Ima tiyashcata ricui

Ima tiyashcata ricui

 YACHAI 40

Tucuri punllacunapi cashcamanta Diospajta rurashunchij

Tucuri punllacunapi cashcamanta Diospajta rurashunchij

‘Diospajta ruranapi huiñashpa, sinchiyashpa, pi mana cuyuchipaj catiraichij’ (1 CORINTIOS 15:58).

CANTO 58 Quishpirisha nijcunata mashcashunchij

CAITAMI YACHASHUN *

1. ¿Tucuri punllacunapi causacushcataca imamantataj crinchij?

1914 HUATA huashamanta huacharishcacunaca tucuri punllacunapimi causacunchij (2 Timoteo 3:1). Jesusca tucuri punllacunapica terremotocuna, macanacuicuna, yaricaicuna, ungüicuna, millai gentecuna, Diosta sirvijcunatapish llaquichijcunami tiyanga nircami (Mateo 24:3, 7-9, 12; Lucas 21:10-12). Jesús nishcacuna pajtaricushcatami noticiacunapi uyashcanchij. Ashtahuancarin apóstol Pablo nishca shinami gentecunaca mana allita rurashpa causacuncuna (“ ¿Cunan punllacunapi causaj gentecunaca ima shinataj can?” nishca recuadrota ricui). Chaimantami Diosta sirvijcunaca tucuri punllacunapi causacushcata crinchij (Miqueas 4:1).

2. ¿Ima tapuicunamantataj yachashun?

2 1914 huatamanta cunancamaca achca tiempomi pasashca. Chaimantami cai shina causai ñalla tucurigrishcata yachanchij. ¿Tucuri punllacunapica imataj tucunga? ¿Tucuri punllacunapi cashcamantaca Jehová Diosca imata rurachuntaj munan? Cai tapuicunamantami yachashun.

¿TUCURI PUNLLACUNAPICA IMATAJ TUCUNGA?

3. 1 Tesalonicenses 5:1 al 3-pi nishca shinaca ¿gobiernocunaca imatataj ningacuna?

3 Pabloca Jehová Diospaj punllamantami parlarca. Jehovapaj punllaca Babilonia jatun pueblota o tucui panda religioncunata  llaquichijpimi callaringa. Shinallataj Jehovapaj punllaca Armagedón macanacuipimi tucuringa (Apocalipsis 16:14, 16; 17:5). Manaraj Jehovapaj punlla chayamujpimi gobiernocunaca “sumajtami causacunchij” ningacuna (1 Tesalonicenses 5:1-3-ta liyipai). * Cunan punllacunapica gobiernocunaca chˈican chˈican llajtacunapura tranquilo causanamantami parlancuna. * Shinapish Jehovapaj punlla chayanapajca mana gobiernocunallachu tranquilo causai tiyashcata yuyangacuna. ¿Imamantataj chashna ninchij? Gobiernocuna “sumajtami causacunchij” nishpa huillajpica achca gentecunami muyundij Allpapi de verdad alli causacushcata cringacuna. Shinapish gobiernocuna chaita nijpica “jatun llaqui punllaca” ñapishmi chayamunga (Mateo 24:21).

Sumajtami causacunchij nijpica mana crinachu canchij. (Párrafos 3 al 6-ta ricui). *

4. a) ¿Imatataj mana yachanchij? b) ¿Imatataj alli yachanchij?

4 Gobiernocuna imamanta sumajtami causacunchij nigrishcataca mana yachanchijchu. Ima shina nigrishcatapish mana yachanchijchu. Shuj cutinlla o achca cutin chashna nigrishcatapish mana yachanchijchu. Pero gobiernocuna muyundij Allpapi sumajtami causacunchij nijpica mana crina cashcatami alli yachanchij. Ashtahuancarin caita nijpica “Jehovapaj punlla” ña callarigrishcatami ricushun.

5. 1 Tesalonicenses 5:4 al 6-pi nishca shinaca ¿Jehovapaj punlla cˈuchuyamucushcata yachashpaca imatataj rurana canchij?

5 (1 Tesalonicenses 5:4-6-ta liyipai). Pabloca: ‘Jehovapaj punlla cˈuchuyamucujpi shujtajcuna shina dormicujcunaca ama cashunchij. Ashtahuanpish chaparashpa, alli yuyaihuan cashunchij’ nircami. Chaimantami politicapi ama chagruringapaj cuidarina canchij. Politicapi chagrurishpaca ‘cai pachapi causajcuna shinami’ tucushun (Juan 15:19). Ñucanchijca Diospaj gobiernolla alli causaita apamunatami crinchij.

6. a) ¿Gentecunataca ima shinataj ayudana canchij? b) ¿Gentecunamanca imamantataj yachachina canchij?

6 Shujtajcunapish rijcharishca cachunmi ayudana canchij. Chaipajca Bibliamantami yachachina canchij. Chaimi yachacujcunaca millai gentecuna ima tucuna cashcata yachangacuna. Jatun llaqui punlla callarijpica gentecunaca Jehová Diosta ña mana  mashcai tucungacunachu. Chaimantami utca huillana canchij. *

HUILLANAPI OCUPARISHUNCHIJ

Predicacushpaca Diospaj gobiernolla sumaj causaita apamuna cashcatami yachachinchij. (Párrafos 7 al 9-ta ricui).

7. ¿Jehová Diosca imata rurachuntaj munan?

7 Jehová Diosca paipaj punlla manaraj chayamujpimi gentecunaman huillachun munan. Chaimantami Diospajta ruranapi ocuparina canchij (1 Corintios 15:58). Jesusca tucuri punllacunapi ima tucunamanta parlashpaca, Diosta sirvijcunaca ‘alli huillaitami tucui cai pachapi huillanga’ nircami (Marcos 13:4, 8, 10; Mateo 24:14). Huillanaman llujshishpaca Jesús nishcatami pajtachicunchij.

8. ¿Predicajcuna miraricushcataca ima shinataj yachanchij?

8 Huatan huatanmi achca gentecunaca Diospaj gobiernomanta yachacuncuna. Chaimi cai tucuri punllacunapica muyundij Allpapi predicajcunaca ashtahuan mirarishcacuna. 1914-pica 5.155 predicajcunami 43 llajtacunapi tiyarca. Cunan punllacunapica 8.500.000 yalli predicajcunami 240 llajtacunapi tiyan. Pero predicanataca manaraj tucuchishcanchijchu. Chaimantami Diospaj gobiernollami tucui llaquicunata tucuchinga nishpa huillana canchij (Salmo 145:11-13).

9. ¿Imamantataj Diosmanta huillashpa catina canchij?

9 Yayitu Dios, huillanaca caipimi tucurin ningacamami huillashpa catina canchij. ¿Gentecunaca Jehová Diosta, Jesusta rijsingapajca mashna tiempotataj charincuna? (Juan 17:3). Mana yachanchijchu. Pero alli shungu gentecunaca manaraj jatun llaqui punlla callarijpimi Diosmanta yachai tucuncuna (Hechos 13:48, NM ). ¿Cai alli shungu gentecuna Diosta rijsichunca imatataj rurana canchij?

10. ¿Jehová Diosca gentecunaman yachachingapajca imallatataj cushca?

10 Jehová Diosca gentecunaman yachachingapajmi minishtirishca ayudacunata cushca. Por ejemplo, chaupi semana tandanacuipimi punta parlanacuipi, primera visitapi imata ruranata, Bibliamanta ima shina estudiota cunata yachachin. Shinallataj Jehová Diosca huillangapaj agllashca publicacioncunatami  cushca. Huillangapaj agllashca publicacioncunahuan predicashpaca

  • ima shina parlashpa callarinatami yachashun,

  • gentecuna Bibliamanta yachanata munachunmi ayudashun,

  • estudiantecunamanmi Bibliamanta alli yachachishun,

  • Bibliamanta yachasha nijcunata jw.org® paginapi yaicuchun, tandanacuicunamanpish shamuchunmi invitashun.

Tucuicunami cai publicacioncunahuan cada quilla predicana canchij. * Por ejemplo, maijan ashtahuan yachanata munajpica tigramungacamami shuj tratadota o revistata liyichun saquina canchij.

11. ¿Imamantataj Jehová Diosca Bibliamanta yachai nishca cursota cushca?

11 Cada quillami tucui ladomanta gentecuna Bibliamanta yachangapaj internetpi mashcancuna. Chaimantami Jehová Diosca jw.org paginapi Bibliamanta yachai * nishca cursota cushca. Huaquin gentecunaca Bibliata yachasha nishpapish ñucanchij yachachichunca mana munancunachu. Paicunamanca Bibliamanta yachai nishca cursoman ima shina yaicunatami yachachina canchij. Cai cursotaca paicuna intindishca shimipimi ricuchi tucunchij.

12. ¿Bibliamanta yachai nishca cursopica imatataj yachachin?

12 Cai cursopica Bibliamanta, Jehová Diosmanta, ñaupa tiempopi Diosta sirvijcunamantapishmi yachachin. Shinallataj Yayitu Dios cai Allpata shuj paraisota ruranatami yachachin. Cai tapuicunamantapishmi yachachin:

  • ¿Bibliaca ima shinataj ñucanchijta ayudan?

  • ¿Jehová, Jesús, angelcunaca picunataj can?

  • ¿Diosca imapajtaj gentecunataca rurarca?

  • ¿Imamantataj llaquicuna tiyan?

  • ¿Llaquicunata, huañuita tucuchingapajca Diosca imatataj ruranga?

  • ¿Huañushcacunataca Diosca ima shinataj causachinga?

  • ¿Diospaj gobiernoca cai Allpapi tiyaj gobiernocunataca ima shinataj tucuchinga?

13. ¿Bibliamanta yachai nishca curso tiyajpipish imamantataj gentecunamanca yachachina canchij?

13 Jesusca gentecunaman yachachishpa paita catijcunata rurachunmi mandarca. Chaimantami Bibliamanta yachachingapaj esforzarina canchij. Gentecunaca Bibliamanta yachai nishca cursoman yaicushpami paicunallataj Diosmanta yachai tucuncuna. Shinapish cai cursollapitajmi paicunataca testigo de Jehovacunata Diosmanta yachachihuai nishpa mañachun invitan. Gentecunaca ashtahuan yachanata munashpaca Bibliamanta yachachichunmi ñucanchijta tal vez mañangacuna. Por ejemplo, cada punllami muyundij Allpapi casi 230 gentecuna jw.org® paginaman yaicushpa Bibliamanta yachachichun mañancuna. Shuj huauqui o shuj pani yachachichun gentecuna minishtishcataca mana cungarinachu canchij.

JESUSPAJ DISCIPULOCUNA TUCUCHUN AYUDASHUNCHIJ

14. a) Mateo 28:19, 20-pi nishca shinaca ¿yachacujcunamanca imatataj yachachina canchij? b) ¿Imamantataj chashna yachachina canchij?

14 (Mateo 28:19, 20-ta liyipai). Yachacujcunamanca Diosta sirvina importante  cashcata, Diospaj gobiernotapish apoyana cashcatami yachachina canchij. Shinallataj Jesuspaj discipulocuna tucuchunca Diosman mingarina cashcata, bautizarina cashcatami yachachina canchij. Yachacujcunaca chaita rurashpallami Jehovapaj punlla chayamujpica quishpiringacuna (1 Pedro 3:21).

15. a) ¿Bibliamanta yachacujcuna mana cambiocunata rurajpica imatataj rurana canchij? b) ¿Imamantataj saquina canchij?

15 Cai shina causaica ñallami tucuringa. Chaimantami Bibliamanta yachacujcuna paicunapaj causaipi mana cambiocunata rurajpica yachachinata saquina canchij (1 Corintios 9:26). Shujtaj gentecunaca Diospaj gobiernomantami yachanata munancuna. Manaraj jatun llaqui punlla chayamujpimi paicunamanca predicana canchij.

PANDA RELIGIONCUNAMANTA CARUYASHUNCHIJ

16. Apocalipsis 18:2, 4, 5, 8-pica ¿Jehová Diosca imata rurachuntaj mandan? (Notata ricui).

16 Bibliamanta yachacujcunaca Jehová Diosta manaraj rijsishpaca panda religioncunapi participashpachari cullquita cujcuna carca. Shinapish Yaya Diosca paita sirvijcunataca panda religioncunamanta llujshichunmi mandan (Apocalipsis 18:2, 4, 5, 8-ta liyipai). Chaimantami yachacujcunaca huillanaman manaraj llujshishpaca panda religioncunapaj tucui ruraicunamanta caruyana can. Paicunaca maiman rishca iglesiamanpish shuj cartatami cachai tucun. Chai cartapica cai iglesiamantami llujshini nishpami huillana can. *

17. a) ¿Imahuan chagrurishca trabajocunatataj mana rurana canchij? b) ¿Imamantataj panda religioncunapaj mana trabajana canchij?

17 Diosta sirvijcunaca ñucanchij trabajocuna panda religioncunahuan ama chagrurichunmi cuidadota charina canchij (2 Corintios 6:14-17). Por ejemplo, shuj iglesiapajca mana empleados cashunchu. Shinallataj shuj empresapi trabajacushpaca, chai empresa shuj religionpaj edificiopi trabajachun nijpica, mana achca tiempota trabajashunchu. Ima negociota charishpapish panda religioncunapajca mana trabajashunchu. ¿Imamantataj panda religioncunapaj mana trabajanchij? Panda religioncunaca millai cosascunata rurashcamantami Diospaj ñaupajpica mana alli ricurincuna. Chaimantami ñucanchijca paicunapaj  millai ruraicunata mana apoyasha ninchij (Isaías 52:11). *

18. ¿Iglesiapi shuj trabajota rurachun mañajpica shuj huauquica imatataj rurarca?

18 Shuj huauqui ancianoca paipaj propio negociotami charirca. Paica carpinteromi carca. Cai huauquica shuj contratista runamanca iglesiacunapi mana trabajashachu nishcami carca. Shuj punllaca chai runaca iglesiapi shuj trabajota utca rurachunmi minishtirca. Chaimantami huauquitaca ayudahuai nishpa mañarca. Pero cai huauquica Biblia yachachishcacunata cazushcamantami chai trabajota mana chasquirca. Catij semanaca shuj periodicopica shujtaj carpintero chai iglesiapi cruzta churacushcatami fotota llujchishca carca. Cai huauqui chai iglesiapi trabajangapaj ari nishca cajpica paipaj fotomi periodicopi llujshinman carca. ¿Chaita rurashca cashpaca manachu chai huauqui ancianoca Jehová Diostapish, huauqui panicunatapish llaquichinman carca?

¿IMATATAJ YACHACUSHCANCHIJ?

19, 20. a) ¿Cai yachaipica imatataj ricushcanchij? b) ¿Catij yachaipica imatataj ricushun?

19 Ima shinami ricushcanchij, Jehovapaj punlla ña chayamugrijpimi gobiernocunaca sumajtami causacunchij ningacuna. Pero Jehová Diosca gobiernocuna sumaj causaita mana cui tucushcatami yachachishca. ¿Jatun llaqui punlla ña chayamucushcamantaca imatataj rurana canchij? Jehová Diospaj gobiernomanta huillashpami gentecunataca Jesuspaj discipulocuna tucuchun ayudana canchij. Shinallataj panda religioncunamantami llujshina canchij. Ñucanchij trabajocunapish panda religioncunahuan ama chagrurichunmi cuidadota charina canchij.

20 ¿Tucuri punllacunapica imacunataj ashtahuan pajtaringa? ¿Jehová Diosca imatataj ashtahuan rurachun mañan? ¿Jatun llaqui punlla shamungacamaca ima shinataj allichirishun? Cai tapuicunatami catij yachaipi ricushun.

CANTO 71 ¡Jehová Diospaj soldadocunami canchij!

^ par. 5 Ñallami gobiernocunaca sumajtami causacunchij ningacuna. Caicunata uyashpaca jatun llaqui punlla ña callarigrishcatami yachashun. ¿Chai punlla chayamungacamaca Jehová Diosca imata rurachuntaj munan? Cai yachaipimi cai tapuimanta yachashun.

^ par. 3 1 Tesalonicenses 5:1-3, NM : “Huauquicuna, ñalla ima tucunataca ñami yachanguichij. Chaimantami mana ña imata quillcachun minishtinguichij. Cancunaca Jehovapaj punlla tutapi shuhua shamuj shina shamunataca allimi yachanguichij. Gentecuna sumajtami causacunchij nijpica chai ratomi shuj chichu huarmita nanai japij shina jatun llaqui punllaca chayanga. Chai punllacunapica mana miticungacunachu”.

^ par. 3 Por ejemplo, Organización de las Naciones Unidasca muyundij Allpapi tranquilo causai tiyachunmi ashtahuan munanchij nincunami.

^ par. 6 Cai revistapi página 6-pi “Diosca manaraj castigashpami gentecuna cambiachun tiempota cun” nishcata ricui.

^ par. 10 Huillangapaj agllashca publicacioncunahuan ima shina yachachinata yachangapajca octubre de 2018 Huillaj revistapi “Diospaj Shimimanta yachachishunchij” nishcata ricui.

^ par. 11 Cai cursoca inglés y portugués shimipimi tiyan. Ñallami shujtaj shimicunapipish llujshinga.

^ par. 16 Huaquin organizacioncunaca pugllana lugarcunata, piscinacunata, maipi tandanacuna salacunatachari charincuna. Chai lugarcunapi ima culto, ima misata mana rurashpapish panda religioncunatami apoyancuna. Chaimantami Diosta sirvijcunaca chai organizacioncunapi mana yaicuna canchij.

^ par. 17 Panda religioncunahuan chagrurishca trabajocunapi ama yaicungapajca La Atalaya del 15 de abril de 1999-pi “Preguntas de los lectores” nishcata españolpi ricui.

^ par. 82 FOTOCUNAMANTA: Cˈatuna ucupi tiyacujcunaca televisionpi sumajtami causacunchij nijpimi mancharishcacuna can. Pero predicacionmanta shamushca cusa huarmi Testigocunaca mana crincunachu.