Ima tiyashcata ricui

Ima tiyashcata ricui

 YACHAI 2

Llaquilla cajcunata animashunchij

Llaquilla cajcunata animashunchij

‘Paicunallami Diospaj ruranapi ñucataca ayudacuncuna. Paicunaca ñucata achcata cushichijcunapishmi’ (COLOSENSES 4:11).

CANTO 90 Caishujmanta chaishujmanta animarishunchij

CAITAMI YACHASHUN *

1. ¿Achca huauqui panicunaca ima llaquicunahuantaj chˈimbapuracuncuna?

MUYUNDIJ Allpapica achca huauqui paicunami tucui laya llaquicunahuan chˈimbapuracuncuna. Ñucanchij congregacionpi caj huauqui panicunapish chˈican chˈican llaquicunatami charincuna. Maijancunaca paicunapaj cˈuyashca familia o amigo huañushcamantami llaquilla sintirincuna. Shujtacunaca paicunapaj familia o cˈuyashca amigo Diosta sirvinata saquijpimi llaquilla sintirincuna. Cutin huaquincunaca terremoto, jatun acapana tiyashcamantami llaquilla sintirincuna. Cashna llaquicunata charijcunaca paicunata ayudachunmi minishtincuna. ¿Paicunataca ima shinallataj ayudai tucunchij?

2. ¿Pabloca imamantataj shujtajcuna animachun minishtirca?

2 Pabloca Jesushuan jahua pachapi mandangapajmi agllashca carca. Shinallataj shujtajcunatami animaj carca. Pero paipish shujtajcuna animachunmi minishtirca (Romanos 9:1, 2; 2 Corintios 11:23-28). ¿Imamantataj chashna ninchij? Pabloca ungüita charishcamantami garruchahuan tujsicuj shina sintirishcanga (2 Corintios 12:7). Shinallataj paipaj amigo Demasca cai pachapi tiyashcacunata cˈuyashpami Diosta sirvinata saquirca. Chaimantami Pabloca llaquilla sintirishcanga (2 Timoteo 4:10).

3. ¿Jehová Diosca Pablotaca ima shinallataj animarca?

3 Jehová Diosca Pablota animangapajca espíritu santotami curca (2 Corintios 4:7). Shinallataj paita animachunca huauqui panicunatami cacharca. Chaimantami  Pabloca: ‘Aristarco, Marcospish, Tiquicopish, shujtaj huauquicunapish ñucata cushichishpami animarca’ nirca (Colosenses 4:11). ¿Cai huauquicunaca ima shinallataj Pablota animarca? ¿Ñucanchijpish shujtajcunata animangapajca paicuna shina imatataj rurana canchij?

HUAUQUI PANICUNATA AMATAJ SAQUISHUNCHIJ

Huauqui panicuna llaquicunahuan cajpica Aristarco shina paicunata amataj saquishunchij. (Párrafos 4 y 5-ta ricui). *

4. ¿Aristarcoca Pablopaj alli amigo cashcataca ima shinataj ricuchirca?

4 Macedonia llajtamanta Aristarcoca Pablopaj alli amigomi carca. Bibliapica Aristarcomanta punta cutin parlashpaca, Éfeso llajtapimi Pablohuan carca ninmi. Chai tiempopica Pabloca quimsa cutinmi congregacioncunata visitacurca. Chaipi cajpimi contracunaca pˈiñarishpa Aristarcotaca huaicashpa japircacuna (Hechos 19:29). Shinapish gentecuna Aristarcota cacharijpica mana chai rato shujtaj ladoman rinata agllarcachu. Ashtahuanpish Pablohuanmi saquirirca. Huaquin quillacuna qˈuipaca Grecia llajtapimi Diospaj contracunaca apóstol Pablota huañuchisha nircacuna. Pero Aristarcoca Pablotaca manataj saquircachu (Hechos 20:2-4). Huata 58-pica Pablotaca Roma llajta carcelmanmi aparcacuna. Chaimi Aristarcoca Pablohuan Roma llajtaman rirca. Paicuna barcopi viajacujpica barcoca yacupimi pambarirca (Hechos 27:1, 2, 41). Shinallataj Aristarcoca Roma llajtapimi Pablohuan carcelpi cashcanga (Colosenses 4:10). Pabloca Aristarco mana nunca saquishcamantami cushilla sintirishcanga.

5. Proverbios 17:17-pi nishca shinaca ¿ima shinataj alli amigocuna cai tucunchij?

5 Ñucanchijpish Aristarco shinami huauqui panicunataca alli horaspi cajpi, llaqui horaspi cajpipish manataj saquina canchij (Proverbios 17:17-ta liyipai). Maipica huauqui panicunaca ima llaqui japishca huashapish paicunata ayudashpa catichunmi minishtincuna. Por ejemplo, pani Franciscaca * paipaj yaya mamataca cáncer japishca quimsa quilla qˈuipallami huañuipi chingachirca.  Paica: “Cashna llaquicunaca achca huatacunatami llaquichin. Ñuca yaya mama huañushca qˈuipapish achca tiempotami llaquilla pasarcani. Pero turi ñañacuna llaqui horaspi ayudashcamantami paicunataca diosolopagui nini” ninmi.

6. ¿Alli amigocuna cashpaca ima shinataj ayudashun?

6 Alli amigocunaca tiempohuan, fuerzahuanmi llaquilla cajcunata ayudancuna. Por ejemplo, Pedromanta paipaj huarmi Katherinemanta parlashun. Pani Katherineca: “Congregacionmanta shuj cusa huarmimi ñuca cusata doctorpajman pusharcacuna. Chaipimi doctorca Pedrotaca huañuchij ungüimi japishca nirca. Chaita yachaj chayashpapish cai cusa huarmica cancunataca tucuipimi ayudashun nircacunami. Paicunaca cunancamami ayudashpa caticushcacuna” ninmi. Ñucanchijta alli amigocuna llaqui horaspi ayudajpica cushillami sintirishun.

ALLI AMIGOCUNA CASHUNCHIJ

Huauqui panicuna llaquicunahuan cai horasca Tíquico laya alli amigocuna cashunchij. (Párrafos 7 al 9-ta ricui). *

7, 8. Colosenses 4:7 al 9-pi nishca shinaca ¿Tiquicopish ima shinataj Pablopaj alli amigo cashcata ricuchirca?

7 Asia llajtamanta Tiquicopish Pablopaj alli amigomi carca (Hechos 20:4). Huata 55-pica Pabloca Judea llajtapi causaj huauqui panicunata ayudangapajmi cullquita tandana carca. Chaimi tal vez Pabloca cai trabajota pajtachichun Tiquicoman mingashcanga (2 Corintios 8:18-20). Asha huatacuna qˈuipaca Pablotaca Roma llajta carcelpimi churarcacuna. Chaimi Tíquico shuti huauquica Pablo quillcashca cartacunata Asiapi tiyaj congregacioncunata animangapaj apashpa ayudarca (Colosenses 4:7-9).

8 Tiquicopimi Pabloca confiashpa catirca (Tito 3:12). Chai punllacunapica huaquincunaca Diosta sirvijcuna cashpapish mana Tíquico shina carcacunachu. Chaimi Pabloca paicunapi mana confiarca. Por ejemplo, huata 65-pica Pabloca cutinmi Roma llajtapi prezu carca. Paica Asiamanta huauqui panicunaca Diospaj contracunata manchashcamantami ñucataca saquishcacuna nishpami quillcarca (2 Timoteo 1:15). Shinapish Pabloca Tiquicopi confiashcamantami shujtaj trabajotapish paiman mingarca (2 Timoteo  4:12). Tíquico alli amigo cashcamantami Pabloca cushilla sintirishcanga.

9. ¿Ñucanchijpish ima shinataj Tíquico laya alli amigocuna cai tucunchij?

9 ¿Ñucanchijpish ima shinataj Tíquico laya alli amigocuna cai tucunchij? Huauqui panicunata ayudangapaj ari nishca cashpaca pajtachishpami ayudana canchij (Mateo 5:37; Lucas 16:10). Ayudachun minishtijcunaca ñucanchij ayudanata yachashpaca tranquilomi sintirincuna. Shuj panica: “Turi ñañacuna imapi ayudasha nishcata pajtachinata yachashpaca cushillami sintirini” ninmi.

10. Proverbios 18:24-pi nishca shinaca ¿llaquicunahuan cajcunataca picunataj ayudai tucuncuna?

10 Llaquicunahuan cajcunaca alli amigocunatami minishtincuna. Ima tucushcata paicunaman parlashpami tranquilo sintirincuna (Proverbios 18:24-ta liyipai). Huauqui Bijayca congregacionmanta paipaj churita llujshichijpica llaquillami sintirirca. Paica: “Ñucaca ima shina sintirishcataca shuj amigomanmi parlasha nircani” ninmi. Cutin huauqui Carlosca mana allita rurashcamantami congregacionpi mingashcacunataca ña mana pajtachi tucurca. Paica: “Ñuca ima shina sintirishcata pi uyachun, ñuca parlashcatapish ama juzgachunmi minishtircani. Ancianocunami ñucataca alli uyashpa ayudarcacuna. Ñuca parlashcatapish paicuna mana piman huillajpica tranquilomi sintirircani” ninmi.

11. ¿Ima shinataj alli amigocuna cai tucunchij?

11 Pani Sandrataca paipaj cusami shitashpa rirca. Chaimi tranquila cangapajca ima shina sintirishcata paipaj amigocunaman parlarca. Sandraca: “Ñuca ima shina sintirishcataca cutin cutin parlajpipish ñuca alli amigocunaca pacienciahuanmi uyarcacuna” ninmi. Ñucanchijpish alli amigocuna cangapajca pacienciahuanmi alli uyana canchij.

SHUNGUMANTA AYUDASHUNCHIJ

Marcos shungumanta ayudajpimi Pabloca llaquicunata ahuantai tucurca. Ñucanchijpish huauqui panicuna llaquicunahuan cajpica shungumanta ayudashunchij. (Párrafos 12 al 14-ta ricui). *

12. a) ¿Marcosca pitaj carca? b) ¿Marcosca tucuipi ayudaj cashcataca ima shinataj ricuchirca?

12 Marcosca Jerusalén llajtamanta Diosta alli sirvijmi carca. Paipaj primo Bernabeca rijsishca misioneromi carca (Colosenses 4:10, NM ). Marcospaj familiaca achca cullquiyujmi carca. Pero paipajca Diosta sirvina, shujtajcunata ayudanami ashtahuan importante carca. Por ejemplo, Marcosca Pablopish Pedropish Dios mingashcacunata pajtachichunmi ayudarca. Paica mai ratocunaca paicunahuan rishpami maipi saquirinata mashcashpa, micunata randishpa ayudarca (Hechos 13:2-5; 1 Pedro 5:13). Chaimantami Pabloca: ‘Marcosca Dios mingashcata pajtachichun ayudajmi can. Ñucataca achcata cushichijmi can’ nirca (Colosenses 4:10, 11).

13. 2 Timoteo 4:11-pi nishca shinaca ¿Marcos ayudashcamantaca Pabloca ima shinataj sintirirca?

13 Marcosca Pablohuanca allimi apanacurca. ¿Imamantataj chashna ninchij? Huata 65-pimi Pabloca Roma carcelpi carca. Chaipi cashpami Timoteopajca shuj cartata escribirca. Chai cartapica Timoteotaca: “Marcosta mashcashpa canhuan pushamungui” nircami (2 Timoteo 4:11). Pabloca Marcos ayudashcata valorashcamantami paita pushanaman cacharca. Marcosca Roma llajtaman chayashpaca chˈican chˈican ruraicunapimi Pablotaca ayudarca. Por ejemplo, micunata apashpa, cartacunata quillcachun imalla minishtishcacunata cushpami ayudashcanga. Marcos  chashna ayudashcamantami apóstol Pabloca huañuchinata yachashpapish achcata animarishcanga.

14, 15. ¿Shujtajcunataca ima shinataj ayudai tucunchij?

14 (Mateo 7:12-ta liyipai). Llaqui horaspi amigocuna ayudajpica shungumantami agradicinchij. Huauqui Raulpaj yayaca shuj accidentepimi huañurca. Raulca: “Jatun llaqui japijpica imata ruranapish sinchimi ricurin. Pero alli amigocuna imallatapish rurashpa ayudajpica tranquilomi sintirini” ninmi.

15 Ñucanchij huauqui panicunata ima shina ayudanata yachangapajca alli ricushunchij. Párrafo 6-pi parlashca Pedromanta paipaj huarmi Katherinemanta cutin parlashun. Cai cusa huarmita ayudangapajca shuj panica doctorpajmanmi apaj carca. Shinallataj cai panica shujtaj huauqui panicunapish doctorpajman apachunmi shuj horariota rurarca. Pani Katherineca: “Paicuna ayudajpimi cushilla sintirircanchij” ninmi. Ñucanchijpish tucui pudirishcahuan ayudajpimi shujtajcunaca cushilla sintiringa.

16. ¿Marcosmantaca imatataj yachanchij?

16 Jesuspaj punllacunapi causaj Marcospi cutin yuyashunchij. Jehová Diosca Marcos librota quillcachun, shujtaj mingashcacunatapish pajtachichunmi Marcosman mingarca. Dios mingashcacunata pajtachina cashpapish Pablota animashpami ayudarca. Chaimantami Pabloca Marcostaca imapipish ayudachunca mañajlla carca. Ñucanchijpish Marcos shinami huauqui panicunataca animana canchij. Por ejemplo, Angelapaj shuj familiataca millai gentecunami huañuchishca carca. Chaimi huauqui panicunaca cai panita animangapajca tucui pudishcata rurarcacuna. Angelaca: “Turi ñañacuna shungumanta ayudajpica paicunataca jahuallami ayudachunca mañai tucuni” ninmi.

SHUJTAJCUNATA ANIMASHUNCHIJ

17. 2 Corintios 1:3, 4-pi nishca shinaca ¿llaquicunata charishpapish ima shinataj shujtajcunata ayudai tucunchij?

17 Ñucanchij congregacionpipish huauqui panicunaca paicunata animachunmi  minishtincuna. Paicunata animangapajca ñucanchijta animashca shinallatajmi animai tucunchij. Por ejemplo, pani Nancypaj abuelami huañurca. Shinapish Nancyca: “Ñucanchij llaquicunata charijpipish Jehová Diosca shujtajcunata animachunmi cachan” ninmi (2 Corintios 1:3, 4-ta liyipai). Párrafo 5-pi parlashca pani Franciscaca: “2 Corintios 1:4-pi nishca shinaca ñucanchijta animashca shinallatajmi ñucanchijpish shujtajcunata animanchij” ninmi.

18. a) ¿Maipica imamantataj animanata manchanchij? b) ¿Shujtajcunataca ima shinataj animai tucunchij? Shuj ejemplomanta parlai.

18 Llaquilla cajcunata animangapajca imata ninata, imata ruranataca mana pudishachu nishpachari yuyai tucunchij. Chashna manchaihuan cashpapish paicunata animangapajmi esforzarina canchij. Por ejemplo, Paul shuti ancianoca: “Ñuca yaya huañujpimi achca huauqui panicunaca ñucata ima shina cushichinataca mana yacharcacuna. Pero paicuna ñuca ladopi cashcamantami diosolopagui nini” ninmi. Tomás shuti huauquica: “Shuj terremoto tiyajpimi huauqui panicunaca mensajecunata cachashpa achcata animarcacuna. Chai mensajecuna ima nishcataca mana yuyarinichu. Pero tucuicunami ñucamantaca sustarishpa cˈuyaita ricuchircacuna” ninmi. Shujtajcunamanta preocuparijpica paicunaca cushillami sintiringacuna.

19. ¿Imamantataj shujtajcunataca animashpa catina canchij?

19 Cai tucuri punllacunapi causacushcamantami llaquicunaca ashtahuan mirarishca (2 Timoteo 3:13). Ñucanchijpish juchayujcuna cashcamantami imapipish pandarinchijlla. Chaimantami shujtajcuna animachun minishtinchij. Apóstol Pabloca shujtaj huauquicuna animajpimi huañuna horascama Diosta alli sirvirca. Ñucanchijpish Aristarco shina huauqui panicunata amataj saquishunchij. Shinallataj Tíquico shina alli amigocuna cashunchij. Marcos shina shungumanta ayudashunchij. Chashna rurashpaca shujtajcuna Diosta alli sirvichunmi ayudashun (1 Tesalonicenses 3:2, 3).

^ par. 5 Apóstol Pabloca achca huatacunatami llaquicunahuan causarca. Paitaca huaquin huauquicunami animashpa ayudarcacuna. Cai yachaipimi cai huauquicuna Pablota ima shina ayudashcata yachashun. Shinallataj paicuna shina shujtajcunata ayudangapaj imata rurana cashcatapishmi yachashun.

^ par. 5 Cai yachaipica huaquin shuticunatami cambiashcanchij.

CANTO 111 Diosta sirvicushcamanta cushicushunchij

^ par. 56 FOTOCUNAMANTA: Aristarcopish Pablopish barcopi viajacujpimi barcoca pambarirca.

^ par. 58 FOTOCUNAMANTA: Pabloca pai quillcashca cartacunata congregacioncunaman apachunmi Tiquicoman mingarca.

^ par. 60 FOTOCUNAMANTA: Marcosca chˈican chˈican ruraicunahuanmi Pablota ayudarca.