Ima tiyashcata ricui

Ima tiyashcata ricui

 YACHAI 25

‘Ñucallatajmi ñuca ovejacunataca mashcasha’

‘Ñucallatajmi ñuca ovejacunataca mashcasha’

“Ñucallatajmi ñuca ovejacunataca mashcashpa rigrisha” (EZEQUIEL 34:11).

CANTO 105 “Diosca cꞌuyajmari”

CAITAMI YACHASHUN *

1. ¿⁠Jehová Diosca imamantataj shuj mamahuan chꞌimbapurarirca?

PROFETA Isaías causaj punllacunapica Jehová Diosca paipaj pueblomanca: ‘Shuj huarmica pai huachashca huahuataca ¿cungaringachu? Huahuata chai huarmi cungarijpipish ñucaca cantaca manataj cungarishachu’ nircami (Isaías 49:15). Jehová Diosca paillataj shuj mamahuanca mana siempre chꞌimbapurarinchu. Pero caipi sí, paica shuj mamahuanmi chꞌimbapurarirca. Paica paita sirvijcunata achcata cꞌuyashcatami ricuchisha nirca. Chaimantami Diosca shuj mama paipaj huahuacunata achcata cꞌuyashcahuan chꞌimbapurarca. Achca mamacunaca pani Jasmín shinami yuyancuna. Paica: “Shuj mamaca paipaj huahuata chuchuchishpaca paihuanmi cꞌuyanacui callarincuna. Toda la vidami chashna cꞌuyanacuncuna” ninmi.

2. ¿⁠Jehová Diosca paita sirvijcuna paimanta caruyajpica ima shinataj sintirin?

2 Jehová Diosca paita sirvijcuna huillanata saquijpi, tandanacuicunata saquijpica cuentatami cun. Achcacuna cada huata paita sirvinata saquishcata ricushpaca dimastijmi llaquirin. *

3. ¿⁠Jehová Diosca imatataj munan?

3 Diosmanta caruyashcacuna congregacionman cutin tigrajpica cushillami chasquinchij. Jehová Diospish ñucanchijpish paicuna congregacionman tigrachunmi munanchij (1 Pedro 2:25). Paicuna tigrachunca ¿ima shinataj ayudana canchij? Cai tapuita manaraj cutichishpami maijancuna imamanta tandanacuicunata, huillanata saquishcata yachashun.

 ¿MAIJANCUNACA IMAMANTATAJ DIOSMANTA CARUYASHCACUNA?

4. ¿Maijancunaca trabajopi dedicarishcamantaca imataj tucushcacuna?

4 Maijancunaca paicunapaj trabajopimi achcata dedicarishcacuna. Asia llajtapi causaj huauqui Hungca: * “Ñucaca trabajopimi dimastij dedicarircani. Achca cullquita ganashpaca Jehová Diostaca allimi sirvisha nishpami yuyarcani. Chaimantami achca horascunata trabajashpa tandanacuicunamanpish faltai callarircani. Qꞌuipacarin ña congregacionmantami caruyarcani. Diabloca gentecuna Jehová Diosta sirvinata saquichunmi munan. Chaimantami cai mundota utilizan” ninmi.

5. ¿Shuj panica achca llaquicunata charishpaca imataj tucurca?

5 Maijan huauqui panicunaca chꞌican chꞌican problemacunahuanmi chꞌimbapurancuna. Gran Bretañapi causaj pani Anneca cinco huahuacunatami charin. Paica: “Ñuca shuj churica discapacitadomi huacharirca. Asha tiempo qꞌuipaca ñuca ushushitapish congregacionmantami llujchircacuna. Cutin caishuj churitaca umapi ancha ungüita charishcatami japircacuna. Chaimantami dimastij llaquilla sintirishcamanta tandanacuicunamanpish ña mana rircani. Huillanamanpish ña mana llujshircani. Tiempohuancarin Diosmantami caruyarcani” ninmi. Pani Anne shina, paipaj familia shina shujtaj huauqui panicunapish llaquicunata charijpica ñucanchijpish llaquillami sintirinchij.

6. Colosenses 3:13-pi nishcata mana pajtachishpaca ¿imataj tucushun?

6 (Colosenses 3:13-ta liyipai). Maijan huauqui panicunaca shuj huauqui o shuj pani llaquichijpimi pꞌiñarishcacuna. Apóstol Pabloca maijan ñucanchijta pꞌiñashpa juchachijpica mana alli sintirij cashcatami yacharca. Maipica maijan huauqui panicunaca yangamantachari mana alli tratangacuna. Pero resentirishca saquirishpaca congregacionmantami caruyai tucunchij. Chaimantami cuidarina canchij. Sudamérica ladopi causaj huauqui Pablomanta parlashun. Paitaca yangamantami juchachircacuna. Chaimantami ancianocunaca chaita crishpa Pabloca mana allitami rurashca nishpa disciplinarcacuna. Paica ¿ima shinataj sintirirca? Pabloca: “Ñucaca dimastij colera sintirishcamantami congregacionmantaca asha asha caruyarcani” ninmi.

7. ¿Huaquincunaca jatun juchata rurashcapi yuyacushcamantaca imataj tucushcacuna?

7 Maijancunaca jatun juchata rurashcapi cutin cutin yuyashpami, “Diosca ñucataca mana cꞌuyangachu” nishpa llaquilla sintirincuna. Arrepintirishpapish Diospaj pueblopica mana cai tucunichu nishpami yuyancuna. Francisco shuti huauquica chashnami sintirirca. Paica: “Huainayana juchapi urmajpimi ñucata Bibliahuan consejarcacuna. Consejota chasquishca qꞌuipaca tandanacuicunaman rishpa catircani. Pero dimastij llaquilla sintirishcamantami Diospaj pueblo ucupi canataca ña mana mericinichu nishpa yuyarcani. Ñuca concienciapi mana alli sintirishcamantami Yayitu Diosca ñucataca mana perdonanchu nishpa yuyarcani. Ashtahuancarin asha tiempo qꞌuipaca huillanaman, tandanacuicunamanca ña mana rircanichu” ninmi. Huauquicuna chashna llaquicunata chꞌimbapurashcata ricushpaca paicunamantaca ¿imatataj yuyanchij? ¿Paicunaca ima shina sintirishcataca intindinchijchu? ¿Jehová Diosca paicunamantaca imatataj yuyan?

JEHOVÁ DIOSCA PAITA SIRVIJCUNATACA CꞌUYANMI

Israel llajtapi tiyaj michijcunaca chingarishca ovejacunamantami achcata preocuparijcuna carca. (Párrafos 8 y 9-ta ricui). *

8. ¿⁠Jehová Diosca paita sirvijcuna paimanta caruyajpipish imatataj mana cungarin?

8 Jehová Diosca paimanta caruyashcacunataca manataj cungarinchu. Paita sirvingapaj  imallata rurashcatapish yuyaipimi charin (Hebreos 6:10). Jehová Diosca paipaj pueblota ima shina cuidashcata ricuchingapajca profeta Isaiasca shuj chꞌimbapuraitami churarca. Paica: ‘Diosca ovejacunata michij shinami paipaj ovejacunataca michinga. Malta cꞌari ovejacunataca paipaj rigrapimi apanga. Marcashpami apanga’ nircami (Isaías 40:11). Alli michij Jehová Diosca paipaj ovejacuna paimanta caruyajpica ¿ima shinataj sintirin? Jesusca paipaj Yaya ima shina sintirishcatami paipaj discipulocunaman intindichirca. Paica: “Shuj runa patsaj ovejacunata charijca, shuj chingarijpica ¿imatashi ruranman? ¿Manachu iscun chunga iscunta saquishpa, urcucunata rishpa chai chingarishcata mashcagrin? Chaita japishpaca, caishuj iscun chunga iscun mana chingarishcacunamanta yallimi cushicunman. Chaica chashnatajmi” nircami (Mateo 18:12, 13).

9. ¿Alli michijca paipaj ovejacunataca ima shinataj cuidaj carca? (Página 1-pi tiyaj dibujota ricui).

9 ¿⁠Jehová Diostaca imamantataj shuj michijhuan chꞌimbapuran? Alli michijca ovejacunataca achcatami cuidan. Por ejemplo, rey Davidca paipaj ovejacunata shuj oso, shuj león micusha nijpimi chai animalcunahuan macanacurca (1 Samuel 17:34, 35). Alli michijca paipaj oveja chingarijpica cuentatami cun (Juan 10:3, 14). Alli michijca 99 ovejacunataca, corralpi saquishpa o pi cuidachun saquishpami shuj chingarishca ovejataca mashcanaman rin. Jesusca paipaj Yaya ima shina sintirishcata yachachingapajmi cai chꞌimbapuraita churarca. Paica: ‘Cai uchillacunamanta shujllapish chingarichunca manataj munanchu’ nircami (Mateo 18:14).

Ñaupa punllacunapi ovejacunata michij israelitami oveja chingarishcata japishpa cuidacun. (Párrafo 9-ta ricui).

JEHOVÁ DIOSCA CHINGARISHCA OVEJACUNATAMI MASHCAN

10. Ezequiel 34:11 al 16-pi nishca shinaca ¿Jehová Diosca chingarishca ovejacunata ayudangapajca imatataj rurasha nirca?

10 Jehová Diosca ñucanchijta, paimanta caruyajcunatapish achcatami cꞌuyan. Paica profeta Ezequielman nishca shinaca paipaj chingarishca ovejacunata mashcashpa, cutin paihuan alli tucuchun ayudasha nishcatami ricuchirca. Cai ovejacunata ayudangapaj  imallata rurana cashcatapishmi huillarca. Pai michigrishcataca Israel llajtapi shuj michij imallata ruranahuanmi chꞌimbapurarca (Ezequiel 34:11-16-ta liyipai). Puntapica, alli michijca paipaj oveja chingarishcatami mashcan. Chaipajca tal vez tiempo, esfuerzomi minishtirin. Chingarishca ovejata japishpaca cutinmi shujtaj ovejacunahuan tandachin. Chugririshca ovejata japishpaca michijca paipaj rigrapi apashpami ovejitataca jambinman. Mana cashpaca oveja yaricaihuan cajpica cꞌuyaihuanmi caranman. Ancianocunaca cai michij shinami congregacionmanta caruyashca huauqui panicunataca ayudancuna. Paicunaca Diospaj ovejacunata michijcunami can (1 Pedro 5:2, 3). Ancianocunaca chingarishcacunataca mashcashpami cutin congregacionman tigrachun ayudancuna. Shinallataj Dioshuan alli amigocuna tucuchun ayudashpami paicunaca cꞌuyaita ricuchincuna. *

11. ¿Alli michijca imatataj yacharca?

11 Alli michijca oveja chingarinataca allimi yacharca. Oveja chingarishcata japishpaca mana macajchu carca. Ñaupa tiempopi Diosta sirvijcuna Jehová Dios mandashcata mana pajtachijpipish Dios ima shina tratashcata ricushun.

12. ¿⁠Jehová Diosca Jonastaca ima shinataj tratarca?

12 Profeta Jonasca Jehová Dios mandashcata mana pajtachisha nishpami Nínive llajtamanca mana rirca. Jonás mana cazujpipish Jehová Diosca paitaca mana saquircachu. Paica alli michij shinami Jonastaca ayudarca. Ashtahuanpish pai mingashcata pajtachichunmi fuerzata curca (Jonás 2:7; 3:1, 2). Qꞌuipaca Jehová Diosca calabaza yurata ricuchishpami gentecunapaj causai valishca cashcata intindichirca (Jonás 4:10, 11). ¿Caicunamantaca imatataj yachanchij? Ancianocunaca congregacionmanta caruyashcacunata ayudangapajmi tucui pudishcata rurana can. Paicuna imamanta caruyashcata intindingapajmi ancianocunaca esforzarina can. Huauqui panicuna Jehová Diosman cutin tigrajpica ancianocunaca cꞌuyaihuanmi alli tratana can.

13. ¿Salmo 73-ta quillcaj runata Jehová Dios ima shina tratashcamantaca imatataj yachanchij?

 13 Salmo 73-ta quillcajca mana allicuna mana allita rurashpa, alli causacujta ricushpami achcata desanimarirca. Paica Diosta sirvina valishca cashcatami dudai callarirca (Salmo 73:12, 13, 16). ¿Jehová Diosca imatataj rurarca? Paica cꞌuyaihuanmi ayudarca. Ashtahuanpish Jehová Diosca salmista nishcacunatami paipaj Shimipi quillcachirca. Asha tiempo qꞌuipaca salmistaca Jehová Diospaj amigo cana tucuimanta yalli valishca cashcatami intindirca (Salmo 73:23, 24, 26, 28). ¿Caicunamantaca imatataj yachanchij? Huaquincuna “¿Jehová Diosta sirvinaca valishcachu?” nishpa tapujpica ancianocunaca mana rato juzganachu can. Juzganapaj randica imamanta chashna parlashcata, rurashcatami ancianocuna intindina can. Caita rurashca qꞌuipaca paicunaca Bibliahuanmi animai tucuncuna.

14. a) ¿Eliasca imamantataj ayudachun minishtirca? b) ¿Jehová Diosca paitaca ima shinataj ayudarca?

14 Profeta Eliasca reina Jezabelmantami miticushpa rirca (1 Reyes 19:1-3). Paica shujtaj profetacunaca mana tiyanchu. Ñuca ima rurashcacunapish mana valinchu nishpami yuyarca. Chaimantami dimastij llaquilla sintirishpa huañusha nirca (1 Reyes 19:4, 10). Elías chashna sintirijpipish Jehová Diosca paitaca ayudarcami. Ashtahuancarin, canca mana solollachu cangui, ñucapi confiailla, ñuca mingashcata pajtachinaca faltanrajmi nishpami animarca. Elías ima shina sintirishcata Jehová Diosman parlajpica paica cꞌuyaihuanmi uyarca. Ashtahuancarin huaquin ruraicunatami  mingarca (1 Reyes 19:11-16, 18). Caimantaca ¿imatataj yachanchij? Diosta sirvijcunataca ñucanchijpish ancianocunapish cꞌuyaihuanmi tratana canchij. Shuj huauqui o pani pꞌiñarishca cajpi, Jehová Diosca ñucataca mana perdonanchu nishpa yuyajpica ancianocunaca allimi uyana can. Chai qꞌuipaca Diospaj valishca cashcata intindichunmi animana can.

¿DIOSMANTA CARUYASHCACUNATACA IMA SHINATAJ RICUNA CANCHIJ?

15. Juan 6:39-pi nishca shinaca ¿Jesusca Jehová Diospaj ovejacunataca ima shinataj ricuj carca?

15 Jehová Diosca paimanta caruyashca huauqui panicunataca ¿ima shinataj ricuchun munan? Jesuspaj ejemplomantami yachai tucunchij. Paica Diospajca tucuicuna valishca cashcatami yacharca. Chaimantami Jesusca Israel llajtamanta chingarishca ovejacuna Diospajman cꞌuchuyachun ayudarca (Mateo 15:24; Lucas 19:9, 10). Jesuspish alli michij cashcamantami Jehová Diospaj ovejacuna ama chingarichunca achcata esforzarirca (Juan 6:39-ta liyipai).

16, 17. ¿Ancianocunaca Diosmanta caruyashca huauqui panicunataca ima shinataj ayudana can? (“ ¿Chingarishca ovejaca ima shinashi sintirin?” nishca recuadrota ricui).

16 Apóstol Pabloca Éfeso llajtapi causaj ancianocunamanca Jesuspaj ejemplotami catina canguichij nircami. Pabloca cashna nishpami escribirca: “Fuerza illaj cajcunata ayudangapajmi sinchita trabajana canguichij. Shinallataj Jesús nishcacunatami yuyarina canguichij. Paica: ‘Imatapish cujmi cushcata japijta yalli cushicun’ nircami” (Hechos 20:17, 35, NWT ). Cai versocunapi ricushca shinaca ancianocunapajca Diosta sirvijcunata cuidanami ashtahuan importante can. España llajtamanta shuj huauqui ancianoca: “Jehová Diosca paimanta caruyashcacunamantami achcata preocuparin. Caita yuyarishpami paicunata ayudangapajca tucui pudishcata rurani. Chaimantami Jehová Dios paicunata cuidachun munashcata intindini” ninmi.

17 Cai yachaipi parlashca huauqui panicunaca Jehová Diospaj ayudata chasquishpami paipajman tigrarcacuna. Pero cunan punllacunapish maijan huauqui panicunaca Yayitu Diospajmanmi tigrasha nincuna. ¿Paicunataca ima shinataj ayudai tucunchij? Caitaca catij yachaipimi ashtahuan yachashun.

CANTO 139 Paraisopi cashcata yuyai

^ par. 5 Maijancunaca Jehová Diosta achca huatacunata sirvishpapish ¿imamantataj congregacionmanta caruyashcacuna? ¿Diosca paicunamantaca imatataj yuyan? Cai yachaipimi cai tapuicunamantaca yachashun. Shinallataj ñaupa tiempopipish Diosta sirvijcuna Dios mandashcacunata mana pajtachi tucujpipish pai ima shina ayudashcatami yachashun. Diosmanta ñucanchijpish imata yachai tucushcatami ricushun.

^ par. 2 ALLI INTINDISHUNCHIJ: Publicadorcunaca Diosta sirvinata saquishcataca ¿ima shinataj ricuchincuna? Paicunaca seis quillacuna yallitami mashna tiempota predicashcata mana huillancuna. Diosmanta caruyashpapish paicunaca ñucanchij huauqui panicunami can. Paicunataca cꞌuyashpapishmi catinchij.

^ par. 4 Caipica huaquin shuticunatami cambiashcanchij.

^ par. 10 Catij yachaipimi ancianocuna ima shina caicunata pajtachi tucushcata yachashun.

^ par. 60 FOTOMANTA: Israel llajtamanta shuj michijca shuj chingarishca ovejatami mashcacun. Ña japishpaca paipaj canlla ovejacunapajman tigrachunmi ayudacun. Cunan punllapish ancianocunaca chashnallatajmi rurancuna.

^ par. 64 FOTOMANTA: Congregacionmanta caruyashca shuj panica busmantami ishqui Testigocuna carritohuan cushilla predicacushcata ricucun.