Ima tiyashcata ricui

Ima tiyashcata ricui

 YACHAI 17

“Cancunaca ñucahuan alli apanacujcunami canguichij”

“Cancunaca ñucahuan alli apanacujcunami canguichij”

“Cancunamanca ñuca Yaya imallata ruracujtaca tucuitami yachachircani. Chaimanta cancunaca ñucahuan alli apanacujcunami canguichij” (JUAN 15:15).

CANTO 13 Jesús shina causashunchij

CAITAMI YACHASHUN *

1. ¿Pihuan alli amigocuna tucungapajca imatataj rurana canchij?

PIHUAN alli amigocuna tucungapajca achca tiempota pasana, imata yuyashcata, ima shina sintishcata, ima shina causashcata parlanami minishtirin. Pero huaquinpica Jesuspaj amigocuna tucungapajca sinchimi ricurin. ¿Imamanta?

2. Puntapica ¿imamantataj Jesuspaj amigos tucunaca sinchi ricurin?

2 Puntapica, Jesustaca mana ñahui ñahui rijsinchijchu. Apostolcuna causashca punllacunapipish huaquin huauqui panicunaca Jesustaca mana ñahui ñahui ricurcacunachu. Chaimantami apóstol Pedroca: ‘Cancunaca mana ricushpapish, Jesucristotaca cˈuyanguichijmi. Cunan mana ricushpapish paipimi cringuichij’ nirca (1 Pedro 1:8). Pedro nishca shinaca Jesuspaj amigo cangapajca paita ñahui ñahui ricunaca mana minishtirinchu.

3. Ishquipica ¿imamantataj Jesuspaj amigos tucunaca sinchi ricurin?

3 Ishquipica, Jesushuanca mana parlai tucunchijchu. Shuj mañaita ruracushpaca Jehová Diostami mañanchij. Jesuspaj shutipi ‘chashna cachun’ nishpa mañashpapish mana paihuan parlanchijchu. Shuj mañaita rurashpaca Diostami adoranchij. Jesuspish Diosllata adorachunmi munan. Paita mañachunca mana munanchu (Mateo 4:10). Shina cajpipish Jesusta cˈuyashcatami ricuchi tucunchij.

4. a) Quimsapica ¿imamantataj Jesuspaj amigos tucunaca sinchi ricurin? b) ¿Cai yachaipica imatataj ricushun?

4 Quimsapica, Jesús jahua pachapi causashcamantami paihuanca mana cai tucunchij. Pero paihuan mana pasashpapish  paimantami ashtahuan yachai tucunchij. Cai yachaipimi paihuan alli apanacungapaj imallata rurana cashcata yachangapaj chuscu yuyaicunata ricushun. Pero puntapica Jesuspaj alli amigocuna cana imamanta valishca cashcatami ricushun.

¿IMAMANTATAJ JESUSPAJ AMIGOCUNA CANA CANCHIJ?

5. ¿Imamantataj Jesuspaj amigocuna cana canchij? (“ Jesushuan alli amigocuna cashpaca Jehová Dioshuanmi alli amigocuna cashun”, “ ¿Jesustaca ima shinataj cˈuyana canchij?” nishca recuadrocunata ricui).

5 Jehová Dioshuan alli apanacungapajca Jesushuanmi alli amigos cana canchij. Ishqui yuyaicunata ricushun. Puntapica, Jesusca paipaj discipulocunamanca: “Ñucata cˈuyashcamantami cancunataca ñuca Yayallataj cˈuyan” nircami (Juan 16:27). Shinallataj paica: “Yayapajmanca pi mana paillatajca chayai tucunchu. Ñucami Yayapajman chayachij ñan cani” nircami (Juan 14:6). Jesushuan manaraj alli apanacushpa Jehovapaj amigos tucusha nishpaca shuj punguta mana yaicushpa huasiman yaicusha nicuj shinami can. Jesuspish chai laya chˈimbapuraimantami parlarca. Paica: “Ñucaca ovejacunapaj pungumi cani” nircami (Juan 10:7). Ishquipica, Jesusca tucuipimi paipaj Yaya shina cashcata ricuchirca. Jesusca: “Pipish ñucata rijsijca, ñuca Yayatapish ñami rijsin” nircami (Juan 14:9). Jehová Diosta alli rijsingapajca Jesustami alli rijsina canchij. Jesusmanta ashtahuan yachashpaca paitaca ashtahuanmi cˈuyashun. Shinami Yaya Diostapish ashtahuan cˈuyashun.

6. ¿Jesuspaj alli amigocuna canaca imamantataj minishtirishca can?

6 Ñucanchij mañashcacunata Yayitu Dios cutichichunca Jesuspaj alli amigocunami cana canchij. Jesuspaj shutipi chashna  cachun nishpallaca mana saquirinachu canchij. Ashtahuanpish ñucanchij mañashcacunata Jehová Dios cutichichunca Jesús ima shina ayudashcatami alli intindina canchij. Jesusca paipaj apostolcunataca: ‘Tucui imatapish ñucamanta Yayata mañajpica ñucaca cushami’ nircami (Juan 14:13). Jehovami ñucanchij mañashcacunata uyashpa cutichin. Pero pai imata ruragrishcata pajtachichunca paipaj Churimanmi mingashca (Mateo 28:18). Jehová Diosca manaraj ñucanchij mañashcacunata cutichishpaca Jesusta cazushcata, mana cazushcatami ricun. Por ejemplo, Jesusca: “Shujtajcuna cancunata ima mana allita rurajpi cancuna paicunata perdonajpica, jahua pachapi caj cancunapaj Yayapish cancunapaj juchacunata perdonangami. Shujtajcuna cancunata ima mana allita rurajpi cancuna mana perdonajpica, cancunapaj Yayapish cancunapaj juchacunata mana perdonangachu” nircami (Mateo 6:14, 15). Chaimantami Jehová Dios shina, Jesús shina shujtajcunataca cˈuyaihuan tratana canchij.

7. ¿Jesús huañushcamantaca picunallataj quishpiringacuna?

7 Jesuspaj alli amigocuna cashpallami pai huañushcamantaca quishpirishun. Paillatajmi, ñuca amigocunamanca ñuca causaitami cusha nirca (Juan 15:13). Ñaupa tiempopi Diosta sirvijcunaca Jesustaca mana rijsircacunachu. Pero paicuna causarishpaca Jesusmantami yachangacuna, paitami cˈuyangacuna. Por ejemplo, Diosta alli sirvij Abraham, Sara, Moisés, Rahabpishmi causaringacuna. Pero paicunapishmi huiñai causaita charingapajca Jesuspaj amigocuna cana can (Juan 17:3; Hechos 24:15; Hebreos 11:8-12, 24-26, 31).

8, 9. a) Juan 15:4 y 5-pi nishca shinaca ¿Jesushuan shuj shinalla cashpaca imatataj rurai tucushun? b) ¿Jesusmanta chˈicanyashpaca imataj tucushun?

8 Gentecunaman Diospaj gobiernomanta huillashpaca Jesushuanmi shuj shinalla trabajanchij. Jesusca cai Allpapi cashpaca Yayitu Diosmantami yachachirca. Cutin jahua pachaman rishpaca congregacioncunapaj uma cashcamantami Diospaj obra ñaupajman catichun ayudacun. Jesusca Jehová Diosmantapish paimantapish gentecunaman rijsichishpa ayudashcamantami ñucanchijtaca valoran. Jehová Dios, Jesús ayudashcallamantami alli huillaicunataca predicai tucunchij (Juan 15:4, 5-ta liyipai).

9 Bibliapica Jehová Diosta cushichisha nishpaca Jesustami cˈuyana canchij ninmi. Jesuspaj alli amigocuna cangapajca chuscu yuyaicunamantami yachashun.

¿JESUSPAJ AMIGOCUNA CANGAPAJCA IMATATAJ RURANA CANCHIJ?

Jesuspaj amigocuna cangapajca: 1) Paitami alli rijsina canchij. 2) Pai shinami yuyana, imatapish rurana canchij. 3) Jahua pachapi mandagrijcunatapishmi apoyana canchij. 4) Congregacionpi decidishcacunatapish cazunami canchij. (Párrafos 10 al 14-ta ricui). *

10. ¿Jesuspaj amigo tucungapajca puntapica imatataj rurana canchij?

10 Puntapica, Jesustami alli rijsina canchij. Chaipajca Mateo, Marcos, Lucas, Juan librocunatami liyina canchij. Jesuspaj causaipi cutin cutin yuyashpami pai cˈuyaj cashcata yachashun. Chashnami paitaca respetashpa cˈuyai callarishun. Jesusca discipulocunapaj Amo cashpapish paicunataca esclavocunata shinaca mana tratarcachu. Ashtahuanpish paicunapaj amigo tucushpami Jesusca pai imata yuyashcata, ima shina sintirishcata huillarca (Juan 15:15). Paipaj discipulocuna llaquilla cajpica paipishmi llaquilla sintirishpa huacaj carca (Juan 11:32-36). Contracunapish Jesús paita uyajcunapaj alli amigo cashcatami  cuentata curcacuna (Mateo 11:19). Jesús paipaj discipulocunata tratashca shina ñucanchijpish shujtajcunata tratashpaca paicunahuanmi alli apanacushun, cushillami sintirishun. Jesustapish ashtahuanmi cˈuyashun, respetashun.

11. a) Ishquipica ¿Jesuspaj amigocuna tucungapajca imatataj rurashun? b) ¿Imamantataj Jesuspaj ejemplota catina canchij?

11 Ishquipica, Jesús shina yuyashunchij, rurashunchij. Paita ashtahuan rijsishpa, pai shina yuyashpaca paihuanmi alli apanacushun (1 Corintios 2:16). Jesusca paillapi yuyanapaj randica shujtajcunata ayudanapimi yuyarca (Mateo 20:28; Romanos 15:1-3). Chaimantami paicunamanta sustarishpa, paicunataca perdonaj carca. Paita yangamanta juchachijpipish mana rato colerajllachu carca (Juan 1:46, 47). Gentecunapaj pandarishcacunatapish mana cutin cutin yuyaricujllachu carca (1 Timoteo 1:12-14). Ñucanchijpish Jesuspaj ejemplotami catina canchij. Paica: “Chashna caishuj chaishuj cˈuyanacujpimi, cancunataca ñuca yachacujcunataj cashcata tucuicuna rijsingacuna” nircami (Juan 13:35). Chaimanta cashna nishpa tapurishunchij: “¿Ñucapish Jesús shinachu huauqui panicunahuan alli apanacungapaj esforzaricuni?”.

12. ¿Quimsapica Jesuspaj amigocuna tucungapajca imatataj rurana canchij?

12 Quimsapica, Jesushuan mandagrijcunata apoyashunchij. Paicunata apoyajpica Jesusca paita apoyacujta shinami ricun (Mateo 25:34-40, QC, 1989). Jesús mandashca shina Diospaj Reinomanta shujtajcunaman predicashpa, yachachishpami jahua pachapi causagrij Dios agllashcacunata apoyacushcata ricuchinchij (Mateo 28:19, 20; Hechos 10:42). “Shujtaj ovejacuna” o cai Allpapi causagrijcuna ayudashcamantami jahua pachapi causagrijcunaca muyundij Allpapi huillai tucuncuna (Juan 10:16). Cai Allpapi causagrijcuna cashpapish Diosmanta huillashpaca Jesustapish, paihuan mandagrijcunatapish cˈuyashcatami ricuchinchij.

13. Lucas 16:9-pi Jesús yachachishcacunataca ¿ima shinataj pajtachina canchij?

13 Diospaj obrata apoyangapaj shungumanta cullquita cushpaca Jehová Diospaj, Jesuspaj amigocunami tucushun (Lucas 16:9-ta liyipai). Por ejemplo, muyundij Allpapimi Diospaj obra ñaupajman catichunca cullquita cui tucunchij. Cai cushca cullquihuanmi caru ladocunapi huillachun, Tandanacuna Huasicunata shayachichun, allichichun ayudai tucunchij. Mana cashpaca jatun acapana, terremoto o chai laya shujtaj llaquicuna tiyashcamantami llaquihuan caj huauqui panicunata ayudangapaj cullquita cui tucunchij. Ñucanchij congregacioncunapipish cullquitami cui tucunchij. Shinallataj huauqui panicuna imata minishticujpipish paicunatami ayudai tucunchij (Proverbios 19:17). Chashnami Jesushuan mandagrijcunataca apoyacushcata ricuchinchij.

14. Efesios 4:15 y 16-pi nishca shinaca ¿Jesuspaj alli amigocuna cangapajca imatataj rurana canchij?

14 Chuscupica, Diospaj organizacionta apoyashunchij. Ñucanchijta cuidangapaj Jesús agllashca huauquicunata apoyashpami Jesushuan ashtahuan alli amigos tucushun (Efesios 4:15, 16-ta liyipai). Por ejemplo, Diospaj organizacionca Tandanacuna Huasicunata alli utilizachunmi ricuracuncuna. Chaipajca huaquin congregacioncunataca shujllapimi tandachishca. Huaquin huillana lugarcunatapishmi cambiashcacuna. Chashnami  Diosman cushca cullquicunataca alli utilizashcacuna. Cai cambiocuna tiyashcamantami huaquin publicadorcunaca shujtaj congregacionman rina cashca. Cai huauqui panicunaca achca huatacunatami shuj congregacionpi sirvishcacuna. Chaimantami chaipi sirvij huauqui panicunahuanca alli apanacushcacuna canga. Pero paicunataca shujtaj congregacionpi sirvichunmi mandashcacuna. Ñaupajman pushaj huauquicunata cazujpica Jesusca cushillami sintiringa.

TUCUI VIDAMI JESUSPAJ AMIGOCUNA CAI TUCUNCHIJ

15. ¿Shamuj punllacunapica Jesushuanca ima shinataj apanacushun?

15 Jahua pachapi causachun agllashca huauqui panicunaca Jesushuanmi mandangacuna. Paicunaca Jesushuan huiñaita causanatami shuyancuna. Jesustaca ñahui ñahuimi ricungacuna, paihuanmi parlangacuna, paihuanmi tiempota pasangacuna (Juan 14:2, 3). Cai Allpapi causagrijcunapish Jesús cˈuyajpi, pai cuidajpimi cushilla causangacuna. Jehová Diospish Jesuspish sumaj causaita cushcamantami cushilla causangacuna. Chaimi Jesusta mana ricushpapish paihuanca ashtahuan alli apanacungacuna (Isaías 9:6, 7).

16. ¿Jesuspaj amigocuna cashcamantaca ima bendicioncunatataj chasquinchij?

16 Jesuspaj amigocuna cashcamantami achca bendicioncunata chasquishcanchij. Por ejemplo, paica ñucanchijtami cˈuyan, ñucanchijtami cuidan. Ashtahuancarin shamuj punllacunapajpish paimantami huiñai causaita charishun. Jesushuan alli apanacushpami Jehová Dioshuanpish alli apanacushun. Dioshuan apanacunami tucuimanta yalli valishca can.

CANTO 17 ‘Ayudasha ninimi’

^ par. 5 Apostolcunaca achca huatacunatami Jesushuan parlajcuna, Diostapish shuj shinalla sirvijcuna carca. Chashnami paicunaca alli amigocuna carca. Cunan punllacunapipish Jesusca paihuan alli amigocuna tucuchunmi munan. Pero Jesuspaj amigocuna tucunaca ñucanchijpajca asha sinchimi can. Cai yachaipimi imamanta sinchi cashcata ricushun. Shinallataj paipaj alli amigocuna tucungapaj imata rurana cashcatami yachashun.

^ par. 55 FOTOCUNAMANTA: 1) Familiahuan Diosta adoracushpami Jesuspaj causaimanta, pai ima shina huillashcamanta estudiana canchij. 2) Congregacionpi huauqui panicunahuan alli apanacungapajmi esforzarina canchij. 3) Diosmanta huillangapaj tucui pudishcata rurashpaca Jesushuan mandagrijcunata apoyashcatami ricuchinchij. 4) Huaquin congregacioncuna shujllapi tandanacujpica ñaupajman pushaj ancianocunatami apoyana canchij.