Ima tiyashcata ricui

Ima tiyashcata ricui

APÉNDICE

Profeta Danielca Mesías ricurinatami huillarca

Profeta Danielca Mesías ricurinatami huillarca

PROFETA Danielca Jesús manaraj huacharijpi 500 yalli huatacuna ñaupamanmi causarca. Shinapish Mesías o Cristo cachun Jesusta ima hora agllanatami Jehová Diosca Danielman huillarca. Diosca cashnami nirca: “Caitaca allimi entendina cangui: Jerusalenta cutin shayachichun nishpa mandashca horasmanta, Mesías nishca Mandaj shamungacamaca canchis semanacuna, sujta chunga ishqui semanacunami canga” nircami (Daniel 9:25).

Mesías ima hora ricurishcata yachangapajca, Danielpaj profecía ima hora pajtari callarishcatami yachana canchij. Chai profeciaca “Jerusalenta cutin shayachichun nishpa mandashca” punllapimi pajtari callarirca. ¿Ima horataj Jerusalenta cutin shayachichun mandarca? Nehemías huillashca shinaca, rey ‘Artajerjes ishqui chunga huatata ña mandacushpami’ Jerusalén llajtapaj pircacunata cutin shayachichun mandarca (Nehemías 2:1, 5-8). Historiata quillcajcunaca rey Artajerjesca Jesús manaraj huacharijpi 475 huatapimi mandai callarirca nincunami. Cuentata rurajpica rey Artajerjesca 455 huatapimi 20 huatacunata ña mandacurca. Shinashpaca Danielpaj profeciaca Jesús manaraj huacharijpi 455 huatapimi pajtari callarirca.

Danielca chai huatamanta callarishpa Mesías chayangacama mashna huatacuna pasana cashcatami huillan. Danielpaj profeciapica “canchis semanacuna, sujta chunga ishqui semanacunami canga” ninmi. Sumajpica 69 semanacunami tucun. ¿69 semanacunaca mashna huatacunataj can? Achca Bibliacunapi ricuchishca shinaca, chai semanacunaca mana 7 punllacunatachu charirca, chai semanacunaca 7 huatacunatami charirca. Ñaupa judiocunaca 7 huatacunata charij semanacuna tiyashcataca allimi entendircacuna. Por ejemplo, cada 6 huatacuna qˈuipaca sábado nishca shuj huatatami yuyarina carca (Éxodo 23:10, 11). Shinashpaca 69 semanacunaca, cada semanami 7 huatacunata charin. Cuentata rurajpica 483 huatacunami tucun.

Cunanca chai huatacunata cuentanallami minishtirin. Jesús manaraj huacharishca 455 huatamanta, 483 huatacunata menosyachishpa cuentajpica, Jesús huacharishca qˈuipa 29 huatamanmi chayanchij. Chai huatapi bautizarishpami Jesusca Mesías tucurca (Lucas 3:1, 2, 21, 22). * ¿Manachu Danielpaj profeciaca alli pajtarishca?

^ par. 2 455 huatamanta, Jesús manaraj huacharishca (J.m.h.) 1 huatacamaca, 454 huatacunami tucun. J.m.h. 1 huatamanta, gentecuna yuyashca shina Jesús huacharishca 1 huatacamaca shuj huatami tucun. Gentecuna yuyashca shina Jesús huacharishca 1 huatamanta 29 huatacamaca 28 huatacunami tucun. Cai quimsa numerocunata sumajpica (454+1+28) 483 huatacunami tucun. Jesusca 33 huatapimi huañurca, 70 semana chaupipi (Daniel 9:24, 26). Ashtahuan yachasha nishpaca Prestemos atención a las profecías de Daniel libropi capítulo 11-ta, shinallataj Perspicacia para comprender las Escrituras, vol. 2, páginas 1014 a 1017-ta ricui. Ishquindij librocunatami testigo de Jehovacuna rurashca.