Ima tiyashcata ricui

Ima tiyashcata ricui

 YACHAI 18

‘Mishangacama callpashunchij’

‘Mishangacama callpashunchij’

“Callpashpa mishanacuitapish tucuchishcanimi” (2 TIMOTEO 4:7).

CANTO 129 Llaquicunata ahuantashpa catishunchij

CAITAMI YACHASHUN *

1. ¿Diosta sirvijcunaca imatataj rurana canchij?

UNGUSHCA cashpa, shaicushca cashpapish shuj sinchi carrerapi callpanataca mana munanchijmanchu. Pero apóstol Pabloca Diosta sirvijcunaca shuj carrerapi callpacuj shinami canchij nircami (Hebreos 12:1). Mashna huatacunata charishpapish, fuerza illaj cashpapish, fuerzayuj cashpapish Dios cusha nishca premiota japingacamami tucuicuna callpana canchij (Mateo 24:13).

2. 2 Timoteo 4:7, 8-pi tiyaj shimicunataca ¿Pabloca imamantataj shungumanta parlarca?

2 Pabloca tucui shunguhuanmi carrerapi callpanamanta parlarca. Paillatajmi: “Callpashpa mishanacuitapish tucuchishcanimi” nirca (2 Timoteo 4:7, 8-ta liyipai). Pero Pabloca ¿ima carreramantataj parlacurca?

¿PABLOCA IMA CARRERAMANTATAJ PARLARCA?

3. ¿Pabloca carrerapi callpanataca imahuantaj chˈimbapurarca?

3 Huaquinpica Pabloca Diosta sirvijcunamanca Grecia llajtapi tiyaj pugllaicunahuan chˈimbapurashpami yachachij carca (1 Corintios 9:25-27; 2 Timoteo 2:5). Achca cutinmi Diosta sirvijcunataca shuj carrerapi callpacujcunahuan chˈimbapurarca (1 Corintios 9:24; Gálatas 2:2; Filipenses 2:16). Maijanpish Diosman mingarishpa, bautizarishpaca carrerapi callpanata callarij shinami can (1 Pedro 3:21). Ashtahuanpish Jehová Dios huiñai causaita cujpimi carrerata mishaj shina can (Mateo 25:31-34, 46; 2 Timoteo 4:8).

4. ¿Cai yachaipica imatataj yachashun?

4 Diosta sirvijcunaca jatun carrerapi callpajcunahuanca ¿imapitaj igual canchij? Cai yachaipica quimsa yuyaicunatami ricushun. Puntapica, callpana ñantami rina canchij. Ishquipica,  maiman chayana yuyaillami callpana canchij. Quimsapica, ima jarcaicunata charishpapish callpashpami ñaupajman catina canchij.

CALLPANA ÑANPI CALLPASHUNCHIJ

Diosta sirvijcunaca Dios agllashca ñanpimi callpana canchij. (Párrafos 5 al 7-ta ricui). *

5. ¿Ima ñanpitaj catina canchij?

5 Carrerapi callpajcuna premiota japingapajca callpana ñanpimi rina can. Chashnallatajmi Jesusta catijcunapish huiñai causaita charingapajca Dios ricuchishca ñanpi callpana canchij o pai munashca shinami causana canchij (Hechos 20:24; 1 Pedro 2:21). Pero Diablo, paita catijcunapish Diosta sirvijcuna chai ñanmanta llujshishpa, ‘ima millaitapish ruranaman richunmi’ munancuna (1 Pedro 4:4). Paicunaca ñucanchij ima shina causashcata ricushpami burlarincuna. Shinallataj “imatapish rurai tucushcamantami ñucanchijca cushilla causanchij” nincunami. Pero chaica llullami can (2 Pedro 2:19).

6. ¿Brianpaj causaimantaca imatataj yachanchij?

6 Diosta mana cazujcunapaj ñanta risha nijcunaca cushilla, alli causaitaca mana charingacunachu. Chaipaj randica Diablopaj, paicunapaj munaillata rurajcunami tucungacuna (Romanos 6:16). Huauqui Brianpaj causaimanta yachashunchij. Huahuaraj cajpica paipaj yaya mamaca Dios mandashcacunatami yachachircacuna. Pero ña jovenyashpaca Dios mandashcacunata cazushpaca mana cushilla causashachu nishpami dudai callarirca. Chaimantami paica Diablota catijcuna shina causai callarirca. Brianca: “Ñuca munashca ñanpi puri callarishpaca millai viciocunapi urmanataca mana yuyarcanichu” nircami. Paica drogarishpa, machashpa, huainayashpami causai callarirca. Paica: “Huatacuna pasajpica ashtahuan fuerte drogacunatami probai callarircani. Chashnami chai viciopi urmarcani. Drogarishpa catingapajca drogacunatami cˈatui callarircani” ninmi. Asha tiempo huashaca Jehová Diospi confiashpa, pai mandashcacunatami cazui callarirca. Paipaj causaita cambiashpami huata 2001-pi bautizarirca. Cunanca Jehová Diospaj ñanpi purishpami cushilla causacun. *

7. Mateo 7:13 y 14-pi nishca shinaca ¿mashna ñancunataj tiyan?

7 Huiñai causaiman apaj quichqui ñanpimi purina canchij. Diabloca chai ñanpi purichunca mana munanchu. Paica ancho ñanpi purichunmi munan. Chaitaca Diosta mana cazujcunami rincuna. Chai ñanta rina jahualla cajpipish paicunaca ‘chingarinamanmi’ ricuncuna (Mateo 7:13, 14-ta liyipai). Quichqui ñanmanta pi ama llujchichunca Jehová Diospi confiashpa, paita uyashpami catina canchij.

 MAIMAN CHAYANA YUYAILLA CALLPASHUNCHIJ

Maiman chayana yuyailla callpashunchij. Shujtajcunatapish ama ñitcachishunchij. (Párrafos 8 al 12-ta ricui). *

8. ¿Callpajcunaca urmashpapish imatataj rurashpa catincuna?

8 Callpajcunaca ama tsagnarishpa urmangapajca ñaupajmanmi alli ricurashpa callpancuna. Pero alli ricucushpapish shuj jutcupimi sarui tucuncuna. Mana cashpaca mana cuentata cushpami shujtaj callpajca paitaca urmachi tucun. Pero urmashpapish callpajcunaca chai rato jatarishpami callpashpa catincuna. Paicunaca imamanta urmashcallata yuyashpaca mana saquirincunachu. Ashtahuanpish maiman chayana yuyailla, premiota japina yuyaillami callpancuna.

9. ¿Ñitcarishpaca imatataj rurana canchij?

9 Huiñai causaiman apaj ñanpi callpacushpapish maipica ñitcari tucunchijmi. Huaquinpica imatapish mana allitami ruranchij o mana yuyashpami parlanchij. Maipicarin shuj huauqui o pani ñucanchijta llaquichishcamantami desanimarinchij. Shinapish juchayujcuna cashcatami yuyarina canchij. Pero tucuicunami quichqui ñanpi callpacunchij. Chaimantami huaquinpica shujtajcunahuan tˈangarinacuj shina llaquichinacui tucunchij. Pabloca shujtajcuna ‘pˈiñashpa juchachijpica’ ñucanchijcuna llaquilla sintirinatami yacharca (Colosenses 3:13). Ima ñitcachishcapi yuyashpallaca ama saquirishunchijchu. Ashtahuanpish huiñai causaita chasquina yuyailla callpashpa catishunchij. Urmashca shina cashpaca jatarishunchij. Pˈiñarishca, llaquilla saquirishpaca maiman chayana cashcamanca mana chayashunchu, premiotapish mana japishunchu. Pˈiñarishca saquirishpaca carrerapi shujtajcunata ñitcachij shinami tucushun.

10. ¿Shujtajcunata ama ñitcachingapajca imatataj rurana canchij?

10 Shujtajcunata mana ñitcachisha o llaquichisha nishpaca ñucanchij munashca shina imatapish rurachunca mana obliganachu canchij. Pudishpaca paicuna munashca shina imatapish rurachunmi saquina canchij (Romanos 14:13, 19-21; 1 Corintios 8:9, 13). Carrerapi callpajcunaca mana chashna yuyancunachu. Paicunaca “ñucami premiota japina cani” nishpami callpancuna. Caishuj callpajcunapica mana yuyancunachu. Chaimantami paicuna mishasha nishpa shujtajcunata tˈangashpa rinllacuna. Cutin ñucanchijca premiota japisha nishcamantami huauqui panicunahuanca  mana pˈiñarinacunchij (Gálatas 5:26; 6:4). Ñucanchijca tucuicuna huiñai causaita chasquichunmi munanchij. Chaimantami maiman chayana cashcaman huauqui panicunapish chayachun ayudanchij. Chaipajca apóstol Pablopaj consejotami catinchij. Paica: “Quiquinpajlla alli canata ama mashcaichijchu. Ashtahuanpish caishujcunapaj alli canata mashcaichij” nircami (Filipenses 2:4).

11. ¿Callpajcunaca ima yuyaillataj callpancuna?

11 Carrerapi callpajcunaca mana ñaupajllaman ricushpa callpancunachu. Ashtahuanpish maiman chayana lugarpi yuyashpami callpancuna. Chayana lugarta mana ricushpapish chaiman chayacuj shina, premiota japicuj shina yuyaillami callpancuna. Chai yuyailla callpashcamantami manataj saquirincuna.

12. ¿Cˈuyaj Yaya Diosca imatataj cusha nin?

12 Yayitu Diosca cˈuyaj cashcamantami tucuringacama tucui callpajcunamanca premiota cunga. Cai Allpapi causagrijcunaman, jahua pachapi causagrijcunamanpishmi huiñai causaita cunga. Bibliapica cai shina causaica ima shina cashcatami yachachin. Chaicunata liyishcamantami alaja causaita charinataca tucui shunguhuan crinchij. Jehová Dios imata cusha nishcapi yuyashpaca tucuringacamami callpashpa catishun. Ima jarcachunpish mana saquishunchu.

JARCAICUNA RICURIJPIPISH CALLPASHPAMI CATISHUN

Llaquicunahuan cashpapish huiñai causaiman apaj ñanpi callpashpa catishunchij. (Párrafos 13 al 20-ta ricui). *

13. ¿Diosta sirvijcunaca imamantataj callpashpa caticunchij?

13 Ñaupa punllacunapi tiyaj Grecia llajtapica callpajcunaca shaicushcacuna cashpapish, nanaihuan cashpapish callpashpami catijcuna carca. Paicunaca entrenacujpaj yachachishcacunata yuyarishpa, paicunapish esforzarishpami callpajcuna carca. Paicunata shinallatajmi ñucanchijtapish huiñai causaiman apaj ñanpi callpachun yachachincuna. Callpajcunaca paicunapaj fuerzallahuanmi callpajcuna carca. Pero ñucanchij callpashpa catichunca tucuita rurai tucuj Jehová Diosmi fuerzata cun. Paipi confiajpica paica ima shina callpanatami yachachisha nin. Shinallataj fuerzatami cusha nin (1 Pedro 5:10).

14. 2 Corintios 12:9 y 10 versocunaca ¿llaquicunata ahuantachunca ima shinataj ayudan?

14 Apóstol Pabloca achca llaquicunatami chˈimbapurana carca. Paitaca cˈamishpami llaquichishpa catirajcuna carca. Huaquinpica fuerza illaj shinami paica sintirirca. Shinallataj garrochahuan tujsicuj shinami paipaj aichapica sintirca (2 Corintios 12:7). Pero cashna llaquicunata charishpapish shaicurinapaj randica Jehová Diospi confiashcatami ricuchisha nirca (2 Corintios 12:9, 10-ta liyipai). Chaimantami Jehová Diosca paitaca siempre ayudarca.

15. ¿Apóstol Pablopaj ejemplota catishpaca imatataj cuentata cushun?

15 Huaquinpica apóstol Pablota shinallatajmi ñucanchij crishcacunamantapish cˈamishpa, catirashpa llaquichincuna. Mana cashpaca ima ungüitachari charinchij, o shaicushcachari sintirinchij. Pero Pablopaj ejemplota catishpaca ima problemacuna ricurijpipish Jehová Dios ñucanchijta cˈuyaihuan apoyacushcatami cuentata cushun.

16. ¿Ungushca huauqui panicunapish imatataj rurai tucuncuna?

16 Huaquincunaca camapimi pasancuna o silla de ruedaspimi purincuna. Shujtajcunaca sanpi nanaihuanmi causancuna. Cutin caishujcunaca mana ricui tucuncunachu. ¿Paicunaca sanocunahuan, jovencunahuanca callpai tucuncunachu? Ari. Achca mayorlla o ungushca huauqui panicunaca huiñai causaiman apaj ñanpimi callpai tucuncuna. Pero paicunaca  mana paicunapaj fuerzallahuanchu callpancuna. Ashtahuanpish tandanacuicunata telefonopi uyashpa, o internetpi ricushpami Dios cushca fuerzata chasquincuna. Shinallataj familiacunaman, doctorcunaman, enfermeracunaman predicashpami paicunapish Diosta sirvichun ayudancuna.

17. ¿Paita mana tanto sirvi tucujcunamantaca Yayitu Diosca imatataj yuyan?

17 Jehová Diosta mana tanto sirvi tucushpaca ama llaquirishunchijchu. Huiñai causaiman apaj ñanpi mana callpai tucushcatapish ama yuyashunchijchu. Jehová Diosca paipi crishcamanta, paita sirvingapaj avanzashcata rurashcamantami ñucanchijta cˈuyan. Cunan punllacunapipish Jehová Dios ayudachunmi minishtinchij. Paica ñucanchijtaca manataj saquingachu (Salmo 9:10). Ñucanchijpaj cˈuchullapi shinami can. Ancha ungüita charij shuj panimanta parlashun. Paica: “Asha asha anchayashpa catishcamantami ña mana tanto Diosmanta huillai tucuni. Pero paita sirvingapaj tucui pudishcata rurashcamantami Jehová Dios cushilla sintirishcata yuyani. Chaimi ñucapish cushilla sintirini” ninmi. Llaquilla sintirishpaca Yayitu Dios ñucanchijhuan cashcatami yuyarina canchij. Pablo parlashcapi yuyashun. Paica: ‘Irquilla cashpapish cushicuihuanmi cani. Chashna irquilla cashcapimi, ashtahuan sinchi tucuni’ nircami (2 Corintios 12:10).

18. ¿Huaquincunaca ima sinchi ungüicunatataj charincuna?

18 Huiñai causaiman callpacuj huaquin huauqui panicunaca shujtaj laya llaquicunatami chˈimbapuracuncuna. Cai huauqui panicuna ima ungüita charishcataca shujtajcunaca mana yachai tucuncunachu. ¿Maijantaj cai ungüicunaca can? Depresión, ansiedad nishca ungüicunami can. Depresión ungüita charijcunaca yallitajmi llaquirincuna. Ansiedad ungüita charijcunaca dimastijmi sustarincuna. ¿Cai llaquicunata charijcunapajca imamantataj sinchi can? Rigra pˈaquirishca o silla de ruedaspi cajcunataca ricunallami can. Chaimantami shujtajcunaca paicunata ayudancuna. Pero depresión o ansiedad ungüihuan cajcunataca mana pi yachai tucuncunachu. Cai ungüicunaca shuj tullu pˈaquirishca shinallatajmi can. Pero mana ricunalla ungüi cashcamantami shujtajcunaca mana ayudai tucuncuna, cˈuyaitapish mana ricuchi tucuncuna.

19. ¿Mefi-bosetpaj causaimantaca imatataj yachai tucunchij?

19 Ungushca cajpi, ima llaquicunahuan cajpi o pi ñucanchijta mana intindishcata sintishpaca Mefi-bosetpaj causaimanta yachashpami fuerzasta charishun (2 Samuel 4:4). Mefi-bosetca chaqui lisiadomi carca. Chai llaquihuan cajpica rey Davidpish yangamanta juchachishpami mana allita tratarca. Chai problemacunaca mana Mefi-bosetpaj culpamantachu  carca. Pero paica mana dimastij llaquilla sintirircachu. Ashtahuanpish allicunallapimi yuyarca. Paita ayudangapaj rey David imallata rurashcatami agradicirca (2 Samuel 9:6-10). David paita yanga juchachijpica Mefi-bosetca mana pˈiñarircachu. Jehová Diostapish mana culparcachu. Ashtahuanpish Dios agllashca rey Davidta apoyangapajmi esforzarirca (2 Samuel 16:1-4; 19:24-30). Jehová Diosca Mefi-bosetpaj causaimanta ñucanchij yachachunmi munan. Chaimantami Bibliapica paipaj causaimanta quillcachirca (Romanos 15:4).

20. a) ¿Maijancunaca ansiedad ungüita charishpaca ima shinataj sintirincuna? b) ¿Llaquicunahuan cashpapish imatataj siempre yuyarina canchij?

20 Ansiedad ungüita charishcamantami maijan huauqui panicunaca shujtajcunahuan tandanacunata, parlanata manchancuna. Gentecunahuan tandanacunata manchashpapish tucui tandanacuicunaman ringapajmi esforzarincuna. Shujtajcunahuan parlanata manchashpapish huillanamanmi llujshincuna. ¿Canpishchu shina sintirishcangui? Ama sustarichu. Achcacunami cashna llaquicunata chˈimbapurancuna. Jehová Diosta shungumanta sirvijpica paica cushillami sintirin. Yayitu Dios bendiciashcamanta, fuerzata cushcamantami mana shaicurishcanchij (Filipenses 4:6, 7; 1 Pedro 5:7). Ungüicunahuan cashpapish, llaquicunata charishpapish Jehová Diosta sirvinata manataj saquishpaca paita cushichicushcatami yuyarina canchij. *

21. ¿Jehová Diospaj ayudahuanca imatataj rurai tucushun?

21 Apóstol Pablo parlashca callpajcunahuan, carreracunapi callpajcunahuanca mana igualchu can. Ñaupa tiempopi callpajcunaca shujllami premiota japij carca. Pero huiñai causaiman apaj ñanpi tucuringacama callpajcunaca tucuicunami premiota japingacuna (Juan 3:16). Ñaupa punllacunapi callpajcunaca alli saludtami charina carcacuna. Mana alli saludta charishpaca preomiotaca manachari gananman carca. Pero ñucanchijca mana sano cashpapish callpashpami caticunchij (2 Corintios 4:16). Jehová Diospaj ayudallahuanmi tucuicuna cai carrerataca mishangacama callpai tucushun.

CANTO 144 Sumaj causaipi yuyashunchij

^ par. 5 Diosta sirvij achca huauqui panicunaca mayorlla cashcamanta, ima ungüita charishcamantami llaquicunata charincuna. Maipica tucuicunami shaicushca shina sintirinchij. Chaimantachari shuj carrerapi callpanataca manchanchij. Cai yachaipimi apóstol Pablo parlashca huiñai causaiman apaj ñanpi ima shina callpanata, mishangapaj imata rurana cashcata yachashun.

^ par. 6 La Atalaya del 1 de enero de 2013-pi “La Biblia les cambió la vida” nishcata españolpi ricui.

^ par. 20 JW.ORG® paginapi PUBLICACIONCUNA > JW BROADCASTING® nishcapi mayo de 2019 programata ricui. Chaipimi ansiedad ungüita chˈimbapurangapaj imallata rurana cashcata, huaquin huauqui panicunapish cai ungüita ima shina mishashcata ricungui.

^ par. 63 FOTOCUNAMANTA: Shuj mayorlla huauquica huillanapi ocuparishpami alli ñanpi callpacuj shina can.

^ par. 65 FOTOCUNAMANTA: Ñucanchijllataj achca tragota ubyashpa o shujtajcunatapish ashtahuan ubyachun obligashpaca paicunatami ñitcachi tucunchij.

^ par. 67 FOTOCUNAMANTA: Shuj huauquica alli ñanpi callpacuj shinami hospitalpi trabajajcunaman Diosmanta huillacun.