Ima tiyashcata ricui

Ima tiyashcata ricui

 ÑUCA CAUSAI

Diosta ashtahuan sirvichunmi animarcacuna

Diosta ashtahuan sirvichunmi animarcacuna

ÑUCA yayaca John Mills shutimi carca. Paica 1913 huatapimi Nueva York llajtapi bautizarirca. 25 huatacunatami charirca. Bautizaringapaj conferenciataca huauqui Russellmi curca. Chai qˈuipaca ñuca yayaca Trinidad nishca islamanmi causanaman rirca. Chaipimi paica Diosta tucui shunguhuan sirvij huarmihuan cazararca. Chai huarmica Constance Farmer shutimi carca. Shinallataj ñuca yayaca paipaj amigo William Browntami “Foto-Drama de la Creación” nishca videota ricuchichun ayudarca. Huauqui Brown, paipaj huarmipish Africaman ringacamami ayudarca. Paicunaca 1923 huatapimi chaiman rircacuna. Pero ñuca yaya mamaca Trinidad islapimi saquirircacuna. Paicunaca jahua pachaman rina esperanzatami charircacuna.

CˈUYAJ YAYA MAMATAMI CHARIRCANI

Ñuca yaya mamaca 9 huahuacunatami charirca. Punta huahuataca Rutherford shutitami shutichirca. ¿Imamanta chaita shutichirca? Chai tiempopica huauqui Rutherfordmi Sociedad Watch Tower nishcapi presidente carca. Qˈuipaca ñucami 30 de diciembre de 1922-pi huacharircani. Woodworth shutitami shutichircacuna. Pero cˈuyaimantaca ñucataca Worth nijcunami carca. Shinallataj ¿imamantataj chaita shutichircacuna? Clayton Woodworth nishca huauquica The Golden Age nishca revistacunatami ricuj, allichij carca (cunanca chai revistacunataca Rijchari ninchijmi). Ñuca yaya mamaca ñucanchijtaca colegiota tucuchingacamallami ayudarcacuna. Shinapish Diosta ashtahuan sirvichunmi animarcacuna. Shinallataj mamitaca ima yuyaicunatapish Bibliahuanmi jahualla intindichij carca. Cutin ñuca yayituca paipaj ñahuita, maquicunatapish tucui laya rurashpami Bibliamanta historiacunata yachachij carca.

Ñuca yaya mama yachachishcacunaca mana denbaldechu carca. Pichca huauquicunamantaca quimsami Escuela de Galaadman rircanchij. Cutin ñuca quimsa panicunaca Trinidad y Tobago nishca llajtapimi achca huatacunata precursora carcacuna. Yayitu, mamitaca “Mandaj Diospaj huasipi” ñucanchijta tarpuj shinami Diospaj Shimita punllanta yachachijcuna carca. Imata yachachishcatapish paicunapaj causaipimi pajtachijcuna carca. Chaimi ‘Taita Diospaj huasi canllapi sisaj’ shina carcanchij (Salmo 92:13).

Ñucanchij huasimantami predicacionman llujshijcuna carca. Chaimi precursorcunaca ñucanchij huasipi tandanacujcuna carca. Paicunaca huauqui George Youngmantami siempre parlanacujcuna carca. Cai huauquica Trinidad islatami misionero shina visitashca carca. Chashnallataj ñuca yaya mamaca huauqui Brownmanta, paipaj huarmimantapishmi cushilla parlajcuna carca. Cai cusa huarmica Africapimi sirvicurca. Chashna parlanacuicunata uyashpami 10 huatacunallata charishpapish predicacionman rinata munarcani.

HUAMBRAMANTAPACHAMI DIOSTA SIRVIRCANI

Chai tiempopica ñucanchij revistacunahuanmi yanga religioncunata, cullqui raiculla cˈatujcunata, cullqui raicu imatapish ruraj politicocunata denunciaj carcanchij. Chaimantami 1936 huatapica Trinidad llajtapi caj gobiernoca Watch Tower rurashca revistacunata, librocunata gentecunaman cuchun jarcarca. Curacuna chaita mañashcamantami shina rurarcacuna. Shinapish ñucanchijca revistacunata, librocunata pacashpami gentecunaman cuj carcanchij. Chaicuna tucuringacamami curcanchij. Chashnallataj hombro jahuapi letrerocunata aparishpami marchaj carcanchij. Hojacunata cungapajpish bicicletacunahuanmi rij carcanchij. Tunapuna pueblomanta caj huauqui panicunaca parlanteta carro jahuapi churashpami predicaj carcacuna. Ñucanchijpish isla ucullapitajmi paicunahuan caru lugarcunapi huillarcanchij. Shina huillashpa purinaca sumajmi carca. Chaimantami Diosta ashtahuan sirvingapaj 16 huatacunata charishpa bautizarircani.

Tunapuna pueblopi caj huauqui panicunami parlanteta charij carro cˈuchupi can.

Ñuca familiaca Diosta alli sirvijcunami carca. Ñucapish sumaj experienciacunatami charircani. Chaimi misionero tucunata munarcani. Chai munaitaca mana saquircanichu. 1944 huatapica huauqui Edmund Cummingshuan huillangapajmi Aruba nishca islaman rircani. Chai islapimi 1945 huatapi shuj Conmemoración tiyarca. 10 gentecuna rijpimi cushilla carcanchij. Qˈuipa huataca shuj congregacionmi chaipi tiyarca.

Ñucapish ñuca huarmipish sumaj experienciacunatami charircanchij.

Chai qˈuipaca trabajopimi shuj compañeraman Diospaj Shimita huillarcani. Paica Oris Williams shutimi carca. Cai huarmica paipaj crishcacunataca tucui shunguhuanmi difindij carca. Pero ñucanchijhuan estudiashpaca Diospaj Shimitaca allimi intindirca. Chaimantami paica Diosta sirvisha nishpa 5 de enero de 1947-pi bautizarirca. Tiempohuanca ishquindij enamorarishpami cazararcanchij. Ñuca huarmica 1950 huatapimi noviembre quillapi precursora tucurca. Ishquindijmi alaja experienciacunata charircanchij.

NIGERIA LLAJTAPIMI DIOSTA CUSHILLA SIRVIRCANCHIJ

1955 huatapica ñucanchijtaca Escuela de Galaadmanmi invitarcacuna. Chaimi Aruba nishca islapi tiyaj huasita, imalla charishcacunatapish cˈaturcanchij. Shinallataj trabajotapish saquishpami rircanchij. Qˈuipaca 29 de julio de 1956-pimi Escuela de Galaadpi graduarircanchij. Chai qˈuipaca ñucanchijtaca Nigeria llajtamanmi cacharcacuna.

1957-pimi Lagos (Nigeria) nishca llajtapi, Betelpi caj huauqui panicunahuan canchij.

Chai tiempopi ima tucushcata yuyarishpami ñuca huarmi Orisca: “Misionerocuna ima llaquicunata charijpipish amañarichunmi Diospaj espirituca ayudan. Por ejemplo, ñucaca misionera canataca manataj munarcanichu. Huahuacunata charinatami munarcani. Pero predicana achca minishtirishca cashcata intindishpaca ña mana chashna yuyarcanichu. Chaimantami ña Galaadpi graduarishpaca predicana yuyailla carcani. Ñuca cusahuan ña barcopi rigrijpica huauqui Worth Thorntonca ‘alli ringuichij. Cunanca cancunaca Betelpimi sirvigringuichij’ nircami. Cai huauquica huauqui Knorrpaj oficinapimi trabajaj carca. Pai nishcata uyashpaca llaquirircanimi. Shinapish Betelpi trabajana sumaj cashcamantami rato amañarircani. Betelpica tucui layami trabajarcani. Shuj trabajopica Betelman shamujcunatami chasquina carcani. Nigeriapi causaj achca huauqui panicunaca polvoyashca, shaicushca, yaricaihuanmi chayamujcuna carca. Paicunahuan canataca achcatami munarcani. Chaimantami paicunataca cushilla, alli atindij carcani. Shinallataj chai trabajoca Jehová Diostami jatunyachij carca. Chaimi alli sintirij carcani” nircami. Chaica ciertomi can. Betelpi tiyaj tucui trabajocunaca sinchi feta charichunmi ayudarca.

1961 huatapica Trinidad llajtapimi familiapura tandanacurcanchij. Chaipimi huauqui Brownca Africapi sumaj experienciacunata charishcata parlarca. Qˈuipaca ñucami Nigeria llajtapi huillajcuna ashtahuan mirarishcata parlarcani. Chaipimi huauqui Brownca ñucata ugllarishpa ñuca yayataca: “Johnny, canca Africamanca nunca mana rishcanguichu. Pero cambaj churica rishcami” nircami. Chaimi ñuca yayaca ñucataca: “Worth chashna rurashpa cati” nirca. Paicuna chashna animachijpimi ñucaman mingashcata tucui shunguhuan pajtachishpa catinata munarcani.

Huauqui William Brownpish paipaj huarmi Antoniapish ñucanchijtaca achcatami animarcacuna.

1962 huatapica clase 37 de Galaadmanmi rircani. Chaipica 10 quillacunatami ñucaman yachachircacuna. Nigeria llajtapica huauqui Wilfred Goochmi sucursalpi superintendente carca. Paica clase 38 de Galaadmanmi rirca. Paitaca Inglaterramanmi  cacharcacuna. Chaimantami paipaj randi ñucataca superintendente cachun nombrarca. Huauqui Brown shinami Nigeria llajtapi chˈican chˈican lugarcunaman rircani. Chai lugarcunapimi achca huauqui panicunata rijsircani. Chaimantami paicunata cˈuyarcani. Cai huauqui panicunaca charij llajtacunapi shina mana achca cosascunata charircachu. Shinapish cushillami causarcacuna. Ashtahuanpish paicunaca tandanacuimanca limpio, alli allichirishcami chayajcuna carca. Shinallataj achcacunaca asambleamanca camioncunapimi shamujcuna carca. Cutin shujtajcunaca chai lugarpi tiyaj buscuna layapimi * shamujcuna carca. Chai buscunapica “Uchilla gota yacucunaca jatun mama cuchami tucun” nishca yuyaicuna layatami quillcashca carca.

Chai yuyaica ciertomi can. Cada unopaj colaboracionmi achca valin. Nigeria llajtapica huillajcunaca mirarishpami catirca. Por ejemplo, 1974 huatapica chai llajtapica 100.000 huillajcunami tiyarca. Chai huatapajca Estados Unidosllapimi Nigeria llajtatapish yalli huillajcuna tiyarca.

Huillajcuna miraricuj tiempopimi Nigeriapica guerra tiyarca. 1967-manta hasta 1970-camami guerra tiyarca. Biafra llajtapi caj huauqui panicunaca Níger nishca yacu chˈimbanijmanmi causarcacuna. Guerra tiyashcamantami paicunaca sucursalmanta mana imata chasqui tucurcacuna. Paicunapajmanca ñucanchijmi revistacunata, librocunata apana carcanchij. Chaimantami shuj cutinca chaupi tutata Níger nishca yacuta cruzagrircanchij. Chai yacuta cruzangapajca shuj kilómetro chaupitami rina carcanchij. Pero guerrapi cashcamantami cruzanaca peligroso carca. Shinapish Jehovata mañashpa, paipi confiashpami chai yacutaca achca cutin cruzarcanchij.

Imalla pasashcataca caina pasashca layami yuyarini. Por ejemplo, tucui laya ungüimi tiyarca. Soldadocunapish tucuitami ricucurca. Chaimantami chai yacuta cruzashpaca huañui tucushcata yacharcanchij. Pero contracunapaj cˈuchupi canami ashtahuan peligroso carca. Shuj tutaca canoapimi Asaba llajtamanta Onitsha llajtaman chayarcani. Cutin chaimantaca Enugu llajtamanmi rircani. Ancianocunata animangapajmi rircani. Shujtaj punllaca Aba llajtapi caj ancianocunata animangapajmi rircani. Chai llajtapica tutacunaca luzcunata mana japichinachu carca. Cutin Port Harcourt nishca llajtapica shuj tandanacuipimi carcanchij. Chaimi soldadocunaca chai cˈuchullapi caj llajtata llaquichi callarircacuna. Chaimantami tandanacuitaca utca Diosta mañashpa tucuchircanchij.

Chai tandanacuicunataca ruranami carcanchij. Chaipimi ñucanchij huauqui panicunataca Jehová cˈuyashcata, cuidashcata ricuchircanchij. Shinallataj macanacuipi ama participachun, ashtahuanpish tandalla causachunmi animarcanchij. Chaimi Nigeriapi caj huauqui panicunaca chai llaqui punllacunata ahuantarca. Maijan pueblomanta cashpapish cˈuyanacushpa, tandallami causarcacuna. Paicunahuan canaca ñucanchijpajca sumajmi carca.

1969 huatapica Asamblea Internacionalmi Yankee nishca estadiopi tiyarca (Nueva York). Chai asambleapica “Paz en la tierra” nishca yuyaimantami parlarca. Chaipica huauqui Milton Henschelmi presidente carca. Ñucami cai huauquitaca ayudarcani. Chaimantami paimanta achcata yacharcani. Paimanta yachanaca allimi carca. ¿Imamantataj chaita nini? 1970 huatapica Lagos (Nigeria) nishca llajtapimi shujtaj Asamblea Internacional tiyarca. Chaipica “Hombres de Buena Voluntad” nishca yuyaimantami parlarca. Chaimanca 121.128 gentecunami shamurcacuna. Y 17 shimicunapimi yachachirca. Shinallataj 3.775 gentecunami bautizarircacuna. Chaitaca huauqui Knorr, y huauqui Henschelmi ricurcacuna. Shinallataj Estados Unidosmanta, Inglaterramanta avionpi fletashpa shamujcunapishmi ricurcacuna. Chai asamblea tucui alli llujshichunmi ñucaca achca ocupado carcani. Ñucanchij Yaya Dios bendiciajllapimi Nigeria llajtapica huillajcuna rato miraricurca. Guerra tiyashca huashapish chai jatun asamblea tiyarca.

The “Hombres de Buena Voluntad” nishca Asamblea Internacionalmanmi 121.128 gentecuna shamurca. 17 shimicunata parlajcunami shamurca. Paicunapurapica ibo nishca shimita parlaj gentecunapishmi carca.

Nigeriapica 30 yalli huatacunatami causarcani. Chai llajtapica huaquinpica superintendente shinami congregacioncunata visitaj carcani. Shinallataj Africapica huaquin llajtacunatami visitaj carcani. Chaipi caj misionerocunaca animachijpica pagui nijcunami carca. Paicunaman cˈuyaita ricuchishpaca ñucapish cushillami sintirircani. Chashna visitashpami cada huauqui panimanta sustarina  cashcata intindircani. Chaimi tucui huauqui panicuna sinchiyarishpa Diosta tandalla sirvincuna.

Guerra punllacunapi llaquicunata chˈimbapurangapaj, ungüicunata chˈimbapurangapajca Jehová Diosmi siempre ayudarca. Ñuca huarmica:

“Ishquindijmi achca cutin paludismo ungüita charircanchij. Shuj cutinca ñuca cusa yallitaj ungushca cajpimi Lagos llajtapi caj hospitalman aparcanchij. Chaipica paica ña mana ashtahuan causai pudingachu nircacunami. Pero qˈuipaca allimi tucurca. Ñuca cusa rijcharishpaca paita atindij enfermeromanmi Diospaj Gobiernomanta parlarca. Chai enfermeroca Nwambiwe shuti runami carca. Qˈuipaca ñuca cusahuanmi chai runaman Diospaj Shimita yachachinaman rircanchij. Paica testigo de Jehovami tucurca. Chai huashaca paica Aba llajtapimi anciano shina sirvirca. Ñucapish achca gentecunatami Diosta sirvichun ayudarcani. Por ejemplo, musulmán gentecunatami Diosta sirvichun ayudarcani. Ñucanchijca Nigeriapi tiyaj costumbrecunata, shimicunata yachanataca achcatami munarcanchij. Chaipi causaj gentecunatapish rijsishcamantami cushilla causarcanchij” nircami.

Shujtaj llajtacunapi sirvingapajca huauqui panicuna ima costumbreta charijpipish paicunata cˈuyana cashcatami yacharcanchij. Chaimi cushilla causarcanchij.

SHUJTAJ LADOPIMI DIOSTA SIRVINAMAN RIRCANCHIJ

1987 huatapica ña mana Betelpi trabajarcanchijchu. Santa Lucía nishca islapi Diospaj Shimita huillagrichunmi cacharcacuna. Chai lugarpi Diospaj Shimita huillana sumaj cajpipish problemacunami tiyarca. Africapica cˈaricunaca achca huarmicunahuanmi cazarajcuna carca. Pero Santa Luciapica apanacushpallami causajcuna carca. Shinapish ñucanchijhuan Diospaj Shimita alli yachashpaca achcacunami paicunapaj causaita cambiarcacuna.

Orishuanca 68 huatacunatami cazado carcanchij. Paitaca tucui shunguhuanmi cˈuyarcani.

Huatacuna pasajpica fuerzasmi tucurishpa catirca. Chaimantami 2005 huatapica Cuerpo Gobernantepi caj huauquicunaca Betelman ñucanchijta invitarcacuna. Chai Betelca Brooklynpimi (Nueva York) saquirirca. 2015 huatapica ñuca huarmimi huañurca. Pai huañushcamantami yallitaj llaquirircani. Paitaca tucui shunguhuanmi cˈuyarcani. Ñucaman alli shungu, cˈuyaj huarmita cushcamantami Jehová Diostaca cada punlla pagui nini. 68 huatacunatami cazado carcanchij. Chai tucui huatacunataca matrimonio ucupi, congregación ucupipish cushilla cangapaj pushajcunata respetana cashcata, perdonana cashcata, humildes cana cashcatami intindircanchij.

Desanimado, llaquilla cashpaca Jehová Dioslla ñucanchij rurashcacunata bendiciahuai nishpami mañarcanchij. Paica siempremi ñucanchijta ayudarca. Chaimantami imapish alli llujshirca. Shamuj punllacunapish Diospaj pueblopi huaquin cambiocuna tiyajpica allimi llujshinga. Cai Allpapish sumaj paraisomi tucunga (Isaías 60:17; 2 Corintios 13:11).

Trinidad y Tobago llajtapica Jehová Diosca ñuca yaya mamapaj trabajota, huauqui panicunapaj trabajotapishmi bendiciarca. Caicamaca chai llajtapica 9.892 gentecunami Diosta sirvicuncuna. Ñucaca Aruba islapi tiyaj congregacionpimi sirvircani. Achca huauqui panicunapishmi chai congregacionpi sirvishcacuna. Chaimantami chaipica cunanca ña 14 congregacioncuna tiyan. Cutin Nigeria llajtapica 381.398 huillajcunami tiyan. Santa Lucía islapipish ñami 783 huillajcuna tiyan.

Ñami 90 yalli huatacunata charini. Salmo 92:14-pica Diospaj huasipi tarpushcacunaca “yuyaj cashpapish, miraricungarajmi. Fuerzasapa, verdijllacunami cangacuna” ninmi. Ñuca familia, ñuca amigocunami Diosta tucui shunguhuan sirvichun animarcacuna. Chaimantami ñuca tucui causaipi Diosta sirvicushcamanta cushilla sintirini. Yayitu Diospish ñucataca mana saquishcachu. Chaimi ‘paipaj huasi canllapi’ sisashcani (Salmo 92:13).

^ par. 17 22 de junio de 1972 huatapi llujshishca ¡Despertad! revistapi, páginas 24 al 26-ta ricui.