Jesusta pˈiñajcunaca, Jesustapish paita catijcunatapish maquicunata mana maillajta ricushpami rimajcuna carca. Moisesman cushca leypi nishca shinaca yahuar cacharirishca ungüita charishcamanta, lepra ungüita charishcamanta, shuj huañushca animalta o huañushca runata japirishcamantami Diospaj ñaupajpi mapa ricurijcuna carca. ¿Diospaj ñaupajpi cutin mapa illaj cangapajca imatataj rurana carca? Moisesman cushca leypica sacrificiocunata rurachun, maillarichunpishmi mandarca (Levítico, capítulo 11-manta 15-cama; Números, capítulo 19).

Cai leypica Diosmanta panda yachachijcunaca paicuna munashca yuyaicunatami mirachircacuna. Shuj libro nishca shinaca: Maijanpish Diospaj ñaupajpi ima shina mapa ricurishcata, shujtajcunatapish ima shina mapayachi tucushcatami mirachircacuna. Shinallataj ima cosascuna mapa cashcata o mana mapa cashcata yachangapajmi shuj listata rurarcacuna. Ashtahuanpish cutin mapa illaj tucungapajca imallata rurana cashcatami paicunapaj yuyaimanta mirachircacuna.

Jesusta pˈiñajcunaca: ‘¿Ima nishpataj cambaj yachacujcunaca, ñaupa yayacuna yachachishca shina mana purishpa mapa maquihuan tandata micunllacuna?’ nishpami Jesusta tapurcacuna (Marcos 7:5). Fariseocunapish, mandashcacunata quillcajcunapish maquicunata maillana cashcallataca mana nircacunachu. Ashtahuanpish maijanpish micugrijpica maquipimi yacuta tallina can nishpami paicunaca leypi mirachircacuna. Ñajaman parlashca libroca: Diosmanta panda yachachijcunaca, yacuta pi tallina cashcata, ima yacuhuan maillana cashcata, maicama maillarina cashcata, imapi maillana cashcatapishmi paicunapura parlanacujcuna carca ninmi.

¿Cai mirachishca leycunamantaca Jesusca imatataj yuyarca? Jesusca: ‘Mishqui shimi jayaj shungucuna, cancunaca ima shina cana cashcataca ñaupa huillaj Isaiastaca Diosca allimi cashna quillcachishca: cai llajtapi causajcunaca mana tucui shunguhuan ñucataca yuyarincunachu, shimillahuanmi allimari cangui nincuna. Ñucata yuyaringapaj tandanacunchij nishpa rurashcapish, runacuna yuyashcallata ñuca mandashcata shina yachachishcamanta yangami nishcami. Cancunaca ñuca Yayapaj mandashcata saquishpami, runacuna yachachishcallata mana pˈaquishpa caticunguichij’ nircami (Marcos 7:6-8, Biblia en Quichua Chimborazo 1989).