Ima tiyashcata ricui

Ima tiyashcata ricui

¿Diospaj Gobiernoca ima horataj cai Allpata mandanga?

¿Diospaj Gobiernoca ima horataj cai Allpata mandanga?

Jesuspaj huaquin discipulocunaca Diospaj Gobierno ima hora cai Allpata mandai callarigrishcatami yachasha nircacuna. Pero Jesusca, cancunaca ima huata, ima punlla canataca mana yachanachu canguichij nircami (Hechos 1:6, 7). Shinapish ñami Jesusca, ñuca huillashcacuna tucui pajtacujta ricushpaca Diospaj Gobierno ñalla cai Allpata mandagrishcatami yachanguichij nishca carca (Lucas 21:31).

¿IMALLA PAJTARINATATAJ JESUSCA NIRCA?

Shuj persona pi cashcata yachangapajmi paipaj dedo huellata ricui tucunchij. Chai shinallatajmi Bibliapi nishcacuna tucui pajtaricujta ricushpaca Diospaj Gobierno ñalla mandagrishcata yachai tucunchij. Jesusca: “Shuj mama llajtaca, caishuj mama llajtahuan macanacungacunami, shinallataj jatun mandajcunapurapish macanacungacunami. Chˈican chˈican llajtacunapi pamba chujchushpa allpa tˈimburicunami tiyanga. Achca yaricai, millai ungüicunapishmi tiyanga” nircami (Lucas 21:10, 11). ¿Chai tucui llaquicunatachu cunan punllacunapi ricunchij? ¿Tucui cai pachapichu chaicunaca pajtaricun? ¿Chaicuna pajtashcaca imatataj ricuchin?

1. MACANACUICUNA

1914 huatapica nunca mana ricushca Primera Guerra Mundialmi jatarirca. Historiamanta parlajcunaca chai jatun macanacui tiyashcamantami tucui mundo enteropi causajcunaca jatun llaquita aparcacuna ninmi. Chai macanacuipica tanque de guerras, bombas, ametralladoras, gas venenoso y chai laya shujtaj armacunatami utilizarcacuna. Cutin, Segunda Guerra Mundialpica bomba atómica nishcatami utilizarcacuna. 1914 huatamantami tucui ladopi macanacuicuna tiyashca, chai macanacuicunapica millones gentecunami huañushca.

2. TERREMOTOCUNA

Encyclopædia Britannica libropi nishca shinaca cada huatami casi 100 terremotocuna tiyan. Chai terremotocunamantami achca dañocunapish tiyashca. Shinallataj Estados Unidospi caj Servicio Geológico organización nishca shinaca “casi 1900 huatamantami cada huata 16 jatun terremotocuna tiyashca yuyachin”. Huaquincunaca achca aparatocuna tiyashcamantami shuj terremoto tiyagrishcata yachai tucunchij. Chaimantami ashtahuan terremotocuna tiyaj laya can nincunami. Ima laya cajpipish jatun terremotocunamanta achca huañui, achca llaquicuna tiyashcatami ricunchij.

 3. JATUN YARICAICUNA

Guerracunamanta, corrupción tiyashcamanta, cullqui illashcamanta, agricultura y ganaderiata pushajcuna mana alli administrashcamanta, cosecha pirdirishcamantami jatun yaricaicuna tiyashca. Programa Mundial de Alimentos nishca shinaca: “Mundo enteropica 821 millones gentecunami yaricaihuan pasancuna. Caicunapuramantaca 124 millonesmi huañunalla can” (2018 Year in Review). Cada huatami 3 millones yalli huahuacuna mana alli alimentarishcamanta huañuncuna. 2011 huatapi muyundij Allpapi huañushca huahuacunamantaca casi chaupimi yaricaimanta huañushcacuna carca.

4. MILLAI UNGÜICUNA

Organización Mundial de la Salud nishca shinaca: “Cai huatacunapica sinchi ungüicunami tiyashca. Ñaupa ungüicunapish cutinmi ricurishca. Por ejemplo, cólera, fiebre amarilla nishca ungüicuna. Shinallataj neumonía, gripe, Oriente Medio ladopi ébola y zika nishca mushuj ungüicunami ricurishca”. Cientificocuna, doctorcunaca cai ungüicunata estudiashpapish mana tucuipajchu jambicunata japishca.

5. MUYUNDIJ ALLPAPI PREDICANA

Diospaj Gobierno ñalla mandagrishcata yachachunca Jesusca: “Dios mandacun alli huillaitaca, tucui cai pachapi causajcunamanmi huillashpa yachaj chayachishca canga. Chai qˈuipami cai shina causaica tucuringa” nircami (Mateo 24:14). Sinchi llaquicuna tiyajpipish 8 millones yalli Diosta alli sirvijcunami Diospaj Gobiernomanta alli huillaicunata 240 llajtacunapi, mil yalli shimicunapi huillacuncuna. Caita ricunaca mai sumajmi can.

 JESÚS NISHCACUNACA ÑUCANCHIJHUANMI RICUNATA CHARIN

Jesús imalla nishcacunaca cunan punllacunapimi ña pajtaricun. ¿Caita yachanaca imamantataj importante can? Jesús ima nishcata yuyarishun. Paica: ‘Cai ñuca huillashcacuna pajtacujta ricushpaca, Taita Dios ña mandagrishcatami yachanguichij’ nircami (Lucas 21:31).

Jesusca ñallami cai Allpata mandai callarishpa Diospaj munaita pajtachinga.

Jesús imalla nishcacuna pajtaricushcata ricushpa, Diospaj Gobierno ima horamanta mandanata Bibliapi ricushpaca, chai Gobierno 1914 huatapi mandai callarishcatami intindinchij. * Chai huatapimi Jesusca Rey tucurca (Salmo 2:2, 4, 6-9). Jesusca cai Allpata mandai callarishpaca tucui gobiernocunatami tucuchinga. Qˈuipaca cai Allpatami shuj paraisota ruranga. Chaipimi ñucanchijca huiñai huiñaita causashun.

Jesusca: “Ima shinami jahua pachapi can munashcata ruracun, shinallataj cai pachapipish can munashcata rurachun” nishpa Yaya Diosta mañanguichij nircami (Mateo 6:10). Cai shimicunaca ñallami pajtaringa. ¿1914 huatapi mandai callarishcamantaca Jesusca imatataj ruracun? ¿Cai Allpata mandacushpaca imatataj ruranga?

^ par. 17 1914 huatapi ima tucushcamanta ashtahuan yachasha nishpaca, Bibliamanta yachashunchij libropi nota 22-ta ricui (cai librotaca testigo de Jehovacunami rurashca).