Ima tiyashcata ricui

Ima tiyashcata ricui

 CAPÍTULO 15

Trabajashpa cushicushunchij

Trabajashpa cushicushunchij

‘Imalla rurashcata ricushpa cushicuichij’ (ECLESIASTÉS 3:13).

1-3. a) ¿Huaquincunaca paicunapaj trabajomantaca imatataj yuyancuna? b) ¿Cai temapica ima tapuicunatataj yachashun?

GENTECUNACA ima minishtishcata randingapaj, familiata mantiningapajmi sinchita trabajancuna. Shinapish maijancunaca imapi trabajacushcata mana munashcamantami obligado laya trabajancuna. Shujtajcunaca trabajoman rinatapish manchancunami. ¿Canpish chashna sintirishcanguichu? ¿Trabajopi cushilla sintiringapajca imatataj rurai tucungui?

2 Eclesiastés 3:13-pica, ‘Dios cushcallamantami ñucanchij imata rurashcamantaca micunchij, ubyanchij, ñucanchij imallata rurashcata ricushpapish cushicunchij’ ninmi. Diosca gentecunataca trabajana munaita charichunmi rurarca. Chaimantami trabajashpa cushilla sintirichun munan (Eclesiastés 2:24; 5:18-ta leyipai).

3 Cai temapica cai tapuicunamantami yachashun: ¿Trabajashpa cushilla sintiringapajca imatataj rurana canchij? ¿Diosta sirvijcunaca ima trabajocunatataj mana chasquina canchij? ¿Trabajana cashpapish Diostaraj sirvinata ama saquingapajca imatataj rurana canchij? ¿Ima trabajotaj ashtahuan importante can?

 JEHOVAPISH JESUSPISH ALLI TRABAJAJCUNAMI CAN

4, 5. ¿Trabajomantaca Diosca imatataj yuyan?

4 Jehová Diosca trabajanataca achcatami munan. Bibliapica: “Imapish manaraj tiyajpimi Taita Diosca jahua pachatapish, cai pachatapish rurarca” ninmi (Génesis 1:1, QC, 1989). Pai rurashcacuna ‘alli cashcata’ ricushpami Yaya Diosca achcata cushicurca (Génesis 1:31; Salmo 104:31).

5 Jesusca: “Ñuca Yayaca, trabajanataca mana saquinchu. Ñucapish trabajanataca mana saquinichu” nircami (Juan 5:17). Jehová Diosca achca cosascunatami ruracushca. Por ejemplo, Jesushuan jahua cielomanta mandachunmi huaquin gentecunata agllacushca (2 Corintios 5:17). Shinallataj Jehová Diosca gentecunata ayudangapajmi paimanta yachachichun ñucanchijman mingashca. Chaimantami achca gentecunaca paimanta yachashpa huiñai causaita chari tucuncuna (Juan 6:44; Romanos 6:23).

6, 7. ¿Jesusca ima laya trabajadortaj carca?

6 Jesusca paipaj Yaya shinallatajmi trabajanata munan. Cai Allpaman manaraj shamushpaca Jehová Diostami tucui imalla tiyashcacunata rurashpa ayudarca (Proverbios 8:22-31; Colosenses 1:15-17). Cai Allpaman shamushpapish trabajashpami catirca. Joven cashpaca carpinteriatami yacharca. Paica huasicunata, mezacunatami rurashca canga. Tucuicunami Jesús alli carpintero cashcata yacharcacuna (Marcos 6:3).

7 Jesusca mana carpinteriapi trabajashpalla causarcachu. Ashtahuanpish pacarimanta tutacamami  Diosmanta yachachishpa purirca. Quimsa huata mediotami Jesusca cai Allpapi Diosmanta huillarca (Lucas 21:37, 38; Juan 3:2). Achca gentecunaman yachachingapajmi polvo ñancunata caruta purij carca (Lucas 8:1).

8, 9. ¿Jesús trabajashpaca imamantataj cushilla sintirirca?

8 Diospaj munaita ruranami Jesuspajca micuna shina carca. Diosmanta huillashpaca Jesusca fuerzahuan, allimi sintirij carca. Maijan punllacunacarin huillacushcamantami micungapajpish mana tiempota charirca (Juan 4:31-38). Paica maipi cashpapish, ima horas cajpipish Diosmanta yachachingapajmi esforzarij carca. Chaimantami Jehová Diostaca: “Ñucaca cai pachapica tucui quiquin ima nishcata rurashpami quiquintaca jatunyachini” nishpa mañarca (Juan 17:4).

9 Jehová Diospish Jesuspish sinchita trabajashpami cushilla sintirincuna. Ñucanchijpish paicuna shinallatajmi cashun ninchij (Efesios 5:1; 1 Pedro 2:21, QC, 1989). Chaimanta sinchita trabajajcuna cashunchij.

¿TRABAJOMANTACA IMATATAJ YUYANCHIJ?

10, 11. ¿Trabajopi cushilla sintiringapajca imatataj rurana canchij?

10 Diosta sirvijcunaca ima minishtishcacunata randingapaj, familiata mantiningapajmi sinchita trabajanchij. Imapi trabajashpapish cushillami sintirishun ninchij. Pero huaquinpica sinchimi. ¿Trabajopi alli sintiringapajca imatataj rurai tucunchij?

Ima trabajota charishpapish cushilla trabajashunchij

 11 Trabajashcamanta cushilla sintirishunchij. Shujtaj trabajotachari charisha ninchij o ashalla horascunatachari trabajasha ninchij. Chashnapish Jehová Dios imamanta trabajachun munashcatami alli intindina canchij. Por ejemplo, familiata pushaj cashpaca sinchitami trabajana cangui. Chashna rurajpica Jehová Diosca cushicungami. Paica imalla minishtirishcata cushpa familiata mantinichunmi munan. Chaita mana pajtachijcunataca Bibliapica, “mana crijtapish yallimi tucushca” ninmi (1 Timoteo 5:8).

12. ¿Imamantataj honrados, alli trabajajcuna cana canchij?

12 Honrado, alli trabajaj cashpaca cushillami sintiringui (Proverbios 12:24; 22:29). Cullquitapish, materialcunatapish mana shuhuajpi, tiempotapish mana perdijpica jefeca canpimi confianga (Efesios 4:28). Shinallataj Jehová Diosca tucuipi honrado cajta ricushpaca cushillami sintiringa. Diosta cushichishcamantaca allimi sintiringui (Hebreos 13:18, NM; Colosenses 3:22-24).

13. ¿Honrados cashpaca ima beneficiocunatataj charishun?

13 Ñucanchij rurashcacunahuanmi Diosta alabai tucunchij. Alli comportarijta ricushpaca trabajopi compañerocunaca Bibliamanta yachasha ningachari (Proverbios 27:11; 1 Pedro 2:12-ta leyipai). Allita rurashcamantaca cushillami sintirishun (Tito 2:9, 10).

¿IMA TRABAJOTATAJ AGLLANA CANCHIJ?

14-16. ¿Shuj trabajota agllacushpaca imatataj yuyarina canchij?

14 Bibliapica imallapi trabajanataca mana tucuita huillanchu. Pero shuj trabajota mashcacushpaca  Bibliapi yachachishcacunatami yuyarina canchij. Chashnami alli decidishun (Proverbios 2:6). Chaimanta cashna tapurishunchij.

Diospaj ñaupajpi alli ricurishca trabajollata agllashunchij

15 ¿Chai trabajopica Dios mana munashcatachu rurachun mañanga? Diosca shuhuachun, llullachunca mana munanchu (Éxodo 20:4; Hechos 15:29; Efesios 4:28; Apocalipsis 21:8). Maijan trabajocunapica Dios mana munashca cosascunata rurachunmi  mañancuna. Chai trabajocunata ama agllangapajmi cuidadota charina canchij (1 Juan 5:3-ta leyipai).

16 Por ejemplo, construccionpi trabajanaca allimi. Pero “shuj iglesiata shayachishpa trabajai” nijpica ¿imatataj ruranguiman? Tal vez, “ñucaca iglesiallatami shayachicuni. Mana panda religionpi participacunichu” ninguichari. Pero yuyari, chai iglesiata shayachishpaca ¿manachu llullacunata yachachichun ayudacushca shina canman? (Apocalipsis 18:4).

17. ¿Alli decidingapajca imatataj rurana canchij?

17 Hebreos 5:14-pica: ‘Ima alli cashcata, ima mana alli cashcatapish agllana yuyaita charijcuna caichij’ ninmi. Bibliapi yachachishcata catishpaca allitami decidishun. Chaimanta shuj trabajota agllacushpaca: “¿Cai trabajota chasquishpaca shujtajcunata ñitcachishachu? ¿Ñuca huarmita, cusata, huahuacunata saquishpa caru llajtapi trabajanaman rinachu minishtiringa? ¿Chashna rurajpica paicunaca ima llaquicunatataj charinga?” nishpami tapurina cangui.

‘IMAPISH ALLI CAJLLATA AGLLASHUNCHIJ’

18. ¿Imamantataj Diostaraj sirvishpa causanaca sinchi ricurin?

18 ‘Tucuri punllacunapimi causacunchij’. Chaimantami Diostaraj sirvishpa causanaca sinchi ricurin (2 Timoteo 3:1). Familiata mantiningapajmi trabajana canchij. Trabajota japingapaj o trabajomanta ama llujchishpa cachachunca achcatami esforzarinchij. Pero familiata mantinina cashpapish cullqui solopi mana yuyanachu canchij. Diosta sirvinami ashtahuan importante can (1 Timoteo 6:9, 10). Shinaca,  ‘imapish alli cajllata agllangapaj’, Diosta tucui shunguhuan sirvingapajca ¿imatataj rurana canchij? (Filipenses 1:10).

19. ¿Imamantataj Diospi shunguta churana canchij?

19 Diospi shunguta churashunchij (Proverbios 3:5, 6-ta leyipai). Jehová Diosca ñucanchij imalla minishtishcataca allimi yachan. Paica ñucanchijmanta preocuparinmi (Salmo 37:25; 1 Pedro 5:7). Diosca: “Cancunaca quiquinpajlla ashtahuan charij canataca ama munaichijchu. Cunan imata charishcacunallahuan cushi caichij. Chashnacunatami Diosca: ‘Cantaca manataj shitashachu, manataj cungarishachu’” nin (Hebreos 13:5). Diosca cutin cutinmi paipaj pueblota alli cuidaj cashcata ricuchishca. Chaimantami familiata mantiningapajca mana yallitaj preocuparina canchij (Mateo 6:25-32). Ima shina cajpipish Diospaj Shimita estudiangapaj, gentecunaman huillangapaj, tandanacuicunamanpish ringapajmi tiempota surcuna canchij (Mateo 24:14; Hebreos 10:24, 25).

20. ¿Diostaraj sirvishpa causangapajca imatataj rurana canchij?

20 Diospajta rurana yuyailla causashunchij (Mateo 6:22, 23-ta leyipai). Cai versocunapi ‘cambaj ñahuicuna alli cachun’ nishpaca Diospajta rurashpa minishtirishcacunallahuan causanatami nin. Diosta ladoman saquishpa cullquiyuj, mushuj cosascunata charinallapi dedicarinaca mana allichu. ¿Diostaraj sirvishpa causangapajca imatataj rurana canchij? Mana dibiyangapajmi esforzarina canchij. Shinallataj dibicunata charishpaca pagangapajmi esforzarina canchij. Charinallapi yuyashpaca Diosta mañangapaj, Bibliata  estudiangapaj, huillangapajpish mana tiempota charishunchu. Chaimanta, ‘micunata, churanatapish charishpaca, chaillahuan cushilla cashunchij’ (1 Timoteo 6:8). Tucuicunami “¿Diosta ashtahuan sirvingapajca imatataj rurai tucuni?” nishpa tapurina canchij.

21. ¿Mana cuidadota charishpaca imallapitaj dedicarishun?

21 Ashtahuan importante cashcataraj agllashunchij. Ñucanchij charishca cosascunatapish, fuerzatapish, tiempotapish alli yuyashpami utilizana canchij. Mana cuidadota charishpaca cullquita  charinallapi, estudianallapimi dedicarishun. Jesusca: “Taita Dios mandashcaraj tucuichij” nircami (Mateo 6:33). Ñucanchij decisioncunapish, ima rurashcapish ñucanchijpaj ima ashtahuan importante cashcatami ricuchin.

¿IMA TRABAJOTAJ ASHTAHUAN IMPORTANTE CAN?

22, 23. a) ¿Ñucanchijcunapajca ima trabajotaj ashtahuan importante can? b) ¿Trabajashpa cushilla sintiringapajca imatataj yuyarina canchij?

22 Ñucanchijcunapajca Diosta sirvinami ashtahuan importante can. Chaimantami Diosmanta huillanataca mana saquina canchij (Mateo 24:14; 28:19, 20). Jesús shina huillangapajmi esforzarina canchij. Por ejemplo, maijancunaca huillashpa ayudangapajmi shujtaj ladoman rishcacuna o shujtaj shimita yachashcacuna. Chashna sirvicuj huauqui panicunahuanmi parlai tucunchij. Paicunaca Diosta ashtahuan sirvishpa cushilla causashcata parlashpami animangacuna (Proverbios 10:22-ta leyipai).

Diospajtaraj rurashpa causanami ashtahuan importante can

23 Causaica sinchimi can. Minishtishcallata charingapajmi chˈican chˈican trabajocunapi, achca horascunata huaquinpica trabajana tucun. Diosca familiata mantiningapaj esforzaricushcata ricushpaca cushillami sintirin. Jehová shina, Jesús shina alli trabajajcuna cashunchij. Ashtahuanpish Diosta sirvingapaj, paimanta gentecunaman huillangapaj ashtahuan esforzarishunchij. Chashna rurashpallami cushilla causashun.