Ima tiyashcata ricui

Ima tiyashcata ricui

Dios mandacujpica tucuicunami sumajta, tandalla causarcacuna.

¿Imamantataj Diospaj Mandana shamuchun minishtinchij?

¿Imamantataj Diospaj Mandana shamuchun minishtinchij?

Callaripica ñucanchijta ruraj Yaya Jehová Diosca paillami tucuicunata cˈuyaihuan mandaj carca. Chaimantami gentecuna causachun nishpa Edenpi shuj sumaj huertata rurarca. Chai huertapica achca micunacunami tiyarca. Gentecunaca chaipi trabajashpami cushilla causana carcacuna (Génesis 1:28, 29; 2:8, 15). Yaya Dios ñucanchijta mandachun saquishca cashpaca, cunan punllapica tucuicunami sumajta causacunchijman.

Adán Evaca Yaya Dios paicunata mandachunca mana saquircachu.

Bibliapica shuj angelmi millai tucushpa Diospaj contra tucurca ninmi. Chai millai angelca Diablo Satanasmi can. Paimi, Diosca mana alli mandajchu can nishpa Diosta yanga juchachirca. Shinallataj, gentecunaca Dios mandachunca mana minishtinchu, paicunallatajmi cushilla causai tucun nishpami llullarca. Ñucanchij punta yaya mama Adán Evaca, Diablo llullashcata crishpami Diablo parte tucushpa Diospaj contra tucurcacuna (Génesis 3:1-6; Apocalipsis 12:9).

Adán Evaca Diospaj contra tucushpa Dios paicunata mandachun ña mana saquishpaca paraisopi huiñaita causanata, alli saludta charinatami pirdircacuna (Génesis 3:17-19). Paicuna mana cazushcamantami paicunapaj huahua huahuacunapish llaquita aparcacuna. Bibliapica, Adán juchapi urmashcamantami “juchaca, cai pachamanca yaicurca. Chai juchamantami huañuipish yaicurca” ninmi (Romanos 5:12). Juchamantami shujtaj llaquicunapish tiyashca. Bibliapica: “Shujcunaca caishujcunata llaquichishpa causashpaca, quiquinpaj llaquipajllatajmi chashna rurancuna” ninmi (Eclesiastés 8:9). Caipi nishca shinaca gentecunallataj mandacushcamantami tucui ladocunapi llaquicuna tiyan.

GENTECUNAMI MANDAI CALLARIRCA

Nemrodca Diospaj contrami tucurca.

Bibliapi parlashca punta mandaj runaca, Nemrod shutimi carca. Paica Diospaj contrami tucurca. Chai punllamanta cunancamami gobiernocunaca mandana poderta charishcamanta shujtajcunata llaquichishcacuna. Chaimantami rey Salomonpish casi tres mil huatacuna huashaman cai shimicunata escribirca: “Llaquita apacujcunataca huacacujpipish, pi mana cushichij tiyanchu. Paicunata llaquichijcunallami imatapish rurai tucuncuna” (Eclesiastés 4:1).

Cunan punllacunapipish shinallatajmi can. 2009 huatapi Organización de las Naciones Unidasmanta shuj informepica, mana alli gobiernocuna tiyashcamantami “tucui laya llaquicuna tiyan” nishpami gentecunaca yuyancuna ninmi.

ALLI GOBIERNOTAMI MINISHTINCHIJ

Gentecunaca alli mandajcunata, alli gobierno tiyachunmi minishtinchij. Yaya Diosca chaitami cusha nin.

Alli gobiernocuna tiyashpapish gentecunapaj llaquicunataca mana tucuchi tucushcachu.

Yaya Diosca shuj mandanatami churashca. Chai mandanaca shuj Gobiernomi can. Chai Gobiernoca manataj chingaringachu. Cai Allpapi tiyaj tucui gobiernocunataca librimi chingachinga (Daniel 2:44). Achca huaranga gentecunami padrenuestro mañaipi chai gobierno shamuchun nishpa Diosta mañashcacuna (Mateo 6:9, 10). Pero chai gobiernopica mana Dioschu mandanga. Ashtahuanpish cai Allpapi runa shina causashcatami rey cachun agllashca. ¿Pitaj can?