Ima tiyashcata ricui

Ima tiyashcata ricui

 YACHAI 49

Trabajangapaj, samaringapajpish shuj punllami tiyan

Trabajangapaj, samaringapajpish shuj punllami tiyan

“Jacuchij, ñucanchijlla pi mana causan chulunllapi ashata samarishunchij” (MARCOS 6:31).

CANTO 143 Diospaj punllata mana shaicushpa shuyashunchij

CAITAMI YACHASHUN *

1. ¿Achca gentecunaca trabajomantaca imatataj yuyancuna?

¿ÑUCANCHIJ causan lado gentecunaca trabajomantaca imatataj yuyancuna? Achca llajtacunapica gentecunaca trabajashpallami causancuna. Chaimantami samaringapaj, familiahuan pasangapaj, Diosmanta yachangapajpish mana tiempota charincuna (Eclesiastés 2:23). Cutin shujtaj gentecunaca mana trabajasha nishpami caita chaita nincuna (Proverbios 26:13, 14).

2, 3. ¿Jehovapish Jesuspish ima shinataj trabajajcuna cashcata ricuchincuna?

2 ¿Jehovapish Jesuspish trabajomantaca imatataj yuyancuna? Jehová Diosca trabajanataca achcatami munan. Chaimantami Jesusca: “Ñuca Yayaca, trabajanataca mana saquinchu. Ñucapish trabajanataca mana saquinichu” nirca (Juan 5:17). Caipi yuyashun. Jehová Diosca achca angelcunatami rurarca. Shinallataj jahua pachapi, cai Allpapipish tucui imalla tiyajcunatami sumajta rurarca. Chashnami alli trabajaj cashcata ricuchirca. Salmota quillcaj runaca: “!Mandaj Dioslla, quiquin rurashcacunaca mana yupai tucuipajmari! Tucui chaicunataca quiquinpaj yachaihuanmari rurashcangui. Cai pachaca quiquin rurashcacunahuan jundamari” nircami (Salmo 104:24).

3 Jesusca Jehová Dios layami trabajanata yacharca. Por ejemplo, Yaya Dios jahua pachata rurajpimi paipish tucuita ‘Mandaj Dioshuan allichirca’ (Proverbios 8:27-31). Achca huatacuna qˈuipaca Jesusca cai Allpaman shamushpami Dios mingashca trabajota rurarca. Chaita ruranami paipajca  micuna shina carca. Jesús alli trabajaj cashcata ricushpami gentecunaca Yaya Dios cachashca cashcata cuentata curcacuna (Juan 4:34; 5:36; 14:10).

4. ¿Jehovapish Jesuspish samarina alli cashcataca ima shinataj ricuchircacuna?

4 ¿Jehovapaj, Jesuspaj ejemplocunaca mana samarina cashcatachu ricuchin? Mana chashnachu can. Jehová Diosca imata rurashpapish mana nunca shaicunchu. Chaimantami paica ñucanchij laya samarinata mana minishtin. Pero Éxodo 31:17-pica Yaya Diosca jahua pachata, cai pachata rurashca qˈuipaca ‘imata mana rurashpami samarirca’ ninmi. Cai versopica Jehová Diosca imallata ruranata saquishpa, paipaj rurashcacunata ricushpa cushicushcatami ricuchin. Jesuspish cai Allpapi cashpaca achcatami trabajarca. Shinapish paipaj amigocunahuan micungapaj, samaringapajmi tiempota surcuj carca (Mateo 14:13; Lucas 7:34).

5. ¿Diosta sirvijcunapajca maipica imata ruranataj sinchi can?

5 Bibliapica Diosta sirvijcunataca ama qˈuillacuna cashpa trabajajcuna canguichij ninmi (Proverbios 15:19). Diosta sirvijcunaca familiata mantiningapajmi trabajana canchij. Shinallataj predicangapaj, samaringapajmi tiempota surcuna canchij. Pero trabajangapaj, predicangapaj, samaringapaj tiempota llujchinaca maipica sinchimi can. Chaimanta ¿mashnata trabajana cashcata, mashnata samarina cashcata yachangapajca imatataj rurana canchij?

¿TRABAJANAPISH SAMARINAPISH IMAMANTATAJ ALLI CAN?

6. ¿Jesusca trabajanapish samarinapish minishtirishca cashcataca ima shinataj ricuchirca?

6 Rey Salomonca: “Tarpunapajpish, imata shayachingapajpish, huacanapajpish, asingapajpish, bailangapajpish” shuj punllami chayan nircami (Eclesiastés 3:1-8). Salomón nishca shinaca trabajanapish, samarinapish minishtirishcami can. Jesuspish chaitaca allimi yacharca. Huaquinpica paipish paipaj apostolcunapish mana achcata samari tucushpapish samaringapajmi tiempota surcurca. Shuj punllaca apostolcunaca predicacushcamantami micungapajpish, samaringapajpish tiempota mana charircacuna. Chaimantami Jesusca paicunataca: “Jacuchij, ñucanchijlla pi mana causan chulunllapi ashata samarishunchij” nirca (Marcos 6:30-34-ta liyipai).

7. ¿Imamantataj sábado punllapi samarina leymanta yachana canchij?

7 Huaquinpica trabajashca qˈuipa samarina o shujtaj cosascunata ruranaca allimi can. Ñaupa punllacunapipish Jehová Diosca israelitacunataca sábado punllapi samarichunmi mandarca. Cunanca ñucanchijca israelitacunaman cushca ley ucupica ña mana causacunchijchu. Pero sábado punllapi samarina leymanta yachanaca allimi can. Chashnami trabajanamanta, samarinamanta imata yuyana cashcata yachashun.

SÁBADO PUNLLACA SAMARINGAPAJ, DIOSTA ADORANGAPAJMI CARCA

8. Éxodo 31:12 al 15-pi nishca shinaca ¿israelitacunapajca sábado punllaca imapajtaj carca?

8 Génesis 2:2-pica: Taita Diosca “tucui imalla rurana cashcata tucuchishpaca canchis punllapica samarircami” ninmi. Shinapish Jehová Diosca trabajanatami munan. Chaimantami cunancama trabajashpa caticushca (Juan 5:17). Yaya Diosca israelitacunatapish sujta punllata trabajashpaca canchis punllapica samarinami canguichij  nircami. Sábado punllaca ‘Mandaj Diospajlla chˈicanyachishca cashcamantami’ Israelitacunaca samarina carcacuna (Éxodo 31:12-15-ta liyipai). Esclavocunapish, huahuacunapish pi mana trabajanachu carcacuna. Animalcunatapish mana trabajachinachu carcacuna (Éxodo 20:10). Israelitacunaca trabajomanta samaricushpami Diosmanta yachangapaj tiempota charircacuna. Sábado punllaca Diospaj pueblo cashcata, Egiptomanta Yaya Dios llujshichishcata yuyaringapajmi carca.

9. ¿Religionta pushajcunaca imatataj rurajcuna carca?

9 Israelitacunapajca sábado punllaca cushicuimi carca. Pero Jesús causan punllacunapica religionta pushajcunaca sábado punllapajca sinchi leycunatami churarcacuna. Paicunaca espiga granocunallatapish mana cˈutsanachu can, ungushcacunatapish mana jambinachu can nijcunami carca (Marcos 2:23-27; 3:2-5). Shinapish Jehová Diosca chaita rurachunca mana mandashcachu carca. Chaimantami Jesusca religionta pushajcuna pandaricushcata ricuchirca.

Jesuspaj familiaca sábado punllacunaca Diospaj Shimimantami yachajcuna carca. (Párrafo 10-ta ricui). *

10. Mateo 12:9 al 12-pi nishca shinaca ¿Jesusca sábado punllapica imatataj ruraj carca?

10 Jesuspish apostolcunapish Moisesman cushca leyta * cazushcamantami sábado punllapica samarijcuna carca. Chai leyta cazushpapish Jesusca ‘samana punlla cajpipish allita ruranataca mandashcaca mana jarcanchu’ nircami. Chaimantami paica sábado  punllapica allita rurashpa shujtajcunata ayudarca (Mateo 12:9-12-ta liyipai). Shinallataj Jesusca sábado punllapimi Diosta adoraj carca. Por ejemplo, Jesuspaj familiaca tucuita ruranata saquishpami sábado punllaca Diosmanta yachanaman rijcuna carca. Shinallataj Jesús huiñashpaca Samana punllapi tandanacuna huasiman rishpami Dios Quillcachishcata liyinaman rij carca (Lucas 4:15-19).

¿TRABAJOMANTACA IMATATAJ YUYANCHIJ?

11. ¿Jesusmanca pitaj sinchita trabajanata yachachirca?

11 Jesusta huiñachij yaya Joseca carpinteromi carca. Paica chai trabajota Jesusman yachachicushpaca Yaya Dios trabajomanta ima yuyashcatami yachachishcanga (Mateo 13:55, 56). Shinallataj Joseca familiata mantiningapajmi punllanta sinchita trabajaj carca. Jesusca chaita ricushpami sinchita trabajanata yacharca. Chaimantami Jesusca paita catijcunamanca: ‘Imata ruraj runapish causangapajca charinmi’ nirca (Lucas 10:7).

12. ¿Sinchita trabajanamantaca ima versocunapitaj parlacun?

12 Apóstol Pabloca Jesús yachachishcacunamantami huillashpa purij carca. Pero mantiniringapajpish sinchitami trabajaj carca. Tesalónica llajtapi Diosta sirvijcunamanca Pabloca, ‘ñucanchijca pipaj micunata yangamanta mana micurcanchijchu. Punllapish tutapish chai yuyai, mana shaicushpami trabajarcanchij’ nircami (2 Tesalonicenses 3:8; Hechos 20:34, 35). Chashna nishpaca Corinto llajtapica Aquilahuan Priscilahuan carpa huasicunata rurashpa trabajashcatami yuyarishcanga. Apóstol Pabloca “punllapish tutapish” trabajarcanchij nishpaca trabajacushcallataca mana nicurcachu. Ashtahuanpish sábado punllaca paipish judiocunapish mana trabajajcunachu carca. Chaimantami Pabloca sábado punllapi judiocunaman predicaj carca (Hechos 13:14-16, 42-44; 16:13; 18:1-4).

13. ¿Pablomantaca imatataj yachanchij?

13 Apóstol Pabloca mantiniringapaj trabajashpapish Diosmantami siempre huillarca (Romanos 15:16; 2 Corintios 11:23). Shujtajcunapish Diosmanta huillachunmi animarca. Chaimantami Áquila, Priscilapish Pablohuan Jesuspajta ruranapi ashtahuan ocuparircacuna (Romanos 12:11, NM ; 16:3). Apóstol Pabloca Corinto llajtapi causaj huauqui panicunataca: ‘Mandaj Diospajta ruranapi catiraichij’ nircami (1 Corintios 15:58, NM ; 2 Corintios 9:8). Shinallataj “maijanpish mana imata rurasha nijca ama micuchun” nircami (2 Tesalonicenses 3:10).

14. ¿Juan 14:12-pica Jesusca imamantataj parlacurca?

14 Cai tucuri punllacunapica Diosmanta huillana, Jesusta catijcuna tucuchun ayudanami ashtahuan valishca can. Jesusca paita catijcunamanca ñuca rurashcacunatapish yallitajmi ruranguichij nircami (Juan 14:12-ta liyipai). Chashna nishpaca paita catijcuna milagrocunata ruranamantaca mana parlacurcachu. Ashtahuanpish paicuna tucui llajtacunapi achca huatacunata huillana cashcatami parlacurca.

15. a) ¿Ima tapuicunatataj rurarina canchij? b) ¿Imamantataj chashna tapurina canchij?

15 Shuj trabajota charishpaca cashna nishpa tapurishunchij: ¿Alli trabajaj cashcatachu rijsincuna? ¿Mingashca trabajotaca allichu pajtachini? Chashna cajpica ñucanchij jefeca ñucanchijpimi confianga. Compañerocunapish Diosmanta huillajpica uyasha ningacunami. Shinallataj:  ¿Gentecunaca Diospaj Shimimanta alli yachachij cashcatachu rijsincuna? ¿Gentecunata visitangapajca allichu allichirini? ¿Diosmanta yachasha nijcunataca utcachu visitani? ¿Tucui laya predicanapichu siempre participani? nishpa tapurishunchij. Caicunata alli pajtachicushpaca cushillami huillashpa catishun.

¿SAMARINAMANTACA IMATATAJ YUYANCHIJ?

16. a) ¿Jesuspish apostolcunapish samarinamantaca imatataj yuyajcuna carca? b) ¿Achca gentecunaca imacunapitaj yallitaj yuyancuna?

16 Jesuspish apostolcunapish samarinatami minishtircacuna. Pero paicunaca samarinallapi, cushicunallapica mana dimastij yuyajcunachu carca. Cutin chai tiempopi causaj achca gentecunaca Jesús parlashca shuj charij runa shinallatajmi yuyajcuna carca. Chai charij runaca: “Cunantajca samarishpa, micucuilla, ubyacuilla, cushicucuilla” nirijmi carca (Lucas 12:19; 2 Timoteo 3:4). Cunan punllacunapipish achca gentecunaca cushicunallapi, samarinallapimi yuyancuna.

Trabajanapipish samarinapipish mana yallitaj ocuparishpami Yayitu Diospajta rurashpa cushilla sintirishun. (Párrafo 17-ta ricui). *

17. ¿Imallacunata rurangapajtaj tiempota surcuna canchij?

17 Ñucanchijpish Jesús shinami casha ninchij. Chaimanta samaringapajllaca mana tiempota surcunachu canchij. Ashtahuanpish predicangapaj, tandanacuicunaman ringapajmi cada semana tiempota surcuna canchij (Hebreos 10:24, 25). Shinallataj vacacioncunapi cashpa, maipi cashpapish tandanacuiman rinata, predicanataca mana saquinachu canchij (2 Timoteo 4:2).

18. ¿Rey Jesusca imata rurachuntaj munan?

18 Rey Jesucristoca trabajangapaj, samaringapajpish tiempota surcuna cashcatami yachachin. Paica Diosmanta alli yachachingapaj tucui pudirishcata rurachun, mantiniringapajpish trabajachunmi munan. Shinallataj samaringapaj tiempota llujshichichunmi munan. Chaimantami achcata cushicunchij (Hebreos 4:15). Catij yachaipica ñucanchijta juchamanta cacharichingapaj Jesús imata rurashcatami ricushun.

CANTO 38 Jehovami fuerzata cushpa cuidanga

^ par. 5 Jehová Diosca israelitacunataca sábado punllata samarichunmi mandarca. Cai yachaipimi chai leymanta yachashun. Chashnami trabajanapi, samarinapi imamanta mana yallitaj ocuparina cashcata intindishun.

^ par. 10 Jesusta catijcunaca sábado punllapi samaj cashcamantami Jesusta pambangapaj mishquijlla ashnacujcunata ruranata saquircacuna (Lucas 23:55, 56).

^ par. 55 FOTOCUNAMANTA: Sábado punllapimi Joseca paipaj familiata tandanacuna huasiman pushashpa ricun.

^ par. 57 FOTOCUNAMANTA: Shuj huauquimi paipaj familiata mantiningapaj sinchita trabajacun. Chai qˈuipaca cai huauquica samarina horaspi cashpapish, vacacionpi cashpapish paipaj familiahuanmi Diospajta ruracun.