Ima tiyashcata ricui

Ima tiyashcata ricui

 CALLARI YUYAIMANTA | JESÚS HUAÑUSHCAMANTACA ¿IMA SHINATAJ PAGUI NI TUCUNGUI?

Yallitaj valishca regalomi can

Yallitaj valishca regalomi can

JORDANCA shuj uchilla barco laya sacapuntatami maquipi charicun. Yanga laya ricurijpipish paipajca achca valishcami can. ¿Imamantataj Jordanpajca valishca can? Russellmi huahuaraj cajpi regalashca carca. Russellca Jordanpaj yaya mamapaj paipaj abuelopajpish alli amigomi cashca carca, llaquicunapipish achcatami ayudashca carca. Russell huañushca qˈuipami Jordanca chaita yachaj chayarca. Chaimantami Russell cushca regaloca Jordanpajca yallitaj valishca carca.

Cai ejemplopi ricushca shinaca huaquincunapajca shuj regaloca mana vali layami ricurin. Shujtajcunapajca yallitaj valishcami cai tucun. Diosca shuj yallitaj valishca regalotami cushca. Chaimantami Bibliapica cashna nin: “Taita Diosca, cai pachapi causajcunataca yallitaj cˈuyashpami, paipaj shujlla Churita cacharca. Pipish paita crijca ama chingarishpa, ashtahuanpish huiñai causaita charichunmi cacharca” ninmi (Juan 3:16).

Dios cushca regalota chasquishpaca huiñaitami causangui. ¿Cai regalota yalli ashtahuan valishca regalo tiyanchu? Achca gentecunapaj mana valishca laya cajpipish Diosta servijcunapajca yallitaj valishca regalomi can (Salmo 49:8; 1 Pedro 1:18, 19). ¿Diosca imamantataj ñucanchijmanta huañuchun paipaj Churita cacharca?

Caimanta parlashpaca apóstol Pabloca cashnami nirca: “Shuj runallamantami juchaca, cai pachamanca yaicurca. Chai juchamantami huañuipish yaicurca. Chashnami tucuicuna juchallishcamantaca, huañuica tucui runacunaman shamurca” (Romanos 5:12). Punta cˈari Adanca alli yachashca jahuami Diosta mana cazurca. Chaimantami paica huañuna carca. Adanpaj culpamantami tucuicuna huañunchij.

“Juchaca huañuitami cun. Ashtahuanpish Taita Dios cˈuyashpalla cushcaca, ñucanchij Mandaj Cristo Jesuspi huiñai causaimi” (Romanos 6:23).  Diosca huañuimanta quishpichingapajmi paipaj Churi Jesusta cai Allpaman cacharca. Jesusca tucuicunamantami huañurca. Chaimantami Jesuspi crijcunaca huiñai huiñaita causangacuna (Romanos 3:24).

Jesús ñucanchijmanta huañushcamantami, Diosta servijcunaca Diospaj bendicioncunata charinchij. Caimanta parlashpaca apóstol Pabloca cashnami nirca: “¡Ima shimicunahuan mana pagui ni tucuipajcunata cushcamantami, Diostaca pagui nini!” nircami (2 Corintios 9:15). Diosca sumaj regalocunatami cushca. Shinapish Jesuspaj causaita cushpami yallitaj valishca regalota cushca. ¿Cai regaloca imamantataj yallitaj valishca can? Taita Dios cushca shujtaj regalocunamantaca, ¿Jesuspaj causaica imamantataj ashtahuan valishca can? * ¿Ima shinataj Diosta pagui ni tucunchij? Cai catij yachaicunapimi cai tapuicunata cutichishun.

^ par. 8 Jesusca ñucanchijta cˈuyashcamantami paipaj causaita curca, pi mana obligarcachu (1 Juan 3:16, QC, 1989). Shinapish Jesusca paipaj causaita cushpaca Diospaj munai pajtarichunmi ayudarca. Cai yachaicunapica ñucanchijta quishpichingapaj Dios imallata rurashcatami yachashun.