Ima tiyashcata ricui

Ima tiyashcata ricui

 Lección 8

Josiasca alli amigocunatami agllarca

Josiasca alli amigocunatami agllarca

¿Jehová Dios mandashcata ruranaca jahuallachu can?... Achca gentecunaca sinchimi can ninmi. Shinapish Bibliapica Josiasmanta parlashpami mana sinchi cashcata yachachin. Paica huambralla cashpapish tucui shunguhuanmi Jehovata servisha nirca. Diosta servingapajca alli amigocunatami agllarca. Josiasmanta paipaj amigocunamantapish ashtahuan yachashun.

Josiaspaj yayaca Amonmi carca. Amonca Judá llajtatami mandaj carca. Paica millai cashcamantami rurashcalla dioscunata adoraj carca. Amón huañujpica Josiasmi mandai callarirca. ¡Josiasca 8 huatacunallata charishpami mandai callarirca! ¿Josiasca paipaj yaya shinachu millai carca?... Mana.

Sofoniasca rurashcalla dioscunataca mana adoranachu canguichij nircami

Uchillamantapachami Josiasca Jehovata servisha nirca. Chaimantami Jehovata cˈuyaj amigocunata agllarca. Paicunami Jehovata cazuchun ayudarca. ¿Josiaspaj amigocunaca picunataj carca?

 Josiaspaj shuj amigoca profeta Sofoniasmi carca. Sofoniasca Judá llajtapi causaj gentecunataca: “rurashcalla dioscunata adorashpaca llaqui tucunguichijmi” nircami. ¿Josiasca Sofoniasta uyashpaca cazurcachu? Ari, cazurcami. Chaimantami Josiasca rurashcalla dioscunata mana adorashpa Jehová Diosllata adorarca.

Josiaspaj caishuj amigoca Jeremiasmi carca. Paicunaca casi chai huatapurallatajmi carca. Jovencuna cashpaca cˈuchullapimi causajcuna carca. Jeremiaspish Josiaspish alli amigocuna cashcamantami Jehová Diosta servingapaj ayudanacurca. Chaimantami Josías huañujpica llaquilla sintirishcata ricuchingapaj Jeremiasca shuj cantota rurarca.

Jeremiaspish Josiaspish Jehová Diosta servingapajmi ayudanacurca

¿Imatataj Josías shina rurai tucungui?... Paica uchillamantapachami Jehová Diosta servisha nirca. Chaimantami Jehovata cˈuyajcunata paipaj amigocuna cachun agllarca. ¿Canpish Jehová Diosta servisha ninguichu? Shinashpaca Jehovata cˈuyajcunatami cambaj amigocuna cachun agllana cangui.