Ima tiyashcata ricui

Ima tiyashcata ricui

 YACHAI 10

Jehová Diosta cˈuyashpami bautizarinata agllangui

Jehová Diosta cˈuyashpami bautizarinata agllangui

“¿Manachu ñucaca cunanllataj bautizari tucuni?” (HECHOS 8:36).

CANTO 37 Cantaca tucui shunguhuanmi sirvisha

CAITAMI YACHASHUN *

1, 2. Hechos 8:27 al 31, 35, 36, 38-pi nishca shinaca ¿Etiopía llajtata mandaj huarmipaj cullquita cuidajca imamantataj bautizarca?

¿BAUTIZARISHPA Jesuspaj discípulo canatachu munangui? Achca gentecunaca Yaya Diosta cˈuyashcamanta, agradecidos sintirishcamantami bautizarinata munancuna. Etiopía llajtata mandaj huarmipaj cullquita cuidaj runapi yuyashun.

2 Etiopía llajtamanta runaca Diospaj quillcachishcacunata estudiashpami bautizarina cashcata intindirca (Hechos 8:27-31, 35, 36, 38-ta liyipai). ¿Paica imamantataj bautizarirca? Cai runaca carretapi viajacushpaca Isaías libromantami liyicurca. Chashnami Diospaj Shimita valichishcata ricuchirca. Jesús paimanta imata rurashcata Felipe intindichijpimi paica cushilla sintirirca. Shinallataj cai runaca Jehová Diostaca achcatami cˈuyarca. ¿Imamantataj chaita ninchij? Paica Jerusalenmantami Diosta adorashpa shamucurca. Tal vez paica panda religionta saquishpami Diosta sirvi callarishcanga. Jehová Diosta tucui shunguhuan cˈuyashcamantami bautizarishpa Jesuspaj discípulo tucurca (Mateo 28:19).

3. ¿Bautizaringapajca imacunataj jarcai tucun? (“ ¿Cambaj shunguca ima layataj can?” nishca recuadrota ricui).

3 Jehová Diosta cˈuyashcamantami bautizarinata agllangui. Pero ¿imacunataj bautizarichun jarcai tucun? Tal vez quiquinca mana Testigo amigocunata, familiatachari achcata cˈuyangui. Chaimantachari paicunaca testigo de Jehová tucujpica ñucamantami caruyanga nishpa yuyangui (Mateo 10:37). Mana cashpaca Dios pˈiñashca ruraicunata  saquinachari sinchi ricurin (Salmo 97:10). O tal vez panda religioncuna yachachishcamantami huaquin fiestacunata rurashpa cushilla sintirij carcangui. Chaimantami Dios mana munashca fiestacunata saquinaca sinchi ricurin (1 Corintios 10:20, 21, NWT ). Chaimanta cashna tapuri: ¿Pita, imatataj ashtahuan cˈuyani?

 

¿DIOSTA CˈUYANGAPAJCA IMATATAJ RUNANA CANGUI?

4. ¿Imamantataj bautizarinataca munangui?

4 Manaraj testigo de Jehovacunahuan estudiashpachari Bibliataca valichij carcangui. Shinallataj Jesustapishmi cˈuyaj carcangui. Cunanca Testigocunahuan Bibliata estudiai callarishcamantami paicunahuan alli apanacungui. Caicunata rurashpapish bautizarina munaitaca manaraj pajtachinguichu. Ashtahuanpish Diosta shungumanta cˈuyashpallami bautizarinata munangui. Jehovata tucui shunguhuan cˈuyashpaca ima jarcajpipish paita sirvinatami agllangui. Bautizarishca huashapish paimantaca manataj caruyanguichu.

5. ¿Cai yachaipica imatataj yachashun?

5 Jesusca: “Taita Diostaca tucui shunguhuan, tucui almahuan, tucui yuyaihuan, tucui fuerzahuan cˈuyangui” nircami (Marcos 12:30). Canca ¿ima shinataj paita cˈuyanata, respetanata yachangui? Dios canta cˈuyashcata yuyarishpami paitaca cˈuyangui, respetangui (1 Juan 4:19). Cai yachaipimi Diosta ashtahuan cˈuyangapaj imallata rurana cashcata yachashun. Shinallataj Yayitu Diosta ña shungumanta cˈuyashpaca imallata ashtahuan rurasha nishcatami yachashun. *

6. Romanos 1:20-pi nishca shinaca ¿Jehová Diosmanta yachangapajca imatataj rurana cangui?

6 Jehová Dios rurashcacunapi yuyashpa paimanta ashtahuan yachai (Romanos 1:20-ta liyipai; Apocalipsis 4:11). Plantacunata, animalcunata ricushpa Yayitu Dios yachaisapa cashcata yuyari. Gentecunatapish ima shina rurashcata ashtahuan yachai (Salmo 139:14). Intipi yuyai. Intipica Jehová Diosca achca rupaitami churashca. Pero intica achca estrellacunamanta shuj estrellallami can (Isaías 40:26). * Caicunapi yuyashpami Jehová Diostaca ashtahuan respetangui. Pai yachaj, poderyuj cajta intindishpaca paipaj amigomi cai tucungui. Pero Diosta tucui shunguhuan cˈuyangapajca paimantami ashtahuan yachana cangui.

7. ¿Jehová Diosta tucui shunguhuan cˈuyangapajca imatataj crina cangui?

7 Jehová Dios canmanta sustarishcatami tucui shunguhuan crina cangui. ¿Tucuita ruraj Dios canpi yuyashcata, paipaj valishca cashcata crinaca cambajca sinchichu can? Chashna sintirishpaca Taita Dios canmanta mana carupi cashcata yuyari (Hechos 17:26-28). “Diosca tucuicunapaj shunguta callarishpami ricun”. Paita mashcajpica paipish cambajmanmi cˈuchuyanga (1 Crónicas 28:9). Bibliamanta yachacushpaca Jehová Dios paita rijsichun canta agllashcatami intindina cangui (Jeremías 31:3). Yaya Dios cambaj imallata rurashcata yachashpami paitaca tucui shunguhuan cˈuyangui.

8. ¿Jehová Dios canta cˈuyashcamantaca ima shinataj agradicingui?

8 Jehová Dios canta cˈuyashcamantaca paita mañashpami agradicishcata ricuchina  cangui. Paiman ima shina sintirishcata parlashpa, cambaj imallata rurashcamanta agradicishpaca ashtahuanmi cˈuyangui. Yayitu Dios can mañashcacunata cutichijta ricushpacarin paihuanmi alli apanacungui (Salmo 116:1). Shinallataj can ima shina sintirishcata Yaya Dios intindij cashcatami cringui. Jehová Diospaj amigo tucungapajpish pai ima shina yuyashcata, canpish paita cushichingapaj imata ruranatami intindina cangui. Chaipajca Bibliatami alli estudiana cangui.

Bibliata estudiashpaca Dioshuanmi alli apanacungui. Shinallataj canmanta Dios imata shuyashcatami cuentata cungui. (Párrafo 9-ta ricui). *

9. ¿Diospaj Shimita valorashcataca ima shinataj ricuchingui?

9 Diospaj Shimita valoranata yachai. Bibliallapimi Jehová Diosmanta, pai cambaj imata munashcata yachangui. ¿Diospaj Shimita valorashcataca ima shinataj ricuchingui? Punllanta Bibliata liyishpa, Bibliamanta yachangapajpish alli prepararishpa, yachashcatapish cambaj causaipi pajtachishpami valorashcata ricuchingui (Salmo 119:97, 99; Juan 17:17). ¿Tucui punllacunachu Bibliata estudiangui?

10. ¿Bibliaca imamantataj ñucanchijpajca valishca can?

10 Achca gentecunaca Jesús cai Allpapi cajpimi ñahui ñahui paita ricurcacuna. Bibliapimi cai gentecuna parlashcataca ricui tucunchij. Chaipimi Jesús canmanta imallata rurashcata tucuita parlan. Jesús imallata rurashcata, nishcata yachashpacarin paipaj amigomi tucungui. Chaimantami Bibliaca ñucanchijpajca valishca can.

11. ¿Jehová Diosta ashtahuan cˈuyangapajca imatataj runa cangui?

11 Jesusta cˈuyanata yachai. Chashnami Jehová Diostaca ashtahuan cˈuyangui. Jesusca paipaj Yaya shinami cˈuyaj, llaquij, humilde can (Juan 14:9). Jesusmanta ashtahuan yachashpaca Yayitu Dios ima shina cashcatami ashtahuan alli intindingui. Chashnami paitaca ashtahuan cˈuyangui. Por ejemplo, Jesusca gentecuna mana ricunayachishca pobrecunata, ungushcacunata, fuerza illajcunata cˈuyaihuan tratashcatami  yachanchij. Shinallataj paica alli causachunmi alaja consejocunata curca. Cai consejocunata pajtachishpaca allimi causangui (Mateo 5:1-11; 7:24-27).

12. ¿Cambaj juchacunamanta Jesús huañushcata yachashpaca imatataj rurangui?

12 Cambaj juchacunamanta Jesús huañushcapi cutin cutin yuyashpaca paitami ashtahuan cˈuyangui (Mateo 20:28). Jesús canmanta huañushcata yachaj chayashpaca juchacunamanta arrepintirishpami Yaya Diosta perdonachun mañangui (Hechos 3:19, 20; 1 Juan 1:9). Jehová Diosta, Jesusta ashtahuan cˈuyashpaca Diosta cˈuyajcunahuanpishmi tandanacunata munangui.

13. ¿Canta ayudachunca Jehová Diosca picunatataj cushca?

13 Jehová Diosta cˈuyajcunata cˈuyai. Cambaj familiacuna o amigocunaca imamanta Diosman mingarisha nijtaca manachari intindincuna. Chaimantami maijancunaca huaquin jarcaicunata churancuna. Pero canta ayudachunca Yaya Diosca paita alli sirvijcunatami cushca. Diosta sirvijcunamanta mana caruyajpica paicunami cantaca sinchiyachishpa cˈuyaihuan apoyangacuna (Marcos 10:29, 30; Hebreos 10:24, 25). Tal vez Diosta alli sirvijta ricushpaca cambaj familiacunapish o amigocunapish Jehová Diosta sirvishpami pai munashca shina causanata agllangacuna (1 Pedro 2:12).

14. 1 Juan 5:3-pi nishcacunata pajtachishpaca ¿ima shinataj causangui?

14 Diospaj mandashcacunata cazushpa pajtachi. Diosmanta manaraj yachashpaca tal vez can munashca shinami causarcangui. Pero Bibliata estudiacushpaca Diospaj mandashcacuna ashtahuan valishca cashcatami intindingui (Salmo 1:1-3; 1 Juan 5:3-ta liyipai). Por ejemplo, Bibliapica cazarashcacunapaj, yaya mamacunapaj, huahuacunapaj consejocunami tiyan (Efesios 5:22–6:4, NWT ). ¿Dios mandashcacunata pajtachishpaca cambaj familiacunaca cushillachu causacun? ¿Dios mandashca shina alli amigocunata charishcamantachu cambaj causaipi cambiashcangui? ¿Cunanca cushillachu sintiringui? (Proverbios 13:20; 1 Corintios 15:33, QC, 1989). Caicunata pajtachishpaca cushillami sintiringui.

15. ¿Bibliapaj consejocunata alli pajtachingapajca imatataj rurana cangui?

15 Diospaj consejocunata yachacushpapish caicunata ima shina pajtachinataca manachari alli intindingui. Chaimantami Yaya Diosca Cuerpo Gobernantepi caj huauquicunata canta ayudachun churashca. Paicunami ima alli cashcata, ima mana alli cashcata cuentata cuchunca publicacioncunata cushca (Hebreos 5:13, 14). Publicacioncunata estudiashpami Bibliapaj consejocunata cambaj causaipi ima shina pajtachinata yachangui. Chashnami Diostapish sirvinata agllangui.

16. ¿Jehová Diosca paita sirvijcunata ñaupajman pushachunca imallatataj rurashca?

16 Diospaj pueblota apoyanata, cˈuyanata yachai. Muyundij Allpapimi Diosca paita sirvijcunataca chˈican chˈican congregacioncunapi churashca. Jesusmi cai tucui congregacioncunapaj uma can (Efesios 1:22; 5:23). Cutin Jesusca “alli cazuj alli yuyaiyuj” sirvij huauquicunatami Diospaj obrata ñaupajman pushachun churashca. Paicunami Diospajman cˈuchuyachun, paihuan alli apanacuchun ayudancuna (Mateo 24:45-47, QC, 1989). Alli cazuj alli yuyaiyuj huauquicunaca congregacioncunata alli pushachunmi huaquin huauquicunatapish agllancuna (Isaías 32:1, 2; Hebreos 13:17; 1 Pedro  5:2, 3). Cai huauquicunaca ñucanchijta animangapajmi tucui pudishcata rurancuna. Ashtahuancarin gentecunaman Jehová Diosmanta huillachunmi ayudancuna (Efesios 4:11-13).

17. Romanos 10:10, 13, 14-pi nishca shinaca Jehová Diosmantaca ¿imamantataj gentecunaman parlanchij?

17 Jehová Diosta cˈuyachun shujtajcunata ayudai. Jesusca paipaj discipulocunataca Jehová Diosmanta yachachichunmi mandarca (Mateo 28:19, 20). Jesús mandashcallamantachari gentecunaman huillai tucunchij. Pero Jehová Diosta ashtahuan cˈuyashpaca canpish Pedro, Juan shinami sintiringui. Paicunaca: “Ñucanchij imallata ricushcata, uyashcata huillanataca mana saqui tucunchijchu” nircami (Hechos 4:20). Shujtajcunata Jehová Diosta cˈuyachun ayudashpami cushilla sintirishun. Felipeca etíope runata Diosmanta yachachishpa, bautizarichun ayudashpaca cushillami sintirishcanga. Felipepaj ejemplota catishpa, Jesús mandashcata pajtachishpaca testigo de Jehová casha nishcatami ricuchingui (Romanos 10:10, 13, 14-ta liyipai *). Canpish etíope runa shinachari tapuringui. Paica: ¿Manachu ñucaca cunanllataj bautizari tucuni? nircami (Hechos 8:36).

18. ¿Catij yachaipica imallatataj yachashun?

18 Bautizarinata decidishpaca cambaj causaipajmi valishca decisionta agllangui. Mana shuj pugllailla cashcamantami, bautizaringapaj imallata rurana cashcata alli ricuna cangui. ¿Bautizarinamantaca imallatataj yachana cangui? ¿Manaraj bautizarishpa, bautizarishca qˈuipapish imatataj rurana cangui? Catij yachaipimi cai tapuicunamantaca yachashun.

CANTO 2 Jehová shutimi cangui

^ par. 5 Huaquin gentecunaca Jehová Diosta cˈuyashpapish bautizarishpa testigo de Jehová tucunatami manchancuna. Quiquin chashna sintirishpaca cai yachaipimi bautizaringapaj imata rurana cashcata yachangui.

^ par. 5 Maijan gentecunaca mana igual yuyashcamantami cai yachaipi nishcacunataca chˈican chˈican ordenpi pajtachingacuna.

^ par. 17 Romanos 10:10, 13, 14 (NWT ): “Cashcata ruraj cangapajca shungumantami crina canchij. Shinallataj quishpiringapajca shujtajcunamanmi huillana canchij. Jehová Diospaj shutipi mañajcunaca tucuicunami quishpiringa. Shinapish paipi manaraj crishpaca ¿ima shinataj paipaj shutipica mañangacunari? Manaraj paimanta uyashpaca ¿ima shinataj paipica cringacunari? Pi mana huillajpica ¿ima shinataj paimantaca uyangacunari?”.

^ par. 62 FOTOMANTA: Shuj panica randicushpami shuj joven huarmiman tratadota cucun.