Ima tiyashcata ricui

Ima tiyashcata ricui

Ñuca huarmi Tabithahuanmi huillacunchij.

 BIBLIATA YACHASHPAMI CAMBIASHCACUNA

Ñucaca Diospi mana crircanichu

Ñucaca Diospi mana crircanichu
  • HUACHARISHCA HUATA: 1974

  • LLAJTA: REPÚBLICA DEMOCRÁTICA ALEMANA

  • PAITA ASHTAHUAN RIJSI: DIOSPI MANA CRIRCACHU

ÑAUPA CAUSAI

Sajonia llajtamanta shuj pueblopimi huacharircani. Chai tiempopica República Democrática Alemana nishpami rijsijcuna carca. Ñuca yaya mamaca c⁠ˈ⁠uyashpami alli runa tucuchun yachachijcuna carca. República Democrática Alemana llajtaca comunistami carca. Sajonia llajtapica religionta charinaca mana minishtirishcatami yuyajcuna carca. Ñucaca Dios tiyashcataca mana crircanichu. Chaimantami punta 18 huatacunataca Diospi mana crishpa ateo, comunistapish carcani.

Comunista canatami munarcani. Comunistacunaca tucui gentecuna igual canata, achcata charijcunapish, pobrecunapish mana tiyanatami crijcuna carca. Ñucapish tucui imalla charishcacunataca tucuicunamanmi igualta cuna canchij nishpami yuyaj carcani. Chaimantami shujtaj comunista jovencunahuan shuj organizacionpi ayudai callarircani. 14 huatacunata charishpaca chai llajtata cuidangapajmi papelcunata tandachishpa achca tiempota trabajarcani. Aue pueblopi autoridadcunaca pagui nishpami shuj premiota curcacuna. Joven cashpapish República Democrática Alemana llajtamanta poderta charij huaquin autoridadcunatami rijsircani. Ñuca causaihuanca allita ruracushcatami yuyarcani.

Shinapish 1989 huatapica muro de Berlín nishcami urmarca. Comunista llajtacunapish poderta ña mana charircacunachu. Comunistacunaca gentecunata yangamanta llaquichishcatami cuentata curcani. Por ejemplo, comunistacuna shina mana yuyaj gentecunataca p⁠ˈ⁠iñajcunami carca. Chaita ricushpaca, ¿manachu comunistacunaca tucuicuna igual cashcata yachachin? ¿Chashna causanaca yangamantachu carca? nishpami yuyarcani. Ñuca munaicunaca tucurircami. Chaimantami shamuj punllacunapi ima tucunamanta yallitaj sustarircani.

Q⁠ˈ⁠uipaca musicata, pintanatami munarcani. Chaimantami universidadman yaicungapaj munashpa shuj colegiopi musicata yachai callarircani. Ñuca yaya mama alli runa tucuchun yachachishcacunata saquishpami cushicunallata yuyarcani. Chaimantami achca huarmicunahuan purishpa, huainayashpa causaj carcani. Chashna causanapish, musicapish, pintanapish shamuj punllacunapi ima tucunamanta ama yalli sustarichunca mana ayudarcachu. Ñuca dibujocunapipish chaitami pintaj carcani. ¿Shamuj punllacunapica imashi tucushun?, ¿imapajtaj causashpa catini? nishpami yuyarcani.

 Shuj punllaca colegiopi asha estudiantecunami shamuj punllacunamanta parlanacujta uyashpa paicunahuan tiyarircani. Chaipimi Mandy * shuti estudianteta rijsircani. Paica testigo de Jehovami carca. Mandyca: “Andreas causaimanta, shamuj punllacunamanta yachanata munashpaca Bibliatami yachana cangui” nircami.

Pai nishcata mana crishpapish yachanatami munarcani. Mandyca Daniel libromanta capítulo 2-tami ricuchirca. Chaipica ñaupa punllacunamanta cunan punllacunacama gobiernocuna ima shina cashcatami parlan. Shinallataj shamuj punllacunapi gentecuna ima shina causanamanta parlaj shujtaj profeciacunatapishmi yachachirca. Ñuca yachasha nishca tapuicunata cutichijta ricushpaca achcatami cushicurcani. Pero, ¿pitaj cai profeciacunata quillcarca? ¿Shamuj punllacunapi ima tucunataca pitaj alli yachan? ¿Chai profeciacunaca Dios tiyashcata ricuchircachu? nishpami tapurircani.

¿BIBLIATA YACHANACA IMA SHINATAJ CAMBIACHUN AYUDARCA?

Mandyca cazarashca testigo de Jehovacuna Horst, Angelikatami rijsichirca. Paicunaca Bibliata alli intindichunmi ayudarcacuna. Testigo de Jehovacunalla Diospaj “shuti Jehová cashcata” gentecunaman yachachijcuna cashcata, paicunapurapish Jehová shutita nijcuna cashcatami ricurcani (Salmo 83:18, NM; Mateo 6:9). Salmo 37:9-pi nishca shinaca, Jehová Diosta shuyajcunaca Allpatami japingacuna ninmi. Chaita yachashpami Jehová Diosca cai Allpata shuj paraisota rurajpica gentecuna causachun munashcatami intindircani. Chaimantami Diosta cazungapaj esforzarijcunaca paraíso Allpapi huiñai huiñaita causai tucushcamanta achcata cushicurcani.

Bibliapi mandashca shina ñuca causaita cambianaca mana jahuallachu carca. Musicata rurashpa, pintashpaca achca rijsishcami tucurcani. Chaimantami jatun tucushca carcani. Humilde cangapaj sinchitami esforzarircani. Mapa causaita saquina sinchi cajpipish saquircanimi. Bibliapi mandashca shina causangapaj sinchita esforzarijcunahuanca Diosca mana utca p⁠ˈ⁠iñarij, intindij cashcamantami pagui nini.

Punta 18 huatacunataca Diospi mana crishpa ateo, comunistapishmi carcani. Pero Bibliata yachanami ñuca causaita cambiachun ayudashca. Shinallataj cushilla, shamuj punllacunamanta ama yalli sustarishpa causachunpishmi ayudashca. 1993 huatapimi testigo de Jehová shina bautizarircani. 2000 huatapica Tabithahuanmi cazararcani. Paipish Testigo de Jehovami can. Cunanca ishquindijmi achca horascunata Bibliamanta gentecunaman yachachishpa purinchij. Achca gentecunami ñuca laya Diospi mana crishpa ateo, comunista yuyaicunata charishcacuna. Paicunataca cushicushpami Jehová Diosmanta yachachishpa ayudani.

BENDICIONCUNATAMI CHARISHCANI

Testigo de Jehovacunahuan Bibliata yachai callarijpica ñuca yaya mamaca mana munarcachu. Shinapish ñuca causaita ima shina cambiashcata ricushpami cunanca paicunapish Bibliata yachacuncuna. Testigo de Jehovacunapaj tandanacuicunamanpish ricuncuna. Chaita ricushpaca cushillami sintirini.

Cazadocunapaj Bibliapi imata mandashcata cazungapajmi esforzarinchij. Chaimantami cushilla causanchij. Por ejemplo, Bibliapica cusallahuan, huarmillahuan causachunmi mandan. Chaita cazushpami ishquindij ashtahuan alli apanacunchij (Hebreos 13:4).

Shinallataj ñuca causaimanta, shamuj punllacunapi ima tucunamantapish ña mana sustarinichu. Charijcunaca pobrecunata ama ch⁠ˈ⁠icanyachichun, tucuicuna igual cachunmi siempre munashcani. Cunanca muyundij Allpapi testigo de Jehovacunahuanmi shuj familia shina cushilla, tranquilo causani.

^ par. 12 Shutitaca cambiashcanchijmi.