Ima tiyashcata ricui

Ima tiyashcata ricui

¿Cai Allpapi huiñaita causasha ninguichu?

¿Cai Allpapi huiñaita causasha ninguichu?

¡CHASHNA CAUSANACA SUMAJMI CANGA! Diosca cai Allpapi huiñaita causachunmi munan. Pero achca gentecunaca chaitaca mana crincunachu. Paicunaca, “ima horapish huañunallatajmi canchij” nincunami. Shujtaj gentecunaca, “huañushpallami jahua pachapi huiñaita cushilla causagrishun” nincunami. ¿Canca imatataj yuyangui?

Caita yachangapajca catij tapuicunataraj Bibliahuan cutichishunchij: ¿Mashna tiempota causangapajtaj rurashca canchij? ¿Imapajtaj Diosca cai Allpatapish, gentecunatapish rurarca? ¿Imamantataj huañunchij?

DIOSMAN RIJCHAJTAMI RURASHCA CANCHIJ

Cai Allpapi tucui tiyashcacunataca Taita Diosmi rurarca. Bibliapi yachachishca shinaca gentecunallami Diosman rijchajta rurashca canchij (Génesis 1:26, 27). Chaimantami Dios shinallataj cˈuyai tucunchij, allita ruranatapish munanchij. Animalitocunaca chaitaca mana rurai tucunchu.

Ñucanchijllami Dios tucui imalla rurashcacunata ricushpa, musicata uyashpa cushicunchij. Yayitu Dios yuyaita cujllapimi allita mana allita agllai tucunchij. Ashtahuantajca ñucanchijllami Diosta adorai tucunchij.

Gentecunaca imata yachasha nishpaca yachai tucunchijmi. Shinallataj imata rurasha nishpapish rurai tucunchijmi. Cai Allpapi huiñaita causachun munashpami Yayitu Diosca ñucanchijtaca chashna rurashca. Paica 70, 80 huatacunallata causachunca mana rurashcachu.

¿DIOSCA IMATATAJ MUNARCA?

Achca gentecunaca “Diosca pruebacunata ahuantachunmi gentecunataca cai Allpapi churashca. Chai pruebacunata mishashpaca jahua pachapimi Dioshuan huiñaita causagrishun” nincunami. Pero Diosca mana pruebacunata churashpa llaquichinchu. Bibliapica: “Paipaj ñancunapish ima mana pandachu. Paica mana llullaj Taita Diosmi. Paipica ima millai mana tiyanchu. Paica cashcata rurajmi, imata mana pandajmi” ninmi (Deuteronomio 32:4).

Shinaca, ¿cai Allpataca Diosca imapajtaj rurarca? Salmo 115: 16-pica: “Jahua pachacunaca jahua pachapi caj Mandaj Diospajmi. Cai pachataca huañujlla runacunamanmi cushca” ninmi. Caipi nishca  shinaca gentecuna huiñaita cai Allpapi causachunmi Diosca munan. Chaimantami cushilla causachun nishpa tucui minishtishcacunata rurashca (Génesis 2:8, 9).

“Jahua pachacunaca jahua pachapi caj Mandaj Diospajmi. Cai pachataca huañujlla runacunamanmi cushca” (Salmo 115:16).

Cunanca gentecunata Dios imapaj rurashcata ricushun. Adán Evata yuyarishun. Paicunataca Diosca: ‘Huahuacunayuj tucushpa, alli huiñachishpa achcata mirarishpa cai pachapi jundarichij. Tucui animalcunatapish cancuna mandanguichij’ nircami (Génesis 1:28). Caipi ricushca shinaca Diosca Adán Evataca cai Allpata cuidachun, paraisota rurachunmi mingarca. Mana jahua pachapi causachunchu rurarca. Ashtahuanpish cai Allpapi huiñaita causachunmi rurarca.

¿IMAMANTATAJ HUAÑUNCHIJ?

Bibliapica shuj angelmi Diosta mana cazurca ninmi. Chai angelca Diablomi can. Paimi Diospaj munai ama pajtarichun nishpa Diospaj contra tucurca.

Diabloca llullacunata nishpami Diospaj contra tucuchun Adán Evatapish pandachirca. Paica Adán Evataca: “Diosca cancunallataj imata ruranata agllachunca mana saquinchu” nircami. Chaita uyashpami Diablopaj parte tucurcacuna. Chaita rurashcamantami Adán Evaca paraisopi ña mana causai tucurcacuna. Qˈuipacarin Dios nishca shinami huañurcacuna (Génesis 2:17; 3:1-6; 5:5).

Diosca mana llaquicunata cachanchu. Adán Eva mana cazushcamantami tucuicuna llaquilla causanchij. Bibliapica: “Shuj runallamantami juchaca, cai pachamanca yaicurca. Chai juchamantami huañuipish yaicurca. Chashnami tucuicuna juchallishcamantaca, huañuica tucui runacunaman shamurca” ninmi (Romanos 5:12).

HUIÑAITAMI PARAÍSO ALLPAPI CAUSAI TUCUNGUI

Adán Eva mana cazushca cajpipish Diosca cai Allpa cutin shuj paraíso tucuchun, gentecunapish huiñaita cushilla causachunmi munan. Diosca cˈuyajmari. Chaimantami paipaj Churita cachashpa ñucanchijta quishpichirca. Apóstol Pabloca: “Juchaca huañuitami cun. Ashtahuanpish Taita Dios cˈuyashpalla cushcaca, ñucanchij Mandaj Cristo Jesuspi huiñai causaimi” nircami (Romanos 6:23). Apóstol Juanpish: “Taita Diosca, cai pachapi causajcunataca yallitaj cˈuyashpami, paipaj shujlla Churita cacharca. Pipish paita crijca ama chingarishpa, ashtahuanpish huiñai causaita charichunmi cacharca” nircami (Juan 3:16). Jesús ñucanchijmanta huañujpimi cutin huiñai causaita chari tucunchij. *

Callaripi Dios munashca shinami cai Allpaca ñalla shuj paraíso tucunga. Chaipi causangapajca Jesús nishcatami pajtachina canchij. Paica: “Quichqui punguta yaicuichij. Chingarinaman pushajca pungupish anchomi, ñanpish yallitaj anchomi. Chaitaca achcacunami yaicuncuna. Causaiman pushajca pungupish quichquimi, ñanpish quichquimi. Chaitaca ashacunallami chasquincuna” ninmi (Mateo 7:13, 14). Paraíso Allpapi causasha nishpaca Jesús mandashcata pajtachingapaj esforzari.

^ par. 17 Jesús huañushcamanta ima bendicioncunata charishcata yachangapajca ¿Bibliaca imatataj yachachin? nishca libropi, capítulo 5-ta ricui. Shinallataj jw.org paginaman yaicushpami ricui tucungui. Cai librotaca testigo de Jehovacunami rurashca.