Ima tiyashcata ricui

Ima tiyashcata ricui

 CAPÍTULO 13

¿Tucui fiestacunachu Diospajca alli ricurin?

¿Tucui fiestacunachu Diospajca alli ricurin?

‘Diospaj munai ima cashcata, ima mana paipaj munai cashcata, ima shina cashcatataj alli agllaichij’ (ROMANOS 12:2).

1. a) ¿Dios munashca shina adorangapajca imatataj rurana canchij? b) ¿Diabloca imatataj rurachun munan?

JESUSCA, ‘Taita Diosta adorajcunaca Diospaj espíritu yuyaita cushca shina, mana llullaj nishca shina adorana punlla chayamungami. Taita Diospish chashna adorajcunatami munan’ nircami (Juan 4:23; 6:44, QC, 1989). Yaya Dios imata munashcata, imata mana munashcatami alli intindina canchij (Romanos 12:2). Caita ruranaca huaquinpica mana jahuallachu can. Jehová mana munashca cosascunata rurachunmi Diabloca munan (Apocalipsis 12:9).

2. ¿Israelitacunaca Sinaí urcu chaquipica imatataj rurarcacuna?

2 Diabloca mana allitaca allita shina ricuchunmi munan. Israelitacuna ima tucushcata ricushun. Sinaí urcumanta Moisés tigramuchunmi israelitacunaca shuyacurcacuna. Moisesca mana tigramunchu nishpami paicunaca Aarontaca, ‘shuj diosta rurai’ nircacuna. Chaimi Aaronca orohuan shuj bizita rurarca. Israelitacunaca chai bizipaj ñaupajpi bailashpa, cungurishpami Diosta shina adorarcacuna. Paicunaca, ‘Mandaj Diospaj fiestatami ruracunchij’ yuyarcacunami.  Pero Jehová Diosca yanga diosta adorachunca manataj munarcachu. Chaimantami bizita adorajcunataca huañuchichun mandarca (Éxodo 32:1-6, 10, 28). Ñucanchijpish paicuna shina mana pandarinachu canchij. Bibliapica, “imapish mapapica ama tuparichijchu” ninmi. Caipi yachachishca shinaca panda religioncunahuan mana chagrurinachu canchij. Ashtahuancarin Jehová ima alli cashcata, ima mana alli cashcata yachachichunmi saquina canchij (Isaías 52:11; Ezequiel 44:23; Gálatas 5:9).

3, 4. ¿Maijan fiestacuna ima shina tiyai callarishcataca imamantataj yachana canchij?

3 Jesusca paipaj apostolcunamanca Dios mandashcacunatami yachachirca. Pai huañushca qˈuipaca apostolcunaca chaillatatajmi yachachishpa catircacuna. Pero apostolcuna huañushca qˈuipaca panda yachachijcunami mana alli yachaicunata, mana alli costumbrecunata yachachircacuna. Huaquin mana alli fiestacunataca shutita cambiashpami alli fiestata laya rurai callarircacuna (Hechos 20:29, 30; 2 Tesalonicenses 2:7, 10; 2 Juan 6, 7). Achcacunami cunan punllacunacama chai mana alli fiestacunata rurancuna. Paicunaca panda yachachishcacunata crishpa, Diablopaj munaita rurashpami causancuna * (Apocalipsis 18:2-4, 23).

4 Gentecunaca tucui laya fiestacunata rurashpami causancuna. Pero Diospaj Shimita ashtahuan intindishpami huaquin fiestacunapi mana participana  cashcata cuentata cungui. Chai fiestacunapi participanata saquina sinchi laya ricurijpipish Jehová Diospaj ayudahuanmi saqui tucungui. Cunanca maijan fiestacuna ima shina tiyai callarishcatami yachashun. Chashnami Jehová Diospaj ñaupajpi maijan fiestacunalla mana alli cashcata yachashun.

¿NAVIDADCA IMA SHINATAJ TIYAI CALLARIRCA?

5. ¿Imamantataj Jesusca 25 de diciembrepica mana huacharircachu ninchij?

5 Achca gentecunaca, ‘25 de diciembrepimi Jesusca huacharirca’ nishpami Navidad fiestata rurancuna. Bibliapica Jesús ima quilla, ima punlla huacharishcataca mana huillanchu. Pero Jesús huachari punllacuna Belén llajta ima shina cajtami Bibliapi, shujtaj librocunapi ricui tucunchij. Por ejemplo, Lucasca: ‘Jesusca Belenpimi huacharirca. Michijcunapish canlla ovejacunatami tuta chapashpa cuidacurcacuna’ ninmi (Lucas 2:8-11). Belén llajtaca diciembre quillapica achca chiri, tamya, razumi can. Diciembre quillapi Jesús huacharishca cajpica michijcunaca ovejacunataca mana canllapi cuidacunmanchu carca. Septiembre, octubre quillacunami Belén llajtaca cunujlla can. Chaimantami, Jesusca chai quillacunapimi tal vez huacharishca canga ninchij.

6, 7. a) ¿Navidadca ima shinataj tiyai callarirca? b) ¿Ima munaihuantaj regalota cuna canchij?

6 ¿Navidadca ima shinataj tiyai callarirca? Shuj libropica: “Romanocunaca Saturno nishca diospaj fiestataca diciembre chaupi quillapimi rurajcuna carca. Chai fiestacunapica micushpa, regalocunata cushpami pasajcuna carca. Cunanpish Navidad punllacunapica  gentecunaca regalocunata cushpa, micushpami cushicuncuna” ninmi (The Encyclopedia Americana). Shinallataj 25 de diciembrepica Persia llajtapi causajcunaca Mitra shuti diospaj cumpleañostami rurajcuna carca.

7 Achca gentecunaca Navidad fiesta ima shina tiyai callarishcataca mana ricuncunachu. Paicunaca familiacunahuan amigocunahuan micushpa, regalocunata cushpa pasangapajmi chai punllata shuyancuna.  Ñucanchijpish familiacunata, amigocunataca achcatami cˈuyanchij. Yaya Diospish ñucanchijpura imatapish convidajcuna cachunmi munan. Pero paica chai fiestacunallapi regalocunata cuchunca mana munanchu. Chaimantami Bibliapica: “Cushicushpa cujtamari, Diosca cˈuyan” nin (2 Corintios 9:7). Diosta sirvijcunaca ima horaspish ñucanchij familiacunahuan, amigocunahuan tandanacushpa, ima regalotapish cushpami cushicunchij. Ñucanchijca cˈuyashcamantami ima regalocunata cuna canchij (Lucas 14:12-14).

Huaquin fiestacuna ima shina callarishcata yachashpami chaicunapi mana participashun

8. ¿Ima horataj astrologocunaca Jesuspajman chayarca?

8 Gentecunaca, ‘Jesús recienlla huacharishpaca animalcunata huaquichina ucupimi siricurca. Chaiman rishpami quimsa yachaj runacunaca paiman regalocunata curca. Chaimantami Navidadpica regalocunataca cuna canchij’ nincunami. Bibliapica Jesuspajman huaquin cˈaricuna regalocunata apashcatami parlan. Ñaupa tiempoca rijsishca gentecunapajman rishpaca regalocunatami apajcuna carca (1 Reyes 10:1, 2, 10, 13). Pero chai runacunaca Diostaca mana adorajcunachu carca. Huaquin Bibliacunapica cai runacunataca “yachaj runacuna” ninmi. Pero ñaupa quillcachishcacunapica paicunataca “astrologocuna” ninmi. Paicunaca magiata rurajcuna, estrellacunata ricushpa causaihuan ima tucunata adivinajcunami carca. Ashtahuanpish Jesustaca mana animalcunata huaquichina ucupi cajpichu visitarcacuna. ‘Huasipi’ cajpimi visitarcacuna. Cai runacunaca Jesuspajman chayangapajca tauca quillacunatami viajashcangacuna. Paicuna chayajpica Jesusca ña mana llullu huahuachu carca (Mateo 2:1, 2, 11).

 ¿CUMPLEAÑOSMANTACA BIBLIACA IMATATAJ NIN?

9. ¿Bibliapica ima cumpleañoscunamantataj parlan?

9 Shuj huahua huacharijpica cushillami sintirinchij (Salmo 127:3). Chashnapish cumpleañostaca mana ruranachu canchij. Bibliapica Faraonpaj cumpleañosmanta, mandaj Herodespaj cumpleañosmantami parlan (Génesis 40:20-22; Marcos 6:21-29-ta leyipai). Cai mandajcunaca Diosta mana adorajcunachu carca. Bibliapica Diosta adorajcuna cumpleañosta rurashcataca shuj cutinllapish mana parlanchu.

10. ¿Jesusta punta catijcunaca cumpleañoscunamantaca imatataj yuyajcuna carca?

10 Shuj libropica: “Jesusta punta catijcunaca, ‘cumpleañosca yanga fiestami can’ nijcunami carca” ninmi (The World Book Encyclopedia). Panda costumbrecunata catishpami gentecunaca cumpleañoscunata rurancuna. Por ejemplo, ñaupa griego gentecunaca: “Ñucanchij huacharishca punllapica shuj espiritumi ñucanchij ladopi carca. Chai espiritumi ñucanchijtaca cuidan” nijcunami carca. Shinallataj griegocunaca paicunapaj dioscuna cuidachun nishpami cumpleañostaca rurajcuna carca. Cunan punllacunapish huaquincunaca: “Ñucanchij huachari horas estrellacuna maipi cashcata ricushpami shamuj punllacunapi ima laya causanata yachanchij” nincunami. Chaimantami chai gentecunaca cumpleañoscunata rurancuna.

11. ¿Diosca imatataj rurachun munan?

11 Huaquincunaca, “cumpleaños punllapica ñucanchijmanmi achca cˈuyaita ricuchina can” nincunami. Pero mana chai punllallachu cˈuyaita ricuchina canchij. Diosca punllanta cˈuyaita ricuchichunmi munan. Shinallataj imatapish compartijcuna cachunmi  munan (Hechos 20:35-ta leyipai). Huaquin gentecunaca cumpleaños punllallami Diostaca causaimanta pagui nincuna. Pero Diostaca tucui punllacunami causaimanta pagui nina canchij (Salmo 8:3, 4; 36:9).

Cˈuyashcamantami imatapish convidana canchij

12. ¿Imamantataj huañui punllaca huachari punllataca yalli alli can?

12 Eclesiastés 7:1-pica: “Tucuicuna rijsishca alli runa canaca, sumaj mishquijllata ashnaj jambihuan llihuirishcata yalli allimi. Huañui punllaca huachari punllata  yalli allimi” ninmi. ¿Caica imatataj nisha nin? Recién huachari horasca ima allita ima mana allitaca mana rurashcanchijchu. Pero tucui vida Jehová Diosta alli sirvishpa, shujtajcunata ayudashpaca “tucuicuna rijsishca alli runami” cashun. Ashtahuantajca Yaya Diospaj ñaupajpimi alli ricurishun. Huañujpipish ñucanchijtaca manataj cungaringachu (Job 14:14, 15). Diosta sirvijcunaca ñucanchij cumpleañosta, Jesuspaj cumpleañostaca mana ruranchijchu. Jesusca pai huañushca punllallata yuyarichunmi mandarca (Lucas 22:17-20; Hebreos 1:3, 4).

CARNAVAL

13, 14. ¿Carnaval fiestaca ima shinataj tiyai callarirca?

13 Carnaval fiestamanta parlashpaca noticiacunapica: “Achca gentecunami maipishcachun purin. Chuscu punllacunatami ubyashpa, tucui tuta bailashpa pacarincuna. Machashcamantaca huaquin punllacunatami uma nanaihuan purincuna” ninmi. Cutin, shuj libropica: “Carnaval fiestataca ñaupa Roma llajtamanta gentecunami Saturno diosta yuyarishpa rurajcuna cashca yuyachin” ninmi (The New Encyclopædia Britannica). Shinallataj romanocunaca Baco o Dionisio nishca diosmanmi fiestata rurajcuna carca. Grecia llajtamanta gentecunapish, ‘Baco diosmi vinota rurangapaj uvacunata granuchin’ nishpami shuj manchanai fiestata rurajcuna carca. Cunan tiempo carnaval fiestaca chai ñaupa fiestacuna layallatajmi can.

14 Cai laya fiestacunapi participashpaca Jehová Diospaj ñaupajpica mana alli ricurishunchu (2 Corintios 6:17, 18).

 HUAÑUSHCACUNATA YUYARINA PUNLLA

15. ¿Imamantataj huañushcacunata yuyarina costumbrecunapica mana participana canchij?

15 Gentecunaca huañushcacunata yuyaringapajmi chˈican chˈican fiestacunata rurancuna. Por ejemplo, 2 de noviembretaca Finados nishca punllatami yuyarincuna. Chai punllapica “almacunami ñucanchijta visitanaman shamun” nishpami cementerioman micunata apancuna o huasipi yanushpa micunata mezapi churancuna. Finados costumbrecunaca mana Diosmantachu shamun. Panda religionmantami shamun. Yuyarishun, huañushcacunaca mana imata yachancunachu (Eclesiastés 9:5 ,10). Chaimantami Diospaj ñaupajpi alli ricuringapajca panda costumbrecunapica mana participana canchij.

CAZAMIENTO FIESTACA DIOS MUNASHCA SHINA CACHUN

16, 17. ¿Boda fiestata ruragrishpaca imapitaj yuyana canchij?

16 Cazarai punllaca alhajami can. Gentecunaca noviocunata cazarachingapajca chˈican chˈican costumbrecunatami charincuna. Pero huaquin costumbrecuna panda religionmanta shamushcataca manachari yuyancuna. Chaimantami Diosta sirvijcunaca boda fiestata ruragricushpaca Dios mandashca shina tucuita alli rurana canchij. Boda costumbrecuna ima laya callarishcata yachashpaca noviocunaca alli decisioncunatami japingacuna (Marcos 10:6-9).

17 Cunanlla cazarashcacuna “suerteta” charichun nishpami gentecunaca huaquin costumbrecunata charincuna (Isaías 65:11). Por ejemplo, huaquin llajtacunapica noviocuna cushilla causachun, huahuacunata  charichun, ima llaquipish ama japichun nishpami arroz granota shitancuna. Diosta sirvijcunaca cai costumbrecunataca mana catinachu canchij. Chashna costumbrecunaca panda religioncunamantami shamun (2 Corintios 6:14-18-ta leyipai).

18. ¿Boda fiestata ruragricushpaca maijan versocunapitaj yuyana canchij?

18 Cazamiento punllapica noviocunapish invitadocunapish cushilla pasanatami munancuna. Chaimantami invitadocunaca shuj palabrata nisha nicushpaca mana maipish cachun rimana can o mapa parlocunatapish mana ninachu can (Proverbios 26:18, 19; Lucas 6:31; 10:27). Shinallataj cullquiyuj cashcata ricuchingaraiculla mana jatun fiestata ruranachu can (1 Juan 2:16). Noviocunaca cazarashca punllata cushilla yuyaringapajmi boda fiestataca alli yuyarishpa rurana can. Nota 28-ta ricui.

¿BRINDISTA RURANACA ALLICHU CAN?

19, 20. ¿Brindista ruranaca ima shinataj tiyai callarirca?

19 Fiestacunapica maijancunaca brindistami rurancuna. Brindista rurangapajca, shujmi ñaupajman shayarishpa huaquin palabracunata nin. Cutin caishujcunaca copata alzashpami “salud” nishpa cutichincuna. ¿Ñucanchijpish chaita ruranachu canchij?

20 Shuj libropica: “Ñaupa tiempo gentecunaca yanga dioscunamanca yacuta shinami cujcuna carca. Paicunaca chai dioscuna bendiciachun munashpami, copata alzashpa ‘salud’ nijcuna carca” ninmi (International Handbook on Alcohol and Culture). Ñucanchijpish chashna brindiscunata rurajpica Diosca mana bendiciangachu (Juan 14:6; 16:23).

 “DIOSTA CˈUYAJCUNACA, MILLAITA RURANATACA PˈIÑAICHIGARI”

21. ¿Ima laya fiestacunapitaj mana participana canchij?

21 Manaraj shuj fiestapi participashpami alli yuyanaraj canchij. Por ejemplo, huaquin fiestacunapica maipish cachunmi bailancuna, achca tragotami ubyancuna, huainayancunapishmi. Ashtahuancarin chai fiestacunapica cˈaripura huarmipura huainayanaca alli cashcata layami ricuchincuna o maijancunaca “ñuca llajtami ashtahuan alli” nishpami jatun tucuncuna. Jehová Dios pˈiñashca fiestacunataca ñucanchijpish pˈiñanami canchij (Salmo 1:1, 2; 97:10; 119:37).

22. ¿Manaraj shuj fiestapi participashpaca imatataj yuyarina canchij?

22 Jehová mana munashca fiestacunapica mana participanachu canchij. Apóstol Pabloca: “Micushpapish, ubyashpapish, tucui imata rurashpapish, Diosta jatunyachingapaj ruraichij” nircami (1 Corintios 10:31, Nota 29-ta ricui). Pero mana tucui fiestacunachu huainayanahuan, panda religioncunahuan chagrurishca can. Shuj fiesta alli o mana alli cashcata Bibliapi yachashca qˈuipami cada uno chai fiestapi participanata o mana participanata decidina canchij. Chashnami shujtajcunata mana ñitcachishun.

DIOS MUNASHCA SHINA TUCUITA RURASHUNCHIJ

23, 24. ¿Ima shinataj mana crij familiamanca yanga fiestacunata saquishcata intindichi tucungui?

23 Jehová mana munashca fiestacunapi ña manachari participangui. Chaimantachari mana crij familiacunaca:  “Cai punllacunallapimi tucui familia tandalla pasanchij, ¿imamantataj ñucanchijhuan ña mana pasasha ningui? ¿Ñucanchijtaca ña manachu cˈuyangui imami?” ningacuna. Paicuna chashna nijpica, ¿imatataj rurana cangui? Por ejemplo, tandalla pasangapajmi shujtaj punlla invitai tucungui (Proverbios 11:25; Eclesiastés 3:12, 13). Chashnami paicunata cˈuyashcata ricuchingui.

24 Publicacioncunapi, jw.org paginapimi fiestacuna ima shina tiyai callarishcata yachai tucungui. Chashnami cambaj familiacuna imata tapujpica alli shimicunahuan, mana pˈiñarishpa cutichingui. Bibliapica: “Cancunapaj shimicunaca paicunapajca, cachihuan churashca mishquichishca shina sumaj cachun” ninmi (Colosenses 4:6, QC, 1989). Pero paicuna crishcata cambiachunca mana obliganachu cangui.

25, 26. ¿Huahuacuna Diosta cˈuyachunca Yaya mamacunaca imatataj rurana can?

25 Huaquin fiestacunapi mana participana cashcataca allimi intindina canchij (Hebreos 5:14). Chashnami Jehová Diosta cushichishun. Yaya mamacunaca huahuacunaman Diospaj Shimita alli intindichingapajmi tiempota llujchina can. Huahuacunaca Jehová Diosta alli rijsishpami tucui causaipi paita sirvisha ningacuna (Isaías 48:17, 18; 1 Pedro 3:15, 16).

26 Limpio causaita charijpi, honrado cajpimi Diosca cushilla sintiringa (Juan 4:23). Pero achca gentecunami, “cunan punllacunapica mana honrado cai tucunchijchu” nincuna. ¿Chaica ciertochu can? Caitaca shamuj capitulopimi yachashun.

^ par. 3 Índice de las Publicaciones Watch Tower nishcapi, Guía de Estudio para los Testigos de Jehová nishcapi, jw.org paginapimi chai fiestacunamanta ashtahuan yachai tucungui.