Ima tiyashcata ricui

Ima tiyashcata ricui

Trompeta tocashcata uyashpa cazushunchij

Trompeta tocashcata uyashpa cazushunchij

CAI tucuri punllacunapica Jehová Dios ñucanchijta pushacushcata, paipaj cꞌuchullapi cachun ima minishtishcata cushcatami yachanchij (2 Timoteo 3:1). Shitashca pambapi causaj israelitacuna shinami cada uno Diostaca cazuna canchij. Trompeta tocacujta uyashpaca paicunaca chai ratomi cazujcuna carca.

Jehová Diosca Moisesmanca: ‘Cullqui trompetacunata ishquita rurai. Chaicunaca israelcunata tandachingapaj, carpa huasicunata shujtajman apana cashcata huillangapajmi canga’ nircami (Números 10:2). Israelitacuna imata ruranata yachachunca sacerdotecunaca chꞌican chꞌicanmi trompetacunata tocajcuna carca (Números 10:3-8). Cunan punllacunapish Diosta sirvijcunaca trompeta tocacujta uyacuj shinami chꞌican chꞌican mandashcacunata chasquinchij. Caimanta quimsa ejemplocunata yachashun. Jatun tandanacuicunaman richun invitajpi, ancianocunata yachachijpi, congregacioncunaman mushuj mandashcacunata cujpimi trompetacuna tocacujta uyacushca shina can.

JATUN TANDANACUICUNAMAN INVITAJPI

Jehová Dios paipaj carpa huasi punguman israelitacuna richun munajpica sacerdotecunaca ishqui trompetacunatami tocajcuna carca (Números 10:3). Diospaj carpa huasi muyundijpi causaj tucui israelitacunami trompetacunata tocacujta uyajcuna carca. Carpa huasi cꞌuchullapi cajcunaca ratomi chayashcacuna canga. Pero carupi causajcunapajca chaiman chayangapajca tiempo, esfuerzomi minishtirishcanga. Ima shina cajpipish Diosca tucuicuna tandanacuchun, pai mandashcacunata uyachunmi munarca.

Ñaupa punllacunapi shinaca mana Diospaj carpa huasiman rinchijchu. Cunan punllacunapica ñucanchijtaca quimsa punlla jatun tandanacuicunaman, chai laya shujtaj tandanacuicunaman richunmi invitancuna. Chaicunapica valishca yachachishcacunatami chasquinchij. Muyundij Allpapimi Diosta sirvijcunaca chai yachachishcacunallatataj chasquincuna. Shujlla shina tandanacushca cashcamantami cushilla sintirincuna. Cai tandanacuicunaman ringapajca maijancunaca caru ladomantami viajancuna. Pero chaiman ringapaj tucuita rurashcamantami contento sintirincuna.

¿Carupi causaj huauqui panicunapish jatun tandanacuicunataca uyai tucushcacunachu? Internet, computadora, televisioncunapish tiyashcamantami jatun tandanacuicunataca uyai o ricui tucushcacuna. Chashnami paicunapish chai jatun tandanacuipi cashca shina sintirincuna. Por ejemplo, central mundialmanta huauquicunami Benín llajtapi tiyaj sucursalman richun shuj huauquita agllarca. Níger llajtapi saquirij Arlit pueblopi causaj huauqui panicunami visitanaman shamuj huauquipaj discursota videopi ricurcacuna. Cai puebloca Sahara nishca chaquishca pambapimi saquirin. 21 gentecunami chaipi tandanacurcacuna. Chaicunapuramantaca quimsa huauqui, ishqui panimi carcacuna. 44.131 tandanacushcacunamanta carupi cashpapish paicunaca chai jatun tandanacuipi cashca shinami sintirircacuna.  Shuj huauquica: “Cai jatun tandanacuita ricungapaj conectachun saquishcamantami shungumanta agradicini. Cancuna achcata cꞌuyashcatami cuentata cushcanchij” nishpami escribirca.

ANCIANOCUNATA ASHTAHUAN YACHACHINGAPAJ INVITAJPI

Sacerdotecuna ‘shuj trompetallapi tocajpimi huaranga huaranga israelitacunata mandajcunaca’ Diospaj carpa huasiman rina carcacuna (Números 10:4). Chaipimi Moisesca paicunamanca yachachij carca. Cai mandajcunaca pai yachachishcacunata cazushpami paicunaman mingashcacunata alli pajtachijcuna carca. Cada familiatapishmi alli cuidaj carca. Ñucanchijpish chai mandajcuna cashpaca, ¿manachu chaiman ringapajca tucuita ruranchijman?

Cunan punllacunapi ancianocunaca huauqui panicunata mandajcunaca mana canchu. Dios mingashca huauqui panicunataca mana shuj amo shinachu mandancuna (1 Pedro 5:1-3). Pero huauqui panicunata alli pushangapajmi achcata esforzarincuna. Chaimantami Escuela del Ministerio del Reinoman invitajpi o chꞌican chꞌican yachaicunaman invitajpipish ancianocunaca cushilla rincuna. Chashnami congregacionpi ima ruraicunataca alli pajtachincuna. Cai yachachishcacunata chasquishcamantami paicunapish, huauqui panicunapish Diospajmanca ashtahuan cꞌuchuyancuna. Chai laya escuelacunaman mana rishpapish, ancianocuna yachashcacunamantami yachai tucunchij.

CONGREGACIONCUNAMAN MUSHUJ MANDASHCACUNATA CUJPI

Diospaj carpa huasi jahuapi caj pꞌuyu shujtaj ladoman rijpica Jehová Dios israelitacuna shujtaj ladoman richun munashcatami ricuchirca. Chaimi sacerdotecunaca asha asha trompetacunata tocajcuna carca (Números 10:5, 6). Israelitacuna maipi saquirishcamanta shujtaj lugarman rishpaca tucuicunami ordenpi rijcuna carca. Pero caita pajtachingapajca tucuicunami esfuerzota rurana carca. Huaquincunapajca shujtaj ladoman rinaca sinchimi cashcanga. ¿Imamanta?

Maijan israelitacunaca, “mana yuyashcapimi sacerdotecunaca trompetacunapi cutin cutin tocancuna” nishpami yuyashcangacuna. Bibliapica: ‘Huaquinpica Diospaj carpa huasi jahuapi caj pꞌuyu chishimanta, cayandij tutamantacamallami saquirij carca’ ninmi. Maipica chai pꞌuyuca ishqui punllata, shuj quilla o yallitami paicunapaj jahuapi saquirij carca (Números 9:21, 22). ¿Israelitacunaca mashna cutintaj caiman chaiman rircacuna? Números capítulo 33-pica israelitacuna casi 40 lugarcunapi saquirishcatami huillan.

Maipica manchanana shitashca jatun pambata puricushpaca llandulla lugarcunatami tarijcuna carca. Chaipi saquirishcamantami alli sintirishcangacuna (Deuteronomio 1:19). Tal vez maijancunaca, “caimanta rishpaca shujtaj ladopica mana allimi causashun” nishpami yuyashcangacuna.

Sacerdotecuna trompetacunata asha asha tocacujta uyashpaca maijan familiacunaca chai ratomi rijcuna carca. Pero shujtaj familiacunaca shuyanami carca. Paicuna llujshina horas chayangacamaca pacienciatami charina carca. Trompetacunapi asha asha tocacujta uyashpaca inti llujshin ladopi saquirij Judá, Isacar, Zabulón familiacunami puntapica llujshina carca (Números 2:3-7; 10:5, 6). Paicuna rishca huashaca sacerdotecunaca cutinmi trompetacunapi tocajcuna carca. Chaimi ura ladopi saquirij quimsa familiacuna llujshina horas carca. Tucui israelitacuna llujshingacamami sacerdotecunaca tocajcuna carca.

Huaquinpica Diospaj organizacionpi ima cambiocuna tiyajpica, “caita pajtachinaca sinchimi can” nishpami yuyai tucunchij. O “achca cambiocunami tiyan” nishpami yuyai tucunchij. Tal vez ñaupa tiempocunapi Diospaj organizacionpi ima mandashcacunata pajtachinatami munarcanchij. Mushuj cambiocunata pajtachingapajca paciencia, tiempomi minishtirirca. Pero chaicunata pajtachina cashcatami yachanchij. Ima cambiocunata pajtachingapaj tucui pudishcata rurajpica Jehová Diosmi bendicianga.

Moisés causashca punllacunapica Jehová Diosca achca cꞌaricunata, huarmicunata, huahuacunatapish shitashca pambapimi cuidarca. Yayitu Dios paicunata mana cuidashca cajpi, paipaj mandashcacunata mana cazushca cashpaca israelitacunaca mana causancunamanchu carca. Cai sinchi punllacunapipish Diosca imata ruranatami yachachin. Shinallataj paipajman cꞌuchuyachun, sinchi feta charichunpishmi ayudan. Diosta cazuj israelitacunaca sacerdotecuna trompetacunapi tocacujta uyashpaca tucuipimi cazujcuna carca. Ñucanchijpish paicuna shinami Diospaj mandashcacunataca tucuipi cazuna canchij.