Ima tiyashcata ricui

Ima tiyashcata ricui

 YACHAI 24

Ñucanchij yuyaita cambiashunchij

Ñucanchij yuyaita cambiashunchij

“Diosmanta ama yachachun nishpa jatun tucushpa jarcaj yuyaicunataca chingachinchij” (2 CORINTIOS 10:5).

CANTO 124 Diosta cˈuyashcamanta cazushunchij

CAITAMI YACHASHUN *

1. ¿Apóstol Pabloca ungido huauqui panicunamanca ima consejotataj curca?

APÓSTOL PABLO causashca punllacunapica huauqui panicunaca ungidocunami carca. Pabloca paicunataca: “Cai pachapaj cajcuna shina rurashpa ama cushicuichijchu” nircami (Romanos 12:2). ¿Imamantataj Pabloca paicunataca chashna nishpa consejarca? (Romanos 1:7).

2, 3. a) ¿Diosmanta caruyachingapajca Diabloca imatataj ruran? b) ¿“Jarcacuj pirca” shina mana alli yuyaicunataca ima shinataj mishai tucunchij?

2 Diabloca panda yachachishcacunahuanmi huaquin huauqui panicunataca pandachishca carca. Chaimi Pabloca preocuparirca (Efesios 4:17-19). Diabloca cai Allpata mandacushcamantami ñucanchijtapish rato pandachi tucun. Paica Diosmanta caruyachingapajca huaquin trampacunatami churan. Por ejemplo, shujtajcunapaj ñaupajpichari alli ricurisha ninchij. O famosochari tucusha ninchij. Shinallataj ima shina huiñashcata, pihuan apanacuj cashcatapish Diabloca allimi yachan. Chaita yuyaipi charishpami Diabloca rato pandachi tucun.

3 ¿“Jarcacuj pirca” shina mana alli yuyaicunataca anchuchi tucunchijchu? Ari (2 Corintios 10:4). Pabloca: “Diosmanta ama yachachun nishpa jatun tucushpa jarcaj yuyaicunataca chingachinchij. Cristota cazungapajmi  ñucanchij tucui yuyaicunataca paiman curinchij” nircami (2 Corintios 10:5). Mana alli yuyaicunataca Yayitu Diospaj ayudahuanmi mishai tucunchij. Caipi yuyashun. Ñucanchij cuerpo venenohuan cajpica chai venenota anchuchingapajmi shuj jambita minishtinchij. Diablopaj yuyaicunaca cai veneno shinami ñucanchij yuyaicunataca mapayachin. Pero Diospaj Shimica shuj jambi shinami ñucanchij yuyaicunata chuyayachi tucun.

YUYAITA CAMBIASHUNCHIJ

4. ¿Bibliapi yachachishcacunata alli intindishpaca imatataj rurarcanchij?

4 Bibliapi yachachishcacunata intindishpami Diosta sirvinata agllarcanchij. Shinallataj huaquin cambiocunatami rurarcanchij (1 Corintios 6:9-11). Yayitu Diosmi mana alli ruraicunata saquichunca cada unota ayudarca. Chaimantami paitaca achcata agradicinchij.

5. Romanos 12:2-pi nishca shinaca ¿mana alli ruraicunapi cutin ama urmangapajca imatataj rurana canchij?

5 Manaraj bautizarishpaca mana alli ruraicunatami ladoman saquircanchij. Pero, ñami tucuita alli ruracuni nishpaca mana yuyanachu canchij. Ashtahuanpish mana alli ruraicunapi cutin ama urmangapajmi esforzarina canchij. Pabloca: “Cai pachapaj cajcuna shina rurashpa ama cushicuichijchu. Ashtahuanpish cancunapaj yuyaita mushujyachirashpa causaichij” nircami (Romanos 12:2). Cai versopi nishca shinaca ¿mana alli ruraicunapi cutin ama urmangapajca imatataj rurana canchij? Puntaca, Diablo pandachichunca mana saquinachu canchij. Qˈuipaca, ñucanchij yuyaicunatami cambiashpa catina canchij.

6. ¿Mateo 12:43 al 45-pi Jesús yachachishcacunamantaca imatataj yachanchij?

6 Pabloca ñahui ricuillapi cambiana cashcataca mana nisha nircachu. Ashtahuanpish  ima shina yuyashcata, imata munashcata cambiana cashcatami nicurca (“ ¿Nij tucushpallachu cambiana canchij?” nishca cuadrota ricui). Chaimantami cashna nishpa tapurina canchij: “¿Diosta alli sirvingapajca jahua ricuillapichu cambiacuni? o ¿ucu shungumantachu cambiacuni?” Jesusca Diosta alli sirvingapaj imata rurana cashcatami yachachirca (Mateo 12:43-45-ta liyipai). Jesús nishca shinaca “mana alli yuyaicunataca ñami ladoman saquishcani” nishpallaca mana saquirinachu canchij. Ashtahuanpish Diospaj yuyaicunatami ñucanchij yuyaipi churana canchij.

ÑUCANCHIJ YUYAITA MUSHUJYACHISHUNCHIJ

7. ¿Ucu shungumanta cambiangapajca imatataj rurana canchij?

7 ¿Ucu shungumantaca cambiai tucunchijchu? Ari. Bibliapica: “Cancunapaj shungupish, yuyaipish mushujyachishca caichij. Mushuj causaita churarichij. Mana llullapi nishca shina, cashcata rurachun, jucha illaj cachun, Diosman rijchaj cachun mushujyachishcami canguichij” ninmi (Efesios 4:23, 24). Ña ricushca shinaca sinchi cajpipish cambiai tucunchijmi. Chaimantami ñucanchij shungupi mapa munaicuna, millai yuyaicuna tiyashpa catichunca mana saquina canchij. Ashtahuanpish ucu shungumanta cambiangapajca tucui mana alli munaicunata, mana alli yuyaicunatami anchuchina canchij.

8, 9. ¿Shuj huauquica imamantataj paipaj yuyaita cambiana carca?

8 Cunanca shuj huauquipaj causaimanta yachashun. Paica Diosta manaraj rijsishpaca machadormi carca. Shinallataj rato pˈiñarishpami pihuanpish macanacudor carca. Pero paica Diosmanta yachai callarishpaca huaquin cambiocunata rurashpami bautizarirca. Chaita ricushpami paipaj comunidadpi causajcunaca cushilla sintirircacuna. Shinapish bautizarishca qˈuipallami shuj machashca runaca paihuan macanacusha nishpa paipaj huasiman chayarca. Callaripica cai huauquica mana macanacusha nircachu. Pero cai machashca runaca Jehová Diosmantami mana allita rimai callarica. Chaimi paica mana jarcari tucushpa, achcata colerashpa machashca runata macarca. ¿Imamantataj chaita rurarca? Paipaj ucu shungucamaca Diospaj yachachishcacunaca manaraj chayashcachu carca. Chaimantami yallitaj colerashpa chai runataca macarca.

9 Cai huauquica paipaj yuyaita cambiangapajmi esforzarirca (Proverbios 24:16). Huauqui ancianocunapaj ayudahuanmi cambiai tucurca. Chai huashaca paipish ancianomi tucurca. Shuj tutaca cai huauquica Tandanacuna Huasi canllapimi shayacurca. Chaipica cutinmi shuj machashca runaca shuj huauquita macasha nishpa cˈuchuyarca. ¿Chaita ricushpaca cai huauquica imatataj rurarca? Cai huauquica mana colerashpami machashca runahuan parlarca. Qˈuipacarin paipaj huasiman chayachunmi ayudarca. ¿Imamantataj chashna rurarca? Diospaj yachachishcacuna paipaj ucu shunguman chayajpimi mana rato colerana cashcata, humilde cana cashcata, cˈuyaj cana cashcata intindirca. Chaita rurashpaca Yayitu Diostami cushichirca.

10. ¿Imata rurangapajtaj esforzarina canchij?

10 Huaquin cambiocunata rurangapajca achca huatacunami minishtirin (2 Pedro 1:5). Jehová Diostaca achca huatacunatachari sirvicunchij. Pero shungupi, yuyaipi cambiashpa catingapajmi esforzarina canchij. ¿Ima shinataj cambiai tucunchij? Ricushun.

 ¿ÑUCANCHIJ YUYAITA CAMBIANGAPAJCA IMALLATATAJ RURANA CANCHIJ?

11. ¿Imamantataj Diosta mañana canchij?

11 Salmo librota quillcaj runa shinami Jehová Diosta mañana canchij. Paica: “¡Taita Dioslla, ñucapica chuya shunguta callarichihuai. Ñuca ucupica ima pandata mana ruraj espirituta cutin churahuai!” nishpami mañarca (Salmo 51:10). Mana alli yuyaicunata saquingapajca Jehová Diostami mañana canchij. ¿Yaya Dios ayudanataca imamantataj crinchij? Ezequielpaj punllacunapica sinchi shungu israelitacunami tiyarca. Chaita yachashpami Diosca: “Paicunamanca mushuj yuyaita, mushuj shungutami cusha. Rumi shunguta anchuchishpami, mushuj shunguta churasha” nirca (Ezequiel 11:19). Yayitu Diosca paicunapaj yuyaicunata cambiachunmi israelitacunata ayudasha nirca. Chashnallatajmi ñucanchijtapish ayudasha nin. ¿Manachu cai shimicunaca ñucanchijta animan?

12, 13. a) Salmo 119:59-pi nishca shinaca ¿imapitaj yuyana canchij? b) ¿Imatataj cada uno tapurina canchij?

12 Tucui punllacunami Bibliata liyina canchij. Liyishcapipish cutin cutinmi yuyana canchij. Shinallataj mana alli munaicunata ima shina cambianatami yuyana canchij (Salmo 119:59-ta liyipai; Hebreos 4:12; Santiago 1:25). “Ñami tucuita alli ruracuni” nishpaca mana yuyanachu canchij. Ashtahuanpish Diablo pandachicushcata cuenta japishpaca utca cambiangapajmi esforzarina canchij.

13 Cashna nishpa tapurishunchij: ¿Envidiosochu cani? (1 Pedro 2:1). ¿Shujtaj llajtamanta cashcamanta, alli escuelacunapi estudiashca cashcamanta, cullquiyuj cashcamantachu jatun tucushca sintirini? (Proverbios 16:5). ¿Shujtaj llajtamanta gentecunata, pobrellacunataca imapaj mana valishcata shinachu ricuni? (Santiago 2:2-4). ¿Diablopaj ruraicunahuan chagrurishca cosascunatachu munani? (1 Juan 2:15-17). ¿Huainayanahuan, macanacuicunahuan chagrurishca peliculacunatachu ricunata munani? (Salmo 97:10; 101:3; Amós 5:15). Cai tapuicunapi yuyashca qˈuipaca ñucanchij yuyaita cambiana cashcatachari cuenta japishun. Pero “jarcacuj pirca” shina mana alli yuyaicunata saquishpaca Jehová Diostami cushichishun (Salmo 19:14).

14. ¿Imamantataj alli amigocunata agllana canchij?

14 Alli amigocunatami agllana canchij. Huaquinpica pihuanmi yalli apanacunchij, paicuna shinami imatapish rurai, yuyai callarinchij (Proverbios 13:20). Trabajopi, escuelapica Jehová Dios shina yuyachunca mana ayudancunachu. Pero Tandanacuna Huasipica alli amigocunami tiyan. Paicunami cˈuyajcuna cachun, Diostapish alli sirvichun ayudancuna (Hebreos 10:24, 25).

DIABLO PANDACHICHUNCA AMATAJ SAQUISHUNCHIJ

15, 16. ¿Diabloca ima shina yuyachuntaj munan?

15 Diabloca pai shina yuyachunmi munan. Chaimantami paica Diospaj mandashcacunata ama cazuchun tucui laya pandachisha nin.

16 Diabloca: “¿Cancunataca Taita Diostajchu cai huertapi tiyaj yuracunamantaca ama micunguichij nirca?” nishpami Evataca pandachirca. Diabloca ñucanchijtapishmi pandachisha nicun (Génesis 3:1). Paica cˈaripura, huarmipura huainayanataca allita shina ricuchunmi munan. Shinallataj cumpleaños, Navidad fiestacunata Yaya Diosca chasquinmi nishpa yuyachunmi munan. Yahuartapish gentecuna churarichunca  Yaya Diosca saquinmi nishpa yuyachunmi munan. Congregacionmanta llujshichishcacunahuanpish apanacunalla cashcata yuyachunmi munan.

17. a) ¿Ñucanchijta pandachisha nishpa tapuicunata rurajpica imatataj rurana canchij? b) Colosenses 2:6, 7-pi mandashcacunata cazushpaca ¿ima shinataj causashun?

17 Ñucanchij crishcacunata mana alli intindishpaca dudai callarishunmi. Shinallataj panda yuyaicunatami chari callarishun. Jehová Diosmantapishmi caruyashun. ¿Cashna ama tucungapajca imatataj rurana canchij? Bibliapica: “Ashtahuanpish cancunapaj yuyaita mushujyachirashpa, shujtaj causaita causaichij. Chashna cashpami Diospaj munai ima cashcata, ima mana paipaj munai cashcata, ima shina cashcatataj alli agllai tucunguichij” ninmi (Romanos 12:2). Bibliata tucui punllacuna estudiashpaca Dios mandashcacuna ima mana panda cashcatami tucui shunguhuan crishun. Chashnami shuj yura sinchi sapicunata charij shina, “crinapi sinchi” cashun (Colosenses 2:6, 7-ta liyipai).

18. ¿Diablo ama pandachichunca imatataj rurana canchij?

18 Diospi tucui shunguhuan crichunca ni pi mana obligangachu. Cada unomi Diospi crinata o mana crinata agllana canchij. Mana alli yuyaicunatapish ladomanmi saquina canchij. Jehová Diostapish paipaj espíritu santota cuchunmi siempre mañana canchij. Ñucanchij munashca shina ama yuyangapajmi esforzarina canchij. Amigocunatapish allimi agllana canchij. Bibliapica: “Diosmanta ama yachachun nishpa jatun tucushpa jarcaj yuyaicunataca chingachinchij” ninmi (2 Corintios 10:5). Chaita rurajpica Diabloca mana pandachi tucungachu.

CANTO 50 Diosman mingarishpami mañani

^ par. 5 Uchillamantapacha mana alli costumbrecunata, mana alli ruraicunata yachashcamantami jatunyajpica chaicunata saquinaca sinchi ricurin. Cai yachaipimi ñucanchij yuyaita cambiangapaj imata rurana cashcata yachashun.