Ima tiyashcata ricui

Ima tiyashcata ricui

Caitami tapushcacuna

Caitami tapushcacuna

Bibliapica ima juchata rurashcata o mana rurashcata yachangapajca ishqui huillajcunami minishtirirca ninmi (Números 35:30; Deuteronomio 17:6; 19:15; Mateo 18:16; 1 Timoteo 5:19). Pero Moisesman cushca leypica, cazaragrishca solterata shuj runa campopi japishpa capariricujta violajpica chai runataca huainayaj cashcatami ricujcuna carca. Pero chai solterataca ima culpata mana charishcatami ricujcuna carca. ¿Chai runa violashcata huillangapaj ishqui testigocuna mana tiyajpipish imamantataj culpajcuna carca?

Deuteronomio 22:25 al 27-pica chai runaca juchata rurashcatami ricuchin. Pero soltera ima culpata mana charishcatami yachachin.

Deuteronomio 22:23, 24-pica shuj cˈari cazaragrij solterahuan pueblopi chayarinacushcamantami parlan. Israel llajtapica ña cazaragrij solteracunataca cazarashcacunata shinami ricujcuna carca. Chaimantami shuj runaca cazaragrij huarmihuan chayarinacushpaca huainayashcamanta culpayuj carca. Cazaragrij huarmi pueblopi caparishca cajpica shujtajcuna uyashpa ayudanmanmi carca. Pero pai mana caparishcamantami paipish huainayashcamanta culpayuj carca (Deuteronomio 22:23, 24).

Shinapish Deuteronomio 22:25 al 27-pica: “Ashtahuanpish maijan cˈarica, shujtajhuan ari ninacushca soltera chagrapi puricujpi japishpa paihuan siriringachari. Chai solterata japirijtaca paillatami huañuchina canguichij. Chai solterapica huañuipaj jucha mana tiyashcamanta ama imata ruranguichijchu. Chashna japirishcaca, shuj runa shujtaj runata japishpa huañuchishca shinami. Shujtajhuan ari ninacushca soltera chagrapi pailla cajpi japirishcamantaca caparirijpipish ¿pitaj mitsanmanri?” ninmi.

Cai versocunapi ricuchishca shinaca, huarmica paita violasha nijpi pai caparirishcatami juezcunaca crircacuna. Chashna caparishcamantami paitaca ima culpata mana charijta ricurcacuna. Cutin cˈaritaca cazaragrij huarmita violashcamantami culpayuj cashcata ricurcacuna.

Moisesman cushca leypica huarmica ima culpata mana charishcatami yachachin. Shinapish cˈarica huainayashcamanta, violashcamanta culpayuj cashcatami ricuchin. Shinallataj juezcunaca chashna cashcata o mana chashna cashcata yachangapajca alli tapushpami ricujcuna carca. Chaimantami juezcunaca Dios munashca shina decidishcata crinchij (Éxodo 20:14; Deuteronomio 13:14; 17:4).