Ima tiyashcata ricui

Ima tiyashcata ricui

 YACHAI 8

Ama envidianacushpa, alli causashunchij

Ama envidianacushpa, alli causashunchij

“Chaimanta ima shina sumajta causanata,caishuj chaishuj ima shina ashtahuan sinchiyanatapish yuyashunchij” (ROMANOS 14:19, QC, 1989).

CANTO 113 Sumaj causaica Diosmantami shamun

CAITAMI YACHASHUN *

1. ¿Josepaj huauquicunaca envidiashcamantaca imatataj rurarcacuna?

JACOBCA paipaj tucui churicunatami cˈuyarca. Pero ashtahuantajca 17 huatacunata charij Josetami cˈuyarca. ¿Chaita ricushpaca Josepaj huauquicunaca imatataj rurarcacuna? Joseta envidiai callarishpami paitaca pˈiñai callarircacuna. Joseca paita pˈiñachunca imata mana rurashcachu carca. Pero paipaj huauquicunaca paitaca esclavota shinami cˈaturcacuna. Jacobmanca cambaj cˈuyashca churitaca shuj millai animalmi micushca nishpami llullarcacuna. Chashna envidiashcamantami familiata, paicunapaj yayatapish achcata llaquichircacuna (Génesis 37:3, 4, 27-34).

2. Gálatas 5:19 al 21-pi nishca shinaca ¿imamantataj mana envidiana canchij?

2 Bibliapica aichapaj ruraicuna maijancuna cashcatami huillan. Shujca envidianami * can. Envidiajcunaca Dios mandacunpica mana yaicungacunachu ninmi (Gálatas 5:19-21-ta liyipai). Shujtajcunata envidiashpaca pˈiñanacushpa, chˈicanyanacushpami causashun.

3. ¿Cai yachaipica imatataj yachashun?

3 Josepaj huauquicunaca envidiai callarishcamantami cushilla causanata chingachircacuna. Ñucanchijca Josepaj huauquicuna rurashca shinaca mana nunca rurashunchu nishpachari yuyashun. Pero tucuicunami pandachijlla shunguta charinchij (Jeremías 17:9). Chaimantami mai ratoca envidiai callarishun. Cunanca huaquincuna imamanta envidiai  callarishcata Bibliapi ricushun. Shinallataj ama envidiangapaj, alli apanacungapaj imata rurana cashcatami yachashun.

¿IMAMANTATAJ ENVIDIAI CALLARINCHIJ?

4. ¿Isaactaca imamantataj filisteocunaca envidiarca?

4 Shujtajcuna charijcuna tucujpichari envidiai callarishun. Isaacca charij runami carca. Shinallataj animalcunata yacuchingapajmi huaquin pozocunata charirca. Filisteocunaca paita envidiashcamantami chai tucui pozocunataca allpahuan taparcacuna (Génesis 26:12-14, 15, 16, 27). Cunan punllacunapish maijancunaca filisteocuna shinami charijcunata envidiancuna. Ashtahuancarin charijcuna ama imata charichunmi munancuna.

5. ¿Religionta pushajcunaca imamantataj Jesusta envidiarcacuna?

5 Shujtajcunahuan alli apanacujta ricushpachari envidiai callarishun. Religionta pushajcunaca Jesús achca gentecunahuan alli apanacujta ricushpami envidiarcacuna (Mateo 7:28, 29). Jehová Dios cachashca cashcamantami Jesusca alli yachachirca. Shinapish religionta pushajcunaca envidiashcamantami paitaca yangamanta juchachircacuna (Marcos 15:10; Juan 11:47, 48; 12:12, 13, 19). ¿Caimantaca imatataj yachanchij? Shujtajcuna allita ruraj, cˈuyaj, humilde huauqui panicunahuan alli apanacujpica mana envidianachu canchij. Ashtahuanpish paicuna shinami allita ruraj, cˈuyaj, humilde cana canchij (1 Corintios 11:1; 3 Juan 11).

6. ¿Huauqui Diotrefesca imamantataj envidiai callarirca?

6 Congregacionpi Dios mingashca trabajocunata chasquijpichari envidiai callarishun. Apostolcuna causashca punllapica huauqui Diotrefesca congregacionpi pushaj huauquicunatami envidiarca. Paica congregacionpi pailla pushanatami munarca. Chaimantami apóstol Juanta, caishuj pushaj huauquicunatapish yangamanta juchachirca (3 Juan 9, 10). Ñucanchijca Diótrefes shinaca manachari rurashun. Pero shujtaj huauqui panicuna Dios mingashca trabajota chasquijpichari envidiai callarishun. Ashtahuancarin paiman mingashcataca ñucami alli pajtachisha nishpachari yuyashun.

Ñucanchij shunguca shuj allpa shinami can. Cˈuyaj, llaquij canaca allpapi huiñashca sisacuna layami can. Cutin envidianaca venenota charij qˈuihua shinami can. Envidianaca cˈuyaj, llaquij canatami jarcanga. (Párrafo 7-ta ricui).

7. ¿Mana envidiashpaca imatataj rurashun?

7 Envidianaca shuj venenota charij qˈuihua sapiyashpa huiñacuj shinami can. Ñucanchij shungupi jatun tucuna munaita charijpi, mitsa cana munaita charijpica envidiaca chai qˈuihua layami sapiyashpa ashtahuan huiñanga. Mana alli qˈuihuaca planta alli huiñachunmi jarcan. Chashnallatajmi envidiana munaica cˈuyaj, llaquij canata jarcanga. Chaimantami sinchi cajpipish ñucanchij shungumanta envidiana munaita anchuchina canchij.

AMA JATUN TUCUSHPA DIOS CUSHCACUNALLAHUAN CUSHILLA CAUSASHUNCHIJ

Ama envidiangapajca Dios paipaj espíritu santota cuchunmi minishtinchij. Chashnami mana jatun tucushpa Dios cushcacunallahuan cushilla causashun. (Párrafos 8 y 9-ta ricui).

8. ¿Ama envidiangapajca imatataj rurana canchij?

8 Ama envidiangapajca charishca cosascunallahuan mana jatun tucushpami cushilla causana canchij. Chashnami shungupi envidiana munaitaca mana charishun. Humildes cashpaca shujtajcunata yalli cashcataca mana yuyashunchu. Shinallataj ñucanchijpajlla alli canataca mana mashcashunchu (Gálatas 6:3, 4). Charishca cosascunallahuan cushilla causashpaca shujtajcunata yalli charinataca mana munashunchu (1 Timoteo 6:7, 8). Ashtahuancarin shujtajcuna ima allita chasquijpica cushillami sintirishun.

9. Gálatas 5:16 y Filipenses 2:3, 4-pi nishca shinaca ¿espíritu santota chasquishpaca imatataj rurashun?

 9 Ama envidiangapajca Dios paipaj espíritu santota cuchunmi minishtinchij. Espíritu santota chasquishpaca imamanta envidiai callarishcatami cuentata cushun. Jehová Dios ayudajpimi shungumanta envidiana munaita anchuchishpa alli munaicunata, alli yuyaicunata charishun (Salmo 26:2; 51:10). Chashnami mana jatun tucushpa charishca cosascunallahuan cushilla causashun (Gálatas 5:16; Filipenses 2:3, 4-ta liyipai). Cunanca Moisespish Pablopish ama envidiangapaj imata rurashcata ricushun.

Shuj jovenca ishqui runacuna profeta shina huillacujta ricushpami Moisesman, Josueman huillangapaj callpashpa ricun. Josueca Moisestaca chai profeta tucushcacunata jarcai nishpami nicun. Pero Moisesca mana jarcarcachu. Ashtahuanpish Josuemanca Jehová Dios paicunata paipaj espíritu santohuan agllashcamantami cushilla sintirini nircami. (Párrafo 10-ta ricui).

10. ¿Jehová Dios shujtajcunaman espíritu santota cujpica Moisesca imatataj rurarca? Página 1-pi tiyaj fotota ricui.

10 Moisesca Diospaj pueblota pushajmi carca. Pushaj cashpapish pailla autoridadta charinataca mana munarcachu. Por ejemplo, shuj cutinca setenta ancianocunami Diospaj carpa huasi muyundij cˈuchullapi carcacuna. Chaimi Jehová Diosca Moisespi caj asha espirituta japishpa, paicunapi churarca. Shinapish ishqui ancianocunaca Diospaj carpa huasiman mana rishca cashpapish espíritu santotami chasquircacuna. Paicunapish espíritu santota chasquishpami profetacuna shina tucurcacuna. Josueca chaita ricushpami Moisestaca chai ishqui ancianocuna Dios huillachishcata ama huillachun nirca. Pero ¿Moisesca imatataj rurarca? Paica mana envidiarcachu. Ashtahuanpish Yayitu Dios paicunaman espíritu santota cushcamantami cushilla sintirirca (Números 11:24-29). ¿Moisesmantaca imatataj yachanchij?

¿Ancianocunaca Moisés shina humilde cashcataca ima shinataj ricuchincuna? (Párrafos 11 y 12-ta ricui). *

11. ¿Ancianocunaca Moisés shina humilde cashcataca ima shinataj ricuchincuna?

11 Caipi yuyashun. Shuj ancianoca cada semana Huillaj revistamanta congregacionpi yachachinatami munan. Pero paitaca “shujtaj huauquita yachachi, paipish Huillaj revistamanta congregacionpi yachachichun” nishpami mañancuna. Moisés shina humilde cashpaca chai ancianoca cushillami yachachinga.

12. ¿Achca huauqui panicunaca humilde cashcata, cushilla causacushcataca ima shinataj ricuchincuna?

12 Cunanca mayorlla huauquicunahuan ima tucushcata ricushun. Achca huatacunatami huauquicunaca ancianocunata pushajcuna cashca. Pero 80 huatacunata charishpaca ancianocunata pushaj canatami cushilla saquishcacuna. Shinallataj superintendente de circuito huauquicunapish 70 huatacunata charishpaca congregacioncunata visitanatami saquishcacuna. Paicunaca shujtaj trabajota chasquishpami cushilla sintirincuna. Achca huauqui panicunapish Betelpi sirvinata saquishpami Dios mingashca shujtaj trabajota chasquishcacuna. Cai huauqui panicunaca paicuna saquishca trabajota shujtajcuna pajtachijpica mana envidiancunachu.

13. ¿12 apostolcunapuramanta mana cashpapish Pabloca imatataj rurarca?

13 Apóstol Pabloca humildemi carca. Shinallataj Dios mingashcata chasquishpaca cushillami causarca. Chaimantami envidiana munaitaca paipaj shungupi mana charirca. Pabloca achcacunata ayudashpapish: “Caishuj apostolcunapaj qˈuipallami cani. Apóstol nishcapish mana caipajmi cani” nircami (1 Corintios 15:9, 10). 12 apostolcunaca Jesús cai Allpapi huillacujpica paihuanmi carca. Cutin Pabloca Jesús causarishca qˈuipami Jesusta cati callarirca. Qˈuipaca Diosca Pablotaca mana judiocunapaj apóstol cachunmi agllarca. Chashna cashpapish  12 apostolcunapuramantaca paica mana carcachu (Romanos 11:13; Hechos 1:21-26). Shinapish Pabloca 12 apostolcuna Jesushuan alli apanacuj cashcamantami paicunataca mana envidiarca. Ashtahuanpish Dios mingashcataca cushillami pajtachirca.

14. ¿Humildecuna cashpaca imatataj rurashun?

14 Humildecuna cashpaca Yayitu Dios ima trabajota mingajpipish cushillami pajtachishun. Shinallataj Dios churashca pushaj huauquicunatapishmi respetashun (Hechos 21:20-26). Pushaj huauquicuna juchayujcuna cajpipish Jehová Diospajca shuj valishca regalomi can (Efesios 4:8, 11, NWT ). Paicunata cazushpaca Jehovapaj amigocunami tucushun. Huauqui panicunahuanpish allimi apanacushun.

TUCUICUNAHUAN ALLI APANACUSHUNCHIJ

15. ¿Jehová nishca shinaca imatataj rurana canchij?

15 Envidiana munaita charishpaca shujtajcunahuanca mana alli apanacushunchu. Jehová Diosca: ‘Ima shina sumajta causanata, caishuj chaishuj ima shina ashtahuan sinchiyanatapish yuyaichij’ ninmi (Romanos 14:19). Chaimantami shungumanta envidiana munaitaca anchuchina canchij. Shinallataj shujtajcunata ama envidiachunmi ayudana canchij. ¿Ama envidiajcuna cachunca ima shinataj ayudashun? ¿Ima shinataj tucuicunahuan alli apanacushun?

16. ¿Ama envidiajcuna cachunca ima shinataj ayudana canchij?

16 Rurashcacunahuan, parlashcacunahuanmi shujtajcuna ama envidiachun ayudana canchij. Diosta mana sirvijcunaca  paicunapaj charishca cosascunallahuanmi jatun tucuncuna (1 Juan 2:16). Paicuna chashna rurajpimi shujtajcunaca envidiai callarincuna. Chaimantami charishca cosascunamanta, imata randigrishcacunamantaca cada rato mana parlana canchij. Shinallataj congregacionpi mingashca trabajocunamantaca mana tucuicunamanchu huillana canchij. Ashtahuanpish huauqui panicunamanta preocuparishpami paicunapaj alli rurashcacunamanta parlana canchij. Chaita rurajpica paicunaca cushillami sintiringacuna. Congregacionpipish tucuicunahuanmi alli apanacushun.

17. ¿Josepaj huauquicunaca ima shinataj cambiashcata ricuchircacuna?

17 Josepaj huauquicunapi cutin yuyashun. Joseta huaquin huatacuna huashaman cˈatushca qˈuipami paihuanca Egiptopi cutin tuparcacuna. Shinapish Joseca pi cashcataca paipaj huauquicunamanca mana utca huillarcachu. Paica huauquicuna cambiashcata o mana cambiashcata yachangapajmi shuj micuiman invitarca. Joseca, paipaj qˈuipa huauqui Benjaminmanca caishuj huauquicunaman carashcata yalli carachunmi mandarca (Génesis 43:33, 34). Pero huauquicunaca mana envidiarcacunachu. Ashtahuanpish Benjaminmanta, paicunapaj yaya Jacobmantami preocuparircacuna (Génesis 44:30-34). Josepaj huauquicunaca shungumanta envidiana munaitami anchuchishcacuna carca. Chaimantami paicunapaj familiaca cutin tandalla causarcacuna (Génesis 45:4, 15). Ñucanchijpish shungumantami envidiana munaitaca anchuchina canchij. Chashnami familiapi, congregacionpipish tandalla causashun.

18. Santiago 3:17, 18-pi nishca shinaca ¿ima shinataj causana canchij?

18 Cai pachapica envidiaj gentecunami tiyan. Ñucanchijpish juchayujcuna cashcamantami mai ratoca envidiai callarinchij. Pero Jehová Diosca ama envidiashpa alli apanacuchunmi munan (Santiago 4:5). Chaimantami humildes, agradecidos cana canchij. Dios cushcacunahuanpish cushillami causana canchij. Chashnami tandalla Dios munashca shina causashun (Santiago 3:17, 18-ta liyipai).

CANTO 130 Jehová shina perdonashunchij

^ par. 5 Diospaj pueblo ucupica cushilla, tandallami causanchij. Pero shungupi envidiai callarishpaca cashna alli causaitami chingachishun. Cai yachaipimi imamanta envidiai callarishcata, ama envidiangapaj, alli apanacungapaj imata rurana cashcata yachashun.

^ par. 2 ALLI INTINDISHUNCHIJ: Envidiashpaca shujtajcunapaj cosascunatami charinata munashun. Ashtahuancarin amataj imata charichun nishpami yuyai callarishun.

^ par. 61 FOTOCUNAMANTA: Pushaj ancianocunaca mayorlla huauquitaca: “Cai jovenraj huauquita yachachi, paipish Huillaj revistamanta congregacionpi yachachichun” nishpami mandacuncuna. Mayorlla huauquica Huillaj revistamanta yachachinata achcata munashpapish ancianocuna mandashcataca cushillami pajtachicun. Jovenraj huauquimanca alajatami yachachicun. Shinallataj mayorlla huauquica cushillami felicitacun.