decidishpapish ima decidishcataca mana pajtachishcacunachu. Ñaupa tiempopipish Corinto llajtamanta huauqui panicunaca ima decidishcataca callaripica mana pajtachircacunachu. ¿Paicunamantaca imatataj yachanchij?

3. a) ¿Corinto llajtamanta huauqui panicunaca imatataj decidircacuna? b) ¿Imatataj mana rurarcacuna?

3 Huata 55-pimi Jerusalenpi, Judea llajtapi causaj huauqui panicunaca ayudachun minishtircacuna. Chaita yachaj chayashpami shujtaj llajtacunamanta huauqui panicunaca  cullquita tandashpa ayudasha nircacuna. Corinto llajtamanta huauqui panicunapishmi ayudasha nircacuna. Chaimantami ima shina ayudanata apóstol Pablota tapurcacuna. Chaimi Pabloca imata rurana cashcata huillarca. Shinallataj huauqui Titotami cullquita tandachun agllarca (1 Corintios 16:1; 2 Corintios 8:6). Pero asha quillacuna qˈuipaca Corinto llajtapi causajcunaca mana imata rurashcacunachu carca. Mana imata rurashcamantami Jerusalenman, Judea llajtamanca cullquita mana cachai tucushcanga (2 Corintios 9:4, 5).

4. ¿Apóstol Pabloca Corinto llajtamanta huauqui panicunataca imata rurachuntaj animarca?

4 Corinto llajtamanta huauqui panicunaca shujtajcunata ayudangapajmi decidircacuna. Chaimi apóstol Pabloca felicitarca. Pero shujtajcunata ayudasha nishcata pajtachichunmi animarca (2 Corintios 8:7, 10, 11-ta liyipai). Ñucanchijpish sinchi crijcuna cashpapish imata decidishcata pajtachingapajmi tucui pudishcata rurana canchij.

5. ¿Ima tapuicunatataj yachashun?

5 Ñucanchijpish juchayujcuna cashcamantami imata decidishpapish mana utca pajtachinchij. Huaquinpica mana yuyashcapimi imapish pasai tucun. Chaimantachari imata decidishcataca mana pajtachi tucunchij (Eclesiastés 9:11; Romanos 7:18). Cai yachaipica: ¿Alli decidingapajca imatataj rurana canchij? ¿Imata decidishcata pajtachingapajca imatataj rurana canchij? nishca tapuicunatami yachashun.

ALLI DECIDISHUNCHIJ

6. ¿Imata decidishcataca imamantataj huaquinpica cambiai tucunchij?

6 Huaquinpica imata decidishcataca mana cambianachu canchij. Por ejemplo, Jehová Diosta sirvingapaj agllashca cashpaca, paita sirvinataca mana saquinachu canchij. Shinallataj cusandij huarmindij ari ninacushcata pajtachinataca mana saquinachu can (Mateo 16:24; 19:6). Cutin ima cambiocuna tiyajpica shujtaj decidishcacunatami tal vez cambiana minishtiringa. ¿Alli decidingapajca imatataj rurana canchij?

7. a) ¿Jehová Diostaca imata cuchuntaj mañana canchij? b) ¿Imamantataj chashna mañana canchij?

7 Jehová Dios yachaita cuchun mañashunchij. Diosca Santiagomanca: “Maijan yachai illaj cashpaca, Diosta mañaichij. Paica mana mitsashpami, tucuicunaman yallijta cunga” nishpami quillcachirca (Santiago 1:5). Chaimantami alli decidingapaj Jehová Dios ayudachun mañana canchij.

8. ¿Manaraj imata decidishpaca imatataj rurana canchij?

8 Manaraj imata decidishpa alli ricushunchij. Maipica Diosta sirvingapajmi shujtaj trabajota mashcana canchij. Mana cashpaca shujtaj ladopi causanamanmi rina canchij. Shinallataj trabajangapajmi imata estudianata agllana canchij. Manaraj caicunata decidishpaca Bibliata, publicacioncunatami liyina canchij. Shuj amigohuanpishmi parlana canchij (Proverbios 20:18).

9. a) ¿Imata manaraj decidishpaca imatataj alli ricunaraj canchij? b) ¿Chaita mana rurashpaca imatataj mana pajtachishun? Shuj ejemplomanta parlai.

9 Diosta cˈuyashcamanta imatapish alli decidishunchij. Imata rurajpica Jehová Diosca imamanta chashna decidishcatami ricun (Proverbios 16:2). Chaimantami imata manaraj rurashpaca imamanta chaita decidigrishcata alli ricunaraj canchij. Chaita mana rurashpaca ñucanchij decidishcataca tal vez mana pajtachi tucushunchu. Por ejemplo, shuj jovenca precursor canatami agllan.  Paica Jehová Diosta cˈuyashcamantami precursor tucusha nini nishcanga. Shinapish asha tiempo qˈuipaca horascunata mana pajtachinchu. Huillanapipish cushilla canapaj randica llaquillami sintirin. ¿Imamantataj chashna sintirin? Cai jovenca yaya mamata, o shujtajcunata cushichingaraicullami precursor tucushca canga.

10. a) ¿Bibliamanta estudiajca imamantataj fumanata saquirca? b) ¿Cai ejemplomantaca imatataj yachanchij?

10 Shujtaj ejemplopi yuyashun. Bibliata estudiajca tabacota fumanatami saquisha nin. Ishqui semanacunatami ama cutin fumangapaj tucui pudishcata ruran. Tucuita rurashpapish cutinmi fumanapi urman. Pero Jehová Diosta cˈuyashcamanta, paipaj ñaupajpi alli ricurisha nishpami fumanata saquin (Colosenses 1:10; 3:23, NM ).

11. ¿Ima decidishcata pajtachingapajca imatataj rurana canchij?

11 Imata decidishcata pajtachingapaj alli yuyashunchij. Por ejemplo, Bibliata liyingapajmi decidishcanchij. Pero Bibliata liyingapajca shuj horariotami agllana canchij. * Shinallataj ancianocunaca huauqui panicunata visitangapajmi decidincuna. Pero imata decidishcata pajtachingapajca cai tapuicunapimi yuyana can. ¿Maijan huauqui panicunataj animachun minishtincuna? ¿Ima punlla ima horataj paicunata visitashun?

12. ¿Imata decidishcataca huaquinpica imamantataj saquina canchij?

12 Imata mana rurai tucushcataca ama decidishunchij. Ñucanchij munashcata pajtachingapajca maipica tiempota, cullquita o fuerzata manachari charinchij. Chaimantachari huaquinpica imata decidishcata mana pajtachi tucushpaca saquina canchij (Eclesiastés 3:6). Mana cashpaca imata decidishcata pajtachingapajca huaquin cambiocunatachari ruranchij. Pero ¿ima decidishcata pajtachingapajca imatataj ashtahuan rurana canchij?

IMATA DECIDISHCATA PAJTACHISHUNCHIJ

13. ¿Fuerzata charingapajca imatataj rurana canchij?

13 Jehová Dios fuerzata cuchun mañashunchij. Ñucanchij ima decidishcata pajtachingapajca Yaya Diosmi fuerzata cushpa ayudanga (Filipenses 2:13). Chaimanta fuerza illaj sintirishpaca Dios paipaj espíritu santota cushpa ayudachun mañashunchij. Mañashcacunata cutichichunpish mañashpa catishunchij. Jesusca: ‘Diostaca mañacuichijlla paica espíritu santota cungami’ nircami (Lucas 11:9, 13).

14. Lucas 14:28-pi nishca shinaca ¿imatataj rurana canchij?

14 Ima shina pajtachinata ricushunchij (Lucas 14:28-ta liyipai). Imata decidishpaca shuj listapi ima shina pajtachinatami quillcana canchij. Imata rurana achca cajpica asha asha rurangapajmi ricuna canchij. Chashnami ña tucuita pajtachicushcata ricushun. Shinallataj asha asha pajtachicushcamantami shaicushca mana sintirishun. Por ejemplo, Corinto llajtamanta huauqui panicunataca apóstol Pabloca: ‘Cada semana callari punllapi chˈicanyachishpa cullquita huaquichichij’ nircami (1 Corintios 16:2).

15. ¿Imata decidishcataca imamantataj shuj listapi anotana canchij?

15 Imata ruragrishcata shuj listapi anotashpaca allimi pajtachishun (1 Corintios 14:40). Caipi yuyashun. Ancianocuna  tandanacujpica shuj ancianomi imata decidishcata anotan. Decidishcataca maijan pajtachinata, ima hora pajtachinatami anotan. Chashnami ancianocunaca imata ruragrishcata alli pajtachingacuna (1 Corintios 9:26). Ñucanchijpish chashnallatajmi rurai tucunchij. Por ejemplo, shuj punllapaj imata ruragrishcataca shuj listapimi anotai tucunchij. Chashnami imata decidishcataca rato pajtachishun.

16. Romanos 12:11-pi nishca shinaca ¿imatataj rurana canchij?

16 Ima decidishcata pajtachishpa catishunchij (Romanos 12:11-ta liyipai). Apóstol Pabloca Timoteotaca alli yachachij cashpapish chaita ruranataca ama saquinguichu nishpami consejarca. Pablo nishca shinaca ñucanchijpish Diospaj imata ruracushpaca pajtachishpami catina canchij (1 Timoteo 4:13, 16).

17. ¿Imamantataj tiempota mana yangamanta pirdina canchij?

17 Tiempota ama yangamanta pirdishunchij (Efesios 5:15, 16-ta liyipai). Imata ruragrishcata pajtachingapajca ima punlla, ima hora pajtachinata alli ricushunchij. Pajtachingapajca mana tucui ñucanchij munashca shina llujshingacama shuyanachu canchij (Eclesiastés 11:4). Yanga ruraicunapipish mana ocuparinachu canchij. Chaipi yalli ocuparishpaca alli decidishcata pajtachingapajca tiempota mana charishunchu (Filipenses 1:10). Shinallataj pajtachingapajca imapish jarcachunca mana saquinachu canchij. Tal vez ñucanchijlla cashca horasmi imata agllashcata pajtachina canchij. Ashtahuancarin celularta, Internettaca qˈuipamanmi ricui tucunchij. *

18, 19. ¿Ñucanchij decidishcacunata pajtachingapajca imapitaj yuyana canchij?

18 Ñucanchij decidishcacuna pajtarina cashcata yuyashunchij. Caipi yuyashun. Maiman rinata yuyarishpaca ñan huichcashca cajpipish shujtaj ñanta rishpami chaiman chayanchij. Chashnallatajmi ñucanchij decidishcacuna pajtarina cashcata yuyashpaca ima jarcaicuna tiyajpipish ñucanchij decidishcata pajtachishun (Gálatas 6:9).

19 Imata alli decidinaca huaquinpica mana jahuallachu can. Shinapish Jehová Diostami yachaita, fuerzata cuchun mañana canchij. Chashnami imata decidishcataca alli pajtachishun.

CANTO 65 ¡Sinchiyashpa ñaupajman catishunchij!

^ par. 5 ¿Imata decidishpaca allichu sintirinchij? ¿Imatapish alli agllashpaca pajtachi tucushcanchijchu? Cai yachaipimi alli decidinata, decidishcata ima shina pajtachinata yachashun.

^ par. 11 JW.ORG® paginapi “Bibliata liyingapaj programa” nishcata ricushpa Bibliamanta estudiangapaj shuj horariota agllai.

^ par. 17 Tiempota ama yangamanta pirdingapajca ¡Despertad! de abril de 2010 “Veinte consejos para que el tiempo le rinda” nishcata españolpi ricui.