Ima tiyashcata ricui

Ima tiyashcata ricui

 YACHAI 18

Jesús mandashcata pajtachishunchij

Jesús mandashcata pajtachishunchij

“Caishujpaj chaishujpaj llaquicunata, apajcuna caichij. Cristopaj mandashcataca, chashna rurashpa pajtachichij” (GÁLATAS 6:2).

CANTO 12 Jatun Dios Jehová

CAITAMI YACHASHUN *

1. ¿Imatataj tucui shunguhuan crinchij?

JEHOVÁ DIOSCA paita alli sirvijcunatami tucui vida cˈuyashca. Cˈuyanataca manataj saquingachu. Shinallataj paica tucuitami alli ruran (Salmo 33:5). Diosca paita sirvijcuna llaquilla cajta ricushpaca achcatami llaquirin. Paica ñallami tucui mana allicunata tucuchinga. Chaitaca tucui shunguhuanmi crinchij. Diosca cˈuyaj, allita ruraj cashcamantami israelitacunamanca leycunata curca. Caitaca Yachai 9-pimi * ricurcanchij (Deuteronomio 10:18). Moisesman cushca leycunaca Yaya Dios paita sirvijcunamanta preocuparishcatami ricuchin.

2. ¿Ima tapuicunamantataj yachashun?

2 Jesusta catijcunaca huata 33-camallami Moisesman cushca leycunata cazurcacuna. Pero cˈuyaita ricuchishpa, allita rurashpami causana carca. Chaimantami Jesusca shuj mushuj mandashcata paicunamanca curca. Chai mandashcamantami cunanca yachagrinchij. Qˈuipaca: “¿Imamantataj cai mandashcaca Jehová Dios tucuita alli ruraj cashcata, cˈuyaj cashcata ricuchin? Cai leypi nishca shinaca ¿congregacionta pushajcuna, yaya mamacunaca ima shinataj shujtajcunataca tratana can?” nishca tapuicunatami yachashun.

CRISTOPAJ MANDASHCACA ¿IMATAJ CAN?

3. Gálatas 6:2-pi ‘Cristopaj mandashca’ nishpaca ¿imatataj nisha nin?

3 (Gálatas 6:2-ta liyipai). Diosta sirvijcunaca Jesuspaj mandashcatami pajtachina canchij. Jesusca paita catijcunataca  ‘caitami, chaitami rurana canguichij’ nishpaca mana tucuita quillcashpa saquircachu. Ashtahuanpish alaja consejocunata cushpami ima shina causanata yachachirca. Jesús yachachishcacunatami ‘Cristopaj mandashca’ ninchij. Caimanta ashtahuan yachangapajca catij parrafocunata ricushun.

4, 5. a) ¿Jesusca ima shinataj yachachirca? b) ¿Jesusca ima horataj yachachirca?

4 Jesusca paipaj shimicunahuanmi yachachirca. Paica Jehová Dios ima laya cashcata, gentecuna imamanta causashcata, Diospaj gobierno ñalla tucui llaquicunata tucuchina cashcatami yachachirca (Lucas 24:19). Shinallataj Jesusca ruraicunahuanmi paita catijcunaman ima shina causanata yachachirca (Juan 13:15).

5 ¿Jesusca ima horataj yachachirca? Paica cai Allpapi cashpami alli huillaicunata yachachirca (Mateo 4:23). Causarishca qˈuipapish yachachishpami catirca. Chaimi 500 yalli gentecunaman ricurishpaca “tucui cai pachata richij, ñuca yachacujcunata ruraichij” nishpa mandarca (Mateo 28:19, 20; 1 Corintios 15:6). Jahua pachaman tigrashca qˈuipapish congregacionta pushaj cashcamantami paita catijcunamanca yachachishpa catirca. Por ejemplo, ungidocunata animangapajca Jesusca huata 96-pimi apóstol Juanta shuj cartata escribichirca (Colosenses 1:18; Apocalipsis 1:1).

6, 7. a) ¿Maijan librocunapitaj Jesusmantaca yachai tucunchij? b) ¿Jesuspaj mandashcacunata cazungapajca imatataj rurana canchij?

6 Jesús yachachishcacunataca Mateo, Marcos, Lucas, Juan librocunapimi liyi tucunchij. Mushuj Testamentopi tiyaj shujtaj librocunatapish liyishpami Jesús ima shina yuyashcata intindishun. Cai librocunata quillcajcunaca Diospaj espíritu santota, ‘Cristopaj yuyaitami’ charircacuna (1 Corintios 2:16).

7 ¿Caimantaca imatataj yachanchij? Jesús mandashcacunataca huasipi, escuelapi, trabajopi, congregacionpipishmi cazuna canchij. Cai mandashcacunamanta ashtahuan yachangapajca Mushuj Testamentotami liyina canchij. Chaipi imallata yachashcatapish cutin cutinmi yuyarina canchij. Jesusca paipaj Yaya yachachishcatami yachachirca (Juan 8:28). Chaimantami Jesuspaj  mandashcacunata cazushpaca Jehová Diostapish cazucunchij.

YAYA DIOSPISH JESUSPISH CˈUYAJCUNAMI CAN

8. ¿Jesusca imamantataj paipaj mandashcacunata curca?

8 Yuyashun. Alli shayachishca huasipi causajcunaca tranquilomi sintirincuna ¿nachu? Pero chai huasita alli shayachingapajca ¿manachu puntapica ima shina ruranata alli yuyarina canchij? Chashna layallatajmi Jesusca paipaj mandashcacunata cungapajca puntapica alli yuyarirca. Paica cˈuyaj cashcamantami chai mandashcacunata curca. Chaimantami Cristopaj mandashcata cazushpaca tranquilo sintirinchij.

Shujtajcunata cˈuyaihuan tratashpaca ‘Cristo mandashcatami’ cazunchij. (Párrafos 9 al 14-ta ricui). *

9, 10. a) ¿Jesusca gentecunata cˈuyashcamantaca imallatataj rurarca? b) ¿Jesuspaj ejemplotaca ima shinataj catinchij?

9 Jesusca cˈuyajmi carca. Chaimantami gentecunaman yachachirca, ungushcacunata jambirca, yaricachijcunaman cararca, huañushcacunatapish causachirca (Mateo 14:14; 15:32-38; Marcos 6:34; Lucas 7:11-15). Caicunata rurangapajca paica tiempota, fuerzastami minishtirca. Shinapish paica cushillami shujtajcunata ayudarca. Ashtahuantajca paipaj causaita cushpami cˈuyashcata ricuchirca (Juan 15:13).

10 ¿Caimantaca imatataj yachanchij? Ñucanchijpish Jesuspaj ejemplotami catina canchij. Ñucanchijllapi yuyanapaj randica shujtajcunatami cˈuyaihuan ayudana, yachachina canchij. Cˈuyaimanta shujtajcunata yachachishpaca Jesuspaj mandashcacunatami pajtachicunchij.

11, 12. a) ¿Jehová Dios ñucanchijta cˈuyashcataca imamantataj yachanchij? b) ¿Jehová Diospaj ejemplotaca ima shinataj catina canchij?

11 Jesusca Jehová Dios cˈuyaj cashcatami ricuchirca. Paica Yaya Dios cada unomanta sustarij cashcatami yachachirca. Shinallataj Jesusca, Diospajca tucuicunami achca valishca can nircami (Mateo 10:31). Congregacionmanta caruyashcacunapish cutin tigrachun Dios munashcatami yachachirca (Lucas 15:7, 10). Ashtahuanpish Jesusca: “Taita Diosca, cai pachapi causajcunataca yallitaj cˈuyashpami, paipaj shujlla Churita cacharca” nircami (Juan 3:16).

12 ¿Caimantaca imatataj yachanchij? Jehová Diospaj ejemplotami catina canchij (Efesios 5:1, 2). Chaimantami congregacionmanta caruyashcacuna cutin tigrajpica cushilla chasquina canchij (Salmo 119:176). Shinallataj tucui huauqui panicunatami valorana canchij. Paicuna minishtishca horasmi ñucanchij tiempohuan, fuerzahuan ayudana canchij (1 Juan 3:17). Shujtajcunaman cˈuyaita ricuchishpaca Jesús mandashcatami pajtachishun.

13, 14. a) ¿Juan 13:34, 35-pica Jesusca imata rurachuntaj mandarca? b) ¿Imamantataj caica mushuj mandashca can? c) ¿Mushuj mandashcataca ima shinataj cazuna canchij?

13 Jesusca, ñuca cˈuyashca shina cancunapish caishuj chaishuj cˈuyanacuichij nishpami mandarca (Juan 13:34, 35-ta liyipai). Cai mandashcaca Moisesman cushca leypica mana tiyarcachu. Jesús ñucanchijta cˈuyashca shinami huauqui panicunatapish cˈuyana canchij. Ñucanchijta yallimi paicunataca cˈuyana canchij. Jesusca ñucanchijmantami paipaj causaita curca. Ñucanchijpish huauqui panicunata cˈuyashcamantami ñucanchij causaita cuna canchij.

14 ¿Caimantaca imatataj yachanchij? Huauqui panicunamanta causaita cuna cashpaca cunami canchij. Pero ¿paicunata cˈuyashcata ricuchingapajca imatataj ashtahuan rurana canchij? Por ejemplo, mayorlla huauqui panicunatami tandanacuicunaman pushashpa  ayudai tucunchij. Shuj huauquita o panita cushichingapajca ñucanchij munashcacunata ladoman saquishpami ayudana canchij. Jatun acapana, terremoto tiyajpipish huauqui panicunata ayudangapaj tiempota llujchina canchij. Tucui caicunata rurashpaca Jesusta cazucushcatami ricuchishun. Shinallataj huauqui panicunatapish congregacionpi tranquilo sintirichun ayudacushcatami ricuchishun.

CRISTOPAJ MANDASHCACA ALLITA RURANATAMI YACHACHIN

15-17. a) ¿Jesusca gentecunataca ima shinataj trataj carca? b) ¿Jesuspaj ejemplotaca ima shinataj catina canchij?

15 Bibliapica allita rurana canguichij nishpaca, Dios munashca shina tucuita rurana cashcatami nisha nicun. Shinallataj imata rurashpapish ñahuita ricushpallaca mana ruranachu canchij. Jesuspaj mandashcacunaca allita ruranatami yachachin. ¿Imamantataj chashna ninchij?

Jesusca tucui huarmicunatami alli trataj carca. Shujtaj gentecuna pˈiñashca huarmicunatapishmi chashna tratarca. (Párrafo 16-ta ricui). *

16 Jesusca siempremi allita ruraj carca. Religionta pushaj judiocunaca shujtaj llajtamanta cajcunata, mana estudiashcacunata, huarmicunatapishmi pˈiñajcuna carca. Pero Jesusca tucuicunatami alli trataj carca. Chaimantami shujtaj llajtacunamanta gentecuna paipi crijpica ayudaj carca (Mateo 8:5-10, 13). Paica charijcunamanpish, pobrecunamanpish, tucuicunamanmi yachachirca (Mateo 11:5; Lucas 19:2, 9). Shinallataj huarmicunatapish respetohuan, allimi trataj carca (Lucas 7:37-39, 44-50).

17 ¿Caimantaca imatataj yachanchij? Ñucanchijpish Jesús shinami tucui laya gentecunata alli tratana canchij. Chaimantami charijcunaman, pobrecunaman, shujtaj religionta catijcunamanpish huillana canchij. Cˈaricunapish huarmicunataca respetohuanmi tratana can. Chaita rurashpaca Jesús mandashcatami pajtachishun.

18, 19. a) ¿Allita ruranamantaca Jesusca imatataj yachachirca? b) ¿Jesús yachachishcamantaca imatataj yachanchij?

18 Allita ruranamanta Jesús imata yachachishcata ricushun. Paica “shujtajcuna cancunapaj allita rurachun nishpaca, cancunapish paicunapaj allita ruraichij” nircami (Mateo 7:12). Pero ñucanchijta mana alli tratajpica ¿imatataj rurana canchij? Jesusca paita catijcunamanca Jehová Diospi confiana cashcatami yachachirca. Paica, pi llaquichishcamanta tutapish punllapish caparijcunatami Diosca mana uniyashpa ayudanga nircami (Lucas 18:6, 7). Cai nishca shimicunaca pajtaringatajmi. Diosca ñucanchijcuna cai tucuri punllacunapi achca llaquicunata charijtaca allimi yachan. Chaimantami pai agllashca punllapi ñucanchijta ayudanga (2 Tesalonicenses 1:6).

19 ¿Caimantaca imatataj yachanchij? Jesús mandashcata pajtachishpaca tucuicunatami alli tratashun. Pi ñucanchijta llaquichishca cajpipish Jehová Dios ayudanata yachashpami cushilla sintirinchij.

YAYA MAMACUNA, ANCIANOCUNAPISH CˈUYAITA RICUCHICHIJ

20, 21. a) ¿Yaya mamacunapish, congregacionta pushaj huauquicunapish shujtajcunataca ima shinataj tratana can? b) ¿Cusaca paipaj huarmita cˈuyashcataca ima shinataj ricuchin? c) ¿Yaya mamacunaca huahuacunata cˈuyashcataca ima shinataj ricuchin?

20 Jesusca ñucanchijta cˈuyashcamantami mandashcacunata curca. Paica imata ruracushpapish cˈuyaita ricuchichunmi munan. Chaimantami yaya mamacuna, congregacionta pushaj huauquicunapish shujtajcunataca cˈuyaihuan tratana can.

21 Familia ucupi. Bibliapica: “Cristoca tandanacushca crijcunata cˈuyashpami, paillataj  curirca. Chai shinallataj cusacunapish, quiquin huarmicunata cˈuyaichij” ninmi (Efesios 5:25, 28, 29). Jesús mandashcata cazuj cusaca paillapi yuyanapaj randica huarmi imalla minishtishcatami ricun. Huaquin cˈaricunatami uchilla cajpica yaya mamacunaca maipish cachun tratajcuna carca. Chaimantami paicunapajca cˈuyaita ricuchinaca sinchi can. Pero Jesús mandashcata catingapajca cˈuyaita ricuchinatami yachana can. Cusa chaita rurajpica huarmipish paitaca cˈuyaita, respetotami ricuchinga. Yaya mamacunapish paicunapaj huahuacunata cˈuyashpaca llaquichij shimicunahuanca mana tratanachu can (Efesios 4:31). Chaipaj randica huahuacuna tranquilo sintirichun, paicunapi confiachun, paicunata cˈuyachunmi alli tratana can.

22. a) 1 Pedro 5:1-3-pi nishca shinaca ¿pitaj ovejitacunapaj dueño can? b) Ancianocunaca huauqui panicunataca ¿ima shinataj tratana can?

22 Congregacionpi. Huauqui panicunaca Jehová Diospaj ovejitacunami can. Chaimantami ancianocunaca mana paicunapaj cashcata yuyana can (Juan 10:16; 1 Pedro 5:1-3-ta liyipai). Diosca ancianocunamanmi paipaj ovejitacunata mingashca. Paica huauqui panicunata cˈuyaihuan, respetohuan tratachunmi munan (1 Tesalonicenses 2:7, 8). Paicunata chashna tratajpimi ancianocunaca Diospaj cˈuyaita chasquingacuna. Huauqui panicunapishmi paicunata respetangacuna.

23, 24. a) ¿Shuj huauqui o pani jatun juchata rurajpica ancianocunaca imatataj rurancuna? b) ¿Ancianocunaca imatataj yuyaipi charina can?

23 Israelitacuna Dioshuan alli cachunca ancianocuna, juezcunami ayudajcuna carca. Shinallataj jatun pˈiñanacuicuna tiyajpi, huañuchishca cajpi, violashca cajpi, shuhuashca cajpica paicunallatajmi ayudajcuna carca. Moisesman cushca leycunata catishpami chaita rurajcuna carca. Pero cunan punllacunapica ancianocunaca chai leycunata cazunapaj  randica ‘Cristopaj mandashcatami’ cazuncuna. Chaimantami shuj huauqui o pani jatun juchata rurashca cajpica Diospaj ñaujpajpi cutin alli ricurichun ayudancuna. Pero jatun pˈiñanacuicuna tiyajpi, huañuchishca cajpi, violashca cajpi, shuhuashca cajpica autoridadcunapaj maquipimi saquincuna. Cai laya problemacunata allichichunca Jehová Diosca autoridadcunatami churashca. Paicunami pi mana allita rurashca cajpica multata cobrancuna o huaquinpicarin carcelpi churancuna (Romanos 13:1-4).

24 Shuj huauqui o pani jatun juchata rurashpa shujtaj huauquita o panita llaquichijpica ¿ancianocunaca imatataj rurancuna? Paicunaca Bibliapi ricushpami imatapish alli decidincuna. Shinallataj Jesús yachachishcacunatapish yuyaipimi charincuna. Cai mandashcacunata catishpami llaquichishca huauquita o panita cˈuyaihuan ayudancuna. Shinallataj llaquichij huauqui o pani de verdad arrepintirishcata o mana arrepintirishcatami ricuncuna. Juchayuj runa arrepintirijpica Dioshuan cutin alli apanacuchunmi ayudancuna.

25. ¿Catij yachaipica imatataj yachashun?

25 Jesús mandashcata catishpami cushilla sintirinchij. Cai mandashcacunata cazushpaca tucuicunami congregacionpi tranquilos, alli sintirishun. Pero cai millai mundopi gentecunaca ashtahuanmi mana allita rurashpa catincuna (2 Timoteo 3:13). Chaimantami congregacionpi millai ruraicuna ama tiyachunca tucuicuna ricurana canchij. Por ejemplo, maijanpish shuj huahuata violashca cajpica ¿ancianocunaca imatataj rurana can? Catij yachaipimi caimanta ashtahuan yachashun.

CANTO 15 ¡Diospaj punta Churita alabashunchigari!

^ par. 5 Jehová Diosca paita alli sirvijcunataca alli tratachunmi munan. Paica llaquichishcacunatami cˈuyaihuan ayudan. Chaimantami cai yachaipi, catij ishqui yachaicunapica Jehová Dios cˈuyaihuan tucuita allita ruraj cashcata yachashun.

^ par. 1Diosca cˈuyashcata, cashcata rurashcatami ricuchishca” nishca yachaitaca febrero de 2019-manta Huillaj revistapi ricui.

^ par. 60 FOTOCUNAMANTA: Jesusca shuj viudapaj churi huañushcatami ricucun. Chaimantami achcata llaquirishpa chai joventa causachirca.

^ par. 62 FOTOCUNAMANTA: Jesusca Simón shuti runapaj huasipimi micucun. Shuj huarmica Jesuspaj chaquitami paipaj huiquicunahuan maillan. Qˈuipaca paipaj ajchahuanmi Jesuspaj chaquita chaquichin. Chai huashaca aceitehuanmi churan. Chai huarmica huainayaj huarmimi cashcanga. Chaimi Simón runaca paita pˈiñashpa mana ricunayachirca. Pero Jesusmi chai huarmita difindicun.