Ima tiyashcata ricui

Ima tiyashcata ricui

 YACHAI 52

Yaya mamacuna huahuacunata alli yachachishpa huiñachichij

Yaya mamacuna huahuacunata alli yachachishpa huiñachichij

“Huahuacunaca Mandaj Diosmanta herenciamari” (SALMO 127:3).

CANTO 134 Huahuacunaca Dios cushca regalomi

CAITAMI YACHASHUN *

1. ¿Jehová Diosca yaya mamacunamanca imatataj mingashca?

JEHOVÁ Diosca Adanta Evataca huahuacunata charichunmi rurarca. Chaimantami Bibliapica: “Huahuacunaca Mandaj Diosmanta herenciamari” nin (Salmo 127:3). Caita alli intindingapajca caipi yuyashun. Cambaj amigochari canpi confiashcamanta achca cullquita mingan. Chashna confiashcata ricushpaca cushillami sintiringuiman. Pero cullqui ama chingarichunca allimi cuidanguiman. Chaitapish yallimi Diosca yaya mamacunamanca huahuacunaman yachachishpa huiñachichun mingashca.

2. ¿Cai yachaipica ima tapuicunamantataj yachashun?

2 ¿Cazarashcacuna huahuacunata charinata o mana charinataca pitaj agllana can? ¿Yaya mamacunaca huahuacuna cushilla causachunca imatataj rurana can? Cunanca yaya mamacuna imata ruranata alli agllangapajca Bibliapi tiyaj consejocunatami yachashun.

CAZARASHCACUNA IMATA RURANATA AGLLAJPICA RESPETASHUNCHIJ

3. a) ¿Cazarashcacuna huahuacunata charinata o mana charinataca pitaj agllana can? b) 1 Tesalonicenses 4:11-pi nishca shinaca ¿cunanlla cazarashcacunapaj familiapish amigocunapish imatataj mana rurana can?

3 Huaquin llajtacunapica familiacuna, amigocunami cunanlla cazarashcacunataca huahuacunata utca charichun munancuna. Asia llajtamanta Jethro * shuti huauquica:  “Congregacionpica maijan huauqui panicunaca huahuacunata mana charijcunataca huahuacunatami charina canguichij nincunami” ninmi. Shinallataj Asia llajtamanta huauqui Jefrica: “Huaquin yaya mamacunaca cancuna mayorlla tucujpi cancunata cuidachunmi huahuacunata charina canguichij nincunami” ninmi. Shinapish huahuacunata charinata o mana charinataca cazarashcacunallatajmi agllana can (Gálatas 6:5). Familiacunapish amigocunapish cunanlla cazarashcacuna cushilla causachun munashpapish paicunallataj decidichunmi saquina can (1 Tesalonicenses 4:11).

4, 5. a) ¿Cazarashcacunaca imamantataj parlanacuna can? b) ¿Huahuacunata charinata o mana charinataca ima horataj parlanacuna can?

4 Cazarashcacunaca huahuacunata ima hora charinata, mashna huahuacunata charinatami parlanacuna can. ¿Cai minishtirishca yuyaicunamantaca ima horataj parlanacuna can?

5 Manaraj cazarashpami huahuacunata charinata o mana charinataca parlanacuna can. Shinallataj huahuacunata huiñachingapaj listos cashcatami ricuna can. Huahuacunata cuidangapajpish achca tiempo, fuerzata minishtirishcatami yuyana can. Chaimantami huaquin cazarashcacunaca huahuacunata charingapajca shuj o ishqui huatacunata shuyancuna. Chashnami paicunaraj alli rijsinacushpa causanata yachancuna (Efesios 5:33).

6. ¿Llaqui punllacunapi causacushcamantaca maijan cazarashcacunaca imata ruranatataj agllashcacuna?

6 Noepaj quimsa churicunaca cazarashcahuanca huahuacunata mana charircachu. Huaquin cazarashcacunaca paicunapaj ejemplotami catishcacuna (Génesis 6:18; 9:18, 19; 10:1; 2 Pedro 2:5). Cunanca llaqui punllacunapimi causacunchij. Chaimantami Jesusca cunan punllacunataca Noepaj punllacunahuan chˈimbapurarca (2 Timoteo 3:1; Mateo 24:37). Caita yuyaipi charishpami maijan cazarashcacunaca huahuacunata manaraj charishpa Diosta ashtahuan sirvinata agllashcacuna.

Cazarashcacunaca huahuacunata charinata agllashpaca ima shina huiñachinatarajmi alli yuyana can. (Párrafo 7-ta ricui). *

7. Lucas 14:28, 29 y Proverbios 15:22-pi nishcacunataca ¿cazarashcacunaca ima shinataj pajtachi tucuncuna?

7 Cazarashcacunaca huahuacunata charinata agllashpaca ima shina huiñachinatarajmi alli yuyana can (Lucas 14:28, 29-ta liyipai). Huahuacunata charij yaya mamacunaca huahuacunata huiñachingapaj tiempo,  cullqui, fuerzami minishtirin nincunami. Chaimantami cazarashcacunaca: “¿Familiata mantiningapajca ishquindijchu trabajashun? ¿Imalla minishtirishcacunamantaca ishquindijchu igual yuyanchij? ¿Ishquindij trabajajpica huahuataca pitaj cuidanga? ¿Huahuaca ima shinashi huiñanga?” nishpa tapurina can. Cazarashcacunaca cai yuyaicunamanta parlanacushpami Proverbios 15:22-pi nishcacunata pajtachincuna (Proverbios 15:22-ta liyipai).

Huarmita cˈuyaj cusaca tucuipimi ayudana can. (Párrafo 8-ta ricui).

8. a) ¿Yaya mamacunaca ima llaquicunahuantaj chˈimbapurana can? b) ¿Cusaca paipaj huarmita cˈuyashpaca imatataj rurana can?

8 Yaya mamacunaca huahuacunata cuidangapajmi tiempota, fuerzata minishtincuna. Maijan yaya mamacunaca achca huahuacunata charishcamantami paicunata cuidanaca sinchi can nincuna. Por ejemplo, mamaca paicunata cuidacushcamantami Diosta mañangapaj, Bibliata estudiangapaj, huillangapajpish fuerzata mana charin. Shinallataj tandanacuicunaman rishpaca huahuacunata cuidana cashcamantami yachachishcacunataca mana tucuita intindincuna. Shinapish cusaca paipaj huarmita cˈuyashpaca tandanacuicunapi cashpapish huasipi cashpapish tucuipimi ayudana can. Yayaca familiahuan Diosta adoranataca cada semanami rurana can. Paipaj familiahuanpish huillanamanmi llujshina can.

HUAHUACUNA DIOSTA CˈUYACHUN YACHACHICHIJ

9, 10. ¿Yaya mamacunaca huahuacunata alli huiñachingapajca imatataj rurana can?

9 ¿Jehová Diosta huahuacuna cˈuyachunca yaya mamacunaca imatataj rurana can? ¿Cai mundopaj trampacunamantaca ima shinataj cuidana can? Caimanta yachashunchij.

10 Jehová Dios ayudachun mañaichij. Manoamanta paipaj huarmimantapish yachashun. Paicunaca Sansón shuti huahuatami charigrircacuna. Chaimantami Manoa runaca cai huahuata alli huiñachingapaj Jehová Diosta ayudahuai nishpa mañarca.

11. ¿Manoa shina yaya mamacunaca imatataj rurana can?

11 Bosnia-Herzegovina llajtamanta huauqui Paul paipaj huarmi Cristinaca Manoa runapaj ejemplotami catircacuna. Paicunaca: “Manoa shina alli yaya mamacuna cangapajca Yayitu Diosta ayudahuai nishpami mañarcanchij. Jehová Diosca ñucanchij mañashcacunataca Bibliahuan, publicacioncunahuan, tandanacuicunahuanmi cutichirca” nincunami (Jueces 13:8-ta liyipai).

12. ¿Josepish Mariapish huahuacuna Diosta cˈuyachunca imatataj rurarcacuna?

 12 Cancunapaj ejemplohuan yachachichij. Chashnami huahuacunapish allita ruranga. Josepish Mariapish paicunapaj ejemplohuanmi huahuacunaman yachachirca. Joseca familiata mantiningapaj trabajashpapish Jehová Diosta cˈuyachunmi huahuacunaman yachachirca (Deuteronomio 4:9, 10). Leypica Jerusalén Pascua fiestaman tucui familia richunca mana mandarcachu. Shinapish huaquin yaya mamacunaca chaiman rinaca shaicushcami can. Cullquipish minishtirishcami can nishpami yuyajcuna cashcanga. Shinapish Joseca cada huatami paipaj familiahuan Jerusalenman rij carca (Lucas 2:41, 42). Chashnami huahuacunamanca Diosta sirvina importante cashcata yachachirca. Mariaca Diospaj mandashcacunataca allimi rijsirca. Chaimantami paipaj huahuacuna Jehová Diosta cˈuyachunca sumaj shimicunahuan, ruraicunahuan yachachirca.

13. ¿Paul paipaj huarmi Cristinapish ima shinataj Josepaj Mariapaj ejemplota catircacuna?

13 Párrafo 11-pi parlashca Paul paipaj huarmi Cristinaca Josepaj Mariapaj ejemplotami catircacuna. Chashnami paicunapaj huahua Diosta cˈuyachun, sirvichun ayudarcacuna. Paicunaca: “Diosta cazuna alli cashcata ñucanchij huahua intindichunca ñucanchijrajmi Diospaj mandashcacunata pajtachircanchij. Chashnami ñucanchij huahuaca Diosta alli sirvij tucurca” nincunami.

14. ¿Yaya mamacunaca huahuacuna pihuan apanacucujtaca imamantataj yachana can?

14 Huahuacuna alli amigocunata agllachun ayudaichij. Yaya mamaca huahuacuna pihuan apanacucujta, imata ruracujtami yachana can. Shinallataj internetpi, celularpi pihuan parlacujtami ricuna can. Chaita mana rurajpica mana alli amigocunapaj yuyaicuna, ruraicunami huahuacunata pandachi tucun (1 Corintios 15:33, QC, 1989).

15. ¿Huauqui Jessiemantaca yaya mamacunaca imatataj yachai tucuncuna?

15 ¿Yaya mamacunaca computadorata, tabletta, celularta mana alli utilizanata yachashpapish imatataj rurana can? Filipinas llajtamanta Jessie shuti yayaca: “Computadorata, celularta ima laya utilizanata mana yachashpapish chaicunata huahuacuna alli utilizashpa ama llaquipi urmachunmi yachachircanchij. Shinallataj shuj shimita yachachun, tandanacuicunapaj alli prepararichun, Bibliata liyichunca computadorapi, celularpi ricuchunmi animarcanchij” ninmi. ¿Yaya mamacuna cancunapaj huahuacunahuanca jw.org® paginapi mensajecunata cachanamanta, fotocunata churanamantaca imata yachachishcata ricushcanguichijchu? (BIBLIAMANTA YACHAICUNA > JOVENCUNA nishcaman yaicui). ¿Shinallataj ¿Mashna tiempotataj celularpi tabletpi pasangui?, Alli yuyashpa internetta utilizai nishca videocunatapish internetpi huahuacunahuan ricushcanguichijchu? * Yaya mamacunaca cai ayudacunahuanmi huahuacunaman alli yachachi tucunguichij (Proverbios 13:20).

16. a) ¿Achca yaya mamacunaca imatataj rurashcacuna? b) ¿Diosta alli sirvij amigocunaca ima shinataj huahuacunata ayudan?

16 Huaquin yaya mamacunaca paicunapaj huahuacuna Diosta alli sirvij amigocunahuan tiempota pasachunmi ayudancuna. Costa de Marfil llajtamanta Dani y Bella shuti cusa huarmica superintendente de  circuito huauquitami paicunapaj huasipi saquirichun siempre invitajcuna carca. Huauqui Danica: “Superintendente de circuito huauqui ñuca churita animajpimi paica precursor tucurca. Cunancarin superintendente de circuito shinami ayudan” ninmi. Yaya mamacuna cancunapish chaitami rurai tucunguichij.

17, 18. ¿Yaya mamacunaca ima horamantataj huahuacunaman Diosmanta yachachina can?

17 Huahuacuna llulluraj cajpi yachachichij. Chashna yachachijpimi Diosta alli sirvijcuna tucunga (Proverbios 22:6). Timoteopaj mama Eunice, paipaj abuela Loidaca pai huacharishca punllamantami Jehová Diosmanta yachachircacuna (2 Timoteo 1:5; 3:15). Chaimi jovenyashpaca Timoteoca apóstol Pablohuan chˈican llajtacunapi Diosmanta huillashpa, huauqui panicunata visitarca.

18 Costa de Marfil llajtamanta John y Paula shuti cusa huarmica paicunapaj 6 huahuacuna Jehová Diosta cˈuyachunmi yachachircacuna. ¿Imatataj paicunaca rurarca? Paicunaca: “Eunice, Loida shinami huahuacunataca huacharishca pachamanta Jehová Diosmanta yachachircanchij” nincunami (Deuteronomio 6:6, 7).

19. ¿Yaya mamacunaca Diosmanta huahuacunaman yachachingapajca imatataj rurana can?

19 Deuteronomio 6:7-pica huahuacunaman Diosmanta cutin cutin yachachichun ninmi. Chashnami huahuacunaca yachashcata manataj cungaringacuna. Chaimantami yaya mamacunaca huahuacunaman yachachingapajca tiempota surcuna can. Huaquinpica huahuacunaman chaillatataj cutin cutin yachachina cashcamantachari shaicushca sintirincuna. Pero chaita rurajpimi huahuacunaca Bibliata intindishpa cazungacuna.

Yaya mamacunaca cada huahuaman ima shina yachachinatami ricuna can. (Párrafo 20-ta ricui). *

20. Salmo 127:4-pi nishca shinaca ¿yaya mamacunaca ima shinataj huahuacunata yachachina can?

20 Huahuacunata alli rijsichij. Salmo 127-pica huahuacunaca flechacuna shinami can ninmi (Salmo 127:4-ta liyipai). Chˈican chˈican flechacunami tiyan. Huahuacunapish mana tucuicunachu igual can. Chaimantami yaya mamacunaca paicunapaj  huahuacunataca cada unota ima shina yachachinata ricuna can. Israel llajtapi causacuj cusa huarmica paicunapaj ishqui huahuacuna Jehová Diosta sirvichunmi ayudarcacuna. Paicunaca: “Cada huahuamanmi Bibliamanta yachachircanchij” nincunami. Shinapish cada yayami paicunapaj huahuacunata ima shina yachachinata agllana can.

JEHOVÁ DIOSMI AYUDANGA

21. ¿Jehová Diosca ima shinataj yaya mamacunataca ayudan?

21 Maijan yaya mamacunaca huahuacunata alli huiñachinaca sinchimi can nishpami yuyancuna. Pero huahuacunaca Dios cushca regalomi can. Chaimantami Jehová Diosca yaya mamacunata ayudasha nin. Yaya mamacuna Diosta mañajpica paica Bibliahuan, publicacioncunahuan, shujtaj yaya mamacunapaj alli ejemplohuanmi ayudan.

22. ¿Huahuacunata alli huiñachingapajca imata ruranataj ashtahuan valishca can?

22 Maijancunaca huahuacunata huiñachingapajca 20 huatacunallami minishtirin nincunami. Pero yaya mamacunaca huahuacunataca tucui vidami yachachina can. Shinallataj huahuacunata alli huiñachingapajca cˈuyaita ricuchina, paicunahuan pasangapaj tiempota surcuna, Bibliamanta yachachinami ashtahuan valishca can. Huahuacunaman Bibliamanta yachachijpipish cada huahuami imata ruranata agllancuna. Asia llajtamanta pani Annaca: “Ñuca yaya mamataca Jehová munashca shina yachachishpa alli huiñachishcamantami agradicini. Chaimantami cushi causaita charini” ninmi (Proverbios 23:24, 25). Diosta sirvij familiapi huiñashca jovencunaca pani Anna shinami sintirincuna.

CANTO 59 Jehová Diosta cantashunchij

^ par. 5 ¿Cazarashcacunaca huahuacunata charinachu can? ¿Mashna huahuacunatataj charina can? ¿Huahuacunataca Jehová Diosta cˈuyachun, paita sirvichunca ima shinataj huiñachina can? Cai tapuicunata yachangapajca cunan punllacunapi cazarashcacunamanta, Bibliapi tiyaj consejocunamantapishmi yachashun.

^ par. 3 Huaquin shuticunatami cambiashcanchij.

^ par. 15 Junio de 2018 Tandanacuipi imalla ruranata ricuchij pˈangapi página 7-pi Redes socialesta utilizashpaca llaquicunamanta cuidari nishcata ricui.

^ par. 61 FOTOCUNAMANTA: Shuj cusa huarmica huahuacunata charinata, mana charinatami parlanacucun. Shuj huahuata charishpaca paicunapaj causai ima shina canapimi yuyacuncuna.

^ par. 65 FOTOCUNAMANTA: Shuj yaya mamaca cada huahua mana igual cashcata yachashpami chˈican chˈican yachachicuncuna.