Ima tiyashcata ricui

Ima tiyashcata ricui

 YACHAI 23

Diablo ñucanchijta pandachichunca amataj saquishunchij

Diablo ñucanchijta pandachichunca amataj saquishunchij

“Riquichij yanga yachaicunahuan, ñaupamanta runacuna apamushca chushaj yuyaicunahuan cai pacha yuyaicunahuanca pipish cancunataca ama umachun” (COLOSENSES 2:8).

CANTO 96 Bibliaca Dios cushca valishca regalomi

CAITAMI YACHASHUN *

1. Colosenses 2:4, 8-pi nishca shinaca ¿Diabloca gentecunataca ima shinataj pandachin?

DIABLOCA Jehová Diosmantami caruyachisha nin. Paica tucuicuna pai shina yuyachunmi munan. Gentecunata pandachingapajca imallata munashcata, imallata yuyashcatami ricun (Colosenses 2:4, 8-ta liyipai).

2, 3. a) ¿Colosenses 2:8-pi mandashcataca imamantataj cazuna canchij? b) ¿Cai yachaipica imatataj ricushun?

2 ¿Diabloca ñucanchijtaca pandachi tucunchu? Ari, paica pandachi tucunmi. Colosenses 2:8-pi tiyaj shimicunataca apóstol Pabloca Diosta mana sirvijcunapajca mana quillcarcachu. Ashtahuanpish ungido huauqui panicunapajmi quillcarca (Colosenses 1:2, 5). Diabloca cai Allpamanmi shitashca cashca. Ima shinami Pablopaj tiempopi huauqui panicunata pandachisha nirca, chashnallatajmi ñucanchijtapish pandachisha nin (1 Corintios 10:12; Apocalipsis 12:9, 12, 17). Shinallataj millaicuna, umajcunaca ashtahuan millai tucushpami caticuncuna. Paicunapishmi ñucanchijta pandachisha nin (2 Timoteo 3:1, 13).

3 Cai yachaipica ‘chushaj yuyaicunahuan, yanga yachaicunahuan’ Diablo pandachisha nishcatami ricushun. Shinallataj ñucanchijta pandachingapaj Diablo quimsa trampacunata churashcatami ricushun  (Efesios 6:11). Cutin, catij yachaipica panda yuyaicunata ima shina saquinatami yachashun. Pero cunanca israelitacunata Diablo ima shina pandachishcata, ñucanchijtapish ama pandachichun imata rurana cashcatami yachashun.

DIABLOCA ISRAELITACUNATAMI PANDACHIRCA

4-6. Deuteronomio 11:10 al 15-pi nishca shinaca ¿israelitacunaca imatataj yachana carca?

4 Diabloca israelitacunatami yanga dioscunata adorachun pandachirca. Paica israelitacuna micunata minishtishcatami yacharca. Egipto llajtapica río Nilo nishca yacuca tucui campocunata regangapajmi tiyarca. Pero Dios cushca allpaca mana Egipto shinachu carca. Chai allpapica regadío yacuca mana tiyarcachu. Chaimantami israelitacunaca allpapi ima shina tarpunata, ima shina cozichanata yachana carcacuna. Paicunaca allpapi granocunata tarpungapajca tamya punllacunatami shuyana carca (Deuteronomio 11:10-15-ta liyipai; Isaías 18:4, 5). Israelitacunacunapaj ñaupa yaya mamacunaca allpapi ima shina tarpunatami yacharcacuna. Pero paicuna shitashca pambapi huañushcamantami, qˈuipa huiñaicunaca ima shina tarpunata, ima shina cozichanata mana yacharcacuna.

Israelitacunata pandachingapajca ¿Diabloca imatataj rurarca? (Párrafos 4 al 6-ta ricui). *

5 Jehová Diosca Egipto llajtapi shinaca ña mana trabajanguichijchu nircami. Paica israelitacunaman ima shina tarpunata, ima shina cozichanata yachachicushpaca: “Ñataj cancunapaj shungullapitaj umaringuichijman. Ñataj Mandaj Diosmanta anchurishpa, shujtaj dioscunapajta ruraj tucushpa chaicunapaj ñaupajpi cunguringuichijman” nircami (Deuteronomio 11:16, 17). Diosca ima shina tarpunata  yachachicushpaca ¿imamantashi ‘yanga dioscunata ama adoranguichij’ nishcanga?

6 Israelitacunapaj cˈuchullapica cananeo gentecunami causajcuna carca. Paicunaca campopica alli tarpujcuna, alli cozichajcunami carca. Shinapish, cananeocunaca Baal diosmi cielopaj dueño, paimi tamyata cun nishpami paita adorajcuna carca. Jehová Diosca israelitacunapish cai panda yuyaicunata crichunca mana munarcachu. Chaimantami Diosca cananeocunahuanca manataj tandanacunachu canguichij nishpa mandarca. Pero israelitacunaca Diosta mana cazushpami Baal diosta adorai callarircacuna (Números 25:3, 5; Jueces 2:13; 1 Reyes 18:18). Diabloca paipaj trampapi israelitacuna urmachunca ¿imatataj rurarca?

DIABLOCA ISRAELITACUNATACA ¿IMA SHINATAJ PANDACHIRCA?

7. ¿Diabloca ima shinataj achca israelitacunata pandachirca?

7 Diabloca israelitacuna causangapaj imalla minishtishcata ricushpami pandachirca. Dios cushca allpapica abril tucurimanta septiembrecamaca ashallatami tamyaj carca. Cutin octubremantaca achcatami tamyaj carca. Chaimi israelitacunaca alli granocunata cozichangapajca octubre quillamanta huichiman shuyajcuna carca. Chai llajta cˈuchullapi causajcunaca tamyata cachachunca yanga dioscunatami adorajcuna carca. Diabloca israelitacunataca achca granocunata charingapaj, alli causaita charingapajca chai llajta cˈuchullapi causajcuna shina yanga dioscunata adorana cashcatami crichirca. Chaimantami huaquin israelitacunaca achca yacuta charisha nishpa chˈican chˈican costumbrecunata rurashpa Baal diosta adorai callarircacuna.

8. Diabloca israelitacunata pandachingapajca ¿imallatataj rurarca?

8 Diabloca israelitacuna mapa munaicunata charichunmi pandachirca. Chai cˈuchullapi causajcunaca mapa ruraicunata rurashpami yanga dioscunata adorajcuna carca. Por ejemplo, paicunapaj templocunapica cˈaripura huarmipurami huainayajcuna carca. Yanga dioscuna alli granocunata cuchun nishpami chaita rurajcuna carca. Paicunaca caita ruranaca mana juchachu can nishpami yuyajcuna carca (Deuteronomio 23:17, 18; 1 Reyes 14:24). Israelitacunapish chai millai ruraicunata ricushpami yanga dioscunata adorai callarircacuna. Chashnami Diablo pandachichun saquircacuna.

9. Oseas 2:16, 17-pi nishca shinaca ¿Diabloca israelitacuna Diosmanta cungarichunca imatataj rurarca?

9 Diabloca israelitacuna Diosmanta cungarichunmi munarca. Profeta Jeremiaspaj punllacunapi israelitacunahuan ima tucushcata ricushun. Panda profetacunami israelitacuna Diospaj shutita cungarishpa Baal diosta adorachun pandachircacuna (Jeremías 23:27). Tal vez israelitacunaca Diostaca Jehová ninapaj randica Baal nijcunami carca. Baal shutica “amo” o “dueño” nisha ninmi. Israelitacunaca Jehová Dios, Baal diospish chaillataj cashcatami yuyarcacuna. Chaimantami Baal diospaj ruraicunahuan Jehová Diosta adorai callarircacuna (Oseas 2:16, 17-ta liyipai).

DIABLOCA CUNAN PUNLLAPISHMI GENTECUNATA PANDACHICUN

10. ¿Diabloca gentecunataca ima shinataj pandachicun?

10 Diabloca ñaupa punllacunapi shinallatajmi cunan punllacunapipish huaquin trampacunata churan. Gentecuna paicunapaj munaicunallapi yuyachun, huainayanata  allita shina ricuchun, Diostapish cungarichunmi pandachin. Caimanta yachashpa callarishun.

11. ¿Jehová Diosta gentecuna ama rijsichunca Diabloca imatataj rurashca?

11 Jehová Diosta gentecuna alli rijsichunca Diabloca mana munanchu. Apostolcuna huañushca qˈuipaca panda yachachijcunami tiyai callarirca. Paicunaca llullacunata nishpami yachachi callarircacuna (Hechos 20:29, 30; 2 Tesalonicenses 2:3). Cai panda yachachijcunaca Jehová Diospaj shutitami Bibliamanta anchuchishcacuna. Paicunaca “Señor”, “Amito”, “Mandaj Dios” nishpami churashcacuna. Caita rurashcamantami gentecunaca Diospaj shutitaca mana rijsincuna (1 Corintios 8:5). Shinallataj paicunaca Jehovapaj, Jesuspaj shuticunata Bibliapi churanapaj randica “Señor” nishpallami churashcacuna. Caita rurashcamantami gentecunaca Diospish Jesuspish shujlla Diosmi can nishpa crincuna. Shujtaj gentecunacarin Diostaca mana rijsi tucunchijchu nincunami. Pero Bibliapica mana chaita yachachinchu (Juan 17:3; Hechos 17:27).

Panda religioncunaca, huainayanaca mana juchachu can nishpami yachachincuna. (Párrafo 12-ta ricui). *

12. a) ¿Panda religioncunaca imatataj yachachishca? b) ¿Romanos 1:28 al 31-pi nishca shinaca gentecunaca imatataj rurashcacuna?

12 Diabloca gentecuna aicha munaita rurashpa causachunmi munan. Pai pandachijpimi israelitacunaca yanga dioscunata adorarcacuna, mapa ruraicunatapish rurarcacuna. Cunan punllacunapish panda religioncunaca huainayanataca allita shina ricuchunmi munancuna. Chaimantami achca gentecunaca Diostami sirvinchij nishpapish pai mandashcacunataca mana cazuncuna. Paicunaca tucui laya mapa ruraicunatami rurancuna. Cˈaripura, huarmipurami huainayashpa causancuna (Romanos 1:24-27, 32; Apocalipsis 2:20). Apóstol Pabloca cai gentecunamantami parlarca (Romanos 1:28-31-ta liyipai). Gentecuna chashna causajpipish ñucanchijca Dios mandashcatami cazuna canchij.

13. ¿Diabloca imata ricushpataj pandachin?

13 Diabloca ñucanchij imata minishtishcata ricushpami pandachin. Causaipi imata minishtishcamanta, familiacunata mantiningapajmi trabajana canchij. Tucuicunami alli trabajadorcuna canata munanchij  (1 Timoteo 5:8). Chaipajca escuelamanmi rinchij. Escuelacunapica causaipaj alli prepararingapajmi yachachin. Pero huaquinpica panda yuyaicunatami yachachincuna. Por ejemplo, Diosca mana tiyanchu, Bibliapish yanga librollami can nishpami yachachincuna. Shinallataj profesorcunaca “inteligente cashpaca evolucionpimi crina cangui” nincunami (Romanos 1:21-23). Pero Jehová Diosca chaitaca mana yachachinchu (1 Corintios 1:19-21; 3:18-20).

14. ¿Cai pacha yachachishcacunata catijcunaca ima shinataj causancuna?

14 Cai pacha yachachishcacunata catijcunaca Diospaj yachachishcacunaca imapaj mana valinchu nincunami. Paicunaca Diospajta ruranapaj randica ‘aichapaj ruraicunatami’ rurashpa causancuna (Gálatas 5:19-23). Shinallataj paicunaca jatun tucushcacunami can (2 Timoteo 3:2-4). Pero Diosca chashna jatun tucushca cachunca mana munanchu. Paica humildes cachunmi munan (2 Samuel 22:28). Maijan huauqui panicunaca universidadman rishcamantami Diosta mana sirvijcuna shina yuyai callarishcacuna. Cunanca shuj panimanta yachashun.

Cai pachapaj yachachishcacunaca ¿ima shinataj ñucanchij yuyaicunata pandachi tucun? (Párrafos 14 al 16-ta ricui). *

15, 16. ¿Shuj panipaj causaimantaca imatataj yachanchij?

15 Shuj panica 15 huatacunatami tiempo completopi sirvicun. Paica: “Universidadcunapi panda yuyaicunata yachachishcata uyashca jahuapish universidadmanmi rircani. Chai punllacunapica ñami testigo de Jehová carcani. Chashnapish ñucaca universidadman rishpaca mana ima  tucushachu nishpami yuyarcani. Pero qˈuipaca pandarishcatami cuenta japircani. Universidadpica achcatami estudiana carcani. Chaimantami Diosta mañangapaj, predicangapaj, tandanacuicunapaj alli prepararingapajpish mana tiempota charircani. Ñucaca Diosmanta mana caruyasha nircanichu. Chaimi universidadpi estudianata saquircani” ninmi.

16 Cai panica universidadpi estudiashcamantaca ¿ima shinataj yuyai callarirca? Paica: “Universidadpica shujtajcunapaj pandarishcacunallata ricuchunmi yachachirca. Chaimi ñucaca turi ñañacunapaj pandarishcacunallata ricuj carcani. Tucuita alli rurachunmi munarcani. Paicuna ñuca munashcata mana rurajpica colerashpami paicunamanta caruyaj carcani. Ñuca yuyaita cambiangapajca achca tiempomi minishtirirca. Jehová Dios yachachishcacunata siempre cazuna cashcatami cunanca intindini. Yaya Diosca ñucanchij bienpajllatajmi yachachin. Paipaj mandashcata utca cazushca cashpaca, cashna shina problemacunataca mana charinmanchu carcani “ ninmi.

17. a) ¿Imata rurashpataj catina canchij? b) ¿Catij yachaipica imatataj yachashun?

17 Chushaj yachachishcacunahuan, yanga yuyaicunahuan Diablo pandachichun amataj saquishunchij (1 Corintios 3:18; 2 Corintios 2:11). Jehová Diosmanta amataj cungaringapaj, pai munashca shina causangapajmi esforzarina canchij. Pero Diablo ñucanchijta pandachicushcata cuenta japishpaca ¿imatataj rurana canchij? Catij yachaipimi cai panda yuyaicunata saquingapaj imata rurana cashcata yachashun (2 Corintios 10:4, 5).

CANTO 49 Jehovapaj shunguta cushichishunchij

^ par. 5 Diabloca gentecunataca ratomi pandachin. Paica gentecuna libresmi canchij nishpa yuyachunmi crichishca. Pero chai gentecunaca Diablo munashcatami rurashpa causacuncuna. Cai yachaipimi gentecunata pandachingapaj Diablo imallata rurashcata yachashun.

^ par. 48 FOTOCUNAMANTA. Israelitacunatami cananeocunaca Baal diosta adorachun, huainayachunpish pandachicuncuna.

^ par. 51 FOTOCUNAMANTA. Shuj religionpimi cˈaripura, huarmipura siririnata allita shina ricuncuna. Chaitami shuj letreropi ricuchicun.

^ par. 53 FOTOCUNAMANTA. Shuj joven panimi universidadman rin. Chaipimi paipaj profesoraca, yachaj gentecunami tucui llaquicunata tucuchi pudin nishpa yachachin. Chaita uyashpami cai panipish, paipaj compañerocunapish cushilla sintirincuna. Chaimantami Tandanacuna Huasiman rishpaca chaipi imata yachachishcata mana atento uyacun, huauqui panicunapaj pandarishcacunallata ricucun.