Ima tiyashcata ricui

Ima tiyashcata ricui

 TAPUI 8

¿Violashpa llaquichisha nijpica imatataj rurasha?

¿Violashpa llaquichisha nijpica imatataj rurasha?

¿IMAMANTATAJ CAITA YACHANA CANGUI?

Cada huatami achca gentecunata violashpa llaquichincuna. Ashtahuancarin huambracunatami chashna llaquichincuna.

IMATATAJ RURANGUIMAN?

Anitata violasha nijca paitaca ñapishmi huajtashpa pambaman shitarca. Anitaca: “Ama llaquichichun caparisha nishpapish mana capari tucurcanichu. Shinallataj tˈangarcanipish, huajtarcanipish, jaitarcanipishmi. Paica shuj cuchillota llujchishpami ñucata chugrichirca. Chaipica imata mana rurai tucurcanichu” ninmi.

¿Anitata shina canta llaquichisha nijpica imatataj ruranguiman?

YUYAI

Achcata cuidarijpipish huasimanta tutacuna llujshijpica pipish llaquichi tucunmi. Bibliapica: “Ima punlla ima tucunataca pi mana yachanchu. Chalhuacunataca linchica ñapish japinllami. Pajarocunapish trampapi japi tucunllami. Runacunatapish chashnallataj mana alli punlla chayajpica, ñapish ima llaqui japinllami” ninmi (Eclesiastés 9:12).

nitataca shuj mana rijsishca cˈarimi llaquichirca. Shujtajcunataca rijsishcacuna o familia purallamantatajmi violashpa llaquichishcacuna. Nataliataca 10 huatacunallata charijpimi paipaj vecinoca violashpa llaquichirca. Paica: “Achca manchaihuan, pingaihuan cashcamantami pimanpish mana huillasha nircani” ninmi.

 CANCA CULPATA MANA CHARINGUICHU

Anitaca chai llaquita charishcamantami cunancama ñucami culpata charini nishpa llaquilla can. Paica: “Chai tutapi llaquichishcataca cutin cutinmi yuyarini mana saquinachu carcani, ñucata cuchillohuan chugrichijpipish llaquichichunca manataj saquinachu carcani” ninmi.

Nataliapish, Anita shinallataj sintirishpami llaquilla can. Paica: “Ñuca yaya mamaca cambaj ñañahuan cashpallami canllapi pugllana cangui nircami. Ñucalla cajta ricushpami shuj vecinoca ñucata violashpa llaquichirca. Mana cazushcamantami chai llaquita charircani. Ñuca familiapish achcatami llaquirircacuna. Ñucapaj culpa cashcata yuyashpami achcata llaquirini” ninmi.

Paicuna shina sintirishpaca caitami yuyarina cangui: Mana can munashcamantachu violashpa llaquichincuna. Huaquincunaca paicunallataj culpata charishcamantami chashna violashcacuna ninmi. Shinapish cai jatun llaquitaca ni pi mana charinachu can. Cantapish violashpa llaquichishca cajpica cambaj culpa cashcataca ama yuyaichu.

Mana culpata charinichu nishpa yuyanaca sinchimi can. Chaimantami huaquincunaca mana piman huillashpa paicunalla llaquilla sintirishpa pandata yuyancuna. Shinapish ¿upalla saquirinaca pipajtaj alli canga? ¿Cambaj o violajpaj? Ayudatami mashcana cangui.

AMA UPALLA SAQUIRICHU

Diosta servij Job runaca achca llaquicunahuan cashpaca: “¡Ñuca almapi huacaihuan huillacushallami!” nircami (Job 10:1). Job shinallataj ima tucushcata pihuan parlashpaca chai llaquipi ña mana yuyashpami alli sintiringui.

Chai llaquica achcata llashaj shinami canga. Ama chashna sintiringapaj pihuan parlanacui.

Anitaca chaita rurashpami alli sintirirca. Paica: “Shuj amigahuan parlanacujpimi paica ancianocunahuan parlanacui nirca. Ancianocunahuan parlanacushcamantaca cushillami sintirircani. Paicunaca cutin cutinmi ñucahuan parlanacurca. Canca culpata mana charinguichu nircacunami. Chaita uyashpami cushilla sintirircani” ninmi.

Nataliaca: “Yaya mamamanmi tucuita parlarcani. Paicunaca ñuca ima shina sintirishcata ricushpami cˈuyaihuan ayudarca. Shinallataj ima tucushcata tucuita paicunaman parlashpami ña mana ñucallahuantaj pˈiñarishpa alli sintirircani” ninmi.

Diosta mañanapishmi paitaca ayudarca. Nataliaca: “Ima tucushcata mana piman parlai tucushpaca Diostami mañani. Ima shina sintirishcata tucuita Diosman huillashpami alli sintirini” ninmi.

Canpish alli sintiri tucunguimi. Bibliapica: “Jambingapajpish, o alliyangapajpish punlla chayanmi” ninmi (Eclesiastés 3: 3). Ama chai llaquipi yuyashpa catichu. Ashtahuancarin tucuipi cushichij Jehová Diosta mashcai (2 Corintios 1:3, 4).

 ¿NOVIOTA CHARINGAPAJ EDADTA CHARINGUICHU?

Cambaj novio mapa yuyaicunahuan imatapish rurasha nijpica mana manchashpami: “¡Imatataj rurasha nicungui! ¡Ama shina japirichu!” ninami cangui. Saquingami nishpaca ama manchaichu, saquishpaca canta mana cˈuyanchu. Cˈuyashpaca canta respetangami, Diospaj mandashcacunatapish cazungami.

¿VIOLASHA NISHPACHU MOLESTANCUNA?

Carla solteraca: “Casi 14 huatacunata charijpimi colegiomanta compañerocunaca huashamanta sostenmanta aisashpa mapa shimicunahuan: ‘Ñucahuan siririshpaca cushillami sintiringui’ nijcuna carca” ninmi.

¿Imamantataj chai jovencunaca chaita rurashca canga:

  1. ... pugllangapajlla?

  2. ... paita munashcamanta?

  3. ... violashpa llaquichisha nishpa?

Claudia solteraca: “Buspi ricujpimi shuj jovenca mapa shimicunata nishpa ñucata japiri callarirca. Huajtashpa anchuri nijpica locata shinami ñucata ricurca” ninmi.

¿Imamantataj chai jovencunaca chaita rurashca canga:

  1. ... pugllangapajlla?

  2. ... paita munashcamanta?

  3. ... violashpa llaquichisha nishpa?

Beatriz solteraca: “Shuj jovenmi ñucataca tucui huata ‘cantami munani ñucahuan purishunlla’ nijmi carca. Ñucaca mana nijmi carcani. Huaquinpicarin ñucapaj rigrapimi japirij carca, saqui ama shina caichu nijpipish mana cazurcachu. Shuj punllaca cumurishpami zapatota huataricurcani ñapish ñuca siquipi huajtajtami sintircani” nimi.

¿Imamantataj chai jovencunaca chaita rurashca canga:

  1. ... pugllangapajlla?

  2. ... paita munashcamanta?

  3. ... violashpa llaquichisha nishpa?

Chai jovencunaca violasha nishpami chaita rurarcacuna.

Caitami yachana cangui.

Vilolashpa llaquichisha nijcunaca mapa shimicunata nishpami mana alli sintichincuna. Ama molestaichu, saqui nijpicarin ashtahuanmi paicunaca molestashpa catincuna.

Mana pugllaimantallachu chaita rurancuna ashtahuanpish canta violashpa llaquichina yuyaihuanmi chashna molestancuna.