Ima tiyashcata ricui

Ima tiyashcata ricui

Pagui nijcuna cashunchij

Pagui nijcuna cashunchij

¿ÑUCACA pagui ninata yachanichu? Tucuicunami chashna nishpa tapurina canchij. Bibliapica tucuri punllapica mana pagui nijcunami tiyanga nircami (2 Timoteo 3:2). Maijan gentecunaca shujtajcunami tucuita ñucanchijman cuna can nishpami yuyancuna. Paicunaman imata cujpipish mana pagui ninata yuyancunachu. Chashna gentecunahuan tandanacunataca mana munanchijchu ¿nachu?

Shinapish Jehová Diosca paita sirvijcunataca tucuimanta pagui nijcuna cachunmi yachachin (Colosenses 3:15; 1 Tesalonicenses 5:18). Pagui nijcuna cashpaca cushillami causashun. Caita intindingapajca huaquin yuyaicunata yachashun.

PAGUI NIJCUNA CASHPACA ALLIMI SINTIRISHUN

Agradecidos cashpaca ñucanchijllatajmi alli sintirishun. Shujtajcunata agradicijpica paicunapish cushillami sintiringacuna. Caipi yuyashun, shujtajcunaca ñucanchijmanta preocuparishpami ñucanchijpaj imallatapish rurancuna. Paicuna chashna preocuparishcamantami alli sintirinchij. Boazpish Rutmanta preocuparishpami cˈuyaihuan ayudarca. Chaimi Rutca cushilla sintirirca (Rut 2:10-13).

Tucuimanta yallica Jehová Diostami pagui nina canchij. Dios ñucanchijman tucuita cushpa ima shina ayudashcataca allimi yachanchij. Shinapish tucui imallacunata Dios ñucanchijman cushcapi, ñucanchij familiata ima shina ayudashcapi yuyangapajmi tiempota surcuna canchij (Deuteronomio 8:17, 18; Hechos 14:17). Chashna rurashpaca Diostami shungumanta pagui nishun. Shinallataj Yayitu Dios ñucanchijta achcata cˈuyashcatami intindishun (1 Juan 4:9).

Jehová Diosca ñucanchijta llaquishpa cˈuyashcamantami tucuita cun. Chaimantami agradicina canchij (Salmo 100:4, 5). Chashna pagui nijcuna cashpaca cushillami causashun.

PAGUI NINATA YACHASHPACA ALLIMI SHUJTAJCUNAHUAN APANACUSHUN

Tucuicunami agradicichun munanchij. Chaimantami shujtajcuna ñucanchijpaj imata rurajpi agradicishpaca paicunahuan alli apanacushun (Romanos 16:3, 4). Agradicij gentecunaca paicunata ayudashca shinallatajmi shujtajcunatapish cˈuyaihuan ayudancuna. Ñucanchijpish chashna ayudashpaca cushillami sintirishun. Jesusca: “Imatapish cujmi, cushcata japijta yalli cushicun” nircami (Hechos 20:35).

Universidad de Californiamanta profesor Robert Emmons runaca: “Tucuicunami ayudachun minishtinchij. Huaquinpica ñucanchijmi shujtajcunata ayudanchij. Cutin maipica paicunami ñucanchijta ayudancuna. Chaita cuentata cushpami pagui ninata yachashun” nircami. Chaica ciertomi can. Por ejemplo, tal vez ñucanchij micuchunmi shujtajcunaca micunitata yanuncuna. Mana cashpaca, ñucanchij ungushca cajpica shujtajcunami ayudancuna  (1 Corintios 12:21). Pagui ninata yachajcunaca paicunata ima shina ayudashcataca yuyaipimi charincuna. Shinaca ¿pagui ninata yachanchijchu?

PAGUI NIJCUNA CASHPACA ALLICUNALLAPIMI YUYASHUN

Huaquinpica llaquicunatami yuyarinchij, cutin maipica allicunatami yuyarinchij. Pero pagui nijcuna cashpaca llaquicunata charishpapish allicunallapimi yuyashun. Allicunallapi yuyashpaca siempremi pagui nishpa causashun. Chashnami apóstol Pablo nishca shina yallitaj cushicushun (Filipenses 4:4).

Agradecidos cashpaca shujtajcunata mana envidiashunchu, imamantapish mana llaquirishunchu, cushillami sintirishun. Shinallataj agradicijcuna cashpaca ashtahuan charinacunapi mana yuyashpami minishtirishcacunallahuan cushilla causashun (Filipenses 4:12).

ALLICUNALLATA CHASQUISHCAPI YUYASHUNCHIJ

Diabloca Diosta sirvijcuna tucuri punllacunapi llaquilla causachunmi munan. Chaimantami paica llaquicunallapi yuyashpa causachun munan. Llaquicunallapi yuyashpa huillanaman llujshishpaca mana cushilla sintirishunchu. Gentecunapish mana uyasha ningacunachu. Ashtahuanpish agradicijcuna cashpaca Diospaj espíritu granota pˈucucuj shinami causashun. Por ejemplo, Dios tucuita cushcamantami cushilla sintirishun. Shinallataj pai cusha nishcacunapimi ashtahuan crishun (Gálatas 5:22, 23).

Diosta sirvijcunaca agradicijcuna cana cashcataca allimi intindinchij. Shinapish huaquinpica pagui nishpa cushilla sintirinaca sinchimi can. Chashna cajpipish mana desanimarinachu canchij. Ashtahuanpish tucuicunami agradicishpa cushilla causai tucunchij. Chaipajca cada punlla Diospish shujtajcunapish ñucanchijta ayudangapaj imallata rurashcapi yuyashunchij. Shinallataj Diosta agradicingapajca ishqui o quimsa yuyaicunata cada punlla anotashunchij. Chaita rurashpaca shungumantami pagui ninata yachashun. Llaquicunapipish mana yuyashpami cushilla causashun.

Cientificocunaca pagui nishpa causaj gentecunaca allicunallapi yuyashpami cushilla causancuna nincunami. Chaimanta Dios tucui allicunata cushcapi yuyashpa agradicishunchij. Chaita rurashpaca cushillami causashun. Bibliapica: “Tucui imapipish paita pagui nijcuna cachunmi Taita Diosca munan” ninmi (1 Crónicas 16:34, NM ; 1 Tesalonicenses 5:18).