Ima tiyashcata ricui

Ima tiyashcata ricui

¿Diosca imatataj rurashca?

¿Diosca imatataj rurashca?

Pitapish alli rijsingapajca imata rurashcatami yachana canchij. Diosta alli rijsingapajpish pai imata rurashcatami yachana canchij. Diospaj rurashcacunamanta ima shina beneficiarishcata ricushpaca, shamuj punllacunapi Dios imata rurana cashcatapishmi intindishun.

ÑUCANCHIJPI YUYASHPAMI DIOSCA TUCUITA RURARCA

Jehová Diosmi ñucanchijta ruraj can. Yayitu Dios ima shina cashcataca, ‘pai rurashcacunata ricushpami’ yachai tucunchij (Romanos 1:20). “Mandaj Diosmari tucuita rurai tucuj cashpa cai pachata rurarca. Jatun yachaj cashpamari, tucui cai pachata alli churarca. Alli yuyaiyuj cashpamari, jahua pachatapish linsota shina churarca” (Jeremías 10:12). Diosca tucuita sumajta rurashpami achcata cˈuyashcata ricuchishca.

“Diosca paiman rijchaj runatami rurarca” (Génesis 1:27). Paiman rijchaj cashcamantami cˈuyaj, llaquij, perdonaj cai tucunchij. Shinallataj paipaj mandashcacunata cazuchun, pai imata yuyashcata yachachunmi ñucanchijtaca rurashca. Diospaj mandashcacunata pajtachishpaca cushillami causashun. Paipaj alli amigocunapishmi tucushun.

Cai Allpata sumajta rurashpami Yaya Diosca ñucanchijta llaquishcata ricuchishca. Apóstol Pablo nishca shinaca, “Taita Diosca tamyata cachashpa granocuna pˈucuna punllapitaj pˈucuchishpami ñucanchijmanca mana nijta carashpa cushichin. Chashnami pai alli cashcataca ricuchin” (Hechos 14:17). Cai Allpata rurashpaca gentecuna cushilla causachunmi tucui laya cosascunata Diosca curca. Chashnami shamuj punllacunapi ashtahuan bendiciana cashcata ricuchishca.

Gentecuna huiñaita causachunmi Diosca cai Allpataca rurarca. Bibliapica: “Cai pachataca huañujlla runacunamanmi cushca” ninmi. “Paica cai pachataca mana yanga tiyachun rurarcachu, runacuna  causachunmi rurarca” ninmi (Salmo 115:16; Isaías 45:18). ¿Cai Allpapica picunataj causanga? ¿Mashna tiempotashi causangacuna? Bibliapica: ‘Cashcata rurajcunallami Dios cusha nishca Allpataca japingacuna. Tucui causaipimi chai Allpapica causangacuna’ ninmi (Salmo 37:29).

Adán y Eva huiñaita causachunmi Diosca rurarca. Chaimantami Edén huertapi “trabajashpa, cuidashpa causachun churarca” (Génesis 2:8, 15). Diosca shuj alaja trabajota paicunaman cushpaca, “huahuacunayuj tucushpa, alli huiñachishpa achcata mirarishpa cai pachapi jundarishpa cai pachata mandanguichij” nircami (Génesis 1:28). Adán Evapish huiñaitami causai tucurcacuna. Pero Diosta mana cazushcamantami cai sumaj causaitaca chingachircacuna. Adán y Eva juchapi urmajpipish Diosca pai rurasha nishcataca mana cambiarcachu. Chaimantami gentecuna cushilla causachun cai Allpataca shuj paraisota ruranga. Cunanca, Dios imata ashtahuan rurashcata yachashun.

BIBLIATAMI DIOSCA CUSHCA

¿Diosca imamantashi Bibliataca curca? Paita rijsichun, paimanta yachachunmi curca (Proverbios 2:1-5). Diosmanta yachangapaj tapuicunataca shujtaj librocunapish, Bibliapish mana tucuita cutichinchu (Eclesiastés 3:11). Chashna cajpipish Bibliallapimi Dios ima shina cashcata, gentecunata ima shina ricuj cashcatapish yachai tucunchij. Shinallataj ima laya gentecunata chasquij cashcatami ricui tucunchij (Salmo 15:1-5). Bibliapica Diosta adorangapaj imata ruranata, chuya causaita charinata, charina cosascunamantapish pai imata yuyashcatami yachai tucunchij. Shinallataj Bibliapi Jesusmanta yachashpami Dios ima laya cashcataca ashtahuan rijsinchij (Juan 14:9).

Cushilla causangapaj imata ruranata yachachunpishmi Diosca paipaj Shimita curca. Bibliaca familia ucupi cushilla causangapaj, tranquilo sintiringapaj, llaquicunata ahuantangapajpish imata rurana cashcatami yachachin. Chashnallataj ¿llaquicunaca imamantataj tiyan? o ¿shamuj punllacunapica imashi tucushun? nishca tapuicunatami Bibliaca cutichin. Ashtahuanpish paipaj munaita pajtachingapaj Dios imallata rurashcatami yachachin.

Bibliaca mana shujtaj librocuna shinachu can. Diosmi Bibliataca quillcachirca. Chaita alli intindingapajca huaquin yuyaicunata ricushun. Bibliataca 40 chˈican chˈican runacunami casi 1.600 huatacunapi escribirca. Chashna cajpipish shuj yuyaillatami charin (2 Timoteo 3:16). Shujtaj librocunaca tiempohuanca cambiashcami. Pero Bibliaca achca huatacuna pasajpipish ñaupa quillcachishcacunapi ricuchishca shinaca mana cambiashcachu. Maijancunaca Bibliata ama traducichun, ama charichun, ama liyichunmi jarcashun nishcacuna. Pero mana pudishcacunachu. Bibliataca casi tucui gentecunami paicunapaj propio shimipi cunanca charincuna. “Ñucanchij Taita Diospaj shimi nishcaca pajtacungallami” (Isaías 40:8).

PAIPAJ MUNAITAMI DIOSCA PAJTACHINGA

Paipaj munaita pajtachingapajca shuj sumaj regalotami Diosca cushca. Ña yachashca shinaca cai Allpapi gentecuna huiñai huiñaita cushilla causachunmi Diosca munarca. Pero Diosta mana cazushcamantami Adanca huiñai causaita chingachirca. Bibliapica: “Shuj runallamantami juchaca, cai pachamanca yaicurca. Chai juchamantami huañuipish yaicurca. Chashnami tucuicuna juchallishcamantaca, huañuica tucui runacunaman shamurca” ninmi (Romanos 5:12). Adán y Eva juchapi urmajpica Diospaj munaica ña mana pajtaripaj layami ricurirca. Pero, ¿Diosca imatataj rurarca?

Jehová imata rurashcata ricushpami ima laya Dios cashcataca yachanchij. Adanpish Evapish paita mana cazujpica cashcata ruraj cashcamantami Diosca castigarca. Pero cˈuyaimantami Adanpaj huahuacuna shamuj punllacunapi alli causachun imata ruranata ricurca. Yachaisapa cashcamantami imata ruragrishcatapish huillarca (Génesis 3:15). Juchamanta, huañuimantapish  quishpichingapajca paipaj Churi Jesucristotami cachana carca. ¿Ima shinataj chaitaca rurarca?

Adán Evapaj culpamanta gentecuna ama huañuchunmi Diosca paipaj Churi Jesucristota cacharca. Paimi huiñai causaiman apaj ñanta rijsichina carca. Shinallataj ‘paipaj causaita cushpami tucuicunata randishpa cacharichina carca’ * (Mateo 20:28; Juan 14:6). Adán shina jucha illaj cashcamantami Jesusca quishpichi tucurca. Paica huañungacamami tucuipi Diosta cazurca. Chaimantami Jehová Diosca cieloman tigrachun Jesustaca causachirca. Chashnami Jesusca huiñai causaita tucui gentecunaman cui pudirca. Bibliapica: “Shuj runa mana cazushcamantami, achcacuna juchayujcuna tucurcacuna. Chashnallatajmi shuj runa cazushcamantaca, achcacuna cashcata rurajta rurashca tucungacuna” ninmi (Romanos 5:19). Gentecuna huiñaita cai Allpapi causachunmi Jesusca huañurca. Chashnami Diosca paipaj munaita pajtachinga.

Adán y Eva mana cazujpipish Dios imata rurashcata ricushpami pai ima shina cashcata yachanchij. Paipaj munai pajtarichunca pi mana jarcai tucunchu, pai nishcacunaca tucuimi pajtaringa (Isaías 55:11). Ñucanchijta achcata cˈuyashcatapishmi paica ricuchishca. Bibliapica: “Diosca paipaj shujlla Churimanta ñucanchij quishpirichunmi cai pachaman cacharca. Chashnami pai cˈuyaj cashcataca ricuchirca. Mana ñucanchijchu Diostaca cˈuyashcanchij, ashtahuanpish paimari ñucanchijta cˈuyashpa ñucanchij juchacunamanta huañushpa juchacunata anchuchichun paipaj Churitaca cacharca. Chashnami pai cˈuyashcataca ricuchishca” ninmi (1 Juan 4:9, 10).

“Diosca paipaj quiquin Churitapish mana mitsashpami, tucui ñucanchijmanta curca. ¿Manachu chashnallataj tucui imatapish paillahuantaj ñucanchijman cunga?” (Romanos 8:32). ¿Diosca imatataj ashtahuan cusha nishca?

¿DIOSCA IMATATAJ RURASHCA? Jehová Diosca cai Allpapi huiñaita causachunmi ñucanchijtaca rurarca. Bibliataca paimanta alli yachachunmi curca. Paipaj munaita pajtachingapajmi ñucanchijmanta huañuchun Jesusta cacharca.

^ par. 16 Jesús imamanta huañushcata ashtahuan yachasha nishpaca, ¿Bibliaca imatataj yachachin? nishca libropi capítulo 5-ta ricui. Cai librotaca testigo de Jehovacunami rurashca. jw.org paginapi gratis descargai.