Ima tiyashcata ricui

Ima tiyashcata ricui

 Yachai 2

Jehová Diosta tandalla alabashunchij

Jehová Diosta tandalla alabashunchij

“Tandanacushcacunapaj chaupipi quiquinta alabashami” (SALMO 22:22).

CANTO 59 Jehová Diosta cantashunchij

CAITAMI YACHASHUN *

1. ¿Davidca Yaya Diosta cˈuyashcamantaca imatataj rurarca?

REY DAVIDCA cashnami nirca: “Mandaj Diosca jatunmari. Tucuimanta yalli jatunmi cangui nishpa alabana Taita Diosmari” (Salmo 145:3). Davidca Yaya Diosta cˈuyashcamantami “tandanacushcacunapaj chaupipi” alabarca (Salmo 22:22; 40:5). Ñucanchijpish Yayitu Diostaca shungumantami cˈuyanchij. Chaimantami David shina: “Mandaj Taita Dioslla, canmari ñucanchij ñaupa yaya Israelpaj Dios cangui. Can Diostaca huiñai huiñaita alli nishca cachun” ninchij (1 Crónicas 29:10-13).

2. a) ¿Jehová Diostaca ima shinallataj alabanchij? b) ¿Huaquincunaca imamantataj tandanacuicunapi mana comentariocunata cuncuna? c) ¿Cunanca imatataj yachagrinchij?

2 Tandanacuicunapi comentariocunata cushpami Jehová Diostaca alabanchij. Pero huaquincunapajca manchaita charishcamantami tandanacuicunapi participanaca sinchi can. Munashpapish maquita mana alzancunachu. Pero ¿ima shinataj manchaita saqui tucunchij? Alaja comentariocunata cushpa shujtajcunata animachingapajca ¿imatataj rurana canchij? Caita yachangapajca tandanacuicunapi imamanta comentariocunata cuna cashcata yachashun.

¿IMAMANTATAJ COMENTARIOCUNATA CUNA CANCHIJ?

3-5. a) ¿Tandanacuicunapica imamantataj comentariota cuna canchij? b) ¿Diosca tucuicuna igual comentariota cuchunchu munan?

3 Tucuicunami Yaya Diostaca alabai tucunchij (Salmo 119:108). Ñucanchij comentariocunaca Diosman shuj sacrificiota cushca shinami can. Chashna sacrificiocunataca mana  pi ñucanchijpaj randi cui tucunchu (Hebreos 13:15-ta liyipai). ¿Jehová Diosca shujtajcuna layallataj comentariota cuchunchu munan? Mana.

4 Yaya Diosca cada uno imata cui pudishcallatami cuchun mañan. Por ejemplo, israelitacunaca chˈican chˈican sacrificiocunatami Diosman cujcuna carca. Huaquincunaca cullquita charishpaca shuj malta ovejata o malta chivotami cujcuna carca. Pobrecunaca ishqui urpita cashpa, ishqui palomata cashpami cujcuna carca. Cutin ni imata mana charishpaca “alli cutatami” sacrificiota rurangapaj cui pudircacuna (Levítico 5:7, 11). Chai tiempocunapica cutaca baratomi carca. Pero alli cutahuan sacrificiota rurajllapimi Diosca chasquij carca.

5 Cunan punllacunapipish Yaya Diosca ñucanchij cui pudishcallata cuchunmi mañan. Chaimantami comentariocunata cucujpica Pablo o Apolos líquido alli rimajcuna cachunca mana shuyan (Hechos 18:24; 26:28). Diosca tucui shungumanta comentariota cuchunmi munan. Yuyashun, shuj viuda huarmi Diospaj huasipi ishqui uchilla cullquita churajpipish chai ofrendataca allimi chasquirca. ¿Imamanta? Chai huarmica imata mana charij cashpapish, pai causanapaj tucui charishcatami curca (Lucas 21:1-4).

Comentariocunata cushpaca ñucanchijllatajmi alli sintirinchij. Shujtajcunatapishmi animanchij. (Párrafos 6 y 7-ta ricui). *

6. a) ¿Tandanacuicunapi comentariocunata uyashpaca ima shinataj sintirinchij? b) ¿Shujtajcuna comentariota cujpica ima shinataj paicunata animai tucunchij?

6 Tandanacuicunapi comentariocunata cushpaca caishuj chaishujmi animanacunchij (Hebreos 10:24, 25-ta liyipai). Ñucanchij tandanacuicunapica tucuicuna comentariota cuchunmi munanchij. Por ejemplo, shuj huahua jahualla shimicunapi alaja comentariota cujpi, shujtajcuna Bibliamanta sumaj yuyaita nijpica achcatami cushicunchij. Maijancuna ñucanchij shimita mana yachashpapish manchaita saquishpa comentariota cujpimi cushicunchij (1 Tesalonicenses 2:2). Chashna comentariota cujcunataca ¿ima shinataj animai tucunchij? Tandanacui tucurishca qˈuipami “pagui, cambaj comentarioca alajami carca” ni tucunchij. Ashtahuancarin ñucanchij comentariocunata cushpami shujtajcunata animachi tucunchij. Pero chaipajca tandanacuicunapimi comentanata yachana canchij (Romanos 1:11, 12).

7. ¿Comentariocunata cushpaca ima shinataj beneficiarishun?

 7 Comentariota cushpaca ñucanchijllatajmi beneficiarinchij (Isaías 48:17). Tandanacuipi comentariota cusha nishpaca allimi prepararishun, Bibliatapish allimi intindishun, imata yachashcatapish causaipimi alli pajtachishun. Shinallataj alli prepararishpaca tandanacuicunapimi alli sintirishun. Shuj comentariota cungapaj alli prepararijpica ñucanchij yuyaipi, ñucanchij shungupimi chai alli yuyaicunaca saquiringa.

8, 9. a) ¿Comentariocunata cungapaj esforzarijpica Yaya Diosca ima shinataj sintirin? b) ¿Comentariota cuna mana denvaldi cashcata yachashpapish huaquincunaca ima shinataj sintirishpa catincuna?

8 Jehová Diosca ñucanchijcuna paita alabachunmi munan. Ñucanchij comentariocunata pai uyanataca segurosmi canchij. Paica tandanacuicunapi comentariocunata cujpica achcatami valoran (Malaquías 3:16-ta liyipai). Chashna rurajpimi ñucanchijtaca bendicianga (Malaquías 3:10).

9 Ñucanchij comentariocuna mana denvaldi cajta yachashpapish huaquincunaca manchaimantami comentariota mana cuncuna. Can chashna manchaita charishpaca mana desanimarinachu cangui. Cunanca comentariocunata cungapaj imata rurana cashcatami Bibliapi ricushun.

COMENTARIOTA CUNATA AMA MANCHASHUNCHIJ

10. a) ¿Comentariota cugrishpaca achcacunaca ima shinataj sintirinchij? b) ¿Comentariota mana cui tucushachu nishpaca imatataj ricuchinchij?

10 Tandanacuicunapi comentariota cunataca achcacunami pingaita charinchij. Pero pingaimanta mana comentariota cushpaca imamanta chashna sintirishcatami yachana canchij. Tal vez comentariota cugrishpaca, ‘pandarishami o imata mana ni valishachu’ ninguichari. Mana cashpaca ‘shujtajcuna shina alaja comentariota mana cui tucushachu’ nishpachari sustaringui. Pero chashna yuyashpaca mana shujtajcunata yalli cashcata, sino humilde cashcatami ricuchingui. Jehová Diospish humilde cachunmi munan  (Salmo 138:6; Filipenses 2:3). Shinallataj paita alabachun, tandanacuipi comentariocunata cushpa shujtajcunata animachunmi munan (1 Tesalonicenses 5:11). Yaya Diosca canta cˈuyashcamantami ama manchaj cachun ayudanga.

11. ¿Mana manchashpa comentariota cungapajca imatataj yuyarina canchij?

11 Bibliapica, parlacushpaca tucuicunami achca cutin pandarinchijlla ninmi (Santiago 3:2). Yaya Diosca ñucanchijcuna imapi ama pandarichunca mana shuyanchu. Ñucanchij huauqui panicunapish imapi ama pandarichunca mana shuyancunachu (Salmo 103:12-14). Paicunaca ñucanchij familia cashcamantami achcata cˈuyancuna (Marcos 10:29, 30; Juan 13:35). Maipica ñucanchij munashca shina mana parlai pudishcataca huauqui panicunaca allimi intindincuna.

12, 13. ¿Nehemiasmanta, Jonasmantaca imatataj yachai tucunchij?

12 Manchaita ama charingapaj huaquin ejemplocunamanta yachashun. Nehemiasca jatun reytami sirvij carca. Jerusalén llajta pungucuna, patacuna libri urmacujta yachashpami Nehemiasca achcata llaquirirca (Nehemías 1:1-4). Nehemiasca, “¿imamantataj llaquilla cangui?” nishpa rey tapujpimi mancharishcanga. Chaimi rey tapushcata manaraj cutichishpaca Yaya Diosta mañarca. Chaimantami chai reyca Diospaj pueblota ayudarca (Nehemías 2:1-8). Ñucanchijpish Nehemías shinami shuj tapuita manaraj cutichishpaca Yayitu Diosta mañana canchij. Cunanca Jonasmanta yachashun. Jehová Diosca Jonastaca Nínive llajtapi gentecunaman imata ruragrishcata huillachunmi cacharca. Shinapish paica achcata manchashcamantami shujtaj llajtaman rirca (Jonás 1:1-3). Pero, Yaya Dios ayudajpimi pai mandashcata Jonasca alli pajtachirca. Jonás huillashcamantami Nínive llajtapi causajcunaca achcata beneficiarircacuna (Jonás 3:5-10). Jonás shina ama manchashpa paita sirvichunmi Yaya Diosca ñucanchijtapish ayudanga. Ñucanchij huauqui panicunataca mana ninivitacunata shina manchanachu canchij.

13 ¿Alaja comentariocunata cushpa shujtajcunata animachingapajca imatataj rurana canchij? Huaquin yuyaicunata yachashun.

14. a) ¿Tandanacuicunapajca imamantataj alli prepararina canchij? b) ¿Ima horataj tandanacuicunapajca preparari tucunchij?

14 Tandanacuicunapaj alli prepararishunchij. Ñucanchijcuna huasipi alli prepararishpaca tandanacuicunapi comentariocunata cungapajmi listos cashun (Proverbios 21:5). Pero, comentariocunata prepararingapajca cada unomi ima horas estudianata agllai tucunchij. Por ejemplo, 80 huatacunata charij pani Eloisemanta parlashun. Paica viudami can. Panica, “ñucaca Huillaj revistataca semana callaripimi preparani. Chashnami tandanacuitaca alli intindini” ninmi. Cutin pani  Joyca tiempo completotami trabajan. Shinapish paica, “ñucaca tandanacuicunaman ringapaj shuj punlla ñaupami Huillaj revistata yachani. Chashnami tandanacuipi imata yachagrishcataca yuyaipi charini” ninmi. Ike shuti huauquipish anciano shina, precursor shinami sirvin. Paica, “achca ocupado cashpapish semanapica asha ashami revistataca estudiani” ninmi.

15. ¿Tandanacuipajca ima shinataj alli preparari tucunchij?

15 Tandanacuicunapaj preparacushpaca Jehová Diostami paipaj espíritu santota cuchun mañana canchij (Lucas 11:13; 1 Juan 5:14). Chai huashaca imata yachagrishcatami titulocunapi, fotocunapi, recuadrocunapi ricuna canchij. Shinallataj cada parrafocunata liyishpa, versocunata liyishpami imata yachashcata intindina canchij. Imata yachashcata cutin cutin yuyarishpami tandanacuipi ima comentariota cugrishcataca alli yachashun. Tandanacuicunapaj alli prepararishpaca achcatami beneficiarishun. Comentariocunatapish jahuallami cushun (2 Corintios 9:6).

16. a) ¿Yaya Diosca ima ayudacunatataj ñucanchijmanca cushca? b) ¿Cai ayudacunataca ima shinataj utilizai tucunchij?

16 Ayudacunata alli utilizashunchij. Ñucanchijcuna alli prepararichunca Yaya Diosca achca ayudacunatami cushca. Por ejemplo, JW Library® programata utilizashpami publicacioncunata tabletman o celularman descargai tucunchij. Chashnami publicacioncunata liyishpa o uyashpa yachai tucushun. Maijancunaca cai programata utilizashpami trabajopi, escuelapi o viajacushpa Bibliata yachai tucuncuna. Shinallataj Watchtower Library, BIBLIOTECA EN LÍNEA Watchtowernishca programacunaca Bibliata ashtahuan yachangapajmi ayudan.

¿Tandanacuicunapajca ima horataj prepararingui? (Párrafos 14 al 16-ta ricui). *

17. a) ¿Imamantataj huaquin comentariocunata prepararina canchij? b) ¿Tandanacuipi cutichingapaj alli preparari nishca videomantaca imatataj yachashcangui?

17 Huaquin comentariocunata prepararishunchij. ¿Imamanta? Ñucanchij shuj comentariota cusha nijpica shujtajcunapishmi comentariota cunata munangacuna. Chaipica pushaj huauquica manachari ñucanchij comentariota cuchun mañanga. Shinallataj cai huauquica tiempota ama pasangapajmi mana achca comentariocunata cuchun saquinga. Punta parrafocunapi comentariocunata cuchun mana saquijpipish mana llaquirinachu canchij. Chaipaj randica shujtaj parrafocunapi comentariota cungapajmi prepararina canchij. Bibliamanta versota liyingapajpishmi maquita alzai tucunchij. Shinallataj ñucanchij propio shimicunahuanmi imata intindishcata parlai tucunchij. *

18. ¿Imamantataj ashalla tiempopi comentariocunata cuna canchij?

 18 Ashalla tiempopi comentariota cushunchij. Ashalla shimicunapi cushca comentariocunami achcata animan. Chaipajca 30 segundocunallapimi comentariota cui tucunchij (Proverbios 10:19; 15:23). Achca huatacunata Diosta sirvij huauqui panicunami ashalla tiempopi comentariocunata cushpa alli ejemplota ricuchina can. Maipica tauca minutocunapi sinchi comentariocunata cujpimi shujtajcunaca, “paicuna shina mana comentariota cui tucushachu” nishpa manchangacuna. Cutin ashalla tiempopi comentariota cujpica shujtajcunapishmi comentariocunata cui tucunga. Parrafopaj punta tapuita rurajpica tucui parrafopi imalla nishcataca mana ninachu canchij. Chaipaj randica tapuipi ima nishcallatami cutichina canchij. Parrafopaj tapuita ña cutichijpica, shujtaj yuyaicunatami ashtahuan parlai tucunchij (“ ¿Comentariocunapica imallatataj ni tucunchij?” nishca recuadrota ricui).

19. ¿Pushaj huauquicuna ñucanchijman comentariota cuchunca imatataj rurai pudinchij?

19 Pushaj huauquimanmi ima parteta comentagrishcata huillai tucunchij. Chashna cajpica tiempo sirinmanmi ima comentariota cugrishcata huillana canchij. Chai comentariota cuna parteman ña chayajpica ñucanchijman cuchunmi utca maquita alzana canchij.

20. ¿Tandanacuicunaca imamantataj amigocunahuan shuj micuita preparacushca laya can?

20 Tandanacuicunaca amigocunahuan shuj micuita preparacushca layami can. Huauqui panicuna micunaman invitajpica mana chushaj maquilla rinchijmanchu. Ashtahuanpish imallatapish apashpami rinchijman ¿nachu? Chaipajca huauquicuna munashca micunata apangapajmi esforzarinchijman. Tandanacuicunapica Jehová Diosmi micunaman invitacuj shina can. Paica sumaj micunacunata cuj shinami alli yachaicunata ñucanchijman cushca (Salmo 23:5; Mateo 24:45). Pero mana Diospaj micunallata micucuj shinachu cana canchij. Ashtahuanpish chai micunapimi shujtajcunapaj imallatapish churana canchij. Chaimanta alli comentariocunata cungapaj esforzarishunchij.

CANTO 2 Jehová shutimi cangui

^ par. 5 Jehová Diosta cˈuyashcamantami ñucanchijpish Rey David shina paita alabanata munanchij. Diosta cˈuyashcata ricuchingapajca tandanacuicunapimi comentariocunata cuna canchij. Pero huaquinpica comentariota cunata manchashcamantami sinchi ricuringa. Cai yachaipimi manchaita ama charingapaj imata rurana cashcata yachashun.

^ par. 17 Caimanta ashtahuan yachangapajca, jw.org paginapi, PUBLICACIONCUNA > VIDEOCUNA > HUAHUACUNAPAJ nishca partepi Jehovapaj amigo tucui: Tandanacuipi cutichingapaj alli preparari nishca videota ricui.

^ par. 63 FOTOCUNAMANTA. Página 9: Tandanacuipimi huauqui panicunaca Huillaj revistamanta comentariocunata cucun.

^ par. 65 FOTOCUNAMANTA. Páginas 10 y 11: Ñaupa dibujopi ricushca huauquicunami chˈican chˈican ocupacionta charishpapish Huillaj revistata yachangapaj tiempota llujchincuna.