Ima tiyashcata ricui

Ima tiyashcata ricui

 YACHAI 33

Diosta uyajcunami quishpiringacuna

Diosta uyajcunami quishpiringacuna

“Canllatajpish cuidaringui. Imata yachachicushcatapish alli yuyaringui. Ima shina yachachishca shinallataj causangui. Chashna cashpami, canllatajpish quishpiringui, can yachachishcata uyajcunapish quishpiringacuna” (1 TIMOTEO 4:16).

CANTO 67 Diospaj Shimita huillashunchij

CAITAMI YACHASHUN *

1. ¿Ñucanchij familiacunapish imata rurachuntaj munanchij?

PANI Paulineca *: “Jehová Diosta rijsi horamantami ñuca tucui familiahuan paraíso Allpapi causanata munarcani. Ashtahuantajca ñuca cusa Walter, ñuca churipish Diosta sirvichunmi munarcani” ninmi. Cai pani shinallatajmi ñucanchij familiacunapish Diosta sirvichun munanchij.

2. ¿Cai yachaipica ima tapuicunatataj yachashun?

2 Familiacuna Diosta sirvichunca mana obliganachu canchij. Pero Diosmanta uyana munaita charichunmi ayudai tucunchij (2 Timoteo 3:14, 15). ¿Familiacunamanca imamantataj predicana canchij? ¿Paicuna ima shina sintirishcapica imamantataj yuyana canchij? ¿Familiacunapish Jehová Diosta cˈuyachunca imatataj rurana canchij? ¿Huauqui panicunapish ima shinataj ayudai tucuncuna? Cai tapuicunatami yachashun.

¿FAMILIACUNAMANCA IMAMANTATAJ PREDICANA CANCHIJ?

3. 2 Pedro 3:9-pi nishca shinaca ¿imamantataj familiacunaman predicana canchij?

3 Diosca ñallami Diablopaj ruraicunata tucuchinga. Pero huiñai causaipaj cajcunallami quishpiringacuna (Hechos 13:48). Shujtaj gentecunaman Diosmanta huillangapajca ñucanchij tiempo, fuerzatami llujchinchij. Ñucanchij familiacunapish Diosta sirvichun nishpami paicunaman predicanchij. Shinallataj Yayitu Diosca, “shujllapish chingarichunca mana munanchu.  Ashtahuanpish tucuicuna arrepintirichunmi munan” (2 Pedro 3:9-ta liyipai *).

4. ¿Familiacunamanca maipica ima shinataj predicashcanchij?

4 Diospaj Shimitaca maipica alajata o mana alajatachari huillanchij. Por ejemplo, mana rijsishca gentecunamanca alli yuyashpachari predicashcanchij. Cutin ñucanchij familiacunamanca sinchi sinchitachari predicashcanchij.

5. ¿Familiacunaman predicacushpaca imatataj yuyaipi charina canchij?

5 Familiacunaman punta cutin Diosmanta huillacushpaca mana alli yuyashpachari predicarcanchij. Chaimi sumajta parlashpami predicana carcani nishpa llaquilla sintirinchij. Pabloca Diosta sirvijcunamanca: ‘Cancunapaj rimaicunaca cachihuan mishquichishca shina uyanalla cachun. Chashna cashpami pimanpish jahualla imata cutichina cashcataca yachanguichij’ nircami (Colosenses 4:5, 6). Familiacunaman predicacushpaca Pablo nishcacunatami yuyaipi charina canchij. Caita mana rurajpica paicunaca mana allimi sintiringacuna. Diosmantapish ña mana uyanata munangacunachu.

¿FAMILIACUNATA AYUDANGAPAJCA IMATATAJ RURANA CANCHIJ?

Familiacuna ima shina sintirishcapi yuyajpi, alli ejemplota ricuchijpica Diosmantami yachasha ningacuna. (Párrafos 6 al 8-ta ricui). *

6, 7. ¿Imamantataj mana testigo cusa o huarmi ima shina sintirishcapi yuyana canchij? Shuj ejemplomanta parlai.

6 Familiacuna ima shina sintirishcapi yuyashunchij. Punta parrafopi parlashca Paulineca: “Callaripica ñuca cusamanca Bibliallamantami parlaj carcani. Chaimantami punllapi imata rurashcataca mana parlanacuj carcanchij” ninmi. Paipaj cusa Walterca Bibliamantaca ashallatami yacharca. Chaimi  Pauline parlashcataca mana intindirca. Ashtahuancarin paipaj cusaca ñuca huarmica chai religionllapimi dimastij ocuparicun. Chai religionca ñucanchijta pandachishpami peligropi churacun nishpami mancharirca.

7 Paulineca tandanacuicunapi, predicacionpi o imata rurangapajpish huauqui panicunallahuan pasaj cashcatami cuenta japirca. Paica: “Ñuca cusa huasiman chayashpaca ni pi mana chaipi cashcamantami sololla sintirij carca” ninmi. Cusa cashcamantaca huarmihuan, huahuahuan pasanatami munarca. Walterca “Pauline ima laya gentecunahuan tandanacuj cashcataca mana rijsinichu. Chaimantami ñucamantaca mana sustarinchu, paipaj amigocunamantami yalli sustarin” nishpa yuyarca. Chaimi Paulinetaca canmantami divorciarisha nini nishpa rimarca. ¿Manachu Paulineca paipaj cusa ima shina sintirishcapi yuyana carca?

8. 1 Pedro 3:1, 2-pi nishca shinaca ¿familiacunaca imatataj ashtahuan ricuncuna?

8 Alli ruraicunahuan ricuchishunchij. Familiacunaca ñucanchij ruraicunatami ashtahuantajca ricuncuna (1 Pedro 3:1, 2-ta liyipai). Paulineca tiempohuanca chaitami cuenta japirca. Paica: “Ñuca cusito ñucanchijta cˈuyashcamanta mana divorciarisha nishcatami yacharcani. Pero divorciarinami canchij nishpa rimashcata yuyarishpami, Dios mandashca shina causana cashcata intindircani. Ñuca ruraicunahuanmi alli ejemplota ricuchina carcani” ninmi. Chaimantami Paulineca paipaj cusahuan Diosmanta parlanacunataca mana obligarca. Ashtahuanpish punllapi imalla rurashcacunamantami parlai callarirca. Walterca paipaj huarmi mana colerajlla cashcata, paipaj churipish alli comportarijtami ricurca (Proverbios 31:18, 27, 28). Chaimantami Diosmanta yachanata munarca (1 Corintios 7:12-14, 16).

9. ¿Familiacunataca imamantataj ayudashpa catina canchij?

 9 Ayudashpa catishunchij. Jehová Diosca tucuicuna paimanta yachashpa huiñai causaita charichunmi munan. Chaimantami paita sirvijcunata huillanaman cachan (Jeremías 44:4). Pabloca Timoteomanca shujtajcunata ayudanata mana saquinachu cangui. Chashnami canpish, canta uyajcunapish quishpiringuichij nircami (1 Timoteo 4:16). Familiacunata cˈuyashcamantami paicunapish Diosta rijsichun munanchij. Pani Pauline rimaicunahuan, ruraicunahuan alli ejemplota ricuchijpimi paipaj familiaca Diosmanta yachai callarirca. Cunanca cai panica paipaj cusahuanmi precursorcuna can. Congregacionpipish paipaj cusaca ancianomi can.

10. ¿Imamantataj pacienciata charina canchij?

10 Pacienciata charishunchij. Diosmanta yachai callarishpaca ñucanchij causaita, crishcacunatapishmi cambiarcanchij. Chaita ricushpami familiacunaca llaquirishcangacuna. Shinallataj huaquin fiestacunapi ña mana participajpi, politicapi ña mana chagrurijta ricushpaca pˈiñarincunachari (Mateo 10:35, 36). Shinapish paicunaca mana nunca cambiangachu nishpaca mana yuyanachu canchij. Ñucanchij crishcacunata paicunaman parlanata saquishpaca juzgacushca shinami canchij. Huiñai causaitapish ña mana charingachu nishpa yuyacushca shinami canga. Pero Yaya Diosca mana ñucanchijta juzgachun churashcachu. Jesustami juzgachun churashca (Juan 5:22). Familiacunahuan pacienciata charijpica tiempohuanca Diosmanta uyanatachari munangacuna (“JW.ORG paginata utilizashunchij” nishca recuadrota ricui).

11-13. ¿Pani Alice paipaj yaya mamata alli tratashcamantaca imatataj yachanchij?

11 Familiacunata alli tratashpapish ñucanchij decidishcacunata cambiachun ama saquishunchij (Proverbios 15:2). Alice shuti panimanta yachashun. Paica paipaj familiamanta carupi causacushpami Bibliamanta yachai callarirca. Paipaj yaya mamaca Diospi mana crijcuna, politicapipish chagrurijcunami carca. Aliceca imalla yachacushcata huillanatami munarca. Paica: “Imalla yachacushcata, imalla ruracushcata mana utca parlajpica familiacunaca ashtahuanmi pˈiñaringacuna” ninmi. Chaimantami pani Aliceca Bibliamanta huaquin yuyaicunata agllashpa paipaj yaya mamaman cartacunata escribishpa cacharca. Por ejemplo, cˈuyaimanta paicuna imata yuyashcata yachangapajmi quillcarca (1 Corintios 13:1-13). Shinallataj yaya mama paita uchillapi ima shina huiñachishcamantami agradicij carca. Regalocunatapishmi cachaj carca. Paicunata visitaman rishpaca huasi ucu ruranacunapimi ayudaj carca. Pero paipaj crishcacunata parlai callarijpica yaya mamaca mana uyasha nircacunachu.

12 Aliceca yaya mamapaj huasipi cashpaca punllantami Bibliata liyij carca. Mamaca chaita ricushpami Bibliata yachana paipaj ushushipaj importante cashcata cuenta japirca. Yayaca ushushi imamanta cambiashcatami yachasha nirca. Biblia yachachishcacunapish pandaricushcatami ricuchisha nirca. Chaimantami Bibliata yachai callarirca. Pani Aliceca: “Bibliallapitaj sumaj shimicunata quillcashpami ñuca yayituman curcani” ninmi. Yayaca Bibliata liyishpaca ima pandata mana ricushpami mancharishca saquirirca.

13 Familiacunataca allimi tratana canchij. Pero ñucanchij decidishcacunata cambiachunca mana saquinachu canchij (1 Corintios 4:12b). Por ejemplo, Alicepaj mamaca Diosta sirvisha nijpimi jarcasha nirca. Aliceca: “Ñuca bautizarijpica mamitaca canca mana alli ushushimi cangui nircami” ninmi. Chashna nijpimi Aliceca: “Mamitamanca, testigo de Jehová  tucunataca ñucallatajmi decidircani. Chaitaca mana cambiashachu nishpami sumajta parlarcani. Shinallataj cantaca achcatami cˈuyani nircanimi. Chaimi ishquindij huacarcanchij. Qˈuipaca mishqui micunitatami yanurcani. Chai punllamantami mamitaca Biblia ñuca causaita allipaj cambiashcata intindirca” ninmi.

14. ¿Diosta sirvina decisionta familiacuna cambiasha nijpica imamantataj mana saquina canchij?

14 Familiacunaca Diosta sirvina valishca cashcataca manachari utca intindingacuna. Por ejemplo, pani Aliceca paipaj yaya mama agllashca profesionpi estudiashpa catinapaj randica precursora canatami agllarca. Chaimantami paipaj mamaca cutin huacarca. Pero Aliceca precursora canataca mana saquircachu. Paica: “Shuj cutinlla familiacuna nishcata uyajpica cada ratomi paicuna nishcata rurachun obligangacuna. Ñucanchij crishcacunata cˈuyaihuan intindichijpica uyanatachari munangacuna” ninmi. Alicepaj familiaca Bibliamantami yachai callarirca. Cunanca yaya mamaca precursorcunami can. Congregacionpipish yayaca ancianomi can.

¿HUAUQUI PANICUNAPISH IMA SHINATAJ AYUDAI TUCUNCUNA?

¿Huauqui panicunaca ima shinataj ñucanchij familiacunata ayudai tucuncuna? (Párrafos 15 y 16-ta ricui). *

15. Mateo 5:14 al 16 y 1 Pedro 2:12-pi nishca shinaca ¿huauqui panicunaca ñucanchij familiacunata ima shinataj ayudai tucun?

15 Gentecunaca Diosta sirvijcunapaj alli ruraicunata ricushpami Diospajman cˈuchuyai tucuncuna (Mateo 5:14-16; 1 Pedro 2:12-ta liyipai). Cambaj cusa o huarmica manachari testigo de Jehová can. Paitaca huauqui panicunata rijsichunmi ayudai tucungui. Ñajaman parlashca pani Paulineca paipaj cusa Walter huauqui panicunata rijsichunmi huasiman  invitaj carca. Walterca: “Shuj punllaca shuj huauquica ñucahuan televisionpi shuj pugllaita ricungapajmi trabajopi permisota mañarca. Chaipimi chai huauqui ñuca shinallataj cashcata intindircani” ninmi.

16. ¿Familiacunataca imamantataj tandanacuicunaman invitana canchij?

16 Familiacunata ayudangapajca tandanacuicunamanmi invitana canchij (1 Corintios 14:24, 25). Walterca punta cutinca Jesús huañushcata yuyarina tandanacuimanmi rirca. Chai tandanacui mana achcata demoraj cashcamanta, trabajo qˈuipa cashcamantami ri tucurca. Paica: “Chaipi yachachishcacunata mana tucuita intindircanichu. Pero ñucata cushilla ñahuihuan saludashpa chasquishcataca cunancamami yuyarini” ninmi. Shuj matrimoniomi Paulinepaj huahuataca tandanacuicunapipish, predicacionpipish cuidashpa ayudaj carca. Chaita ricushpami Walterca paipaj huarmipaj crishcacunata intindinata munarca. Chaimantami ayudaj huauquitaca paiman Bibliamanta estudiota cuchun mañarca.

17. a) ¿Imamantataj ñuca culpami can nishpa mana yuyana canchij? b) ¿Familiacunata ayudanataca imamantataj mana saquina canchij?

17 Ñucanchij familiacunapish Diosta sirvichunmi shuyanchij. Pero tucui laya ayudajpipish Diosta sirvinataca manachari munangacuna. Paicuna mana munajpica ñuca culpami can nishpaca mana yuyanachu canchij. Ñucanchij crishcacunata chasquichunca mana obliganachu canchij. Shinapish Jehová Diosta cushilla sirvicujta ricushpaca Diosmanta yachanatami munangacuna. Chaimanta paicunamanta Yaya Diosta mañashunchij. Diospaj Shimitapish alli yuyashpa parlashunchij. Ayudanatapish amataj saquishunchij (Hechos 20:20). Chaita rurangapaj esforzarijpica Diosmi bendicianga. Shinallataj familiacuna ñucanchijta uyashpaca quishpiri tucungacunami.

CANTO 57 Tucuicunaman huillashunchij

^ par. 5 Ñucanchijca familiacuna Jehová Diosta rijsichunmi munanchij. Pero paicunami Diosta sirvinata o mana sirvinata agllana can. Cai yachaipimi familiacuna Diosmanta yachanata munachun imata rurana cashcata yachashun.

^ par. 1 Huaquin shuticunatami cambiashcanchij. Cai yachaipica familiacunamanta parlashpaca Diosta manaraj rijsij familiacunamantami parlacunchij.

^ par. 3 2 Pedro 3:9, NM: “Maijancunaca, Jehová Diosca pai cusha nishcataca manaraj cushcachu, uniyacunmi nincunami. Pero mana chashnachu. Paica cancunatami shuyacun. Shujllapish chingarichunca mana munanchu. Ashtahuanpish tucuicuna arrepintirichunmi munan”.

^ par. 54 FOTOCUNAMANTA: Shuj joven testigomi paipaj mana testigo yayata carrota allichishpa ayudacun. Qˈuipaca jw.org® paginamanta shuj videotami ricuchicun.

^ par. 56 FOTOCUNAMANTA: Shuj panimi paipaj cusa imalla rurashcata parlajpi alli uyacun. Chai huashaca paipaj familiahuanmi cushilla cainacun.

^ par. 58 FOTOCUNAMANTA: Chai panillatajmi huaquin huauqui panicunata paipaj huasiman invitashca. Cai huauqui panicunaca paipaj cusatami alli rijsicuncuna. Qˈuipaca paipaj cusaca Jesús huañushcata yuyarina tandanacuipimi can.