Ima tiyashcata ricui

Ima tiyashcata ricui

 YACHAI 4

Espíritu santollatajmi huillacun

Espíritu santollatajmi huillacun

‘Chai espiritullatajmi ñucanchij espiritumanca, Diospaj huahuacunami canguichij nishpa huillacun’ (ROMANOS 8:16).

CANTO 25 Jehová agllashca ungidocuna

CAITAMI YACHASHUN *

Pentecostés punllapimi Jehová Diosca 120 discipulocunata Jesushuan jahua pachapi mandachun espíritu santohuan agllarca. (Párrafos 1 y 2-ta ricui).

1, 2. ¿Huata 33 Pentecostés punllapica imataj tucurca?

HUATA 33 Pentecostés domingo tutamantapica Jerusalenpimi 120 discipulocunaca shuj altibajo huasipi carcacuna (Hechos 1:13-15; 2:1). Asha punllacuna ñaupallami Jesusca paita catijcunamanca: “Cai llajtamantaca ama ringuichij. Diospaj espíritu santotami chasquigringuichij” nirca (Hechos 1:4, 5). ¿Chaipica imashi tucushcanga?

2 “Paicuna chashna tandanacushca cajpica, ñapish shuj jatun huaira huajiashpa pˈucuj shina jahua pachamanta shamushpami paicuna tiyacun huasipi jundarca”. Discipulocunaca ‘nina lunyacuj shina paicunapaj uma jahuapi tiyarishcatami’ ricurcacuna. Chaimi ‘tucuicuna jucha illaj espirituhuan junda tucurcacuna’ (Hechos 2:2-4). Chashnami Jehová Diosca paipaj jucha illaj espiritutaca discipulocunaman curca (Hechos 1:8). Paicunatami puntapica Yaya Diosca Jesushuan jahua pachapi mandachun espíritu santohuan * agllarca.

¿AGLLASHCACUNACA IMATATAJ YUYARINA CAN?

3. ¿120 discipulocunaca imamantataj Jehová Dios paicunata agllashcataca seguros carcacuna?

3 ¿Nina lunyacuj shina cambaj uma jahuapi tiyarijta ricushpa, ñapish can shujtaj shimipi parlai callarishpaca  ima shinataj sintiringuiman? Can chai 120 discipulocunapurapi cashpaca ima tucushcataca mana cungaringuimanchu ¿nachu? (Hechos 2:5-12). Espíritu santota chasquishcamantami Yayitu Dios jahua pachapi mandachun agllashcataca tucui shunguhuan cringuiman. ¿Pero Diosca tucuicunatachu chai shinallataj agllan? Mana cashpaca, ¿chai horallatajchu agllan? Mana. Caimanta ashtahuan ricushun.

4. ¿Huata 33-pica tucuicunatachu Jehová Diosca jahua pachaman richunca chai shinallataj agllarca?

4 Puntaca Jesushuan mandagrijcunata Dios ima horas agllashcata ricushun. Huata 33 Pentecostés punllapica Diosca 120 discipulocunata agllashca huashami 3.000 discipulocunata agllarca. Cai 3.000 discipulocunaca bautizarishcahuanmi jahua pachapi mandangapaj Diospaj espíritu santota chasquircacuna (Hechos 2:37, 38, 41). Pero asha huatacuna qˈuipaca mana tucuicunachu bautizarishcahuan Diospaj espíritu santota chasquircacuna. Por ejemplo, samaritanocunataca bautizarishca qˈuipami Jesushuan jahua pachapi mandachun Jehová Diosca agllarca (Hechos 8:14-17). Cutin Corneliota, paipaj familiataca manaraj bautizarijpimi jahua pachaman richun agllarca (Hechos 10:44-48).

5. 2 Corintios 1:21, 22-pi nishca shinaca ¿agllashcacunaca jahua pachapi mandagrishcataca imamantataj seguros can?

5 Cunanca jahua pachapi causagrijcunata agllajpi ima tucushcata ricushun. Jehová Dios jahua pachapi mandachun agllajpica maijancunaca ¿ñucataca imamantashi agllan? nishpami tapurincuna. Cutin shujtajcunaca mana chashna yuyancunachu. Chashna yuyajpipish Jehová Diosca paicunata agllashcata ricuchingapajmi paipaj espíritu santota cun. Apóstol Pabloca: ‘Chaita uyashpa cancuna crincami, Diosca pai cusha nishca jucha illaj espirituhuan sellarca. * Tucuimanta quishpichishpa pushajpi ñucanchij japina cashcata japingacama ricuchij cachunmi, chai espiritutaca churarca’ nircami (Efesios 1:13, 14). Espíritu santota cushpami  Jehová Diosca jahua pachapi mandachun agllashcacunahuanca ari ninacushca. Chaimantami agllashcacunaca jahua pachapi mandagrishcata tucui shunguhuan crincuna (2 Corintios 1:21, 22-ta liyipai).

6. ¿Jesushuan jahua pachapi mandagrijcunaca imatataj rurana can?

6 Dios agllashcacunaca jahua pachapi mandangapajca nombrashcallami can. Chaimantami paicunaca 2 Pedro 1:10-pi ima nishcata yuyarina can. Chaipica: “Cancunata cayashpa agllashcapica ashtahuan sinchiyarina yuyailla caichij. Chaicunata rurashpaca manataj urmanguichijchu” ninmi. Agllashcacunaca Diosta mana alli sirvishpaca jahua pachamanca mana ringacunachu (Filipenses 3:12-14; Hebreos 3:1; Apocalipsis 2:10).

¿DIOS AGLLASHCATACA IMA SHINATAJ YACHANCUNA?

7. ¿Agllashcacunaca Jesushuan jahua pachapi mandagrishcataca ima shinataj yachancuna?

7 Pabloca Romapi caj agllashcacunataca: ‘Jucha illaj cachun cayashcacuna. Cancunaca manchaihuan cachunllataj huatashcata charij espiritutaca mana chasquircanguichijchu. Ashtahuanpish quiquin huahuata shina ruraj espiritutamari chasquircanguichij. Paimantami: “¡Ñuca Yayitu!” nishpa caparicunchij. Chai espiritullatajmi ñucanchij espiritumanca, Diospaj huahuacunami canguichij nishpa huillacun’ nircami (Romanos 1:7; 8:15, 16). Jehová Diosca agllashcacunamanca paipaj espíritu santota cushpami jahua pachapi mandanaman rina cashcata ricuchin (1 Tesalonicenses 2:12).

8. ¿Jesushuan mandagrijcunaca imamantataj canca agllashcami cangui nichunca mana minishtincuna?

8 Jehová Diosllatajmi agllashcacunataca jahua pachapi mandanaman rina cashcataca mana dudashpa tucui shunguhuan crichun ayudan (1 Juan 2:20, 27-ta liyipai). * Agllashcacunaca congregacionpi Jehová Dios yachachichunmi minishtincuna. Pero shujtajcuna canca agllashcami cangui nishpa yachachichunca mana minishtincunachu. Jehová Diosmi espíritu santota cushpa paicunamanca jahua pachapi mandachun agllashca cashcata ricuchin.

¿CUTIN HUACHARINACA IMATATAJ NISHA NIN?

9. ¿Agllashcacunaca imamantataj jahua pachapi causanata munancuna?

9 Diosca gentecunataca cai Allpapi causachunmi rurarca (Génesis 1:28; Salmo 37:29). Pero huaquin gentecunallatami jahua pachapi causachun agllashca. Chaimantami paraíso Allpapi causagrijcunaca Jesushuan mandagrijcuna ima shina sintirishcata, imata yuyashcataca mana intindincuna. Jahua pachaman rigrijcunataca Jehová Diosmi paicunapaj yuyaita, paicunapaj munaitapish cambian. Chaimi paicunaca jahua pachapi causanata tucui shunguhuan munancuna (Efesios 1:18-ta liyipai).

10. ¿Cutin huacharinaca imatataj nisha nin? Notata ricui.

10 Bibliapica: “Diosta sirvijca jahua pachapi mandangapaj espíritu santohuan agllashca cashpaca cutinmi huacharin” * ninmi. Jesuspish: “Mana agllashcacunaca cutin huacharijcuna o espíritu santomanta huacharijcuna ima shina sintirishcataca mana intindi tucuncunachu” nircami (Juan 3:3-8).

11. ¿Jesushuan mandagrijcunaca imamantataj paicunapaj yuyaita, paicunapaj munaita cambiancuna?

 11 Jesushuan mandagrijcunata Dios manaraj agllajpica paicunaca llaquicuna illaj paraíso Allpapi causanatami munarcacuna. Shinallataj paraíso Allpapi shuj cˈuyashca familiata o amigota cutin ricunatami munajcuna carca. Pero jahua pachaman ringapaj Jehová Dios agllajpica paicunapaj yuyaipish munaipish tucuimi cambiarirca. ¿Imamantashi cambiarirca? ¿Sustarishca causacushcamanta o cai Allpapi llaquicunata charishcamantachu cambiarirca? ¿Cai Allpapi huiñaita causanaca jiru cashcamantachu cambiarirca? Mana. Ashtahuanpish Yayitu Dios paipaj espíritu santota cushcamantami paicunapaj yuyaipish, paicunapaj munaipish cambiarirca.

12. ¿Agllashcacuna jahua pachaman rinata yachashpaca ima shinataj sintirincuna?

12 Dios agllashcacunaca tal vez chai bendicionta mana chasquina cashcatami yuyangacuna. Pero Yayitu Dios paicunata agllashcataca tucui shunguhuanmi crincuna. Ima dudasta mana charincunachu. Ashtahuanpish jahua pachapi causanata yachashpacarin cushillami sintirincuna (1 Pedro 1:3, 4-ta liyipai).

13. ¿Agllashcacunaca ima shinataj cai Allpapica causancuna?

13 ¿Jesushuan mandagrijcunaca jahua pachapi causaringapajchu huañusha nincuna? Mana. Paicuna ima shina sintirishcataca apóstol Pabloca cashnami huillarca: “Cai carpa huasi shina cai aichapi causacushpaca, llaquihuan aij nicunchijmi. Ñucanchijca mana lluchulla cashun ninchijchu, ashtahuanpish churachishcacunami cashun ninchij. Cai huañuj aichataca, causai chingachishpa mushujyachichunmi shuyacunchij” nirca (2 Corintios 5:4). Agllashcacunaca paicunapaj causai, cai Allpapi rato tucurichunca mana munancunachu. Ashtahuanpish paicunapaj familiacunahuan, amigocunahuanmi cai Allpapica Diosta sirvishpa cushilla causancuna. Paicunaca imata rurashpapish jahua pachaman ringapajmi pacienciahuan shuyacuncuna (1 Corintios 15:53; 2 Pedro 1:4; 1 Juan 3:2, 3; Apocalipsis 20:6).

¿JEHOVÁ DIOSCA JAHUA PACHAMAN RINGAPAJ CANTA AGLLASHCACHU?

14. ¿Tucui shunguhuan Diosta sirvishpa, Dios bendiciashcata ricushpaca jahua pachaman rina cashcatachu yuyana canchij?

14 Jehová Diosca paipaj espíritu santohuanmi ñucataca agllashca canga nishpachari yuyangui. Shina yuyacushpaca cashna tapuri: ¿Diospaj munaitaca tucui shunguhuanchu rurani?, ¿cushillachu predicani?, ¿Bibliataca allichu estudiani?, ¿huillacushpaca Yayitu Dios bendiciacushcatachu sintini?, ¿shujtajcunapish Yayitu Dioshuan alli apanacuchunchu ayudani?, ¿imata ruracushpapish Jehová Dios siempre bendiciashcatachu ricuni? (1 Corintios 2:10). Cai tapuicunata ari nishpaca ¿jahua pachaman ringapaj agllashca cashcatachu yuyana canchij? Mana. Yayitu Diosca jahua pachaman rigrijcunatapish, cai Allpapi causagrijcunatapishmi espíritu santota cun. Chaimantami Diosta sirvijcunaca Diospajta rurashpa causanchij. Pero jahua pachaman rigrishcata mana seguro cashpaca Jehová Dios canta mana agllashcatami cuentata cungui. ¿Imamantataj chashna ninchij? Agllashcacunaca Yayitu Dios paicunata cayashcataca segurosmi cancuna.

Jehová Diosca Abrahanta, Sarata, Davidta, bautizaj Juantami paipaj munaita rurachun espíritu santota curca. Shinapish paicunataca jahua pachaman richunca mana agllarcachu. (Párrafos 15 y 16-ta ricui). *

15. ¿Davidpish bautizaj Juanpish espíritu santota chasquishpapish imapajtaj mana agllashcacuna carca?

15 Ñaupa tiempopi Diosta sirvijcunaca espíritu santotami chasquircacuna. Pero  paicunaca mana jahua pachaman ringapajchu espíritu santota chasquircacuna. Por ejemplo, Davidca espíritu santotami chasquirca (1 Samuel 16:13). Espíritu santota chasquishcamantami Dios ima nisha nishcataca intindirca. Chaimi Bibliapaj huaquin salmocunata escribirca (Marcos 12:36). Shinapish apóstol Pedroca ‘Davidca mana jahua pachaman rishcachu’ nishpami huillarca (Hechos 2:34). Bautizaj Juanpish Diospaj espíritu santohuan jundami carca (Lucas 1:13-16). Jesusca: ‘Bautizaj Juanta yalli allica pi mana tiyashcachu’. Shina cashpapish Juanca mana jahua pachapi mandangachu nishpami yachachirca (Mateo 11:10, 11). Jehová Diosca cai runacunata jahua pachaman richunca mana agllarcachu. Pero paipaj espíritu santohuanmi paipaj munaita rurachun ayudarca. ¿Cai runacunaca Diosta mana alli sirvishcamantachu jahua pachamanca mana rircacuna? Mana, ashtahuanpish Yayitu Diosca paicunataca cai Allpapi huiñai causaita charichunmi bendicianga (Juan 5:28, 29; Hechos 24:15).

16. ¿Diosta sirvijcunapuramanta achcacunaca maipitaj causanata munancuna?

16 Cunan punllacunapica Diosta sirvijcunaca mana tucuicunachu jahua pachaman rinata munancuna. Ashtahuanpish Abrahán shina, Sara shina, David shina, bautizaj Juan shina, Diosta alli sirvij shujtaj cˈaricuna huarmicuna shinami cai Allpata Diospaj gobierno mandacujpi sumajta causanata munancuna (Hebreos 11:10).

17. ¿Catij yachaipica ima tapuicunamantataj yachashun?

17 Cunan tiempopipish jahua pachaman rigrij huaquin agllashcacunaca cai Allpapi causacunrajmi (Apocalipsis 12:17). Chaimantami maipica cai laya tapuicunapi yuyanchij. ¿Jahua pachaman rigrijcunaca ima shinataj cana can? ¿Jesús huañushcata yuyarina tandanacuipi vinota ubyajcunata, tandata micujcunataca ima shinataj tratana canchij? ¿Tandata micujcuna, vinota ubyajcuna mirarishpa catijpica preocuparinachu canchij? Catij yachaipimi cai tapuicunamantaca yachashun.

^ par. 5 Huata 33-pi Pentecostés punllamantami Jehová Diosca Jesushuan jahua pachapi mandachunca huaquincunata agllai callarirca. ¿Pero paicunaca ima shinataj jahua pachaman rina cashcata yachancuna? Cai yachaipimi cai valishca tapuimantaca yachashun. Cai yachaitaca La Atalaya de enero de 2016-mantami japishcanchij.

^ par. 2 ALLI INTINDISHUNCHIJ: Jehová Diosca paipaj espíritu santota cushpami jahua pachapi Jesushuan mandagrijcunataca agllan. Cai agllashcacunaca espíritu santota chasquishpami jahua pachaman rina cashcataca paicunallataj cuentata cuncuna. Espíritu santota cushcamantami Jehová Diosca jahua pachapi Jesushuan mandachun ari nicushca shina can (Efesios 1:13, 14). Chaimantami Jesushuan mandagrijcunaca: ‘Espíritu santollatajmi ñucanchijmanca Diospaj huahuacunami canguichij nishpa huillacun’ nincuna (Romanos 8:16).

^ par. 5 ALLI INTINDISHUNCHIJ: Diosta tucuipi cazuj agllashcacunaca paicuna ña huañugrijpi o jatun llaqui punlla ñalla callarigrijpimi jahua pachapi causangapaj huiñaipaj sellashca cangacuna (Efesios 4:30; Apocalipsis 7:2-4; Tandanacuipaj ayudacuna 29 de abril de 2019 semanapi “Sello” nishcata ricui).

^ par. 8 1 Juan 2:20, 27, NM : “Cancunaca Diospaj espíritu santotami chasquishcanguichij. Chaimantami tucui imatapish yachanguichij. Ashtahuanpish Diosmanta chasquishca espirituca cancunapimi causacun. Chaimanta pi yachachichunca mana minishtinguichijchu. Cancunapi caj espiritullatajmi, tucuita mana llullashpa yachachin. Pai yachachishca shina Dioshuan shuj shinalla catichij”.

^ par. 10 Cutin huacharinamanta yachangapajca La Atalaya del 1 de abril de 2009, páginas 3 al 12-ta ricui: Nacer de nuevo: ¿el camino de la salvación?, Nacer de nuevo: ¿cuánta importancia tiene?, Nacer de nuevo: ¿una decisión personal?, Nacer de nuevo: ¿cuál es su función?, Nacer de nuevo: ¿cómo se realiza este proceso?, Nacer de nuevo: ¿qué cambio conlleva?, Un gobierno de miles que beneficiará a millones.

CANTO 27 Ungidocunaca ñallami Jesushuan mandanga

^ par. 58 FOTOMANTA: Diosta sirvishcamanta carcelpi cashpapish, o ñucanchij llajtapi Diosmanta huillanata, yachachinata pudishpapish cai Allpapi Diospaj gobierno mandacujpi sumajta causanatami shuyacunchij.