Ima tiyashcata ricui

Ima tiyashcata ricui

 Lección 3

Rahabca Jehová Diospimi tucui shunguhuan crirca

Rahabca Jehová Diospimi tucui shunguhuan crirca

¿Shuj parlota uyasha ninguichu? Ñaupa tiempopica Canaán llajtapimi Jericó llajta tiyarca. Chaipi causajcunaca Jehová Diospi mana crircacunachu. Shinapish Jericó llajtapica Diospi crij Rahab huarmimi causarca.

Rahab huarmica uchillamantami israelitacunata Dios ima shina ayudashcata uyarca. Diosca Moiseshuanmi Egiptomanta israelitacunata llujshichirca. Puca cucha yacutapish chaquichishcatami Rahabca uyarca. Shinallataj israelitacunaca Jericó llajta cˈuchullapi cashcatami paica uyarca.

Rahabca Jehová Diospi tucui shunguhuan crishcamantami israelitacunata ayudarca

Shuj tutaca ishqui israelitacunami pacalla Jericó llajtata ricunaman yaicurca. Paicunaca Rahabpaj huasimanmi chayarca. Shinapish Jericota mandaj reyca israelitacuna llajtata ricunaman shamushpa Rahabpaj huasipi cashcatami yachaj chayarca. Chaimantami paicunata mashcanaman cacharca. ¿Rahabca imatataj rurarca? Israelitacunata paipaj huasi jahuapi pacashpami mashcaj runacunataca, “ñami caimantaca rircacuna, utca catishpa richij japinguichijmi” nircami. ¡Chashnami Rahabca israelitacunata ayudarca! ¿Israelitacunata imamanta ayudashcata yachasha ninguichu?... Rahabca tucui shunguhuanmi Jehová Diospi crirca. Israelitacunaman Canaanpi tiyaj tucui llajtacunata cuna cashcatami Rahabca yacharca.

Israelitacuna Rahabpaj huasimanta manaraj rishpaca: Jehová Dios Jericó llajtata tucuchijpica, canpish cambaj familiapish quishpiringuichijmi nircacunami. Shinapish Rahab quishpiringapajca ¿imatataj rurana carca?... Israelitacunaca cashnami nirca: “Cai puca huascata ventanapi huarcungui. Cambaj familiatapish cambaj huasipi tandachingui” nircacunami. Rahabca israelitacuna mandashca shinami rurarca. ¿Chai qˈuipa ima tucushcata yachasha ninguichu?...

Jehová Diosca Rahabtapish paipaj familiatapishmi quishpichirca

Huaquin punllacuna qˈuipaca israelitacunaca Jericó llajtatami muyurca. 6 punllacuna tucungacamami cada punlla shuj cutin muyurca. 7 punllapica 7 cutinmi muyurca. Chai qˈuipaca sinchitami caparircacuna. Chaipimi ¡Jehová Diosca Jericó llajtapaj jatun pircacunata urmachirca! ¿Rahabpaj huasica imataj tucurca? Pirca jahuapi cashpapish puca huascata ventanapi huarcushcamantami  mana urmarca. ¿Dibujopi huarcushca huascata ricunguichu?... ¡Chashnami Rahabpish paipaj familiapish quishpirirca!

¿Rahabca imamantataj quishpirirca?... Jehová Diosta cazushcamantami quishpirirca. Rahabca Dios cuidanatami tucui shunguhuan crirca. Jehová Dios imata rurashcata uyashpami tucui shunguhuan crirca. Canpish Diosmantami ashtahuan yachacungui. ¿Canca Rahab shina Jehová Diosta cazusha ninguichu?... ¿Ari nachu?