Ima tiyashcata ricui

Ima tiyashcata ricui

¿Yacharcanguichu?

¿Yacharcanguichu?

Bibliapica israelitacuna Egipto llajtapi esclavocuna cashcatami huillan. Pero ¿Bibliallachu chaita yachachin?

Bibliapica madianitacuna Joseta Egipto llajtaman apashcatami huillan. Chai qˈuipaca Josepaj yayapish paipaj familiahuan Canaán llajtamanta Egiptoman rishcatami huillan. Egiptopi cashpaca Gosén llajtapimi saquirircacuna. Gosén llajtaca Río Nilo yacu callarin cˈuchullapimi saquirij carca (Génesis 47:1, 6). ‘Israelitacunaca mirashpa yallitaj achcacunami tucurca’. Chaimantami Egiptopi causajcunaca dimastij mancharishpa israelitacunataca esclavocuna tucuchun obligarcacuna (Éxodo 1:7-14).

Bibliapi quillcachishcacunata huaquin mana valichijcunaca Bibliamanta chai parloca yanga parlollami can nincunami. Pero ñaupa tiempopi tiyaj Egiptopica semita * esclavocunaca tiyarcatajmi. ¿Chaitaca ima shinataj yachanchij?

Egipto llajta janaj ladopimi huaquin arqueologocunaca allpata allashpa ñaupa tiempopi tiyashca huaquin pueblocunata japircacuna. Bibliata estudiaj John Bimsonca: “Chaipica 20 yalli semita nishca pueblocunatami japishca carca” ninmi. Egipto llajtamanta estudiaj James Hoffmeier runaca: “Jesús manaraj huacharijpi más o menos 1800 huatacuna huashamanmi Asia occidentalpi semítico shimita parlaj gentecunaca Egipto llajtapi causanaman rinata munarcacuna. Chai tiempopimi Abraham, Isaac Jacobpish causarcacuna. Génesis libropi nishca shinaca chai tiempopimi paicunaca Egipto llajtapi yacuta, micunata, qˈuihuacunata mashcanaman rircacuna” ninmi.

Egipto llajta ura ladopimi shuj pillushca papelta japircacuna. Jesús manaraj huacharijpi casi 2 mil huatacuna huashamanmi chaitaca quillcashcacuna canga. Chai quillcashcapica shuj huasipi esclavocuna causashca shuticunatami quillcashcata japircacuna. Chai shuticunapurapica 40 yalli semitacunapaj shuticunatami japircacuna. Paicunaca yanujcuna, tejinata yachajcuna o peoncunami carca. James Hoffmeier runaca: “Cai huasipi 40 semitacunapaj shuticunata tarishcamantami Egipto llajtapi saquirij shujtaj pueblocunapipish achca semitacuna causashca ni tucunchij. Río Nilo yacu callari cˈuchullapimi ashtahuantajca causashcacuna canga” ninmi.

Arqueólogo David Rohl runaca: “Cai quillcashcapi tiyaj shuticunaca Bibliamanta surcushca layami yuyachin” nircami. Por ejemplo, Isacar, Aser, Sifra shuticunata layami chai quillcashcaca charin (Éxodo 1:3, 4, 15). Rohl runaca: “Chaita ricushpami israelitacuna Egipto llajtapi esclavocuna cashcata yachanchij” ninmi.

John Bimsonca: “Bibliapica israelitacuna Egipto llajtapi esclavocuna cashcata, chaimanta llujshishcatapishmi yachachin. Arqueologocuna, yachajcuna japishcacunapish chai yachachishcacuna cierto cashcatami ricuchin” ninmi.

^ par. 4 Semita nishpaca Noepaj churi Sempaj huahuacunamantami parlacun. Sempaj huahua huahuacunaca elamitacuna, asiriocuna, caldeocuna, israelitacuna, siriocuna, huaquin arabecunami cashcacuna canga.