Ima tiyashcata ricui

Ima tiyashcata ricui

 Lección 7

¿Manchaita charishpaca imatataj rurai tucungui?

¿Manchaita charishpaca imatataj rurai tucungui?

Cai huahuata ricui. Pailla cashcamantami manchaihuan can. ¿Canca manchashcanguichu?... Tucuicunami manchashcanchij. Bibliapica Jehovata cˈuyajcunapish paicunalla sintirishpa manchashcatami parlan. Elías ima tucushcata yachashun.

Jezabelca Eliastami huañuchisha nirca

Eliasca Jesús huacharinapaj achca huatacuna illajpimi Israel llajtapi causarca. Chai punllacunapica Israel llajtata mandaj rey Acab, paipaj huarmi Jezabelpish mana Jehová Diosta cˈuyarcacunachu. Paicunaca rurashcalla dios Baaltami adorajcuna carca. Israelpi causaj achca gentecunapish Baaltami adorajcuna carca. Jezabelca millai cashcamantami Jehovata adorajcunata huañuchisha nirca. Eliastapish Jehovata servij cashcamantami huañuchisha nirca. ¿Eliasca imatataj rurarca? ¿Canca imatataj ruranguiman carcangui?...

Eliasca shitashca pambaman rishpami urcu jutcupi miticurca. ¿Ima nishpataj miticurca?...  Manchashcamanta. Shinapish mana manchanachu carca. ¿Imamanta? Dios ayudanataca Eliasca allimi yacharca. Diosca ñami paita ayudashca carca. Elías shuj mañaita rurajpica Diosca jahua pachamantami ninata cacharca. ¿Manachu Jehová Diosca achca poderta charin? Ari. ¡Chaimantami Eliasca Jehovapi shunguta churana carca!

¿Jehová Diosca ima shinataj Eliasta ayudarca?

Chai jutcupi miticushca cajpimi Jehová Diosca: “¿Elías imatataj caipica ruracungui?” nirca. Eliasca: “Ñaupaca canta servijcuna tiyarcami. Cunanca ñucallamari saquirishcani. Ñucatapish huañuchinatami manchacuni” nircami. Diosta servijcunataca tucuicunata huañuchishcatami Eliasca yuyarca. Shinapish Jehová Diosca: “Mana canllachu cangui, ñucataca 7.000 gentecunami adoracunraj. Ama manchaichu cambajca shuj mingaitami charini” nircami. Dios chashna nijpica, ¿manachu Eliasca cushicushca canga?... Ari, ¡cushicushcami canga!

¿Cai leccionpica imatataj Eliasmanta yachashcanchij?... Huaquinpica canlla cashpaca manchanguichari. Shinapish caipi yuyai, mana canllachu cangui. Jehová Diosta cˈuyaj achca amigocunatami charingui. Paicunapish canta cˈuyanmi. Ashtahuanpish ama cungaringui, Jehová Diosca achca podertami charin. Paica ayudangami. ¿Caita yachashpaca manachu cushicungui?...