Ima tiyashcata ricui

Ima tiyashcata ricui

Sumaj causaitami chari tucungui

Sumaj causaitami chari tucungui

DIOSCA cunan shina llaqui causai tiyachunca mana munarcachu. Paica gentecuna paipaj autoridadta respetachun, paipaj mandashcacunata cazuchun, pai shina cˈuyaj llaquij cachunmi munarca. Shinallataj familiahuan cushilla, tranquilo causachunmi munarca. Gentecunaca mushuj cosascunata rurashpa, cai Allpa shuj paraíso tucuchun ayudashpami causana carca.

DIOSCA SUMAJ CAUSAITAMI CUSHA NIN

  • Salmo 46:9-pica: “Paica tucui cai pacha macanacuicunata tucuchijmi” ninmi.

  • Apocalipsis 11:18-pica: ‘Can pˈiñarishpa llaquichinapish ñamari chayamushca. Cai pachata chingachijcunata chingachinapish ñamari chayamushca’ ninmi.

  • Isaías 33:24-pica: “Caipi causajcunaca: ‘Ungushcami cani’ nishpa pi mana ningacunachu” ninmi.

  • Isaías 65:22-pica: “Ñuca agllashcacunaca paicuna trabajashcahuanca paicunallatajmi cushicungacuna” ninmi.

¿Cai versocunapi nishca profeciacunaca ima shinataj pajtaringa? Yaya Diosca paipaj gobiernopi mandachunmi paipaj churi Jesusta agllashca. Daniel 2:44-pica cai gobiernotaca Diospaj Mandana ninmi. Jesusca jahua pachamantami cai Allpata mandanga. Jesusmanta parlashpami Bibliapica, ‘Mandaj Diosca, Davidpaj jatun tiyarinatami paimanca cunga. Paipaj mandanaca, manataj tucuringachu’ nin (Lucas 1:32, 33).

Jesús cai Allpapi cashpaca achca milagrocunatami rurarca. Chashnami pai mandaj cashpaca gentecuna cushilla causachun ayudanata ricuchirca.

JESUSCA DIOSTA CAZUJCUNAPAJ ALLICUNATA RURANATAMI RICUCHIRCA

  • Tucui laya ungüicunata jambishpami shamuj punllacunapipish ungüicunata tucuchina cashcata ricuchirca (Mateo 9:35).

  • Huairata, yacutami jarcai tucurca. Chashnami ima llaquicuna ama tiyachun controlai tucushcata ricuchirca (Marcos 4:36-39).

  • Achca huaranga gentecunamanmi micunata cararca. Chashnami ñucanchijman ima minishtishcata cui tucushcata ricuchirca (Marcos 6:41-44).

  • Shuj bodapi cashpaca yacutami vinota rurarca. Chashnami pai mandacujpica cushi causaita charina cashcata ricuchirca (Juan 2:7-11).

¿Huiñaita, cushilla causangapajca imatataj rurana cangui? Bibliapica huiñai causaiman apaj ñanpimi purina cangui ninmi. Shinapish chai ñantaca ashacunallami tarin (Mateo 7:14).

HUIÑAI CAUSAIMAN APAJ ÑAN

¿Huiñai causaiman apaj ñanca imatataj ricuchin? Chai ñanca Dios imalla mandashcacunatami ricuchin. Bibliapica: “Mandaj Dios canta Quishpichij,  Israelpaj jucha illaj Diosca cashnami nin: ‘Ñucaca Mandaj Diosmi cani. Cambaj allipaj yachachij cambaj Diosmi cani. Can catina ñanta yachachij Diosmi cani’” ninmi (Isaías 48:17). Chai ñanta catishpami cushi causaita charishun.

Jesusca: “Ñucamari ñan cani, mana llullapish, causaiyujpish cani” nircami (Juan 14:6). Jesús yachachishcacunata cazushpa, paipaj ejemplota catishpaca Diospajmanmi ashtahuan cˈuchuyashun. Chashnami cushilla causashun.

¿Huiñai causaiman apaj ñantaca ima shinataj tari tucungui? Achca ñancuna o religioncuna tiyashcamantami Jesusca: “Ñucata: ‘¡Mandaj Jesús, Mandaj Jesús!’ nijcunaca, Taita Dios mandacunpica mana tucuicuna yaicungacunachu. Ashtahuanpish jahua pacha ñuca Yayapaj munaita rurajcunami, chaimanca yaicungacuna” nirca (Mateo 7:21). Shinallataj: “Paicunataca granota pˈucujta ricushpami pi cashcata rijsinguichij” nircami (Mateo 7:16). Bibliamanta yachashpami alli religiontaca tari tucungui (Juan 17:17).

¿Huiñai causaiman apaj ñanpi puringapajca imatataj rurana cangui? Ñucanchijman causaita cuj Diostami rijsina cangui. Pai ima shina cashcata, ima shuti cashcata, imata ruracushcata, ñucanchijtapish imata rurachun mañashcatami yachana cangui. *

Yaya Diosca gentecuna trabajashpalla, micushpalla, huahuacunata charishpalla, divirtirishpalla causachunca mana munanchu. Ashtahuanpish paita alli rijsichun, paipaj alli amigo tucuchunmi munan. Diosta cazushpaca paita cˈuyashcatami ricuchinchij. Jesusca: ‘Huiñai causaita charinapajca: Quiquinlla shujlla Taita Diostaj cashcata crinami’ nircami (Juan 17:3).

ÑUCANCHIJ ALLI CAUSACHUNMI YAYA DIOSCA BIBLIATA CUSHCA (ISAÍAS 48:17).

CAITA RURAI

Diosta cushichingapajca huaquin cambiocunatachari cambaj causaipica rurana cangui. Chaita rurana mana fácil cajpipish chai ñanta purinata decidishpaca alli causaitami charingui. Diosmanta ashtahuan yachasha nishpaca Internetpi jw.org paginapi Bibliamanta gratis yachachichun mañai. Ima punlla, ima horas, maipi yachasha nishcata huillai. Testigo de Jehovacunaca cushicushpami Bibliamanta yachachishun.