Ima tiyashcata ricui

Ima tiyashcata ricui

Jesús huañushcata tandalla yuyarishunchij

Jesús huañushcata tandalla yuyarishunchij

“¡Huauquindijcuna tandalla, shuj shinalla causanaca yallitaj alli, yallitaj sumajmari!” (SALMO 133:1).

CANTOCUNA: 18, 14

1, 2. a) ¿Cai huataca imapajtaj achca gentecuna tandanacushun? b) ¿Imamantataj chai tandanacuica sumaj canga? (Jahuapi tiyaj fotota ricui).

JESÚS huañushcata yuyaringapajca huatapi shuj cutinllami tandanacunchij. Cai 2018 huatapica 31 de marzo punllatami inti huashicushca qˈuipa Jesús huañushcata yuyarishun. Chai punllapica achca millón gentecunami tucui muyundij Allpapi tandanacushun. Chashnami tucuicuna tandalla Diosta sirvicushcata ricushun. Cai tandanacuica sumajmi canga.

2 Achca gentecuna tandanacujta ricushpaca Jehovapish Jesuspish achcatami cushicungacuna. Bibliapica cashnami huillarca: ‘Pi mana yupaipaj yallitaj achcacunami tucui llajtacunamanta, chˈican chˈican aillucunamanta, pueblocunamanta, rimaicunamanta tiyanga. Paicunaca, ¡jatun tiyarinapi tiyacuj ñucanchij Diospish, Ovejapish paicunallami quishpichijca! nishpami sinchita  caparingacuna’ nircami (Apocalipsis 7:9, 10). Jesús huañushcata yuyarina tandanacuiman rishpaca Jehová Diostapish Jesustapishmi jatunyachinchij.

3. ¿Cai temapica ima tapuicunamantataj yachashun?

3 Cai temapica chuscu tapuicunamantami yachashun. 1) ¿Cai tandanacuipi beneficiaringapajca imatataj rurai tucuni? 2) ¿Cai tandanacuica ima shinataj Diospaj pueblo tandalla cachun ayudan? 3) ¿Tucuicuna tandalla cangapajca ima shinataj ayudai tucuni? 4) ¿Jesús huañushcata yuyaringapaj tandanacunata saquishunchu? Chaica ¿ima horashi canga?

JESÚS HUAÑUSHCATA YUYARINGAPAJ ALLICHIRISHUNCHIJ

4. ¿Imamantataj Jesús huañushcata yuyarina tandanacuiman ringapaj esforzarina canchij?

4 Jesús huañushcata yuyarina tandanacuiman rinaca importantemi can. Yuyarishun, tandanacuicunapica Jehová Diostami alabanchij. Chaimantami Jesús huañushcata yuyaringapaj tandanacuimanca mana faltana canchij. Tal vez ungüimanta, o ima atraso japishcamantachari mana ri tucushun. Pero, chai tandanacuiman ringapaj esforzarishpaca ñucanchijpaj importante cashcatami ricuchishun. Shinallataj Jehová Diospish Jesuspish ñucanchij esfuerzocunataca achcatami valorangacuna. Ashtahuanpish Diosca ñucanchij shutitaca ‘causanaman rinapaj libropimi’ quillcanga. Chai libropi quillcashca tiyacujcunamanca huiñai causaitami cunga (Malaquías 3:16; Apocalipsis 20:15).

5. ¿Diospaj ñaupajpi ima shina cashcata yachangapajca imatataj tapurina canchij?

5 ¿Jesús huañushcata yuyarina punlla chayamungacamaca imatataj rurai tucunchij? Jehová Diospaj ñaupajpi ima shina cashcata yuyaringapaj, paita mañangapajpishmi tiempota surcuna canchij (2 Corintios 13:5-ta leyipai). Pabloca alli crij cashcata, mana alli crij cashcatapish ñucanchijllataj alli yuyarina cashcatami nirca. Chaimantami cashna tapurina canchij: “¿Testigo de Jehovacunalla Diospaj munaita ruracushcataca tucui shunguhuanchu crini? ¿Diosmanta huillangapaj, yachachingapajpish achcatachu esforzaricuni? ¿Tucuri punllacunapi causacushcata, Diablopaj ruraicuna ñalla tucurigrishcatapish tucui shunguhuanchu crini? ¿Jehovapipish Jesuspipish tucui shunguhuan confiashpa caticunichu?” (Mateo 24:14; 2 Timoteo 3:1; Hebreos 3:14). Cai tapuicunapi yuyashpami Diospaj ñaupajpi ima shina cashcata ñucanchijllataj cuentata cushun.

6. a) ¿Huiñai causaita charingapajca imatataj rurana canchij? b) ¿Jesús huañushcata yuyarina punllapajca ima shinataj shuj huauquica prepararin? c) ¿Ñucanchijpish chai huauqui laya imatataj rurai tucunchij?

6 Huiñai causaita charingapajca Jehová Diostami rijsina canchij. Shinallataj Jesús ñucanchijmanta huañushcatami crina canchij. Chaimantami Jesús huañushcata yuyarina punllapajca allichirina canchij. Por ejemplo, Jesús huañushcamanta parlaj temacunatami leyina canchij. Leyishcapipish yuyanami canchij (Juan 3:16; 17:3-ta  leyipai). Shuj huauqui ancianomanta parlashun. Paica La Atalaya revistacunapi Jesús huañushcamanta parlaj temacunatami huaquichinata yachan. Jesús huañushcata yuyarina punlla ashalla faltajpimi chai revistacunata leyishpa imamanta chai tandanacuiman rina importante cashcata yuyarin. Shinallataj huaquinpica chai temallamantataj parlaj mushuj revistacunatami huaquichishpa catin. Cai huauquica: “Chai revistacunapi, Bibliapipish leyishcata yuyashpami cada huata mushuj yachaicunata yachani. Ashtahuanpish Jehová Diospajman, paipaj Churi Jesusmanpishmi ashtahuan cˈuchuyashcani” ninmi. Ñucanchijpish chai huauqui laya rurashpaca Jehová Diospajman paipaj Churi Jesusmanpishmi ashtahuan cˈuchuyashun. Shinallataj Jesús huañushcata yuyaringapaj tandanacuipica ashtahuanmi beneficiarishun.

JESÚS HUAÑUSHCATA YUYARINGAPAJ TANDANACUSHUNCHIJ

7. a) ¿Jesusca paita catijcunamantaca imatataj mañarca? b) ¿Jehová Diosca ima shinataj paipaj Churi mañashcataca cutichishca?

7 Jesuspish paipaj Yayapish tandallami cancuna. Chaimantami cai Allpapi ashalla horascuna huañungapaj faltajpica Jesusca paipaj catijcunapish tandalla cachun Diosta mañarca (Juan 17:20, 21-ta leyipai). Jesús mañashcataca Jehová Diosca uyashcami. Chaimantami Jesús huañushcata yuyaringapajca chˈican chˈican llajtacunamanta, chˈican chˈican laya gentecuna muyundij Allpapi tandanacunchij. Shinami testigo de Jehovacunaca tandalla cashcata, Jehová Dios paipaj Churita cachashcatapish tucui shunguhuan crishcata ricuchinchij. Shujtaj religioncunaca mana chashna tandalla cancunachu. Ashtahuanpish shujtaj laya gentecunata ricushpacarin pˈiñancunami. Jehová Diospish Jesuspish ñucanchijcuna tandalla sirvicujta ricushpami cushilla sintirincuna.

8. ¿Jehová Diosca imatataj profeta Ezequielmanca huillarca?

8 Jehová Diosca profeta Ezequielmanca: ‘Judapaj caspi, Josepaj caspipish shuj shinallami tucunga’ nircami (Ezequiel 37:15-17-ta leyipai). Caita nishpaca Jehová Diosca paita sirvijcuna tandalla adorana cashcatami huillarca. La Atalaya de julio de 2016 “Preguntas de los lectores” nishca temapica cashnami nirca: “Jehová Diosca profeta Ezequielmanca: ‘Israelcunaca ñuca cusha nishca llajtaman chayashpaca ñucataca tandallami sirvingacuna’ nircami. Cashna nishpaca tucuri punllacunapipish Diosta sirvijcunaca tandalla canatami Jehová Diosca huillarca”. Cunan punlla chaita ricushpami cushilla sintinchij.

9. ¿Ezequiel 37:19 nishca shimicunaca ima shinataj pajtaricun?

9 ‘Judapaj caspica’ ungidocunatami ricuchin. Cutin, ‘Josepaj caspica’ cai Allpapi causagrijcunatami ricuchin. Jehová Diosca: ‘Cai ishqui caspicunaca ñuca maquipica shujlla caspimi canga’ nircami (Ezequiel 37:19). ¿Diosca ima shinataj paipaj maquipica  shujlla caspita shina rurashca? Diosca 1919 huatamantami asha asha ungidocunataraj tandachirca. Chai qˈuipaca cai Allpapi causagrij gentecunapish ungidocunahuan tandalla paita sirvichunmi tandachishpa catirca (Juan 10:16; Zacarías 8:23). Cunan punllacunapica ungidocunapish shujtaj ovejacunapish tandallami Jehová Diosta sirvicun. Paicunaca shuj Mandajllatami charin. Chai Mandajca Jesusmi can. Ezequiel libropica Jesustaca ‘ñucata sirvij Davidmi’ nishpami shutichin (Ezequiel 37:24, 25). Tucui huatacunami ungidocunapish shujtaj ovejacunapish Jesús huañushcata yuyaringapaj tandanacuncuna. Chashnami tandalla cashcata ricuchincuna. Shinapish tapurishunchij ¿Diosta tandalla sirvishpa catingapajca imatataj rurana canchij?

¿TANDALLA CANGAPAJCA IMATATAJ RURANA CANCHIJ?

10. ¿Jehová Diosta tandalla sirvishpa catingapajca imatataj rurana canchij?

10 Jesús cai Allpapi cashpaca paita catijcunamanca humildecunami cana canguichij nircami (Mateo 23:12). Diosta mana rijsij gentecunaca shujtajcunamanta yalli cashcatami yuyancuna. Pero ñucanchijcunaca paicuna  shina ama cangapajmi esforzarina canchij. Humilde cashpaca congregacionpi pushajcunatami respetashun, cazushunpish. Chashnami huauqui panicuna Jehová Diosta tandalla sirvishpa catichun ayudashun. Shinallataj Jehovapaj ñaupajpipish allimi ricurishun. Yuyarishun, Diosca jatun tucushcacunataca, mana ricunachinchu. Pero humildecunataca cˈuyanmi (1 Pedro 5:5).

11. a) ¿Tandapish vinopish imatataj ricuchin? b) ¿Imamantataj tandapish vinopish imata ricuchishcata alli yuyana canchij?

11 Jesús huañushcata yuyaringapajca levadura illaj tandatapish vinotapishmi utilizanchij. Tandaca Jesuspaj jucha illaj cuerpotami ricuchin. Cutin, vinoca Jesuspaj yahuartami ricuchin. Tandapish vinopish imata ricuchishcatami Jesús huañushcata yuyarina punlla manaraj chayamujpi, chai tandanacuipi cashpapish alli yuyana canchij (1 Corintios 11:23-25). ¿Imamantataj tandapish vinopish imata ricuchishcata alli yuyana canchij? Jehová Diosca paipaj Churita cachashpami ñucanchijta cˈuyashcata ricuchirca. Jesuspish paipaj jucha illaj causaita cushpa, paipaj yahuarta jichashpami ñucanchijta cˈuyashcata ricuchirca. Chaita mana cungarishpaca ñucanchijpishmi Jehová Diostapish Jesustapish cˈuyashun. Shinallataj huauqui paicunahuanpish tandallami causashun.

Shujtajcunata perdonashpami Diosta tandalla sirvishun. (Párrafos 12 y 13-ta ricui).

12. ¿Mateo 18:23-34-pi nishca shimicunaca imatataj yachachin?

12 Jehová Diosca paipaj Churimantami ñucanchij juchacunata perdonai tucun. Shujtajcunata tucui shunguhuan perdonashpaca Diosta agradicishcatami ricuchishun. Shinallataj Diosta sirvishpa tandalla catingapajmi ayudashun. Mateo 18:23-34-pica perdonana cashcatami Jesusca yachachirca. Cai versocunata leyishca qˈuipaca cashna tapuri: “¿Cai versocunapi yachachishca shinaca imatataj rurana cani? ¿Huauqui panicuna ima shina sintirishcata ricushpa ayudangapaj esforzaricunichu? ¿Shujtajcuna pˈiñachijpica perdonai tucunichu?” Huaquinpica ñucanchijta pˈiñachijpica mana cungarinchijllachu. Shinapish, Jesús yachachishca shinaca Jehová Diosca perdonachunmi munan (Mateo 18:35-ta leyipai). Shujtajcunata mana perdonajpica Jehová Diosca ñucanchijta mana perdonangachu. Chaitaca mana cungarinachu canchij.

13. ¿Huauqui panicunahuan alli causangapajca imatataj rurana canchij?

13 Ñucanchij huauqui panicunata perdonashpaca paicunahuan allimi causashun. Apóstol Pablo yachachishca shinaca Diospaj espiritumi ñucanchijta tandachishpa, shujllata rurashca. Chaimantami tucuicunallataj tandalla, sumajta causangapaj esforzarina canchij (Efesios 4:3). Jesús huañushcata yuyarina tuta manaraj chayajpi, ña chai tandanacuipi cashpapish shujtajcunata ima shina tratacushcatami yuyarina canchij. Chaimanta cashna tapurishunchij: “¿Tucui shunguhuan perdonajchu cani? ¿Huauqui panicunahuan tandalla  Diosta sirvingapajca imatataj ruracuni?” Cai tapuicunapi yuyanataca amataj cungarishunchij.

14. ¿Caishuj chaishuj mana pˈiñarishpa cˈuyaihuan llaquinacuj cashcataca ima shinataj ricuchinchij?

14 Tucuicuna tandalla cangapajca Jehová Dios cˈuyashca shinami cˈuyana canchij (1 Juan 4:8). Chaimantami “huauqui panicunata cˈuyashpapish paicunahuan canataca mana minishtinichu” nishpaca mana yuyanachu canchij. Chashna yuyashpaca Pablo nishcata mana cazushcatami ricuchishun. Paica: ‘Caishuj chaishuj mana pˈiñarishpa cˈuyaihuan llaquinacuj caichij’ nircami. (Efesios 4:2, QC, 1989). Yuyashun. Pabloca caishuj chaishuj mana pˈiñarishpa llaquinacuj caichij nishca jahuapish “cˈuyaihuan” nircami. Jehová Diosca tucui laya gentecunata cˈuyashcamantami paipaj pueblopi chasquishca (Juan 6:44). Chaimantami huauqui panicunaman cˈuyaita ricuchina canchij (1 Juan 4:20, 21).

¿JESÚS HUAÑUSHCATA YUYARINA TANDANACUICA IMA HORATAJ ÑA MANA TIYANGA?

15. ¿Imamantataj Jesús huañushcata yuyarina tandanacuica ña mana tiyangachu ninchij?

15 Ima horaca Jesús huañushcata yuyaringapajca ña mana tandanacushunchu. ¿Imamantataj chaita ninchij? Pabloca shujtaj ungidocunahuan parlacushpaca: ‘Mashna cutin Jesús huañushcata yuyarishpaca, Mandaj Jesús huañushcatami pai shamungacama huillacunguichij’ nircami (1 Corintios 11:26). Tucuri punllacunamanta parlacushpaca Jesusca pai shamunamantapishmi parlarca. Jatun llaqui punlla chayamujpica: ‘Jahua pachapica Runa Aichayuj shamucujta ricuchij señalmi ricuringa. Tucui cai pacha aillucunaca Runa Aichayuj jahua pachamanta pˈuyupi tucui poderhuan, achijnicuj sumaj shamucujta ricushpami huacangacuna. Paipaj angelcunatami cachanga. Paicunami trompetapi sinchita tocashcahuan, cai pachapi tiyaj tucui llajtacunamantaca Runa Aichayujpaj agllashcacunataca uramanta janajmanta tucuicunata tandachingacuna’ nircami (Mateo 24:29-31). Armagedón macanacui manaraj callarijpica Jesusca cai allpapi causacuj ungidocunataca jahua pachamanmi apanga. Chaipimi ‘paipaj agllashcacunataca’ tandachinga. Armagedón macanacuipica Jesuspish 144 mil agllashcacunapish cai Allpapi tucui gobiernocunatami tucuchinga (Apocalipsis 17:12-14). Cai Allpapi ungidocuna ña mana tiyajpica Jesús huañushcata yuyarina tandanacuica ña mana tiyangachu.

16. ¿Imamantataj Jesús huañushcata yuyarina tandanacuiman mana faltana canchij?

16 Shuj punllaca Jesús huañushcata yuyaringapajca última vezmi tandanacushun. Chaimanta cai huataca Jesús huañushcata yuyarina tandanacuiman ama faltashunchijchu. Shinallataj huauqui panicunahuan tandalla sirvishpa catingapajca Jehová Dios ayudachun mañashpa catishunchij (Salmo 133:1-ta leyipai).