Ima tiyashcata ricui

Ima tiyashcata ricui

¿Diospaj Gobiernoca imatataj ruranga?

¿Diospaj Gobiernoca imatataj ruranga?

Jesusca paita catijcunamanca, Diospaj Mandana punlla ña chayamuchun nishpa mañanguichij nircami. Jesusca cai Allpapi llaquicuna tiyachun Dios mana munashcataca allimi yacharca. Shinallataj Diospaj Gobiernolla tucui llaquicunata tucuchina cashcatami yacharca. Pero ¿Diospaj Gobiernoca imatataj ruranga?

¿DIOSPAJ GOBIERNOCA IMATATAJ ÑA RURASHCA?

Cai revistapica Jesús mandai callarinapaj imalla tucuna cashcatami ña yachashcanchij. Chai tucui pajtarishcacunaca Jesucristo jahua pachapi mandai callarishcatami ricuchin.

Bibliapica Jesucristo jahua pachapi mandai callarishpaca Diablotapish, supaicunatapish cai Allpaman shitashcatami ricuchin. Chaimi 1914 huatamanta cai Allpapica achca llaquicuna mirashca (Apocalipsis 12:7, 9).

Cai pachapi ashtahuan llaquicuna mirashpa catijpipish, Jesucristoca achca alli cosascunatami gentecunapajca rurashca. Bibliapica, Yaya Diosca paipaj ñanpi purichunmi gentecunataca yachachinga ninmi. Achca millones gentecunami Bibliapi tiyaj consejocunata yachashpa paicunapaj causaipi pajtachishcacuna (Isaías 2:2-4). Por ejemplo, trabajopi mana yalli ocuparishpa causanata, familiahuan alli causanata, charijyana cosascunamanta mana yalli sustarinatami yachashcacuna. Chashnami paicunapaj causaita cambiashpa Diospaj ñaupajpi alli ricurinata yachashcacuna.

 ¿DIOSPAJ GOBIERNOCA IMATATAJ ÑALLA RURANGA?

Jesús ña jahua pachapi mandacujpipish cai Allpapica gentecunapurami mandashpa caticun. Pero, Yaya Diosca Jesustaca: “Quiquinta pˈiñajcunapaj chaupipimi cazuchishpa mandacungui” nircami (Salmo 110:2). Jesusca ñallami paipaj contracunata tucuchinga. Shinallataj Diosta cazusha nijcunapaj problemacunatapishmi tucuchinga.

Chai punllacunapica Diospaj Gobiernoca caicunatami ruranga:

  • Tucui panda religioncunatami tucuchinga. Bibliapica panda religioncunataca shuj huainayaj huarmihuanmi chˈimbapuran. Chai panda religioncunaca Diosmantami achca llullacunata nishca. Shinallataj gentecunapaj causaitami llaquichishca. Chaimantami chai panda religioncunaca tucuchishca canga. Panda religioncunata tucuchijpica achcacunami mancharingacuna (Apocalipsis 17:15, 16).

  • Tucui mandajcunatami tucuchinga. Jesús cai Allpata mandai callarishpaca tucui gobiernocunatami tucuchinga (Apocalipsis 19:15, 17, 18).

  • Millai gentecunatami tucuchinga. ¿Diosta mana cazusha nishpa millai cosascunata rurashpa causaj gentecunahuanca imashi tucunga? “Diosta mana manchajcunaca, cai llajtamanta llujshichishpa cachashca” o chingachishcami cangacuna (Proverbios 2:22).

  • Diablotapish demoniocunatapishmi tucuchinga. Diablopish demoniocunapish tucui cai llajtapi causajcunata ña mana umangacunachu (Apocalipsis 20:3, 10).

¿Diospaj Gobiernota apoyaj gentecunahuanca imataj tucunga?

 ¿DIOSPAJ GOBIERNOCA IMATATAJ GENTECUNAMANTA RURANGA?

Jesucristoca jahua pachamantami cai Allpapi mandajcuna mana rurai tucushcata ruranga. Shinallataj Jesusca cai Allpamanta agllashca 144.000-cunahuanmi cai Allpata mandanga (Apocalipsis 5:9, 10; 14:1, 3). Jesusca Diospaj munai cai Allpapi pajtarichunmi ayudanga. Pero, ¿imatataj gentecunamanta ruranga?

  • Ungüicunata huañuitapishmi tucuchinga. Caipi causajcunaca, “‘Ungushcami cani’ nishpa pi mana ningacunachu”. Shinallataj ‘huañuipish ña mana ashtahuan tiyangachu’ (Isaías 33:24; Apocalipsis 21:4).

  • Sumaj causaitami apamunga. “Cambaj huahuacunapaj sumaj causaica ashtahuanmi miraringa”. “Chaipica pi mana manchachingachu. Quiquin uva yura ucupi, quiquin higo yura ucupi tiyarishpami samaringacuna” (Isaías 54:13; Miqueas 4:4).

  • Sumaj trabajotami cunga. “Ñuca agllashcacunaca paicuna trabajashcahuanca paicunallatajmi cushicungacuna”. “Mana yanga trabajangacunachu” (Isaías 65:22, 23).

  • Cai Allpataca sumajtami ruranga. “Shitashca pambacunapish, chaquishca pambacunapish cushicungacunami. Shitashca pambapish cushicungami. Rosas shinami sisanga” (Isaías 35:1).

  • Gentecuna huiñai causaita charichun imata ruranatami yachachinga. “Huinai causaita charinaca cashnami: Diostajca canlla cashcata rijsinami, Jesucristopish can cachashca cashcata crinami” (Juan 17:3, Biblia en Quichua Chimborazo, 1989).

Yaya Diosca canpish chai sumaj bendicioncunata charichunmi munan (Isaías 48:18). Catij yachaipimi cai bendicioncunata charingapaj imata rurana cashcata ashtahuan yachangui.